M. Yohana 14

1MITIMA yanu isafipa: mumchetekera Mlungu, chetekerani neo nane. 2Mng'anda ya Ŵata muli vikalo vinyinji; kati ntiteti sembe nimuuzyani: pakuti nikuyomuwamizyani ulo. 3Kati nikuya nomuwamizyani ulo nize niwere soti nimpokerereni mwangu namwine, kuti kunti nkaŵe neo mkonkalako namwe soti. 4Kwamene kunikuya muziŵa njira yake. 5Tomaso enena naye, Asikuru, situziŵa kumkuya; tiziŵe syani njira yake? 6Yesu emuuzya, Ne nine njira na vyendi na moyo: paliye omzila Ŵata sembe muli neo. 7Mngati muniziŵa neo sembe mumziŵa Ŵata soti: chitatikile lomba mumziŵa nomuŵona. 8Filipo enena naye, Asikuru, mtilangizye Ŵata, ninga ikumane. 9Yesu echiti kwake, Kansi nankala namwe nsita ino yonse, nawe wosaniziŵa, Filipo? uyo oniŵona neo omuŵona Ŵata; unenanji, Mtilangizye Ŵata. 10Kansi suzomera kuti nili muli Ŵata, na Ŵata muli neo? malizu anulaŵira namwe sinuŵanena neka: sembe Ŵata onkala muli neo ni ochita milimo yaŵo. 11Nichetekereni kuti nili muli Ŵata, na Ŵata muli neo: kati ntiteti nichetekereni chikomo cha milimo yeka. 12Lezee lezee numuuzyani, Uyo onichetekera, milimo inuchita azaichite naye soti; azachite ikuru yopula iyi, pakuti nikuya kwa Ŵata. 13Chiri chonse chimti mosenga mzina langu nize nichichite, kuti Awisi alemekewe mMwana. 14Mkanisenga kantu konse mzina langu nize nikachite. 15Kati munitemwa mosunga matetulo ŵangu. 16Neo nimsenge Ŵata, naye azampeni Chipuzisya umbi aŵekuŵa namwe maŵeromaŵero, 17niye Mzimu wa vyendi: uchisakuma charo cha pansi kumpokera, pachisamuŵona kano kumziŵa: mweo mumziŵa, pakuti onkala namwe, azaŵe mwa mweo. 18Sinti nimsiyeni ŵana anchete: nikuza kwanu. 19Kasala kansita katonto na charo sichiniŵona soti; sembe mweo muniŵona: panili moyo, namwe soti muze muŵe moyo. 20Msiku lila mze mziŵe kuti nili muli Ŵata, na Ŵata muli neo, na neo muli mweo. 21Uyo ana matetulo ŵangu noŵasunga ni onitemwa: naye onitemwa azatemweke na Ŵata, na neo nize nimtemwe nolilangizya kwake. 22Yuda (nte Iskariote) enena naye, Asikuru, ni chinji chapona chakuti mze mulilangizye kwasu, nte ku charo? 23Yesu eyasuka echiti kwake, Kati muntu onitemwa azasunge malizu ŵangu: na Ŵata azamtemwe, nase timzile nonkala naye. 24Uyo asanitemwa sosunga malizu ŵangu: na lizu limkumvwa nte langu, sembe la Ŵata enituma.

25Ivi vintu vinalaŵira namwe panunkala namwe. 26Sembe Chipuzisya, niye Mzimu Mtuŵa, wati akatume Ŵata mzina langu, azomsambizyani vyonse nomkumbusyani vyonse vinichiti kuli mweo. 27Mtendere numsiilani; mtendere wangu numpani: umo mchupera charo neo nte mnumperani. Mitima yanu isafipa kano kuchita mwezo. 28Mwamvwa mnanenera namwe, Nuimapo, kumbi numzilani. Mngati munitemwa sembe mwasangalala panikuya kwa Ŵata: chikomo Ŵata ni mkuru kupula neo. 29Lomba namuuzyirani katera pachikaliyochitika, kuti pachiti chichitike mchetekere. 30Sinilaŵira soti namwe malizu anyinji, pakuti nduna ya charo chino ikuza, ilive kantu muli neo; 31sembe kuti charo chiziŵe kuti numtemwa Ŵata: nga ni Ŵata mwechiniuzizya, tetyo ni mnuchitira. Imani takuya.

Currently Selected:

M. Yohana 14: MA23

Highlight

Copy