Fagsigadan 18

Diyus nu Gfoyung sas Sara te, “Mafabul Aw Taw at Fagyudun Mafabul”

1-2Bandi sik sayginan, Diyus gdog yangay kasure sas Abrayam. Ginanya at menit maturuk. Masugba dawdaw fag lungud. Ay Abrayam nu malunggung, si tuwa sad sakbawan. Ay nu sanya wa gugat, nalag sik tuluk ama nu malindug sit dayu. Ginanya Abrayam at bale sanya yay gugat si ebi, si at usama Mamri at daga. Sanya fag daga, gbiya ayu daw at ngay kayu.

Ay Abrayam nu nalag kanya fag tuluk taw at malindug sit day bale, kanya inlindug. Ay nafadfalian nanfablang. Ay nu si wat akbang, natudan ay namalub sit daga salubangan. Gfababaun. 3Ay iglong sanya fag tuluk ama at sadi te, “Sama, nu masine di sa emu, lag yap tunglusanan glo. 4Fafiyani yap ay lufuy stes daga fun kayu. Ay an akyay nansugu sik taw tagfon ayu mamam ay famegus ay darafa. 5Ay aw nanfamasadan kyay sik ngay fakonun, laman ro gfangon yay am, bagu am gfatunglus glo sa ay fasadan, laman ay bilug gdog yay umbitsug. Teway guseganan ami dawdaw ay naadasugan stiye sa em bale.” Ay kanya fag tuluk ama nabalus Abrayam te, “Kin, kaumsig ami katanya am longan.”

6Ay Abrayam nu nadungug tuluk ama at famalus, nafadfalian nasakbo sat bale. Ay nasugu sat mangena te, “Nanbul o sik wabilug saku arina. Ay awati sik ngay tinafay. Ay fatamai. Katsi wan. Dangay gfanranan aba sirut nu gfagbulun o.” 7Ay nu nasugu at mangena, Abrayam natarung yay sat ke ngay baka. Ay nafili yay sik baka riyangan mataba sanya ginan. Ay nafon yangay sat sadi at fanuguwan. Ay nasugu te, “O fatei kanya fag baka. Ay fatamai.” Ay at fanuguwan igfaning wan.

8Ay rodi nu glugo wa sirut Abrayam nu gfanya, kanya fag ngay fakonun intama wan. Ay nu katanya, Abrayam nabul kanya fag ngay fakonun siginan sad bale, ay anggan sik balan susu bilug, ay anggan tiba yak fakonun. Ay kanya fagayu, nauba sas day bale. Ay nafon sanya fag tuluk ama. Ay kanya long fag tuluk ama, gfangon wan sanya sad lanbung, sis daga fun kayu. Kadugenya, Abrayam malindug sit dayu sirut.

9Ay kanya fag tuluk ama kaduge gfangon, ginto sas Abrayam te, “Dada wan am mangena Sara?” Ay Abrayam gbalus te, “Isnay way daw sad bale.” 10Ay kanya fag tuluk ama at sadi gfatunglus wan nu glong te, “E kin. Ku fagalongunun, glong aw emu te, katsi ban fag banwa, kaduge yangay katsi fag lungud, gdog kyangay kafoli stiye. Ay laman ban, nu ginanya wan, am mangena e unga wan.”

Roro kadugenya, Sara, sanya way sad sakbawan, sis ke tagelongan day guyuy, gdungugan nu gelongan. 11Ginanya, Abrayam ay Sara magurang wa dawdaw. Ay nlangfe wan Sara nu gfangigusan. 12Ay katanya wayay, Sara nu nadungug ka fag ngay taw longan, kanya gafayudun sat amatanganan. Kanya kase way ngap sat amatanganan, te, “Sek, yaya. Wa long umgurungan ku nadungug ay elongan. Kin long satu, kaumsig kway ngap nu mke ngenge aw. Ay teway yaya, nu kamagurang wami tuy. Kwa long e fagsegun nu mke ngenge aw.” Katanya Sara amatanganan nu nadungug ka fag mangama at longan.

13Roro kanya fag mangama tagfasulitanan Abrayam, Yawi wan. Ay Yawi glong sas Abrayam te, “Ay roro am mangena naase way. Gafayudun te, sik mangena nu kamagurang wa anya wa mke unga. 14Ay roro aw wan Yawi, ay nus nga setaw ku fakaumsigun ku fagbulun, umgurungan wa fiya. Satu ro, afanudi tuwa, ku nalong te, katsi ban fag banwa umfoli aw stiye, ay nu ginanya wa ban am mangena e ngenge wan. Kanya ku nalong katanya mafafagurungan kwa fiya.”

15Ay Sara nu nadungug Yawi at longan, kanya inlimu dawdaw. Ay gbalus te, “Yaya. Kwa long naase ayu.” Ay Yawi nabalus te, “Muwag. Naase wo fiya.”

Yawi nu Gfoyung sas Abrayam te, “Nanfauri Akwan Fulan Suduma”

16Ay rodi kanya fag tuluk ama nalo wan sanya ginan, siginans Abrayam bale. Nalo wa sa sik dalan tagsas fulan Suduma baliwa. Ay Abrayam nangufud yay sangaba dalan. Ay nu ndasug wa sa sik lungud dalan, kabantay wan fulan Suduma. Ay malindug yay sanya. 17Ay Yawi gamatangan te, “Katsi nanfoyung akwa sas Abrayam ku naloan stiye. Dakdi sumuksuk anya te roro ngap nanfauri akwan fulan Suduma. 18-19Nanfoyung aw sas Abrayam, teway kanya ku filian tuway fag taw. Ku fagnafiliun anya, laman kanya wa ban tagfoyung sat ngay unga, te laman di kamabo angku, ay laman gfatunglus nu gfaning angku ay nu gugalian at masine. Ay Abrayam ban at ngay fufu sat dagat daga umkayu ban dawdaw anggan wa umsik fulan taw ayuwayu, sik fulan taw madaragang. Ay Abrayam ban at fufu tagfadasug ku fanarabangun sas fagayu fulan taw. Ay Abrayam at ngay fufu sat dagat daga gina ban gfaning angku, ginanya wa ban nu gfagurungan aw ku fatuyanan sas Abrayam.” Katanya Yawi at amatanganan.

20-21Ay Yawi glong sas Abrayam te, “Katsi glo kwan. Nanlag kwa fulan Suduma ay fulan Gumura. Teway mason wan kanya fag duwak fulan at asalanan. Ay nangatuyan aw te, go gurungan wa fiya ku nadungug fag ngay longan ayuwayu taglong te mason wan nu mauri, kanya fag duwak fulan.”

22Ay Yawi nu nalong wa katanya, Yawi at ufud fag duwama nalo wan. Nangadasug wa sas fulan Suduma. Ay Yawi ay Abrayam, naubunan yay sanya sit fagmalindugan. 23Ay nu katanya, Abrayam inkakbang sas Yawi. Ay nalong anya te, “Ku fun, nu gamatangan aw, wa long ro o gfauri at masine fag ngay taw. Sadaw at mauri way fagayu am fagfauriun. 24Ay ku fagnalongun katanya, gamatangan aw te, labon sanya fag fulan nu fagdaul wan, e masine yay 50k taw. Ay gamatangan aw te, nu e masine yay 50k taw, wa long ro o gfauri kanya fag fulan fagdaul, teway kafanyu tuwa long ro o sanya fag 50k taw. 25Teway nu nafauri way ro o at masine fag taw, katanya fag fagbulun at masuwad, gsudan way nu glinggat o at masine fag taw ay at mauri fag taw. Aw nu gamatangan aw, katanya wa gtungul. Ay wa long ro o magbulun katanya, teway fagayu am fagbulun gtungul tuwa. Teway o wa ngani tagsaful iglinggat taw at leleganan te go sinu at ke asalanan.” Katanya Abrayam at longan sas Yawi.

26Ay Yawi gbalus te, “Kin, nu e nalag aktuwa 50k taw at masine at ugali, kwa gfauri ka fag fulan.”

27Ay Abrayam glong yay sas Yawi te, “E, idya. Dewa aw sik taw ay o wan ku fagsegan, nanginkaplan kyay nanginto emu. 28Nanginto kyay emu te, nu msirut way limak taw siginan ku longan aro, ay at sawad 45k taw way, go grasras yay o kanya fag fulan? Go gfamin yay o sanya at ngay taw?” Ay Yawi gbalus Abrayam te, “Yaya, kwa long igrasras dewa kayunya at masine fag taw.”

29Ay Abrayam ginto yay gugat, te, “Ay nu 40 way rok taw at masine?” Ay Yawi gbalus te, “Yaya, dewa kayunya.”

30Ay Abrayam gdog yay nanginto sas Yawi. Glong te, “Ku fun, nanginto kyay gugat emu. Lag kadotama angku. Go nu 30 way rok taw sanya at masine am nalag, go gfauri yay o kanya fag fulan?” Ay Yawi gbalus te, “Yaya, dewa kayunya.”

31Ay Abrayam glong te, “Ku fun, katsi kapla kwemu, teway aro ginan ginto kwa gugat gugat emu. Ay dewa katanya, kya nfanud. Go nu 20 way ro at masine sanya, gfauri yay o?” Ay Yawi gbalus te, “Yaya, dewa kayunya.”

32Ay Abrayam glong te, “E, ginto kyay fiya emu. Lag kadotama angku. Taguyan wan. Ay nu safuluk taw way sanya am nalag at masine?” “Yaya, dewa safuluk taw,” Yawi gbalus te. “Kwa long gfauri ka fag fulan.” 33Ay nu ntabu wan Abrayam nu ginto katanya, Yawi nalo wan sanya ginan. Ay Abrayam nauli wan.

Currently Selected:

Fagsigadan 18: TAWEAST

Highlight

Copy