Fagsigadan 19

Yawi Fanuguwan nu Glag te Mason wa fiya Taw Suduma Asalanan

1Ay rodi ataws fafun, Yawi at ufud fag duwama kadasug wa sas Suduma. Ay roro mangaro kanya fag duwama, siginan was banwa. Kanya wan Yawi at fanuguwan at duwa. Ka fag duwama nu kadasug wa sas fulan Suduma, sat ke alad fulan, nalag Lut nu malunggung sanya sis sakbawan fulan.#19:1 Ebi, gina yay Abrayam, at ngay fulan sanya fag talun maaladan tuwa.

Ay Lut nu nalag sik duwama nu kadasug, kanya inlindug. Ay nanfablang ka fag duwama. Ay Lut natudan ay namalub sis duwama daga salubangan. Igfababaun. 2Ay glong te, “Duwama, katsi glo watam, sa em bale. Ay nanfon kwa ayu mamam ay famegus ay darafa. Ay nu masine di sa ayu, tiyugi yap sanya, sa em bale. Ay balabag wa ban nu gfatunglus am iglo.” Ay duwama gbalus te, “Yaya. Ami ro nu tumiyug ami si way ro sad faglanuwan.” 3Ay mafabulun tuwa Lut nu glong sas duwama te, “Lagi. Dangay sad faglanuwan nu gtiyug am. Sai tuwa em bale.”

Ay duwama nu nadungug te, Lut mafabulun wan nu glong, rodi ataw nafaning wan. Naalo tuwa sat bale. Ay duwama nu malunggung wa gugat sanya sis Lut bale, kadugenya Lut fag fulan gfatama sik ngay tinafay ay tiba yak fakonun ayuwayu. Ay nu nafafatama wa at ba fakonun, kanya nafon wa duwama. Ay duwama nafangon wan.

4Ay satu ro duwama nantiyug yama, roro mangaro kadugenya at ngay mangama sanya fag fulan inful wa sas Lut bale. Sanya wa sangaba day bale gsafungan. Siginan at ngay baguwama anggan at ngay fufuwama, sanya wan fagayu, sanya mandi fag fulan. 5Ay kanya fag ngay ama guro Lut te, “Sama, go dada wa ka fag duwama em nalag aro at nasakbo? Falakloi wa ka fag duwama stiye sad talun. Nanfagbulun ami sa anya kata sa sik ina.”

6Ay Lut nu nadungug tibama fagetun, nalaklo sas day bale. Ay nadingding wan sakbawan sit guyan. Ay malindug way sit alungudan sakbawan. 7Glong tibama te, “Lagi. Wa masine ay fasadanan katanya. Mauri way. 8Ay nu kaumsig tuwam, gfon kwa ayu ku baguyna fagduwa. Gfalaklo aw stiye sad talun. Mangama ya batang sa anya. Ay fagbuluni wa kata ay fakaumsigun sa anya. Lag way sas duwama, teway kanya ku nafasakbo wa sa ku bale. Kanya gfatvngvdun aktuwa.”

9Ay kanya fag ngay ama igbalus Lut te, “Basta sanya sad sakbawan. Lag gugat fangatulun emi. Ay anggan ngap o, bunwo sik taw dan ste fag fulan. Wami gdungugan emu. Way ro o gugat igfadalan emi, em fagbulun ro sa emu, glabi yay ro em fasadanan sanya fag duwama.”

Ay ka fag ngay ama nu nalong wa katanya, inkakbang sas Lut ay igtulud anya. Ay satu ro nanrasras wan at dingding sakbawan. 10Roro ngap ka fag duwama siginan sad bale naluwang at sakbawan. Ay naranggut way sigad Lut. Nafasakbo sasad bale. Ay nadingding yangay at sakbawan. 11Ay ka fag duwama nafaarum wa gugat ka fag ngay ama sangaba day bale at mata. Ay dewa gkamkamangan sanya sangaba day bale, wa gtungul Lut sakbawan. Ay nu gsarap wa gugat, rodi nlimata wan.

Yawi Dewa Gfauri at Mauri fag ngay Taw, Kafanyu tuwa at Filian fag ngay Taw

12-13Nu katanya wan, kanya fag duwama tagsiginans banwa, glong wa sas Lut te, “Yawi fasadanan at fagnasuguun emi stiye, nanrasras wami ste fag fulan, laman at ngay taw umkamin wan. Teway Yawi nadungug wa te, mason wan ste fag fulan nu mauri. Ay seyu ste am ngay kalongan? Kanya fagayu ani wa tabani ste ginan fag fulan. Falfasi wan. Am mangena, anggan am ngay baguwama, anggan am ngay baguyna ay anggan am ngay nugang, ay anggan at ngay taw takagup emu, tabani wan.”

14Ay Lut gfaning tuwa kanya fag duwama at suguwan. Nananlag at duwa baguyna famangaman. Ay nananlong sanya te, “Lumo watam ste ginan fag fulan. Diyus nanrasras wan.” Ay at duwa baguyna famangaman wa gafanud, teway nu gfasad, Lut anway kamangkasean nu gelongan. Nu katanya, wa naalo Lut.

15Ay rodi gakamenitun wan. Ay Yawi at fanuguwan fag duwama nalong wa sas Lut te, “Katsi dewa am talanan, loi wan. Aygaluwani wan kayu am at maful ste. Tabani wa am mangena ay am duwa baguyna. Alfasi wan ste ginan fag fulan. Manataipan am ste fag fulan at faurianan.” 16Ay dewa duwama mason nu gasubuwan, roro Lut marananan wadi. Ay nu katanya, duwama nated wa long Lut talanan at ngay take. Ay nataban wan. Nafalaklo wa sas day fulan. Fakatanyaun duwama fagbulun sas Lut, teway roro Yawi kafanyu tuwa Lut.

17Ay nu si was day fulan, Yawi fanuguwan at sadi glong sas Lut te, “Dangay am ste kabat. Loi yap ste ginan. Nus tuwa ma, nu glo am, tarungi tuwa. Ay lag kalong glinggat sa ay guyan. Ay dangay fagtvngvd nangadasug sa tibak lungud ste fag datag. Langfei tuwa. Fabuluni tuwa nangadasugi sas muyud. Umkate way am sigad, way am nasanya.” Katanya at longan sas Lut.

18-19Ay Lut gbalus te, “Ku fun, guseganan aw dawdaw am naafanyuwan emi, am nafalangfean emi laman di ami mkate. Fadi fadi di o nafabayan emi. Ay dewa aw guseganan katanya, yaya, lag nangus sugu emi te, adasugi sas muyud. Teway wa ngap ro ami dumasug sanya fag ngay muyud. Ngayayu yadi. Kaduge ngap ro ami glo sangaba dalan, am faurianan dumasug wa ngap ro emi. Ay mkate wa ngap ro ami. 20Ay nu katanya, nu masine di sa emu, tumarung yakman ami snay fag fulan sirut, snay at alay fag fulan. Sanya ro nu tumarung ami, laman di ami mkate.” Katanya Lut at fagetun.

21-22Ay tagfasulitanan Lut gbalus te, “Kin nu gdi. Loi wa sanya, ay kwa gfaurianan ka fag fulan. Ay nu glo o, tarungi tuwa, teway kya mafafagurungan ku faurianan ste fag ngay fulan yap ngay o ndasug sanya.”

Ay nu glugo wan, at ngay taw nu gngayan sanya fag fulan, Suar. At masuwad sat fanlong, galay nalong “suar”, alay. Fakatanyaun at ngayan, teway ebi gina Lut glagyu, nalong te, “Kanya fag fulan alay way.”

23-26Ay Lut talanan nu nadungug at fasulitanan longan, nalo wa fiya sanya ginan. Ay kaduge glo, roro mangaro Lut mangena nabantay yay sat guyan. Ay kanya intigas wa daw sanya. Anwa daw insik batu asing. Ay kanya sanya wadi.

Ay at menit nu kasure wan, Lut talamian kadasug wa sas fulan Suar. Ay ginanya yangay, Diyus gfasigad wa gfamoyan afuy sas fulan Suduma ay fulan Gumura ay anggan sat ngaba dayu fag ngay fulan. At fagbulun, nafatong afuy ayuwayu siginans banwa ay anggan sik ngay batu gigang. Ay nu katanya, inkate wan fagayu at taw sanya fag ngay fulan. Anggan at ngay melo sanya fag datag, namin wan. Katanya Diyus nu gfauri kanya fag ngay fulan sangaba datag.

27Ay balabag di sad surip, Abrayam nalo yangay sas ke fakabantayan fulan Suduma, sa ebi at fagfasulitananan Yawi. 28Ay Abrayam nu ndasug wa sanya, nabantay sas datag baliwa. Ay manlag di, kanus wa dawdaw sanya nu sedaw fag datag.

29Ay roro Diyus dewa narasras sanya fag ngay fulan sangaba datag Urdan, kafanyu tuwa gugat Abrayam. Ay nu katanya, nafalangfe tuwa at mangwayi Lut dewa nabanwan sanya fag datag.

Lut Dugsay Igfaning way Taw Suduma at Ugali

30Bandi ataw, Lut talamian naalin wan siginans fulan Suar, teway kalimu way igbanwan sanya. Nalo wa sas muyud. Ay gbanwan way sa sik daga luwib.

31Ay talamian nu gbanwan wa gugat sanyas daga luwib, at dugsay nasulitanan. At kaka glong te, “Ta tama mafufuwama wan katsi. Ay ste fag lungud talun wa ta lumag ta mangama. At ngay taw ngap sas fagdaul daga kawat tuwa at ngay unga. Di kata si anta yud e kawat ta unga.”

32Nu katanya at kaka glong te, “Katatuy way siring ta fagbulun. Nanbul ta fanginum fangaranug. Ay gfainum ta ta tama. Ay kanya ro nu karanug wan, umkakbang ta sa anya, laman ro suma anta. Ay umke ngenge wa long ta.”

33Ay at ariyan inkumsig wa fiya at kaka longan. Kanya fag dugsay nafainum wa fiya at tama. Ay at tama karanug wa fiya. Ay at tama nu dway gamatang, at baguyna at kaka inkakbang. Ay at tama natsa anya. Ay dewa katanya, at tama wa namatang fagayu at nafagbulun sat baguyna.

34Ay balabag di, at kaka nafamansulit at ariyan te, “Aro fag yabi ta tama natsa wa fiya angku. Ay katsi ro fag yabi anyay ta fiya nanfainum ta tama, laman ro umranug yay fiya. Ay nu karanug wan dewa gina, o takakbang sa ta tama laman ro suma yangay emu ay laman ban fagduwa ta umke ngenge tuwa ta.”

35Ay rodi ataw fag yabi, ka fag dugsay nafainum yangay fiya at tama. Ay at tama karanug yangay kata aro taw fag yabi. Ay at ariyan inkakbang wa fiya sat tama. Ay at tama natsa wa anya. Ay dewa katanya, at tama wa namatang fagayu at nafagbulun sat baguyna.

36Katanya kanya fag dugsay nu kafafiyon. Siginan way at tama. 37Ay bandi nu glugo wan, at kaka gfasalug at ngenge. Ay manlag di, at ngenge sik ama. Ay nafangayan at ngenge te, Muab. Ay katsi fag ngay taw Muab, nu kafasigad, sanya ginan fag ngenge. 38Ay at ariyan sigon gfasalug yangay at ngenge. Ay at ngenge sik ama. Ay nafangayan at ngenge te, Ben-Ami. Ay katsi fag ngay taw Amun, sanya ginan fag ngenge nu kafasigad.

Currently Selected:

Fagsigadan 19: TAWEAST

Highlight

Copy