M. Yohana 18

1YESU akanene malizu aŵa efuma pamo na asambili ŵake notauka kamana Kedroni, uko kwenze munda, wechiloŵamo yeve na asambili ŵake. 2Lomba Yuda naye wamene emvumbula eziŵapo pa malo, pakuti Yesu enzoyapo kaŵirikaŵiri pamo na asambili ŵake. 3Pamene apo Yuda, akapokere mpingo na manjolinjoli ŵofuma kwa akuru a ansembe na Afarisayo, echiza pamene na misaniko na myenje na mauta. 4Nipo Yesu poziŵa vyonse viti vimponere eima nonena naŵo, Musaka ŵani? 5Emyasuka, Yesu wa ku Nazarete. Yesu eŵauzya, Ni neo. Naye Yuda emvumbula enzepeneme naŵo pamo. 6Tetyo akaŵauzye, Ni neo, ŵewerera mvuli nopona konganga. 7Naye eŵayasuka soti, Musaka ŵani? Naŵo echiti, Yesu wa ku Nazarete. 8Yesu eyasuka, Namuuzyani kuti ni neo: teti kati munisaka neo ŵalekeni aŵa ŵaye: 9kuti malizu ŵechinena asilizike, Mwa ŵala emwinipa niliyotayapo yeka umo. 10Lomba Simoni Petro pakuŵa na chinkalammanja echisolola, nomnyata kapolo wa mkuru wa ansembe nomtenda kwatu kwa kwendi. Lomba zina lake kapolo ni Maliko. 11Tetyo Yesu emuuzya Petro, Wezezyamo chinkalammanja mchilalo chake: ntumo yanipa Ŵata sinimwerako kansi?

12Pamene apo mpingo na chilolo chikuru na manjolinjoli a Ayuda emkata Yesu nommanga 13nomkwekwesyera kwa Anna potatika, peenze sivyalawake wa Kayafa, wamene enze mkuru wa ansembe chirimika chamene chila. 14Lomba Kayafa ni eŵapanga Ayuda nzeru yakuti chuwamila kuti muntu umo afwile ŵantu.

15Naye Simoni Petro emkonka Yesu, na msambili muyake soti. Lomba msambili ula enze woziŵikwa ku mkuru wa ansembe noloŵa pamo na Yesu mnsaka ya mkuru wa ansembe; 16sembe Petro enzepeneme panja pa mulyango. Tetyo msambili ula muyake, wamene enze woziŵikwa ku mkuru wa ansembe, efuma nolaŵira na mwanakazi wolindilila mulyango nomulovya Petro. 17Nacho chituntulu cholindilila mulyango chimkonsha Petro, Nawe soti ntiwe msambili wa muntu uyu? Echiti, Si neo. 18Lomba akapolo na manjolinjoli enzepeneme akakozye mulilo wa misimbe, pekwenze mpepo, naŵo enzoyotako: naye Petro soti enze naŵo enzepeneme noyotako.

19Lomba mkuru wa ansembe emkonsha Yesu zya asambili ŵake na mayeruzyo ŵake. 20Yesu emyasuka, Nilaŵira pasweta ku charo; nsiku zyonse nenzosambizya mmasunagoge na mchipupilo mwenzolongana Ayuda ŵonse; kunsei sinenzolaŵira kantu. 21Munikonshiranji neo? ŵakonsheni ŵala enimvwa chinenzolaŵira naŵo: ŵonani, ŵala ni oziŵa vinenzonena. 22Naye akanene teti umo wa manjolinjoli opanamapo emnyata Yesu lupi echiti, Kansi umyasuka teti mkuru wa ansembe? 23Yesu emyasuka, Kati nalaŵira chiŵichiŵi chita untoni wa chiŵichiŵi: sembe kati ni viweme uninyatiranji? 24Tetyo Anna emtumizya wa mnsinga kwa Kayafa mkuru wa ansembe.

25Lomba Simoni Petro enzepeneme poyota mulilo. Naŵo enena naye, Kansi niwe soti wa asambili ŵake? Ekana echiti, Si neo. 26Umo wa akapolo a mkuru wa ansembe pakuŵa mkwaŵo wa ula wechitenda kwatu Petro echiti, Kansi sinakuŵona mmunda pamo naye? 27Nipo Petro ekana soti: lomba pano apa na kombwe elila.

28Pamene apo echiya naye Yesu kufuma kwa Kayafa nomulovya mPretoriyo: mwenze mmamawa; naŵo ŵeve ŵene nteloŵa mPretoriyo asafifyiwa, sembe kuti alyeko pasaka. 29Naye Pilato eŵafumira echiti, Ni mlandu wanji umumsusya nawo uyu muntu? 30Eyasuka emnenera, Angati uyu muntu nte muŵipa sembe tiliyomleta kwanu. 31Naye Pilato eŵauzya, Muuleni mwaŵene nompingula mwa dango lanu. Ayuda emuuzya, Tiliye nsaka seo yopaya muntu ali wonse: 32kuti malizu asilizike ŵechinena Yesu ŵolulula imfwa yotyani yati akafwe nayo.

33Lomba Pilato eloŵa soti mPretoriyo nomuita Yesu nonena naye, Kansi niwe Mfumu ya Ayuda? 34Yesu eyasuka, Kansi munena ichi mweka, kano ni ŵambi emuuzyani cha neo? 35Pilato eyasuka, Kansi nne Muyuda? Mtundu wako wamwine na akuru a ansembe ni akuleta kwangu: wichitanji? 36Yesu eyasuka, Ufumu wangu nte wa charo cha pansi: ungati ufumu wangu ni wa charo sembe akulwa nkondo alumbwana ŵangu nisatwaliwa kwa Ayuda: sembe lomba ufumu wangu nte wa pano. 37Tetyo Pilato emnenera, Niwe mfumu tu? Yesu eyasuka, Mweo munena kuti nine mfumu. Chikomo ichi ni penivyalikwa, na chikomo ichi ni penizila mcharo, chakuti nivichitire vyendi untoni. Ali wonse wa vyendi omvwila lizu langu. 38Pilato enena naye, Vyendi ni vinji?

Lomba akanene teti eŵafumira soti Ayuda noŵauzya, Sinufwanga chiŵi muli yeve. 39Sembe mweo mwina msango wakuti pa pasaka nommangululilani umo: tetyo mupangwa kansi nimmangululi eni Mfumu ya Ayuda? 40Naŵo ekuwa soti echiti, Nte uyu muntu, sembe Barabba. Lomba Barabba enze nyalufwimbi.

Currently Selected:

M. Yohana 18: MA23

Highlight

Copy