M. Yohana 19

1TETI Pilato emuula Yesu nomkwapula. 2Manjolinjoli akapikilizye nkata ya minga eivwinikila pa mutu wake, emvwika mwinjira wa kaniki 3nomzila na kuti, Timuŵoneni, we Mfumu ya Ayuda! naŵo emnyata malupi. 4Lomba Pilato efuma soti eŵanenera, Ŵonani, numfumizya kwanu mziŵe kuti sinufwanga mwake chiŵi chiri chonse. 5Teti Yesu efuma wovwala nkata ya minga na mwinjira wa kaniki. Pilato eŵauzya, Ŵonani, muntu uyu! 6Teti akuru a ansembe na manjolinjoli pechimuŵona ekuwa kuti, Mpachikeni, mpachikeni. Pilato eŵauzya, Muuleni mwaŵene mumpachike paniliyofwanga mwake chiŵi chiri chonse. 7Ayuda emyasuka, Tina dango, na mdango ilo owamila kufwa, pakuti elichisya Mwana wa Mlungu. 8Teti Pilato pamene pechimvwa malizu aŵa epulamo noyopa; 9eloŵa soti mPretoriyo nonena naye Yesu, Wifuma kuni? Sembe Yesu aliyomyasuka kantu. 10Teti Pilato echiti kwake, Sulaŵira nane? kansi suziŵa kuti nina upinguzi wokumangulula nopinguzi wokupachika? 11Yesu emyasuka, Sembe simwina upinguzi wonse pali neo, ungati uliyopewa kwanu kufumila kumulu: teti uyo wanivumbula kwanu ni paali nacho chiŵi chikuru ngacho. 12Pa ichi Pilato esakommangulula: sembe Ayuda eŵirikizya kuti, Mkammangulula uyu, ntemwe chiuza cha Kaisari: ali wonse olichisya mfumu omsusya Kaisari. 13Naye Pilato akamvwe malizu aŵa emfumya Yesu nonkala pa chilimba chopingula pa malo poitiwa Walo wa Myala, sembe mChihebrayo Gabbata. 14Lomba kwenze Chiwamizyo cha pasaka: kwenze zuŵa pa mutu. Naye eŵanenera Ayuda, Ŵonani, Mfumu yanu! 15Naŵo ekuwa, Mfumyeni, mfumyeni, mpachikeni pa msalaba. Pilato echiti kwaŵo, Kansi nipachike Mfumu yanu? Akuru a ansembe eyasuka, Tiliye mfumu sembe Kaisari. 16Pamene apo empeleka kwaŵo apachikiwe.

17Tetyo emuula Yesu: naye efuma wolitwalira msalaba ku malo kuitiwa mChihebrayo Golgota: 18kwamene kula kwechimpachika, na ayakene aŵiri pamo naye, muyake uku muyake uku na Yesu pakati. 19Nipo Pilato elemba vizemba soti novisaŵika pa msalaba. Vilembewa, YESU WA KU NAZARETE, MFUMU YA AYUDA. 20Vizemba ivi anyinji Ayuda evipendapo: pakuti pechipachikiwa Yesu penze pafupi na mzinda, navyo vilembewa mChihebrayo, mChiroma na mChihellene. 21Naŵo akuru a ansembe a Ayuda emnenera Pilato, Msalemba, Mfumu ya Ayuda, sembe kuti yeve echiti, Nine Mfumu ya Ayuda. 22Pilato eyasuka, Chinalemba nalemba.

23Lomba manjolinjoli akampachike Yesu eula vyovwala vyake eviyaŵa vitwa vine, ku linjolinjoli liri lonse chimo, na mtopola nawo: lomba mtopola wenzeve muŵilo, wolukiwa muŵili umo kutatikila pamulu. 24Teti euzyana, Tisaupazula: natipoze mlondola pa uyo, uŵe wa ŵani: kuti malembo asilizike akuti,

Eyaŵana vyovwala vyangu pakati paŵo,

Na pa mtopola wangu epoza mlondola.

Ivi ni vyechichita manjolinjoli. 25Lomba enzepeneme pa msalaba wa Yesu anyina, na mkwaŵo wa anyina, Mariya mkazi wa Klopa, na Mariya Magadalene. 26Pamene Yesu pechiŵaŵona anyina na msambili opanama pafupi wechitemwa, eŵanenera anyina, Mwanakazi, ŵonani mwana wanu! 27Nipo emnenera msambili, Ŵona anyoko! Naye msambili chitatikile nsita ila emuulila kwake.

28Pavuli pa ivi Yesu poziŵa kuti vyonse vyasila, kuti malembo asilizike echiti, Nikumvwa njota. 29Chiikiwapo chiya chozula vinyu vyoŵaŵa: naŵo esomeka chinkupule chozula vinyu ivyo vyoŵaŵa pa chimpeti cha husopo emsumika pakanwa. 30Naye Yesu akapoke vinyu ivyo vyoŵaŵa echiti, Kwasila: ekotama mutu nosindika mzimu wake.

31Teti Ayuda, pekwenze Chiwamizyo, vitanda vingasale pa msalaba pa sabata (siku la sabata lila pelenze likuru), esenga kwa Pilato kuti mendo ŵaŵo atyolewe, asauliwe. 32Teti manjolinjoli echiza etyola mendo a wotatika na a muyake epachikiwa naye pamo: 33sembe pechiza kwa Yesu noŵona kuti wafwa kale setyola mendo ŵake: 34lomba umo wa manjolinjoli emlasa fumo mchitumba mwake, lomba pano mwifuma mlopa na manzi. 35Uyo eŵona echita untoni, na untoni wake ni wendi: naye oziŵa kuti onena vyendi, kuti mzomere namwe. 36Pakuti ivi vichitika kuti malembo asilizike akuti, Leka fupa la uyo siliti lize lityolewe. 37Soti ayakene malembo akuti, Azamlolesye uyo wechilasa.

38Lomba pavuli pa ivi Yosefe wa ku Arimateya, pakuŵa msambili wa Yesu, sembe kunsei chikomo choŵayopa Ayuda, esenga kwa Pilato kuti afumyepo chitanda cha Yesu: na Pilato ezomera. Tetyo echizofumyapo chitanda chake. 39Echiza soti Nikodemo, wamene ula potatika emzila usiku, eleta choyovizya cha muro na vyofuluma vya stakite, nga ni ndemera ya malitro makumi kumi. 40Naŵo echiula chitanda cha Yesu nochizeŵezya mmanyula ŵotimba pamo na vyonunkila vila, nga ni muulili msango wa Ayuda woŵikira mu msitu. 41Lomba pa malo pechipachikiwa penze munda, na pa munda pala chikwe chalomba mkaliyoŵikiwa na muntu nsiku zyonse. 42Mwamene mula ni mwechimuŵika Yesu chikomo cha Chiwamizyo cha Ayuda, chikwe pechenze pafupi.

Currently Selected:

M. Yohana 19: MA23

Highlight

Copy