Fagsigadan 25

Abrayam ay Kitura at ngay Baguwama

(1 Kru. 1:32,33)

1Roro mangaro, Abrayam e mangena yay fiya sadi. At ngayan, Kitura. 2Ay kanya daduwa Abrayam ay Kitura, inke ngay baguwama unum, at ngayan Simran, Uksan, Midan, Midyan, Isbak, ay Suak. Kanya wan Abrayam ay Kitura at ngay baguwama.

3Ay at baguwama Uksan, inke baguwama duwa, Sheba ay Dedan. Ay siginans Dedan nu kafasigad tuy fag tuluk fulan taw: taw Asur, ay taw Letus, ay taw Liyum.

4Ay Abrayam ay Kitura, at baguwama at sadi, Midyan. Ay Midyan at baguwama at ngayan, Efa, Efer, Kanuk, Abida, ay Eldaa. Kanya wan Midyan at ngay baguwama.

Ay kanya fagayu at marirukan fag ngay ngayan, Kitura yay at ngay baguwama ay at ngay fufu sat dagat daga.

Abrayam nu Gfe Kasinean at ngay Sisiyan nu Gbanwan

5Ay Abrayam kaduge gleleg, gfoyung tuwa sa tiba te, “Dewa gina, nu nkate kwan, tagbilug ban fagayu ku fagmabalanun, ku baguwama Isaak.” 6Teway roro mangaro, Abrayam e ngay mangena yay, ay e ngay baguwama yay sanya ginan fag ngay mangena. Ay Abrayam nafon sik ngay famanyun sanya fag ngay baguwama. Ay nafaalin wan nu gbanwan. Sa wa tibak talun sas fakamenitan baliwa. Fakatanyaun, at tama gamatangan te, laman sisiyan nu gbanwan, di maful at baguwama Isaak.

Abrayam nu Kate

7Abrayam at banwa nu anwa 175, 8kanya inkate wan. Nalugo tuwa kanya nu gbanwan.

9-10Abrayam nu nkate wan, at nasandig at tama, at duwa baguwama Ismael ay Isaak. Nasandig at tama sa sik luwib, sas Makpela fag lungud talun. Kanya fag Makpela, makbang fulan Mamri. Ay Abrayam gina gleleg, nabili kanya fag luwib siginans taw Kit, siginans sik taw at ngayan Efrun. Efrun at tama, Sukar. Ay sanya wa fag luwib Abrayam nu gsandig at mangena Sara, ebi gina inkate. Ay sanya yangay fag luwib at duwa baguwama nu gsandig at tama.

11Ay Abrayam dewa nkate, Diyus di gfabayan Isaak. Igtarabang tuwa. Ay Isaak nu gbanwan, makbang Ber-Lakay-Ruy.

Ismael fag Kalongan

(1 Kru. 1:28-31)

12Abrayam baguwama at sadi at ngayan, Ismael. Ismael at tina, at ngayan Agar. Kanya wan Sara at fanuguwan, ebi. Ay katatuy at foyungan sas baliwas Ismael at ngay unga, ay anggan at ngay fufu sat dagat daga:

13-15Ismael at baguwama, labi duwa. At ngayan, Nibayut, Kidar, Adbel, Mibsam, Misma, Duma, Masa, Kadad, Tema, Itur, Nafis, ay Kidima. Katanya Ismael ngay baguwama nu gdaddagan.

16Bandi nu glugo wan, kanya fag labi duwak baguwama, kanya wa mandi tagmagurang si at ngay unga ay sit ngay fufu, anggan wa inlabi duwak talafuwanan bandi. Fafud sisiyan. Ay ka fag ngay talafuwanan, bandi at ngay fulan kaayu wan. Anggan at ngay fagnantiyugan kaduge gadgalinan sangaba day fulan, kaayu yangay. Ay at ngay taw nu gngayan sanya fag ngay fulan ay fag ngay fagnantiyugan, igfaning yay Ismael ngay baguwama at ngay ngayan.

17Ismael at banwa nu anwa 137, kanya nkate wan. 18Ay Ismael fag kalongan nu gbanwan, wa maful tibak taw. Kanya nu gbanwan, makbang talun Iptu, sas fakamenitan baliwa fag tigyangan. Sik taw galay iglo siginans talun Iptu ay nangadasug sas Asur, gdalan yay sanya, sas Ismael fag kalongan at fagbanwanan. Ay at kadaulan at fagbanwanan, gfasigad siginans Kabila anggan gfadasug sas Sur.

Diyus nu Gfon Isaak Daduwa at Unga

19Katatuy at foyungan sa baliwas Isaak, anggan sat ngay unga: Kanya Abrayam baguwama. 20Ay Isaak nu anwa 40 at banwa, inke mangena at ngayan Ribika. Kanya Ribika, at tama ngayan, Betwel. Ay at fadugsay at ngayan, Laban. Ribika tama fag fulan, sik ngay taw Aram. Nu gbanwan, sas talun Padan-Aram.

21Roro Ribika dewa ndaduwa, wa gfafiyon. Ay nu katanya, at mangama nadarangin sas Diyus. Ay Diyus nabalus tuwa at fagetun. Ay Ribika long gfafiyon wan.

22Ay Ribika nu gfafiyon wan, roro at fagfafiyonun duwa. Ay at fagfafiyonun gtudtuludan dawdaw sat basad ungdan. Gbarangyan. Ay nu katanya, Ribika glong te, “Sek, taw fakatanyaun ku fagfafiyonun?” Nu katanya, Ribika nanginto yay sas Diyus. 23Ay Diyus nabalus te, “Kanya am fagfafiyonun, duwak ngenge tuwa. Ay kanya ban fagduwa gbadbaboan. Ay at ariyan, gbabo ban at kaka. Ay katanya yangay, anggan ban sat fufu sat dagat daga. At ngay fufu ban sat dagat daga, duwak fulan taw tuwa. Ay at ariyan ban at ngay fufu tagbabo at kaka at ngay fufu.”

24Ay Ribika gfasalug wa at ngenge. Ay manlag di, duwa wa ngaro fiya at ngenge. 25Ay at magurang manlag di, at turungana at ngaba bilug, gsigyuwan maraska. Kata nangus nasulun sik falefe tagsigyuwan. Ay at magurang nafangayan at turungana te, Isaw.#25:25 Sis Fangebriyu, galay glong te, Isaw, labon at masuwad, igsigyuwan. 26Ay at ariyan nu kasalug, kanya gted at kaka sungkulan. Ay at magurang nafangayan te, Akub.#25:26 Sis Fangebriyu, galay glong te, Akub, at masuwad, igted tiba sungkulan. Ay roro kanya sik dawisan way. At fagalongun fiya fiya, nu nalong te igted tiba sungkulan, kanya fag taw sik tagfanluk tiba. Ginanya, Isaak banwa anwa 60.

Isaw nu Gfon at Fakaturunganaun sat Ariyan

27Dugsay nu ndaul wan, at kaka sik maseganama taggamat mangimut. At fakaumsigun, gayayag sa sangaba talun, gsarap mangimut. Ay at ariyan kamato way sis bale. Kanya sik taw way yud gbarisan. 28Ay at tama nesugan, at kaka, teway katebo at ngay ba mangimut. Ay si at tina at nesugan at ariyan.

29Ay sayginan, Akub igsewud. At sineud, balatung maraska. Ay ginanya mangaro, at kaka kadasug siginan at fagnangayayagan. Kalunus dawdaw. 30Ay glong sat ariyan te, “Ku fangalunus wan, ku ariyan. Foni angku nin daw am sineud at maraska. Nangon aw.”

Ay Isaw naet wayay at ariyan sineud at maraska, bandi ataw, tiba ginan at ngay taw nu gngayan anya, anway Idum. At masuwad Idum, sat fanlong, maraska.

31Ay Akub nu nadungug at kaka at fagetun, glong te, “E kin, nu gdi, longi yap ngani te, siginan o umon ku sineud, aw wan bilang at turungana.”#25:31 Ebi, sanya fag fulan taw, mafanud tuwa fakaturunganaun. Teway nus nga sinu at turungana tagsik ama, sanya wa ban at tama fagfamatoan at ngayu at fagmabalanun. Ay kanya yangay at mafafamagurang at ngay ariyan.

32Ay Isaw nu nadungug at ariyan longan, glong te, “Snga setaw wo. Wa ngap e fanambagun sa angku, ku fakaturunganaun. Kate kwa ngap ay.”

33Ay at ariyan nalong sat kaka te, “Fatvngvdi wa ngani am longan, te aw wa ban fiya at turungana.” Ay at kaka nafatvngvd wa fiya.

34Nu katanya wan, at ariyan nafon wa long at fakonun. Nafon sik ngay tinafay ay tiba at gulayan. Ay at kaka long naon wan. Ay nainum wan. Ay nu napsug wan, kanya nalo wa gugat. Wa namatangan te, mafanambagun tuwa dawdaw fakaturunganaun.

Currently Selected:

Fagsigadan 25: TAWEAST

Highlight

Copy