M. Yohana 20

1LOMBA pa siku lotatika la pa wiki echiza Mariya Magadalene mmatemwakucha, kukali mfinzi, ku msitu nochiŵona chimwala chakankiwapo pa chikwe. 2Naye eutuka echiza kwa Simoni Petro na ku msambili muyake wechitemwa Yesu, eŵauzya, Aŵafumyamo Asikuru mu msitu, situziŵa kwaŵaika. 3Teti Petro efuma, na msambili muyake uyo, eima kuya ku msitu. 4Eutuka ŵonse pamo, na msambili muyake empula Petro, etangulofwika ku msitu; 5akaŵerame nosonjolamo eziŵona nyula zyenze patyalani; lomba aliyoloŵamo. 6Na Simoni Petro soti echiza kumkonka, eloŵa mchikwe noziŵona nyula ziri patyalani, 7na kamcheka, kenze pa mutu wake, sikenze pamo na nyula izyo, sembe kopetewa pa keka. 8Pamene apo eloŵa soti msambili muyake etangulofwika ku msitu, naye eŵona nozomera. 9Pakuti na lomba ŵaliyoziŵe ŵeve malembo ŵala akuti azazyuke soti kwa akufwa. 10Teti asambili eimapo kuya kwaŵo.

11Sembe Mariya enzepeneme panja pa chikwe nolila: naye polila eŵerama nosonjolamo mchikwe; 12naye eŵona malaika aŵiri enze mbuu ŵonkala umo ku mitu na muyake ku matambalalilo, apo pechilala chitanda cha Yesu. 13Naŵo enena naye, Mwanakaziwe, ulilanji? Yeve eŵauzya, Pakuti aŵafumyamo Asikuru ŵangu, sinuziŵa paŵaika. 14Akanene teti echeukila kuvuli noŵona Yesu enzepeneme, nteziŵa kuti ni Yesu. 15Yesu enena naye, Mwanakaziwe, ulilanji? usaka ŵani? Yeve polinga ni wolima munda enena naye, Asikuru, kati nimwe mwaŵafumyamo muniuzye pamwaŵaika, nane niŵafumyepo. 16Yesu echiti kwake, Mariya. Yeve echeuka enena naye mChihebrayo, Rabboni; ni kuti Msambizi. 17Yesu emuuzya, Usanikumya, panikaliyokwera kwa Ŵata: lomba nkoya kwa akwasu noŵauzya, Nukwera kwa Ŵata ŵangu na Ŵata ŵanu, kwa Mlungu wangu na Mlungu wanu. 18Mariya Magadalene echizoŵauzya asambili kuti, Naŵawona Asikuru, na kuti ŵalaŵira nane ivi.

19Lomba pekwenze chingulo siku lamene, lotatika la pa wiki, pepezaliwa pa milyango penze asambili chikomo choyopa Ayuda, Yesu echiza epanama pakati noŵanenera, Mtendere kwanu. 20Akanene teti eŵalangizya manja ŵake na mchitumba mwake. Naŵo asambili esangalala pechimuŵona Asikuru. 21Yesu enena naŵo soti, Mtendere kwanu: nga ni Ŵata mwechinitumira neo, tetyo ni mnumtumirani mweo. 22Nipo akanene teti eŵafuzilila nonena naŵo, Mpokereni Mzimu Mtuŵa: 23ŵonse amti molekelera viipa vyakulekelewa kwaŵo; ŵonse amti momangila vyakumangiwa.

24Sembe Tomaso, umo wa ŵala kumi na aŵiri, woitiwa Wa mapasa, ntenze naŵo pamo pechiza Yesu. 25Teti ayakene asambili enena naye, Tamuŵona Asikuru. Sembe yeve eŵanenera, Nikakanoŵona mmanja mwake mikovu ya mizumali, nopisya munwe wangu mmikovu ya mizumali, nopisya kwanja kwangu mchitumba mwake sinizomera yai.

26Lomba akapitepo masiku asano na atatu asambili enzemo soti na Tomaso pamo naŵo. Echiza Yesu, apo pa milyango penze pozala, epanama apo pakati echiti, Mtendere uŵe kwanu. 27Pamene apo echiti kwa Tomaso, Tambikizya kuno munwe wako noŵona manja ŵangu; tambikizya kwanja kwako nokupisya mchitumba mwangu: usaŵa uliye mvwano, wingozomera. 28Tomaso eyasuka emnenera, Asikuru wangu na Mlungu wangu. 29Yesu enena naye, Wazomera pawaniŵona: ana shuko ŵala ozomera ŵosaŵona.

30Viziŵikwilo vimbi vinyinji evichita Yesu pa menso pa asambili, vyamene viliyolembewe mbuku ili: 31sembe ivi vilembewa mozomera kuti Yesu ni Kristo, Mwana wa Mlungu; na pozomera mwakuŵa na moyo pa zina lake.

Currently Selected:

M. Yohana 20: MA23

Highlight

Copy