M. Yohana 16

1NALAŴIRA namwe ivi mngapilingishiwe. 2Azamfumyeni mmasunagoge: inde, nsita ikuza yati alinge wompayani kuti omtumikila Mlungu. 3Azachite ivi pakuti aliyoziŵa Ŵata kano neo. 4Lomba namnenelani ivi kuti peiti ize nsita yake mvikumbukile kuti nimuuzyani. 5Lomba nikuya kwa ula enituma; paliye wa mweo onikonsha, Mkuya kuni? 6Sembe pakuti nalaŵira namwe ivi mandandauzi azula mmitima mwanu. 7Sembe neo numuuzyani vyendi; Ni chiweme kwanu kuti nifumepo: pakuti nikakanofumapo Chipuzisya ula samzilani; sembe nikaya nikamtume kwanu. 8Naye akaza azachipe mlandu charo cha pansi pa viipa na pa chilungamo na popinguzi: 9pa viipa pasanimvwila neo; 10pa chilungamo panikuya kwa Ŵata, namwe simuniŵona soti; 11popinguzi chikomo mmbili wa charo cha pansi alupinguliwe. 12Nikali naŵo malizu anyinji ŵolaŵira namwe, sembe simngaŵakoselele lomba. 13Sembe akaza yeve, Mzimu wa chendi, azomtanguzyani mvyendi vyonse: pakuti sati azanene vya yeka; viri vyonse vyati amvwe azavinene: naye azamlululileni vintu viti vize. 14Azanichinzike: pakuti azaule vyangu novikundulula kwanu. 15Vyonse vyali navyo Ŵata ni vyangu: ni panati kuti oulamo vyangu, kumbi azamkundululileni mweo. 16Kansita katonto simuniŵona soti; soti kansita katonto muze muniŵone. 17Asambili ŵake euzyana, Ni chinji ichi chakutinenera, Kansita katonto simuniŵona; soti kansita katonto muze muniŵone: soti, Pakuti nikuya kwa Ŵata? 18Teti echiti, Ni chinji chakunena, Kansita katonto? Situziŵa chakunena. 19Yesu eziŵa kuti esakomkonsha enena naŵo, Kansi mukonshana mweka zya ichi chinanena, Kansita katonto simuniŵona, soti kansita katonto muze muniŵone? 20Lezee lezee numuuzyani kuti muze mlile nolizya simpingu, sembe charo cha pansi chize chisekelele: muze mndandaule, sembe mandandauzi ŵanu azayaruke nseko. 21Mwanakazi povyala mwana ondandaula payaza nsita yake: sembe akapapa mwana ntokumbuka soti chipota chikomo chosangalala pavyalikwa muntu mcharo. 22Tetyo namwe lomba mundandaula: sembe neo nize nimuŵoneni soti, na mitima yanu ize isekelele, na chimwemwe chanu paliye ati amlondeni. 23Msiku lila simti munikonshe kantu. Lezee lezee numuuzyani, Mkasenga chiri chonse kwa Ŵata azampeni mzina langu. 24Mpaka lero mkaliyosenga kantu mzina langu: sengani ninga mpokere, kuti nseko yanu isilizike.

25Ivi vinalaŵira namwe mnzenguluka: ikuza nsita inti nikanolaŵira namwe soti mnzenguluka, lomba nize nimuuzyeni pasweta zya Ŵata. 26Siku lila mze msenge mzina langu: sinunena namwe kuti nize nimsengereni kwa Ŵata; 27pakuti Ŵata mwine omtemwani, pamunitemwa neo nozomera kuti nifuma kwa Ŵata. 28Nifuma kwa Ŵata, niloŵa mcharo cha pansi: soti nuchisiya charo na kuya kwa Ŵata. 29Asambili ŵake echiti, Ŵonani, lomba mulaŵira pasweta kosalaŵira mnzenguluka. 30Lomba tuziŵa kuti muziŵa vyonse, simusoŵa ali wonse amkonsheni: pa ichi tuzomera kuti mwifuma kwa Mlungu. 31Yesu eŵayasuka kuti, Muzomera lomba kansi? 32Ŵonani, ikuza nsita, inde yaza kale, imti mumwazike ali wonse ku vyake mwine nonisiya neo neka: sembe neo sinili neka, pakuti Ŵata ali pamo nane. 33Ivi vinalaŵira namwe kuti mwa neo mwakuŵa nawo mtendere. Mcharo cha pansi muli naŵo matamano: lomba nkazikani mitima; neo nuchipulamo charo.

Currently Selected:

M. Yohana 16: MA23

Highlight

Copy