Fagbulun 8

1Ay sanya yangay Saulu gfadiyuganan nu gfate Esteban.

Saulu Gfauri ngay Tagafanud sas Isus

Siginan ginanya fag menit, mason at faurianan sa sangay tagafanud sas Erusalem. Ay at ngay tagafanud nafansaruwayanan wa sas fagdaul talun Udiya ay sas talun Samarya. At sawad, Isus way at ngay Nasugu. 2Ay sik ngay tagseg Diyus nalibing Esteban, ay mason nu kabalu. 3Ay ginanya, Saulu gfauri dawdaw ngay tagafanud. Ay gsakbo sa sangay bale laman nan-gamat at ngay mangama ay anggan at ngay mangena laman nansungsung.

Filipi Gfamoyung at Masine fag Barita sas Talun Samarya

4Ay at nafansaruwayanan fag ngay taw gfoyung tuwa Diyus at longan nus nganday at fagloan. 5Ay Filipi nalo wa sa sik fulan sas talun Samarya, ay nafoyung sanya sa baliwa tam Fun Isus. 6Ay insadi tuwa at ngay taw at amatanganan nu gdungugan sas Filipi at foyungan. 7Ay at ngay mafurat fag falad guro dawdaw gina nalfas siginan sik ngay taw. Ay ngayuk taw at yud malelegan ay at yud malo bangan at kinfiya. 8Ay nu katanya, sanya fag fulan at ngay taw guseganan dawdaw.

9Ay sanya sik taw at ngayan Simun. Ay gfagbulun at madulawan fag ngay fagbulun. Glugo wan nu gfagbulun katanya sa sangay taw Samarya at faglagan. Ay glong yangay te, “Madaragang aktuwa.” 10Ay fagayu taw sanya, dewa yud mabalan ay dewa mabalan, igdungugan dawdaw sa anya. Ay nalong te, “Kanya fag taw Diyus at taw at ke fagmadaragangun, ay nu gngayan tam anya, ‘Madaragang.’ ” 11Ay ngayuk taw tagfaning sa anya, anway glugo wan nu gfalag takatanya fag fagbulun. 12Ay roro gina Filipi nafamoyung sa sangay taw at Masine fag Barita sa baliwas Diyus nu gmagurang taw ay sas Isus, Diyus at nafili fag Fun, ngayuk taw gafanud ay insurung wan, dewa mangama ay mangena. 13Ay anggan Simun gafanud ay insurung yangay. Ay siginan ginanya, kanya galo wa Filipi. Ay Simun gadulawan dawdaw nu nalag Filipi at madaragang fag ngay fagbulun.

E Nasugu Pedru ay Uan sas Talun Samarya

14Ay Isus at ngay Nasugu sas Erusalem nu nadungug te, taw Samarya gafanud wa sas Diyus at longan, kanya nasugu sanya Pedru ay Uan. 15Ay duwama nu ndasug wan, igdarangin yay sanya fag ngay bagu tagafanud laman at Masine fag Falad tuwa tagsi anya. 16At masuwad at fagnadaranginun, anway at Masine fag Falad yat sanya fag ngay taw. Kanya nsurung yay fagtvngvd sa tam Fun Isus at fagmadaragangun. 17Ay Pedru ay Uan nated sanya fag ngay kinsurung at alfuyu, ay at Masine fag Falad sanya wan. 18Ay Simun nu nalag te, at Masine fag Falad si wa at ngay kinsurung gina Isus at ngay Nasugu nated at alfuyu, kanya gafonun sik ngay singku sas Pedru ay Uan. 19Ay glong te, “Foyungi yangay angku ka fag fagmadaragangun laman ban nus nga sinu fag taw ku nated at alfuyu, at Masine fag Falad si yangay ban anya.” 20Ay Pedru nabalus Simun te, “O ay anggan am singku malyam wa ban. Anway gamatangan o te, mafasali way o Diyus at nafon emu. 21Yaya. Wa masine sa emu tuy fag fagbulun, anway am amatanganan wa masadi sas Diyus. 22Ubuni yap am asalanan. Ay darangini sa tam Fun Diyus, labon gfalyam yay aro am amatanganan at mauri. 23Anway nalag aw te, matvngvd yay nu galabian o. Ay asalanan yay tagmagurang si emu.” 24Ay Simun nalong te, “Darangini angku sa tam Fun Diyus laman am nalong aro di mgurungan sa angku.”

25Ay Pedru ay Uan nu nafoyung wan tam Fun Diyus at longan sanya, kafoli yangay sas Erusalem. Ay sa sangaba dalan kamoyung yay at nadalan fag ngay fulan sirut sas talun Samarya.

Filipi Nafablang sik Taw Itiupya

26Ay tam Fun Diyus at tagfabarita at sadi nalong sas Filipi te, “Mafamasadani ay loi wa sas siyun baliwa, siginans Erusalem fag dalan tagtunglus sas fulan Gasa.” (Ka fag dalan, wa bangan e glo.) 27Ay Filipi nalo wa fiya, ay nafablang sik taw Itiupya nu guli siginans Erusalem. At naloan sas Erusalem nananseg sas Diyus. Kanya fag taw tagtanud Kandasi ngay nanuranan. (Taw Itiupya nu gngayan at fun fag ina, Kandasi.) 28Ay kanya gsakay sit karwai ay igtap Diyus at taglong Isayas at rirukan. 29Ay at Masine fag Falad nalong sas Filipi te, “Akbangi sa at karwai ay ufudi anya.” 30Ay Filipi matarung nu nkakbang. Ay igdungugan ka fag tagtanud nu gtap Isayas at rirukan. Ay Filipi ginto anya te, “Go nasaful tuwo am tapan at masuwad?” 31Ay ka fag tagtanud nabalus te, “Yaya. Tain ro nu sumaful aw nu dway e gfayamag sa angku at masuwad?” Ay kanya nafasakay yay Filipi ay nafalunggung yay gfataladan anya. 32Ay katatuy sanya at tapan at rirukan te:

“Kanya kata sik tupa at nataban sas fagfatean,

ay ate kata yangay sik tupa riyangan at yud guni dewa gbul at sigyu.

33Ay dewa dawdaw e nafalingun anya, we natarabang anya.

Ay we mafafoyung te, kanya at sugfun,

anway inkafus wayay at leleg ste swa daga.”#8:33 Isayas 53:7-8.

34Ay ka fag tagtanud ginto sas Filipi te, “Go sinu ka fag taglong at faglongan? Go sa anya wa mandi, ay go ate sa tibak taw?” 35Ay Filipi nafayamag ka fag taglong at rirukan at masuwad. Ay anggan nafatunglus nafoyung at Masine fag Barita sas Isus baliwa. 36Ay duwama gina glo sa sangaba dalan, indasug sa sik safa. Ay ka fag tagtanud nalong te, “E nin, sik safa. Go e gsalag yay nu kasurung aw?” 37[Ay Filipi nabalus te, “Nu gafanud tuwo, we gsalag.” Ay kanya nabalus te, “Gafanud akwa fiya te, Isus, kanya wan Diyus at Baguwama ay at nafili fag Fun.”] 38Ay ka fag tagtanud nalong sat tagfalafang at karwai te, “Fatuwasi yap.” Ay duwama, Filipi ay ka fag tagtanud, indaga siginan at sakayan ay nalo sasad safa, ay Filipi nafasurung at usama. 39Ay duwama nu nlakwi wa siginan sad safa, tam Fun Diyus at Masine fag Falad mafali nu nataban Filipi sanya ginan, ay ka fag tagtanud dewa yud e nalag anya, guseganan wa nalo. 40Ay Filipi nu gamatang si wa gugat fulan Asutus. Ay gina glo gfoyung wa at Masine fag Barita sas fagayu fulan at nadalan anggan indasug sas fulan Sesaria.

Currently Selected:

Fagbulun 8: TAWEAST

Highlight

Copy