Fagbulun 9

Saulu Gafanud sa Tam Fun Isus

1Ay ginanya, Saulu matvngvd nu gfalimuwanan sa tam Fun Isus at ngay tagadal ay manga gafateun wan. Ay kanya nananlag sas fun taganyun 2laman nanget sik ngay rirukan at uba sa sangay taw Udyu at ngay bale fakafulan sas fulan Damasku. At fag e ba rirukanun laman ro nus nganday nu lumag sik tagfaning sas Isus at foyungan, dewa mangama ay mangena, kanya gumamat wan ay tumaban sas Erusalem.

3Ay Saulu nu gadasugun wa fulan Damasku, rodi tv insure wa daw mafali sik damlag masulo siginans banwa. 4Ay kanya nagfu sas daga, ay ginanya e dungganan nu e glong te, “Saulu, Saulu! Taw ro am fagfauriun angku?” 5Ay Saulu gbalus te, “Sinu o, ku Fun?” Ay kanya gbalus te, “Aw Isus, am fagfauriun. 6Alindugi wan ay loi wa sas fulan, sanya e gfoyung yay ro emu am fagbulun.” 7Ay Saulu at ngay ufud intuwas yay nu glo, ay maragangan way daw. Ay dewa nadungug nu e gelongan, we nalag at bilug. 8Ay Saulu nlindug wa fiya. Ay dewa malinggatan, wa glag. Ay at ngay ufud igted way anya anggan indasug sas fulan Damasku. 9Ay tuluk menit nu gyud glag, ay manga wa gfangon ay wa ginum kadugenya.

10Ay sanya sis Damasku e sik tagadal at ngayan Ananias. Ay tam Fun e nafalag sa anya ay nalong te, “Ananias!” Ay Ananias nabalus te, “Taw ro, ku Fun.” 11Ay tam Fun nalong te, “Famasadani ay loi wa sanya fag dalan at ngayan, ‘Maslung,’ ay sarapi sas Udas at bale sik taw tagsiginans Tarsus, at ngayan Saulu. Katsi kanya gdarangin tuwa. 12Ay e nafalag aw sa anya te, insakbo o ay nafatayuk o am daluwap sat mata laman kanya gdog yay glag.” 13Ay Ananias nabalus te, “Ku Fun, ngayu ku dunguganan sanya fag taw at nafagbulun mauri sam ngay taw sis Erusalem. 14Ay at fagnastiyeun wan e fagmadaragangun siginans fun taganyun laman nan-gamat fagayu at tagafanud sa emu.” 15Ay tam Fun nalong sas Ananias te, “Loi wan, anway katsi nafili aw ka fag taw laman nanfoyung ban sas yud Udyu fag ngay taw, ay sa sangay fun, ay sa sangay taw Israel, laman ban gafanud tuwa sa angku. 16Ay nanfalag aw sa anya at fagsungatanun ban fag ngay mataka, laman e fanambagun ban aw.”

17Ay nu katanya, Ananias nalo wan ay nasakbo wa fiya sa at foyungan fag bale. Ay nated wa Saulu ay nalong te, “Ku fadugsay Saulu, tam Fun Isus nasugu angku. Kanya at kinsure sa emu gina o glo sa sangaba dalan. Ay at fagnasuguun angku ste laman gdog yay ro o glag, ay laman ro at Masine fag Falad tuwa tagmagurang emu.” 18Ay rodi tv, e ntong siginans Saulu at mata kata sik ngay sariksik uyang, ay gdog yay fiya glag. Ay kanya nlindug ay e nasurung anya sasad safa. 19Ay kanya nu nafangon wan, gdog yay inbitsug at bilug.

Saulu Kamoyung sas Fulan Damasku

Ay Saulu nabanwan yay sirut sanya sis fulan Damasku gfaygaluwan Isus at ngay tagadal. 20Ay Saulu nasakbo sa sangay taw Udyu at ngay bale fakafulan ay nafoyung sas Isus baliwa te, “Isus tam Diyus at Baguwama.” 21Ay fagayu at nadungug nadulawan dawdaw te, “Go bunwa kanya fag taw ebi tagfauri sa sangay tagafanud sas Isus sas Erusalem? Ay at fagindasugun ste ebi tv, laman nan-gamat at ngay tagafanud ay nantaban sas fun taganyun.”

22Ay dewa e glong katanya, Saulu nkugat yay baliwa nu gfoyung Diyus at longan. Ay taw Udyu tagbanwan sis Damasku wa nasaful sat amatanganan, anway matvngvd Saulu nu gfatuyan at foyungan te, “Isus wa fiya tam Diyus at nafili fag Fun.”

23Ay nu nlangfe wa ngayuk menit, taw Udyu kamasadan way gananfateun Saulu. 24Ay e nafoyung sas Saulu ka fag fasadan. Ay ginanya, kayu menit ay kayu yabi ka fag ngay taw Udyu gbalabag way sisad sakbawan fulan laman nanfate Saulu. 25Ay roro sik yabi at ngay tagadal nataban Saulu, ay nasuwad anya sa sik bangkat ay nafabaringbing sas day alad.

Saulu Ndasug sas Erusalem

26Ay Saulu nu ndasug wa sas Erusalem, kanya kaumsig ganangafulun sas Isus at ngay tagadal. Ay at ngay tagadal kalimu yay anya anway wa gafanud te, Saulu sik tagadal tuwa katsi. 27Nu katanya, Bernabe nataban yay Saulu sas Isus at ngay Nasugu, ay nafoyung sa baliwa at kinsure sas Saulu gina glo sa sangaba dalan ay anggan gina tam Fun Diyus gelongan sa anya. Ay anggan di kapla nu nafoyung sas Isus baliwa sas Damasku. 28Ay siginan ginanya Saulu galo wa Isus at ngay tagadal sis Erusalem. 29Ay maseganama tuwa nu gfoyung sa tam Fun baliwa. Ay igfasulitanan ay igfabadbaboan way sa sangay taw Udyu at fanlong Grigu. Ay roro sanya fag ngay taw gafateun way anya. 30Ay at ngay tagafanud nu nasaful at fasadan, nataban Saulu sas Sesaria ay nafalo wa anya sas fulan Tarsus.

31Ay ginanya at ngay tagafanud manabayan tuwa sas fagdaul talun Udiya, ay sas talun Galiliya, ay anggan sas talun Samarya. Ay anggan intvngvd yay at fagafanudun. Ay manga nu maugalian gfaning tuwa sa tam Fun Diyus. Ay at Masine fag Falad wan tagfatvngvd at ngay amatanganan. Nu katanya, inkayu yay baliwa at ngay tagafanud.

Pedru Nafafiya Eneas

32Gina Pedru glodlowan sa sangay fulan laman nansibo at ngay tagafanud, kanya nananlag yangay Diyus at ngay taw sas fulan Lida. 33Ay sanya nalag sik taw at ngayan, Eneas, at kinlukme at bilug. Waluk banwa wan nu gyud malunggung. 34Ay Pedru nalong anya te, “Eneas, Isus, Diyus at nafili fag Fun tagfafiya emu. Malindugi wan ay fabilugi wan am igyan.” Ay rodi mafali kanya nu nlindug. 35Ay fagayu tagbanwan sis fulan Lida ay fulan Sarun nu nalag anya, gafanud sa tam Fun.

Sik Mangena, Durkas, Gdog yay Gleleg

36Sis fulan Upa, e sik tagadal fag mangena at ngayan, Tabita. (Sis Grigu, at ngayan Durkas, at masuwad te, Arasyo.) Ay fagayu at fagbulun masine tuwa, ay anggan gfantarabang tuwa sa tiba. 37Ay ginanya fag ngay menit, ka fag ina nadaylan ay inkate wan. Ay tiba nafegus at bilug ay nafatungkud sas tungud fag silid. 38Fulan Lida makbang way fulan Upa, ay tibak tagadal nu nadungug te, Pedru sis fulan Lida, kanya nasugu sik duwama sas fulan Lida laman glong sas Pedru te, “Sai yap fulan Upa.” 39Ay Pedru naalo wa fiya ka fag duwama. Ay kanya fag tulu nu ndasug wan, at duwama nataban Pedru sat tungud fag silid. Ay fagayu at burangday fag mangena namalindug sis day Pedru ay guyway, gina gfalag anya sik ngay balukas ay sik ngay umut ebi Durkas at naawat gina gleleg. 40Ay Pedru nafalaklo yay sat dayu at ngay taw tagsanya. Ay Pedru gtudan gdarangin. Ay rodi kanya nbiling sa at kinkate baliwa ay nalong te, “Tabita, alunggungi!” Ay ka fag ina nlinggat ay nalag Pedru. Ay rodi nlunggung tuwa daw. 41Ay Pedru nated at daluwap ay gfalindug anya. Ay nu nafatsanya wa Diyus at ngay taw, ay anggan ngay burangday, nafalag sas fagayu tagsanya te, Tabita gleleg yangay. 42Ay nu e nafoyung wa sas fagdaul fulan Upa, ngayuk taw tagafanud sa tam Fun Isus. 43Ay Pedru gbanwan yay sanya fag fulan sik kadugayun sirut, sis Simun bale, tagfagong balat balan.

Currently Selected:

Fagbulun 9: TAWEAST

Highlight

Copy