Fagsigadan 24

Diyus nu Gtarabang Abrayam Fanuguwan nu Gsarap Isaak Mangena

1Ginanya, Abrayam mafufuwama wa dawdaw. Ngayu ginan wan Yawi nu gtarabang anya. Ay Yawi nafamanyun wa anya sik ngay fagmabalanun ayuwayu.

2-4Ay Abrayam mangaro e sik fanuguwan at magit anya. Kanya tagmagurang tibak fanuguwan. Ay kanya yangay tagtanud Abrayam at fagmabalanun. Ay sayginan, Abrayam glong sanya fag fanuguwan te, “Katsi nansarap wo ku baguwama mangena. Nu gsarap o, lag gsarap ste ginan fag ngay taw Kanaan. Sai tuwa ku fakadaulan fag talun, sa ku ngay kalongan at fagbanwanan. Sanyai tuwa nu gsarap o. Ay katsi fatuyanani sa tam Yawi, sa tam Diyus tagmagurang tam banwa ay tam daga, te fagurungan wa ban o fiya katanya. Ay katanya am fatuyanan, fatvngvdi tuwa.”#24:2-4 Sis Fangebriyu, ste fag tapan nu tumap tam, Abrayam wa fiya fiya nalong te, “Katanya am fatuyanan, fatvngvdi tuwa.” Nalong way te, “Fatsai ku buknga balangbang am daluwap.” Ebi, kanya fag fulan taw, galay gfagbulun katanya, kanya sik faglagan te fagurungan wa ban fiya kata at nafatuyanan.

5Ay at fanuguwan gbalus te, “Ay tain ban nu lumo kwa ban sanya sam fakadaulan fag talun ay roro ku nalag fag baguyna kauri way galo angku? Tain ro ku fagbulun? Go nanbul kyay am baguwama stiye ay tumaban kwa sanya ay laman sanya wa ban am baguwama nu gbanwan?”

6Ay Abrayam igbalus te, “Lagi. Lag long gtaban sanya ku baguwama. 7Ebi ngani, tam Yawi nafalo wa angku sanya ginan, siginan ku fakadaulan. Nafaalin wa angku stiye fag talun. Ay kanya inke fatuyanan matvngvd sa angku te, ‘Tuy fag talun fagdaul, gfon kwa ban sa am ngay fufu sat dagat daga.’ Nu katanya, gafanud aw te, gina ban o lumo sanya fag talun, Yawi sumugu yay sik falad at masine. Ay kanya Yawi fanuguwan fag falad tumarabang emu, laman ban am nafalag fag baguyna gaaloun tuwa emu. 8Ay roro kanya fag baguyna nu kauri way galo emu, deyud wan. At mafanud sa angku anway te, lag taban sanya baliwa ku baguwama.” Katanya Abrayam at longan sat fanuguwan at magit anya.

9Ay kanya fag fanuguwan nafatuyanan wa fiya sat fun. Ay nafe famatvngvd yay at longan te, nanfagurungan wa ban fiya kata at nafatuyanan.

10Ay kanya fag fanuguwan bagu lumo, at fun nafon yay sik ngay famaumsiganan ayuwayu. Kanya ban at fanuguwan fanfon sat fakadasugan fag ngay taw. Ay ka fag fanuguwan nafasakay wa ka fag ngay famaumsiganan sat fun kamelyu at safulu. Ay nalo wan, igtaban kanya fag ngay kamelyu anggan at ngay ufud. Ay kanya fag fanuguwan nu glugo wa nu glo, indasug sa sik talun at ngayan Aram-Naaraim, sas Abrayam fadugsay at fagbanwanan fag fulan.

11Kanya fag fanuguwan nut si was day fulan, indasug sa sik ke fagfanaguban. Ay sanyas ke fagfanaguban, nafatuwas yay at ngay kamelyu nu galafang. Ginanya, kayabi wa bangan. Ay at ngay baguyna sanya ginan fag fulan, nanfanagub wa ro.

12Ay roro mangaro sanya, kanya fag fanuguwan gdarangin sat amatanganan. Gdarangin te, “Yawi, o wan ku fun at fagsegan fag Diyus. Ay katsi, nu gurungan tuwo kesug ku fun kata ebi ginan, tarabangi angku ku naloan stiye, laman umke fanambagun tuwa. 13Katsi malindug aw stes ke fagfanaguban. Ay iste fag fulan at ngay baguyna nanfanagub wa ro. 14Ay katsi, get aw emu te, fasafuli angku te, go sinu fag baguyna am nafamasadan ku fun baguwama at mangena ban. Rodi ro, umkakbang aw sanya fag ngay baguyna at sadi, ay nanget aw at ba mamam. Ay kanya nu nalong ro te, ‘Kin, inumi wan, ay gfainum akyay anggan am ngay kamelyu,’ kanyai wa nangus am nafamasadan sa ku fun baguwama, at mangena ban. Ay nu katanya, sumaful aw te, anggan katsi kesug tuwo ku fun.” Katanya Abrayam fanuguwan at darangin.

15-16Ay kanya fag fanuguwan ya gsaful te, roro sanya fag fulan sis ke fagfanaguban, e sik baguyna at ngayan Ribika. Kanya fag baguyna, gurungan yay sik diyaga. Ay at tama at ngayan, Betwel. Ay Betwel tina, Milka, ay at tama, Nakur. Kanya Abrayam wa fadugsay at sadi.

Ay kaduge Abrayam fanuguwan igdarangin, sas ke fagfanaguban, manlag di, sik baguyna kadasug, gfasanan at baringan. Nanfanagub. Ay ka fag fanuguwan nu glag, at namasine wa fag baguyna.

Ay ka fag fanuguwan manlag di, ka fag baguyna tunglusanan wan nanfanagub, sas fagfanaguban. Ay nu guli wa baliwa, 17ka fag fanuguwan nafadfalian inkakbang sanya fag baguyna. Ay get te, “Fainumi angku. Foni angku at balyu am ba mamam.” 18Ay ka fag baguyna gbalus te, “Kin.” Ay nafadaga wa fiya at baringan. Ay ka fag fanuguwan ginum wa fiya.

19Ay ka fag fanuguwan nu nainum wan, ka fag baguyna glong te, “Katsi nanfanagub kyadi. Nanfainum akyay am ngay kamelyu, anggan umkapyan.” 20Ay ka fag baguyna nu nalong wa katanya, nabusbus yay at ba mamam sas fagfainuman balan. Ay ginfolian wa gugat sas fagfanaguban, ay nantalin sas fagfainuman, anggan fagayu at kamelyu napyan. 21Ay kadugenya, ka fag fanuguwan gulit way dawdaw. Gyafatuyanun te, “Go Diyus nafe fanambagun tuwa ku naloan?”

22Ay at ngay kamelyu nu napyan wan, ka fag fanuguwan intuyan wan. Nu katanya, nabul at fangubaun tiba. Ay kadkad at suwadan. Ay at nabul, duwak baklo daul ay sik famasinean sis dungus, at ngayu dawdaw nu kasali. Kanya fagayu, at fangawat, gintu. Ay ka fag fanuguwan nafon sanya fag baguyna.

23Ay ka fag fanuguwan ginto te, “Sinu emu am mama at ngayan? Ay go manga masine tuwa ro nu an ami gtiyug sanya sa ay bale, katsi fag yabi? Nu gamatang o, go e fagsakan yay ro ami?”

24Ay ka fag baguyna gbalus te, “E, angku ngaro ku mama, Betwel. Ay ku mama tama, Nakur. Ay ku mama tina, Milka. 25Ay kin, masine tuwa long nu gtiyug am sa em bale. E fagsakan yay long ro am. Anggan ay ngay balan, e famaon tuwami ayuwayu. Ay e famafugad tuwami.”

26Kanya fag fanuguwan nu nadungug ka fag baguyna famalus, kanya natudan ay namalub. Guseganan sas Yawi, te nafadasug tuwa anya sat fun at ngay kalongan. Glong te, 27“Fadi fadi sa ku fun at fagsegan fag Diyus. Kanya di gfainbalian nu kesug ku fun. Kata tuwa ebi ginan. Madyay kanya nataban tuwa angku stiye, sa ku fun at ngay kalongan.”

28Ay kanya fag baguyna nu nadungug Abrayam fanuguwan at fagusegananun, ka fag baguyna natarung sat bale. Ay kamansulit sat iba fagayu at nalag ay at nadungug. 29-30Ay roro, sanya wa mangaro at fadugsay sigon Laban, ka fag baguyna fadugsay sik ama. Ay Laban nu nadungug at fadugsay nu kamansulit, ay nu nalag at ngay famasinean sit bilug, kanya kasulup dawdaw. Ay nu katanya, natarung sas fagfanaguban. Ay manlag di, sanya yay ka fag taw. Anggan at ngay kamelyu, sanya yay sis ke fagfanaguban.

31Ay Laban nu nalag kanya fag mangama sas ke fagfanaguban, glong te, “Sama, nu glag aw, matvngvd tuwa tam Diyus nu gtarabang emu. Ay katsi, taw ro am faglugoun gugat stes day fulan? Lumo wata sa em bale. Nafamasadan kwan am fagtiyugan. Ay anggan am kamelyu at fagtiyugan, nafamasadan kwan. Ay katsi stei wan. Lumo wata, sa em bale.”

32Ka fag fanuguwan nu nadungug Laban at longan, naalo wa fiya sa at bale. Ay nu ndasug wan, Laban fag fulan igfadaga at ngay fangubaun siginan at ngay kamelyu. Ay igfafangon at ngay kamelyu. Ay igbul nagfamiluganan trigu at famafugad at ngay kamelyu. Ay igbul yangay mamam ay igfon sas Abrayam fanuguwan, at famegus at darafa. Anggan at ngay ufud, nafon yangay at famegus at darafa.

33Ay rodi, Laban fag fulan igfon wa at fafa sas Abrayam fanuguwan. Ay ka fag fanuguwan glong sas Laban te, “Idya, aw kya gfangon. Yap ngay aw nafoyung ayu ku fasadan fiya fiya stiye, ku fagindasugun ste sa ayu, kya gfangon.” Ay Laban glong te, “E kin, nu gdi, foyungi yap emi.”

34Ay ka fag fanuguwan kamansulit wan. Glong te, “Aw ngaro, Abrayam aw fanuguwan. Kanya wan ku fun. 35Ay siginan ngay ebi, Diyus gtarabang tuwa dawdaw ku fun. Nafamanyun ayuwayu anya sik ngay tupa, sik ngay kambing, sik ngay baka, sik ngay kamelyu, ay sik ngay asnu. Nafamanyun yangay ayuwayu sik ngay pilak, sik ngay gintu, ay sik ngay fanuguwan. Nu katanya, ku fun inbalan wa dawdaw. 36Ay nu gfon ban kanya fag ngay fagmabalanun, sa tuwa at baguwama. Teway roro mangaro, ku fun mangena dewa dawdaw mafufuyna, inke ngenge yadi. Inke baguwama yay. Ay sanya wa ban at tama nu gfon at fagmabalanun.

37-38“Ay ku fagnastiyeun, ku fun nasugu angku. Nalong angku te, ‘Katsi nansarap wo ku baguwama at mangena, sa ku kalongan at talun, laman ku baguwama at mangena bundi ste ginan fag ngay taw Kanaan at baguyna. At mangena siginan tuwa ku kalongan fag ngay taw.’ Ay ku fun nalong yay angku te, ‘Fatuyanani sa tam Yawi te gfaning wa ban o fiya katanya.’

39“Ay ku fun nu nalong wa angku katanya, nainto kyay ku fun te, ‘Ay idya. Tain ro ku fagbulun, roro, ku nalag fag baguyna sanya nu kauri way galo angku?’ 40Ay ku fun gbalus te, ‘Gafanud aw te, ku fagfaningan fag Diyus, kanya sumugu yay sik falad tagtarabang emu, laman ban gfe fanambagun am naloan sanya, laman ban siginan ku kalongan fag ngay taw sadik baguyna malo tuwa emu. 41Ay roro ku kalongan nu kauri way gfaalo emu at baguyna, deyud wan.’ Ay katanya em sulitanan, ebi.”

42Ay Abrayam fanuguwan gfatunglus yay nu kamansulit. Glong te, “Ay aro ngaro, gina aw sis ke fagfanaguban, gdarangin aw si ku amatanganan te, ‘Yawi, o wan ku fun at fagsegan fag Diyus. Ay katsi tarabangi angku. Fe fanambaguni stiye ku naloan. 43Katsi ngani, malindug aw stes ke fagfanaguban. Ay galay ro sik baguyna nanfanagub, ay nu guli wa baliwa, met aw at ba mamam. 44Ay kanya galay lumong te, “Kin, inumi wan, ay gfainum akyay anggan am ngay kamelyu,” kanyai wa nangus am filian ku fun ban nugang.’

45“Nu gdarangin kwa gugat sanya, manlag akdi, sik baguyna kadasug. Gfasanan at baringan. Nanfanagub. Nu glag aw, gtunglusanan wa sat fagfanaguban. Ay gfanagub wan. Ay guli yama nangus, inkakbang aw anya. Ay naet aw at ba mamam at balyu. 46Ay manlag akdi, ka fag baguyna nu nadungug wan, mafali tuwa nu gfatungkud at baringan. Ay nafon wa fiya angku at ba mamam at balyu. Ay nu gdungug aw, kanya glong yay te, ‘Nanfainum kyangay am ngay kamelyu.’ Ay kanya nafainum wa fiya.

47“Ay rodi, nainto aw anya te, ‘Sinu emu am mama?’ Ay ka fag baguyna gbalus te, ‘Angku ku mama, Betwel. Ay ku mama tama, Nakur. Ay ku mama tina, Milka.’ Ay kaduge ami gsulitanan sanya, nafon aw anya duwak baklo ay sik famasinean sis dungus. 48Ay natudan aw ay namalub. Guseganan aw sas Yawi, te nafadasug tuwa angku sa ku fun at ngay kalongan. Nalong aw te, ‘Fadi fadi, Yawi, am nafadasug angku stiye laman tumungul aw ku fun mangwayi at baguyna, laman kanya wa ban ku fun at nugang.’ ” Katanya wan Abrayam fanuguwan nu kamansulit at naloan.

49Ay nu ntabu wa nu kamansulit katanya, ka fag fanuguwan e fagalongun yadi. Glong sas Laban fag fulan te, “Katsi e fagintoun aw ayu te, go anggan katsi tunglusanan tuwa nu kesug am ku fun? Teway nu kesug tuwam ku fun, gfataban wa ro am angku ay baguyna Ribika. Ay dewa aw glong katanya, foyungi tuwa nangus angku si ayu ay amatanganan, te go gfataban tuwa ban am angku. Teway nu moyung tuwam angku ayu ay amatanganan, sumaful kyangay fadogan ku fagbulun.”

50-51Ay kanya Betwel ay Laban nu nadungug kanya fag fanuguwan nu gelongan, glong te, “Mayamag fiya fiya sa emi te, tam Yawi wan at nataban emu stiye. Nu katanya, ami gfaning way ami. Wami gsalag em baguyna nu malo emu, laman am fun at nugang ban. Kanya wa daw em baguyna. Tabani wan.”

52Kanya fag fanuguwan nu nadungug talame at famalus, te gfaning tuwa Yawi at fasadan, kanya fag fanuguwan natudan ay namalub. Guseganan sas Yawi. 53Ay rodi ka fag fanuguwan naadkad wa at fangubaun. Ay nafon sas Ribika sik ngay masine fag ngay fagnuwan, at fangawat pilak ay gintu. Ay nafon yangay sik ngay falefe masine. Ay anggan sat tina ay sat fadugsay Laban, nafon yangay tibak famanyun at masine. 54Ay nu ntabu nu gfon, kanya long fag fanuguwan gyafun wan. Anggan at ngay ufud siginan Abrayam at ngay taw, gyafun wan fagayu. Ay nu ntabu nu gyafun, sanya wa fag bale nu gtiyug.

Balabag di, ka fag fanuguwan gfatagak wa sas Betwel talanan te, “Laman katsi ro guli wami. Kafoli yangay ami sa em guyan ebi.” 55Ay talanan nu nadungug katanya at longan, at talanak mangaro wa kaumsig nu ginanya wan nu glo. Betwel mangena ay Laban igfatawad way. Glong way te, “Toyap am glo. Falangfei yap manga safuluk menit.” 56Ay ka fag fanuguwan gbalus te, “Yaya, guli wami, teway tam Yawi nafe fanambagun wan ku naloan stiye. Lag salag emi nu guli ami sa ku fun.”

57Talanak gbalus te, “E idya, nu gdi. Nanfastiye yay ami em baguyna, Ribika. Nanginto yay tam te, go tain anya at amatanganan.” 58Ay nafasanya wa fiya Ribika. Ay tiba ginto anya te, “Go tain ngatu am amatanganan? Go nangalo wa ro o?” Ay Ribika gbalus te, “Kin wan. Nangalo kwan.”

59-61Ay Ribika at magurang ay anggan at ngay fadugsay nu nadungug at longan, di gsalag nu glo. Fangkabat, gdarangin tuwa anya. Gdarangin te,

“Katsi ban nangus, em baguyna antuwa sik ngay taw ayuwayu at magurang.

Ay at ngay fufu ban nangus sat dagat daga, baboi tuwa gugat at ngay fabarangyan.”

Ay nu ntabu wat darangin, Ribika igsakay wa sas kamelyu. Iglo wan. Galo wa sanya fag fanuguwan, gfaygaluwan at ufud fag ngay ama.

Ay Ribika gina glo, gtaban yay sik ngay fanuguwan. Anggan at takamato anya ebi gina alay, Ribika nataban wan. Ay kanya fagayu igsakay yangay sas kamelyu. Ay nalo wan. Nangadasug wa sas Isaak bale.

62Ay ebi ataw, Isaak nabanwan yay sirut sa sik lungud at ngayan Ber-Lakay-Ruy. Ay bandi ataw, infoli yangay sa ebi ataw at fagbanwanan sanya sis talun Nigib. Kanya fag talun Nigib, talun Kanaan yay gugat at balyu.

63Ay nu sanya wa gugat si ebi ataw at fagbanwanan, sik sayginan, Isaak gayayag sat ngaba day bale. Ginanya, kayabi wan. Ay Isaak nabantay sas fakasurayan baliwa. Ay manlag di, e kadasug sik ngay kamelyu ayuwayu. 64Roro mangaro, sanya wan Ribika nu gsakay. Ay anggan mangaro Ribika, gbantay wan, siginan ku dayu. Ay Ribika nu nalag sik mangama nu glo, indaga siginans kamelyu. 65Ay nanginto sanya fag fanuguwan te, “Go sinu manga kanya fag mangama at nanfablang antam?” Ka fag fanuguwan gbalus te, “Kanya wan ku fun, ku fun Abrayam at baguwama.” Ay Ribika nu nadungug katanya, kanya nabul sik falefe ay natabun at alfuyu. Katanya at ugali sanya fag talun, sik mangena nu kadaduwa wan.

66Ay rodi, kanya fag ngay taw ayuwayu indasug wa sas ke Isaak bale. Ay kanya fag fanuguwan kamansulit sas Isaak fagayu at nadalan ebi ataw, kaduge gugat mafalyuwan. 67Ay Isaak nafasakbo Ribika sa at tina bale ebi ataw. Ay kanya wan at mangena. Ay Isaak mason way ngap nu kafanyu at mangena Ribika. Ay nu katanya, Isaak inkalyaman tuwa nu kabalu tina naatean.

Currently Selected:

Fagsigadan 24: TAWEAST

Highlight

Copy