M. Yohana 17

1YESU elaŵira teti; naye poŵinula menso ŵake kumulu echiti, Ŵata, yaza nsita; zizyani Mwana wanu, Mwana amzizyeni mweo: 2nga ni umo mmwimpera nsaka ya miŵili yonse yakuti iri yonse imwimpa aipe yamene moyo wosasila. 3Moyo wosasila ni uyu, wakuti amziŵeni mweo Mlungu yeka wendi na uyo wimwituma, niye Yesu Kristo. 4Nimzizyani mcharo cha pansi posilizya mulimo wimwinipa niuchite. 5Lomba, mwe Ŵata, nizizyeni pamo na mwaŵene na mchinzi ula unenze nawo pamo namwe pachikaliyoŵapo charo cha pansi. 6Neo nilangizya zina lanu ku ŵantu emwinipa mcharo cha pansi: ŵenze ŵanu, namwe mwinipa; naŵo osunga malizu ŵanu. 7Lomba oziŵa kuti viri vyonse vimwinipa vifuma kwanu: 8pakuti malizu ŵala emwinipa neo niŵapa amene ŵala; naŵo eŵapokera, noziŵa ng'aleze kuti nifuma kwanu nozomera kuti nimwe mwinituma. 9Nuŵasengera ŵala: sinusengera charo cha pansi, sembe ŵala emwinipa, paali ŵanu: 10na vyonse vyangu ni vyanu, na vyanu ni vyangu: nane nuzizyiwa na vyamene. 11Neo sinili soti mcharo cha pansi, na aŵa ali mcharo, na neo nikuza kwanu. Ŵata ŵozila, ŵasungeni mzina lanu ŵala emwinipa, kuti aŵekuŵa mumo nga ni mtilili seo. 12Pamene penenze naŵo niŵasunga mzina lanu ŵala emwinipa: nane niŵachilingizya, paliye umo wa ŵala etaika sembe mwana wa chitaiko; kuti malembo ŵala asilizike. 13Sembe lomba nikuza kwanu; nulaŵira ivi mcharo kuti aŵekuŵa na nseko yangu ilusilizike muli ŵeve. 14Niŵapa malizu ŵanu; na charo chiŵapata, ŵeve pasali a charo, nga ni neo munisalili wa charo. 15Sinusenga kuti mwafumye mcharo, sembe kuti mwachilingizye kwa ula muŵipa. 16Ŵeve sali a charo, nga ni neo munisalili wa charo. 17Mwatuŵisye mvyendi: malizu ŵanu ni vyendi. 18Nga ni umo mmwinitumira mcharo tetyo na neo ni mniŵatumira mcharo. 19Chikomo cha ŵeve ni panulituŵisya neka, kuti naŵo soti atuŵishiwe mvyendi. 20Lomba nte aŵa ŵeka anusengera, sembe ŵala naŵo ati animvwile chikomo cha malizu ŵaŵo; 21kuti ŵeve ŵonse aŵekuŵa mumo; nga ni mweo, Ŵata, mmulili muli neo, na neo muli mweo, kuti ŵeve naŵo aŵekuŵa muli seo: kuti charo chozomera kuti nimwe mwinituma. 22Mchinzi nawo wimwinipa neo niŵapako ŵeve, kuti aŵekuŵa mumo, nga ni seo mtilili mumo; 23neo muli ŵeve, na mweo muli neo, kuti awamyiwe na kuŵa umo; kuti charo choziŵa kuti nimwe mwinituma, noŵatemwa ŵala nga ni mmwinitemwera neo. 24Mwe Ŵata, ŵala emwinipa nupangwa kuti kwinti nkaŵe neo naŵo soti azaŵeko pamo nane, kuti akaŵone mchinzi wangu wimwinipa: pakuti mwenzonitemwa pechenzevonkazikike charo cha pansi. 25Mwe Ŵata ŵolungama, charo sichimziŵani, sembe neo nimziŵani; na aŵa eziŵa kuti nimwe mwinituma. 26Niŵaziŵisya zina lanu, kumbi nze niliziŵisye soti; kuti chintemwa chimwinitemwa nacho chakuŵa muli ŵeve, na neo muli ŵeve.

Currently Selected:

M. Yohana 17: MA23

Highlight

Copy