Fagsigadan 23

Abrayam nu Gbili at Fagsandigan sis Diyus at Filian fag Talun

1Sara at banwa nu anwa 127, 2-3kanya inkate wan. Ay Sara nu nkate wan, at mangama Abrayam nauyway dawdaw sit mangena akbang. Ay nafagbulun sik ngay fagbulun tagfasaful sa tiba te kabalu dawdaw at mangena.

Ay Abrayam nu ntabu wa nu gfagbulun katanya, kanya inlindug wan siginan at mangena akbang. Ay nalo wan. Nanlag wa at taw dan sanya fag fulan. Kanya fag fulan, at ngayan Kiryat-Arba. Ka fag fulan, sis talun Kanaan. Ay at taw dan sanya sik ngay taw Kit.

Ay Abrayam nu nanlag at ngay taw Kit, sat ke fagsulitananan. At fagsulitananan, sas tigyangan fulan, sas ke sakbawan daul. Ay Abrayam nu sanya wan, glong sanya fag ngay taw Kit te, 4“Ami dewa ami gbanwan gugat ste si ayu, bunwami sik ngay taw dan. Ay wami e daga mandi. Ay katsi ku fagstiyeun, nanget aw ayu ay tarabang. Laman, foni angku ay daga sik lungud, ku fagsandigan ku mangena.”

5Ay tibama gbalus Abrayam te, 6“Nasaful wami te, o sik madaragang o fag tagmagurang. Ay nu katanya, glong ami emu te, filii wa am naumsigan am fagsandigan ste si em daga, si em talun. Nganday am nafili, sanyai wan nu gsandig o am mangena. Fagayu ami kaumsig tuwami. Nus nga sinu ro ami at ke daga am filian, tagbilug di kalimata nu gsandig o am mangena sanya.”

7Ay Abrayam nu nadungug tiba famalus, kanya inlindug. Ay inkarung sat iba daga salubangan. Gfasaful tiba te, gfababaun. 8Ay rodi, Abrayam glong te, “E kin nu gdi. Guseganan aw ay longan. Nu kaumsig tuwam nu gsandig aw ku mangena ste si ay talun, falui angku eti sas Sukar baguwama, at ngayan Efrun, te 9laman kanya mon angku at daga at balyu, sas ke luwib sit tigyangan daga. Laman, kanya fag luwib, sis Makpela fag lungud daga. Longi nangus katanya sas Efrun. Ay longi yangay sas Efrun te, kadaw ban ku nabul at daga, sumali aktuwa at kasakan. Ay nu sumali aw, si tuwa sik ngay taw faglagan, laman ban e gfatuyan tuwa te, nasali kwa fiya kanya fag daga. Fakatanyaun ku fasadan, laman ban faggugat, ku ngay kalongan wa at fagsandigan, sanya.”

10-11Roro mangaro sanya wa gugat Efrun. Malunggung sit ibama buknga. Igdungug wa gugat Abrayam nu gelongan. Ay nu katanya, Efrun glong sas Abrayam te, “E kin, nu katanya am fakaumsigun, dungugani yap tuy ku fagalongunun. Glong aw te, kin, nu kaumsig o sanya fag luwib, emu wan. We fansali. Kanya fag luwib anggan sit ngaba dayu fag daga, emu wan. Ay sandigi wa sanya am mangena. Ay tagfatuyan ban kanya ta sulitanan, ste wa ku ibama at maful katsi. Kanya wa ban tagfatuyan te, nafon kwa fiya emu sanya fag lungud daga.” Ay anggan at ngay ibama at malunggung, sanya sad sakbawan fulan, nadungug wan Efrun nu gelongan. Ay anggan at ngay taw tagsakbo sanya sasad fulan, nadungug yangay.

12Ay Abrayam nu nadungug Efrun elongan, kanya inkarung sis taw Kit daga salubangan. 13Ay glong sas Efrun te, “Fadi, am nafadiyuganan ku amatanganan. Ay igdi ngaro. Dakdi sigad igbul kanya fag lungud daga. Sumali aktuwa. Buli tuwa ku fansali, ay sumandig kwa sanya ku mangena.” Ay kanya fag ngay taw at maful ginanya, nadungug wan Abrayam nu gelongan.

14Ay Efrun nu nadungug Abrayam longan, glong te, 15“E kin, katatuy nu gdi angku ku fagalongunun. Kin, satu ngaro, nu gfabili kway ro kanya fag lungud daga, at fansali ro, antuwa ufat kilu pilak sit dayu gwabilug. Ay dewa aw glong katanya, yaya, deyud wan am nasali. Sandigi wa sanya am mangena.” Roro ngap, fakatanyaun Efrun longan, gyay wa fiya at fansali.

16-18Abrayam nu nadungug Efrun longan, nasali wa fiya ka fag luwib. Ay kayu wa fiya Efrun fagetun, ufat kilu pilak sit dayu gwabilug. Ay sanya fag ngay taw at maful ginanya, igdungug wa gugat duwama nu gsulitanan. Ay anggan glag yangay Abrayam nu gkilu at fansali ay nu gfon sas Efrun. Nu katanya, e famatuyan wa te, Abrayam wan tagbilug sanya fag luwib ay anggan sit ngaba dayu fag daga, ay anggan fagayu kayu sanya mandi fag daga.

19Ay Abrayam nu nabili wan kanya fag luwib, nasandig wa sanya at mangena Sara. Kanya fag luwib, sas Makpela fag lungud talun. Ay kanya fag lungud talun, makbang fulan Mamri. Ay nu katsi wa fag fulan taw, nu gngayan sanya fag fulan, Kebrun wan. Kanya fagayu, si yays talun Kanaan.

20Ay Abrayam nu nabili wan sas taw Kit sanya fag lungud daga at ke luwib, siginan ginanya Abrayam wan tagdagaan sanya. Ay at fanambagun sas Abrayam kanya at nabili fag daga, at fagsandigan at ngay kinkate.

Currently Selected:

Fagsigadan 23: TAWEAST

Highlight

Copy