Fagsigadan 22

Abrayam Mafamasadan Igfon at Baguwama fag Sesadi sas Diyus

1Bandi sayginan, Diyus nangasaful te, go setvngvd Abrayam nu mafanfaning. Ay guro te, “Abrayam.” Ay Abrayam gbalus te, “Taw ro?” 2Ay Diyus gbalus Abrayam te, “Katsi nantaban way o am baguwama fag sesadi, am nesugan. Nangadasugi sas talun Muriya. Ay nu ndasug wam sanya, gfoyung kyay ban emu sanya sik bugsul. Ay fatei wa am baguwama sanya ay at bilug ani batasi laman ro gfauseganan angku.”

3Ay balabag di sad surip, Abrayam kamasadan wat ngay fangubaun. Taguna nasagmak at asnu guyuy. Ay nataban at baguwama Isaak ay at fanuguwan at duwa. Ay bagu glo, Abrayam nabalse yay at bayango, at famaigang ban gina gbatas at baguwama. Ay kanya fagayu nalo wan. Sa wa sangaba dalan. Nangadasug wa sas Diyus foyungan fag lungud talun.

4Ay ka fag ngay taw nu tuluk menit wan nu glo, Abrayam nabantay wan Diyus foyungan fag lungud. 5Ay nu nabantay wan, Abrayam iglong sat duwa fanuguwan te, “Katsi ste yakman am. Tanudi way tam asnu ste. Anyay ami nanfatunglus nanlo nangadasug sas Diyus foyungan fag lungud. Anyay ami nanfauseganan tam Diyus sanya. Ay nu ntabu wa nu gfauseganan ami, gdalan yangay ami ayu stiye.”

6Ay Abrayam nu nafamato wa at asnu sat duwa fanuguwan, nabul at bayango. Ay nafafasanan sat baguwama Isaak. Ay si anya at ubanan, at fiso ay at afuy. Ay nalo wan.

7Ay talame nu glo wa gugat, at baguwama glong te, “Mama!” Ay at tama gbalus te, “Taw ro?” Ay at baguwama glong te, “Dewa ta e bayango ay e afuy, wa ta e ubanan sik tupa ta fagbatasun.” 8Ay at tama gbalus te, “Kin dewa. Tam Diyus wa ro tagfon kanya fag tupa.” Ay kanya gfatunglus yay glo sangaba dalan.

9Ay talame nu glo wa gugat, indasug wan, sas Diyus at foyungan fag lungud. Ay nu sanya wan, Abrayam at fagbulun, kawat at fagbatasan. Nabul sik ngay batu. Nafataladan ay nafatudtungudan tiba. Ay nu nafaawat wan, nabul at bayango. Ay nafasine sis tungud fagbatasan. Ay nu nafasine wan, kanya nasiyuk at baguwama. Ay naurug sas tungud fagbatasan. 10Ay Abrayam nabul at fiso, laman nanfate at baguwama.

11Ay Abrayam nu anwa dawdaw gatubukun at baguwama, siginans banwa Yawi at tagbukngan nauro way sigad. Nauro te, “Abrayam! Abrayam!” Ay Abrayam gbalus te, “Taw ro?”

12Ay Yawi tagbukngan glong te, “Lag fate am baguwama. Lag e fagbulun nus nga setaw sa anya. Katsi nafasaful wo angku te gamagurangan tuwo angku. Madyay dewa sadi way am unga, mafamasadan tuwo igfon sa angku. Di o inkesug.”

13Ay Abrayam nu nabantay sat day fagbatasan, manlag di, sik tupa tama, mabarikusan at duwa sunge sa sik funfun. Ay Abrayam long nananbul ka fag tupa. Ay nafate. Ay nabatas at bilug laman igfauseganan Yawi. Ay natubus wa gugat at baguwama. 14Ay Abrayam nafangayan sanya fag lungud talun te, “Yawi Tagfon Nayudanan.” Ay nu katanya, anggan katsi sa antam, gdungug yay tam tam iba nu glong te, “Sas Yawi at bugsul e gfon tuwa antam tam nayudanan.”

15Ay rodi, siginans banwa, Yawi tagbukngan nauro yay fiya. 16Glong te, “Aw wan Yawi. Katsi nafaning tuwo ku longan. Nafon tuwo angku am baguwama, dewa sesadi. Nu katanya, glong aw emu te, katsi nanfatvngvd aw ku fatuyanan sa emu. Nus nga setvngvd nu madaragang aw, katvngvd yangay anya nu mafanud ku fatuyanan emu. 17Katatuy ku fatuyanan sa emu: Tumarabang aktuwa ban gugat gugat emu. Gfaayu aw dawdaw am ngay fufu sat dagat daga. At kayuwan, we mangatap. Kata wa galeme sas banwa, ay kata wa lagnas sas tigyangan dagat. We taw fafatap at kayuwan. Ay kanya ban gbabo tuwa at ngay fabarangyan. 18Ay at sadi ya ku fagalongun sa emu, tumarabang kyay ban fagayu fulan taw. Ay nu ginanya wa ban, am fufu ban sat dagat daga tagfadasug ban ku fanarabangun sas fagayu fulan taw. Ay katanya ku fatuyanan sa emu, gfagurungan akwa fiya, teway nafaning tuwo ku longan.”

19Abrayam nu nadungug wan Yawi at longan, talame nalo wan sanya ginan. Nandalan wa sa ebi at fagfamatoan at duwa fanuguwan. Ay kanya fagayu gaygaluwanan wa glo sa sangaba dalan. Nangadasug sat fagbanwanan sas Beerseba. Ay sanya yay gugat sis Beerseba, Abrayam nu gbanwan.

Abrayam Fadugsay Nakur fag Talafuwan

20Abrayam nu gbanwan wa gugat sis Beerseba, bandi ataw, nadungug te, at fadugsay Nakur ay at mangena Milka, e unga wan. 21-22At turungana, Us. Ay at ariyan Bus, Kemwel, Kesed, Kasu, Pildas, Idlap, ay Betwel. Kanya fagayu sik ngay ama. Ay kayunya Nakur at ngay baguwama sit mangena Milka. Waluk ama, nu fagayu wan. Ay bandi ataw nu glugo wan, Kemwel inke mangena wan ay inke unga at ngayan Aram. 23Ay anggan Betwel inke mangena yangay ay inke unga at ngayan Ribika.

24Ay Nakur e mangena yay fiya sadi, at ngayan Riyuma. Anya at baguwama ufat. At ngayan, Tebak, Gakam, Takas, ay Maka. Kayunya anya at unga.

Currently Selected:

Fagsigadan 22: TAWEAST

Highlight

Copy