Fagbulun 11

Pedru Nanfoyung at Fagbulun sas Erusalem

1Ay Isus at ngay Nasugu ay anggan at ngay tagafanud sis talun Udiya nadungug te, at yud Udyu fag ngay taw gafanud wa sas Diyus at longan. 2Ay nu katanya, Pedru nalo wa sas Erusalem. Ay sanya e sik fulan taw Udyu tagafanud te, “Tulii yap at yud Udyu fag ngay taw bagu umsadi sa antam.” Ka fag ngay taw Udyu tagafanud katanya fag ugali kalimata Pedru. 3Ay nalong te, “Taw am fagnasakboun sas yud Udyu fag ngay taw at yud matulian at bale ay am fagfasfuwanun gfangon?” 4Ay Pedru nafayamag fagayu at kin-gurungan.

5Kanya glong te, “Ebi gina sis fulan Upa, gina aw gdarangin, Diyus e nafalag angku. E nalag aw sik umut dawdaw marafad kababa siginans banwa. Ay kanya masiyukan at ufat suluk ay inbaba si ku day tigyangan. 6Ay nafalingamanun akwan sanya at suwadan, ay ku nalag sanya nus nge wain fag ngay mangimut: tagalafang, ay tagfangagat, ay taglayug. 7Ay nadungug aw nu e glong sa angku te, ‘Pedru, alindugi wan. Ay fatei ay oni.’ 8Ay nabalus aw te, ‘Sek, ku Fun. Anway aw, kwa batang kon am yud nafili nu mafurat way.’ 9Ay gdog yay fiya e naelongan siginans banwa te, ‘Nus nge wain Diyus at nafasine, lag glong te, kanya at yud way nafili.’ 10Tulu ginan nu katanya at fagbulun. Ay rodi ka fag umut inkabat yangay sas banwa. 11Ginanya e ndasug tuluk mangama sa ku fagtiyugan fag bale. Kanya at nasugu sa angku siginans fulan Sesaria. 12Ay at Masine fag Falad nalong angku te, ‘Aloi ka fag tuluk ama, ay lag o gaduwanun.’ Ay gina aw glo, unum yangayk tagafanud tagufud angku. Ay nu ndasug wami, nasakbo wami sas Kurnilyu bale. 13Ay Kurnilyu nafoyung emi at nalag ebi. Nalong te, ‘Nalag aw sik tagfabarita si ku basad bale ay nalong angku te, “Sugui sas fulan Upa. Ay fastiyei Simun, tiba at ngayan, Pedru. 14Ay kanya yay ban at moyung sa baliwa nu gfalangfe emu, ay anggan fagayu taw si am bale.”’ 15Ay gina aw gfasigad gfoyung, rodi at Masine fag Falad sanya wa fag ngay taw, kata yangay ebi at kin-gurungan sa antam. 16Ay namatang aw tam Fun Isus at longan ebi sa antam te, ‘Uan nafasurung sasad safa. Ay gfasurung yangay ban ayu sa at Masine fag Falad.’ 17Ay tam Diyus nafon yangay sanya fag ngay taw kata ebi at nafon sa antam ebi gina tam bagu gafanud sa tam Fun Isus. Ay sinu aw, laman nansalag Diyus at fakaumsigun.” 18Ay ka fag ngay taw Udyu tagafanud nu nadungug Pedru at longan, kanya di gfabadbaboan Pedru, fangkabat naseg sas Diyus. Kanya glong te, “Nu katanya, Diyus nafon yangay sik lungud sat yud Udyu fag ngay taw laman gubun at ngay asalanan laman mul leleg at yud e fakatabuwan.”

At ngay Tagafanud sas Fulan Antiukia

19At ngay tagafanud nafansaruwayanan way siginans Erusalem ebi gina e faurianan ay gina nafate Esteban. Ay at tiba ndasug sas talun Finisya, ay sas furu Sipre ay anggan sas fulan Antiukia. Ay at fagfoyungan Diyus at longan sa ways taw Udyu fagtvngvd. 20Ay roro tibak tagafanud siginans furu Sipre ay fulan Sirene ndasug sas Antiukia ay nafoyung sas yud Udyu fag ngay taw at Masine fag Barita sa baliwa tam Fun Isus. 21Ay tam Fun at fagmadaragangun si yangay at yud Udyu fag ngay taw, ay ngayu tuwa tagafanud ay at nafaning sa tam Fun.

22At ngay tagafanud sis Erusalem nu nadungug takatanya, nasugu Bernabe sas Antiukia. 23Ay Bernabe nu ndasug wa sanya, guseganan nu nalag Diyus at ngay famanyun sat ngay taw. Ay nafoyung yay sanya, laman umkugat yay at fagmasadiun at amatanganan ay laman faggugat igfatunglus tuwa nu gfaning sa tam Fun. 24Bernabe sik matuyan fag taw. Ay si tuwa anya at Masine fag Falad, ay matvngvd tuwa at fagafanudun. Ay inkayu tuwa at ngay tagafanud sa tam Fun.

25Ay rodi Bernabe nalo yay sas fulan Tarsus laman nansarap Saulu. 26Ay nu nalag wan, nataban yay sas Antiukia. Ay ginanya fag banwa, ka fag duwama sanya ay maful sat ngay tagafanud laman igfoyung sat ngay taw sanya. Ay sanya sis fulan Antiukia taguna nu gngayan fagayu tagafanud te, “Ngay tagafanud sas Diyus at nafili fag Fun.”

27Ginanya fag ngay menit, Diyus at ngay taglong at tiba siginans Erusalem nalo sas Antiukia. 28At taglong at sadi at ngayan, Agabus. Ay kanya nlindug ay nafoyung at Masine fag Falad at longan te, “Umdasug ban sik fanlunus daul sas fagdaul daga.” (Ay in-gurungan wa fiya at longan gina Klaudiu at fun fiya fiya sis talun Ruma.) 29Nu katanya, Isus at ngay tagadal sanya matvngvd nu gfasadanan gfon at ngay fanarabangun sa sangay tagafanud sas talun Udiya. Ka fag ngay taw nu gfon nafainfaluwan nus nga seyu at nanuranan. 30Ay nafauba wa sas Bernabe ay Saulu at ngay fanarabangun laman nanfon sa sangay tagfangguna sa sangay tagafanud sas Erusalem.

Currently Selected:

Fagbulun 11: TAWEAST

Highlight

Copy