Fagsigadan 20

Abrayam nu Gbanwan sis Abimilik Talun

1Bandi nu glugo wan, Abrayam naalin wan siginan at fagbanwanan, siginans Kebrun. Nalo wa sas Nigib fag lungud talun. Ay sanyas Nigib, Abrayam fagbanwanan, sas buknga Kadis ay Sur. Ay bandi ataw, kanya naalin yangay fiya. Sa wa sik fulan at ngayan Girar. 2Abrayam nu ndasug wa sas fulan Girar, iglong sanya fag ngay taw te, “Tuy ku taban fag mangena, ku ariyan way.” Roro at mangena wa Sara. Ay Abrayam igfanlamangan wayay nu gelongan, sanya fag fulan at fun nataban Sara sat bale, laman kanya wa ban at sadi at mangena. Ay sanya fag fulan at fun, at ngayan Abimilik.

3Ay sik yabi, Diyus nafataginfanan Abimilik. Si at taginfanan, Diyus glong te, “Katsi ro umkate wo, teway kanya am nabul fag mangena e mangama wan.” 4Ay dewa katanya, Abimilik di natsa anya fag mangena.

Ay Abimilik glong sas Diyus te, “Ku fun, go nanfate wo emi fagayu, dewa te, di ami e asalanan? 5Teway, kanya fag taw nalong wa emi te, ‘Ku taban fag mangena ku ariyan way.’ Ay kanya sigon fag mangena glong yangay te, ‘Kanya fag mangama ku kaka wadi.’ Ay nafanud aw at longan. Ay ku fagnabulun tibak taw mangena, teway kwa nasaful. Sadaw gtungul yadi ku nafagbulun katanya. Di nasalan.”

6Ay Diyus nabalus Abimilik te, “Kin, gsaful kwa gugat te, wo natumlungud, katanya am nafagbulun. Ay nu katanya, kaduge kanya fag mangena si am bale, nadingding aw am amatanganan te, laman di o mke fagbulun mauri sa anya, ay di o umke asalanan sa angku. 7Ay katsi folii wa sat mangama, ka fag mangena am nabul, laman at mangama dumarangin emu ay di o mkate. Teway at mangama, kanya wan sik taw at mafadarangin sa angku. Ay roro ngap nu dway o moli ka fag mangena, umkate wa long o fiya. Anggan fagayu am ngay taw, umkate wan. Katanya ku longan gurungan wa fiya.”

8Ay balabag di, Abimilik nasugu yay tiba te, “Fafuli stiye ku ngay fanuguwan fagayu.” Ay at ngay fanuguwan nu nful wan, Abimilik nafoyung at taginfanan sad yabi, Diyus at nafataginfanan anya. Ay at ngay fanuguwan nu nadungug, kalimu wa dawdaw.

9-10Ay at fun nasugu tiba te, “Fastei wan Abrayam.” Ay Abrayam nu sanya wan, Abimilik glong te, “Taw ro am fagyudun glong at matuyan sa angku? Go sangay batang kwa e nafaaringanan dawdaw emu, am fagnafagbulunun katanya sa angku? Sadaw long nu gamatang aw, ebi ginan ya ta batang garingangan. Taw ro fakatanyaun am nafagbulun sa emi? Ay nafamuwagan way o ay, inke asalanan kwa sas Diyus, ay katsi Diyus kalimata wa dawdaw emi fagayu. Wa long masine katanya am nafagbulun sa angku.”

11Ay Abimilik nu gbaya wa dawdaw Abrayam, Abrayam gbalus te, “Teway fagnakatanyaun ngaro ku longan sa ayu ste fag fulan, taguna namatangan aw te, ste fag fulan at ngay taw wa kalimu ku fagsegan fag Diyus. Ay inlimu aw te fate wa long ro am angku gina am malabian ku mangena. Fate wa long ro am angku laman ro fabul ku mangena. Katanya ku amatanganan, ku fagnalongun te kanya ku ariyan way.

12“Ay famamut ya, fakatanyaun em nalong sa ayu, te dugsay ami, kanya gurungan tuwa. Dugsay wami fiya. Sadi tuwa em tama. Tagsaman em duwa tina way. Ay roro sik daduwa wami fiya. 13Ay siginan ngay ebi gina bagu ami glo siginan em magurang at fulan, nalong aktuwa sa ku mangena te, ‘Dewa ban nus nganday fag fulan nu mdasug ta, longi way gugat te, dugsay way ta. Katanyai am longan nu kesug tuwo angku.’ ”

14Ay Abimilik nu nadungug Abrayam famalus, nafon sik ngay famanyun ayuwayu sas Abrayam. Nafon sik ngay tupa, sik ngay kambing, sik ngay baka, ay sik ngay fanuguwan. Ay nafafoli wan at mangena. 15Ay ginanya yangay Abimilik nu glong sas Abrayam te, “Katsi ban, fatunglusi tuwa banwani ste si ku fagmagurangan. Filii wan nus nganday ay fakaumsigun ay fagbanwanan ste si em talun.”

16Ay rodi, Abimilik nafon yay sik labi sadik kilu pilak sas Abrayam. Ay ginanya, glong sas Sara te, “Linggati nin ku nafon fag ngay pilak sam kaka. Kanya at masuwad ku fagnafonun, laman sik famalyaman am nadalan, ay laman ban at ngay taw ayuwayu sumaful te, di o e nafagbulun mauri.”

17-18Nu katanya wan Abimilik fagbulun, Abrayam nadarangin sas Diyus. Nadarangin Abimilik ay anggan fagayu at taw sanya. Abrayam igdarangin sanya fag fulan te, “Diyus fafiyai ste fag fulan at fanlonganan.” Ay Diyus nafafiya wa fiya Abimilik ay anggan at mangena ay anggan fagayu at ngay fanuguwan. Teway fakatanyaun mangaro Abrayam at darangin, ebi gina Abimilik nabul Abrayam mangena, Diyus nasalag wan fagayu at ngay mangena si at fulan nu gfafiyon. Ay Abrayam siginan nadarangin, Diyus nabalus yangay ay di gsalag sanya fag fulan at ngay mangena nu gfafiyon.

Currently Selected:

Fagsigadan 20: TAWEAST

Highlight

Copy