Fagbulun 10

Kurnilyu ay Pedru

1Sis fulan Sesaria e sik taw at ngayan, Kurnilyu. Kanya sik fun sundalu. Nafangayan at fulan sundalu te, “Sik ngay sundalu siginans talun Italya.” 2Kurnilyu ay fagayu tagbanwan si at bale gafanud tuwa ay kalimu kamabo sas Diyus. Ay ngayu tuwa nu gfon sat yud e kwa. Ay faggugat igdarangin tuwa sas Diyus. 3Ay sik menit sis fatulu sfafun, Kurnilyu e nalag. Glag wa fiya fiya Diyus at tagfabarita nu gsakbo sat bale ay glong te, “Kurnilyu!” 4Ay nu nalag ka fag tagfabarita kalimu dawdaw, ay nalong te, “Taw ro, ku fun?” Ay ka fag tagfabarita nabalus anya te, “Diyus nadungug am ngay darangin. Ay kaumsig tuwa am ngay fagbulun nu gfamanyun o sat yud e kwa. 5Ay katsi, sugui am taw at tiba sas fulan Upa, laman ro tumaban ste Simun, tiba at ngayan, Pedru. 6Kanya nu gbanwan sa sik taw at ngayan Simun, sik tagfagong balat balan. Ay at bale sas tigyangan dagat.” 7Ay ka fag tagfabarita nu nalo wan, Kurnilyu nagewan at fanuguwan at duwa ay anggan sik sundalu tagseg Diyus at fagsuguwan gugat. 8Ay Kurnilyu nafoyung fagayu at nalag, ay nasugu ka fag tulu sas fulan Upa.

9Ay balabag di, gina ka fag tulu gadasugun sas fulan Upa, Pedru nasas tungud bale laman nandarangin, ginanya swa bilug menit. 10Ay ginanya, Pedru kalunus ay kaumsig wa nanfangon. Ay kaduge at tiba kamasadan at fakonun, tam Diyus e nafalag sas Pedru. 11Ay nalag banwa nu kaluwang, ay sanya nalag sik tagbiya fag umut nu kababa, masiyukan at ufat suluk. 12Ay sanya fag basad umut at suwadan nus nga setaw wa fag mangimut, tagalafang ay tagalayug. 13Ay e naelongan te, “Pedru, alindugi. Ay fatei ay oni wan.” 14Ay Pedru nabalus te, “Sek, ku Fun, kwa batang kon nus nga setaw tagsanya, am yud nafasine at mafurat.” 15Ay gdog yay fiya e naelongan te, “Nus nge wain Diyus nafasine lag gamatangan te, kanya at yud way nafasine.” 16Tulu ginan nu e gelongan katanya. Ay rodi, inkabat yangay ka fag umut sas banwa.

17Ay Pedru kaduge gamatanganan te, taw manga katanya at masuwad, Kurnilyu at nasugu fag ngay taw indasug. Ay nu nasaful Simun at bale, kanya nalo ay malindug sis day sakbawan alad. 18Ay guro te, “Go sanya Simun, at ngayan at sadi, Pedru?” 19Ay ginanya Pedru gamatangan yay sat nalag. Ay at Masine fag Falad nalong anya te, “Katsi tuluk taw gsarap emu. 20Alindugi ay adagai wan. Ay lag o gaduwanun nangalo, anway aw wan at nasugu anya.” 21Ay Pedru ndaga wa fiya, ay nalong sanya fag tulu te, “Aw wan ay fagsarapun. Taw ro ay fagstiyeun?” 22Ay ka fag tuluk mangama gbalus te, “Kurnilyu, nasugu emi stiye. Kanya sik fun sundalu ay sik matuyan fag taw, ay tagseg Diyus. Ay anggan fagayu taw Udyu gseg anya. Ay Diyus at tagfabarita nalong anya te, gewani emu sat bale laman dumungug am longan.” 23Ay Pedru nafasakbo at ngay bagu kadasug, ay ginanya fag yabi nafatiyug yay sanya. Ay nus balabag wan, Pedru nfulo ay naalo wa kanya fag ngay taw. Ay anggan tibak tagafanud sanya ginan fag fulan Upa naalo yay anya.

Pedru Ndasug sas Kurnilyu Bale

24Ay nu nlangfe wa sik menit, ka fag ngay taw indasug wa sas Sesaria. Ay sanya Kurnilyu gfanya anya, ay kanya nagewan yangay at ngay kalongan ay anggan at fakesugun fag ngay fagwes. 25Ay Pedru gina gsakbo, Kurnilyu nafablang anya, ay natudan ay gseg anya. 26Ay Pedru nasalag te, “Lagi, lag nantudan anway anggan aw, sik taw kyangay kata emu.” 27Ay gina Pedru gsakbo sasad bale gfamatuwan anya, kanya nalag at ngay taw nu maful sanya. 28Ay Pedru nalong tagsanya fag ngay taw te, “Nasaful wam te, sik Udyu wa masine nu nanlag ay ate nangaful sat yud Udyu. Ay roro Diyus nafoyung wa angku te, lag ngayan nus nga sinu fag taw te, kanya sik yud way nafili ay sik mafurat fag taw. 29Ay nu katanya, gina am nagewan angku stiye, kwe amatanganan tiba naalo kwan. Ay katsi e fagintoun akyay sa ayu te, taw ro ay fagfastiyeun angku?”

30Ay Kurnilyu nabalus te, “Tulu wak menit at kinlangfe, kaduge aw gdarangin ste si ku bale, katatuy yangay sfatulu sfafun. Ay kaduge aw gdarangin, sik mangama masulo at balukas inlindug si ku akbang. 31Ay kanya nalong angku te, ‘Kurnilyu, Diyus nadungug am darangin ay nalag am nafamanyun sat yud e kwa. 32Sugui am taw tiba sas fulan Upa. Ay intoi sanya te, dada Simun, at ngayan at sadi Pedru. Kanya gbanwan sis Simun bale, sik tagfagong balat balan. Ay at bale sas tigyangan dagat.’ 33Ay rodi nasugu aw ku tuluk ama sa emu. Ay masine tuwa anway indasug o. Ay nu katanya, stiye wami fagayu ami sas Diyus at akbang laman nandungugan ami fagayu Diyus longan sa emu.”

Pedru Gfamoyung sis Kurnilyu Bale

34Ay Pedru gfasigad wa gfoyung te, “Katsi nasaful kwa te, Diyus we filian taw. 35Sik taw nu kalimu tuwa Diyus ay nu matuyan tuwa at ngay fagbulun, dewa nus ngandaginan fag talun, Diyus igdungug anya. 36Ay nasaful wam sa baliwa at Masine fag Barita, Diyus at nafoyung sa emi fag ngay taw Israel te, ngay taw umke fagmasadiun sas Diyus nu gafanud tuwa sas Isus, Diyus at nafili fag Fun. Tam Fun Isus, kanya wan fagayu taw at fun. 37Ay nasaful yangay am te, nafoyung wan ka fag ngay foyungan sas fagdaul Udiya, kaduge Uan gfoyung sis fulan Galiliya sa baliwa nu gfasurung. 38Ay nasaful yangay am sa baliwas Isus tagsiginans fulan Nasaret. Diyus nafat sas Isus at Masine fag Falad ay anggan at fagmadaragangun. Ay Isus nalo sa sangay fulan ay gfagbulun at masine fag ngay fagbulun, ay gfafiya Satanas at nafatakan fag ngay taw. Fakatanyaun, teway Diyus gufud tuwa Isus. 39Ay ami, nalag wami Isus at ngay fagbulun sis fulan Udiya ay anggan sis fulan Erusalem. Ay sanya fag ngay taw natuktuk anya sas salibagan kayu. 40Ay roro Diyus gdog yay nafaleleg anya sis fatuluk menit ay nafasure sa emi laman lumag ami te, kanya gleleg wan. 41Ay nu gfasure bunwa sas fagayu taw, sa way emi, Diyus at nafili, laman nanfatuyan ami em nalag. Ay kaduge kanya nadog gleleg, nafasfuwan yay emi gfangon ay ginum. 42Ay Diyus nasugu te, ‘Famoyungi at Masine fag Barita sa sangay taw ay fatuyani te, Isus wan Diyus at nafili laman nantuyan sa baliwa sik taw at fagbulun, dewa sa tagleleg ay dewa sat kinkate.’ 43Ay fagayu Diyus at ngay taglong ebi nafatuyan wa te, fagayu tagafanud sa tam Fun Isus e gfalyam ban at asalanan.”

At Masine fag Falad si sangay Taw at yud Gafanud sas Diyus

44Ay kaduge Pedru gelongan, at Masine fag Falad nasas fagayu at tagdungugan Diyus at longan. 45Ay at ngay tagafanud fag ngay taw Udyu at naufud Pedru namatangan dawdaw te, “Taw ro at Masine fag Falad fagnatsiun daw at yud Udyu fag ngay taw?” 46Ay ka fag ngay taw Udyu nadungug at yud Udyu fag ngay taw nu gelongan sa tibak fanlong at yud nasaful ay gseg sas Diyus. Ay Pedru nalong te, 47“Diyus nafon yangay at Masine fag Falad sat yud Udyu fag ngay taw, kata yangay nu nafon sa antam. Nu katanya, we mafasalag tuy fag ngay taw nu nangasurung.” 48Ay Pedru nasugu at ibama te, fasurungi at bagu tagafanud sa tam Fun Isus at fagmadaragangun. Ay nu ntabu wan, at ngay taw sanya glong sas Pedru te, “Istei yap sa emi.”

Currently Selected:

Fagbulun 10: TAWEAST

Highlight

Copy