M. Yohana 13

1LOMBA pakaliyekuza masiku akuru a pasaka Yesu poziŵa kuti nsita yake yafwika yofuma mcharo cha pansi kuya kwa Awisi, pechiŵatemwa ŵake mwine ŵenze mcharo, eŵatemwa mpaka kumpezyo. 2Lomba pa mulalilo muŵepeki paluŵike mu mtima wa Yuda Iskariote, mwana wa Simoni, kumvumbula, 3Yesu poziŵa kuti Awisi empa vyonse mmanja mwake na kuti efuma kwa Mlungu na kuya kwa Mlungu, 4epanama pa mulalilo, eika minjira yake, noula nyula yopukutira nolimanga muluunda. 5Pamene apo etira manzi mchiŵate notatikosambika mendo a asambili, noŵapukuta na nyula yechilimanga nayo. 6Tetyo emzila Simoni Petro. Yeve enena naye, Asikuru, kansi munisambika mmendo mweo? 7Yesu eyasuka emuuzya, Chinuchita suchiziŵa lomba; uzomvwisye nsita ikuza. 8Petro emuuzya, Simti mosambika mendo ŵangu. Yesu emyasuka, Kati sinukusambika uliye chitwa pali neo. 9Simoni Petro emnenera, Asikuru, nte mendo ŵangu ŵeka, sembe soti manja ŵangu na mutu wangu. 10Yesu emuuzya, Uyo osambikiwa ntosoŵa sembe kusamba mmendo, lomba waliwamya kwene kantu: namwe muluwamyiwe, sembe nte monse. 11Pakuti emziŵa uyo ati amvumbule; ni pechiti, Nti monse muluwamyiwe.

12Lomba akaŵasambike mmendo noula minjira yake nonkala soti pansi enena naŵo Kansi muziŵa chanamchitirani? 13Munitula Msambizi na Asikuru: munena wino panili tetyo. 14Teti kati neo, panili Asikuru na Msambizi, namsambikani mmendo namwe kumo mosambikana mmendo. 15Pakuti nampani mlingo wakuti namwe soti mochita umo mnamchitirani neo. 16Lezee lezee numuuzyani, Kapolo nte mkuru kumpula asikuru wake; kano wotumiwa kupula uyo emtuma. 17Kati muziŵa ivi mwakupewa shuko kati mwakuvichita. 18Sinunena mweo monse: nuziŵa aŵo ŵinisalulapo: sembe ni kuti malembo ŵala asilizike akuti, Uyo akulya mitanda yangu eniimira katende kake. 19Chitatikile lomba numuuzyani pachiliyochitika, kuti pachiti chichitike mkazomere kuti ne nine wamene. 20Lezee lezee numnenelani, Uyo ompokera ali wonse unutuma onipokera neo; na uyo onipokera neo ompokera uyo enituma.

21Apo Yesu akanene teti ezingwa mu mzimu echita untoni wakuti, Lezee lezee numuuzyani kuti umo wa mweo anivumbule. 22Asambili ŵala elolesyana ŵekaŵeka povimvyiwa kuti wanena ŵani. 23Enzepo polyerapo oseama mchifuŵa cha Yesu umo wa asambili ŵake wechitemwa Yesu. 24Tetyo Simoni Petro emcheuzya enena naye, Tiuzyeni ni ŵani wakunena. 25Uyo akalusamile mchifuŵa cha Yesu emkonsha kuti, Asikuru, ni ŵani? 26Yesu naye eyasuka kuti, Ni uyo unti ntoŵezyere tozi nompa. Tetyo akalitoŵezye tozi eliula nompa Yuda, mwana wa Simoni Iskariote. 27Nipo pavuli pa tozi Satana eloŵa muli yeve. Naye Yesu emuuzya, Chiuchita puvyochichita. 28Lomba paliye muntu wa ŵala ŵenzekulya eziŵa chikomo chechimnenera teti. 29Pakuti ŵambi elinga kuti Yuda pakuŵa na chipaŵo Yesu ni pechimuuzya, Ukasite vutisoŵa ku masiku akuru, kano kuti apeko akavu kantu. 30Pamene apo yeve akapewe tozi epuvyofuma: wenze usiku.

31Lomba akafume Yesu echiti, Lomba Mwana wa muntu wachinzikiwa, na Mlungu wachinzikiwa mwa yeve; 32Mlungu amchinzike muli yeve mwine, naye amchinzike lomba pano apa. 33Mwe mwanamwe, kasalapo kansita katonto kanikali namwe pamo. Mze munisake: umo mwiniŵauzyira Ayuda, Kunikuya simngazeko, tetyo na lomba ni mnumuuzyirani mweo. 34Numpani tetulo lalomba lakuti motemwana; nga ni umo mnumtemwerani namwe kumo ni mumti motemwerana. 35Pa ichi ni mwati aŵoziŵira ŵonse kuti nimwe asambili ŵangu, chakuti muli nacho chitemwano umo na muyake.

36Simoni Petro enena naye, Asikuru, mkuya kuni? Yesu eyasuka, Kunikuya sunganikonke lomba; ukanikonke pavuli pake. 37Petro emnenera, Asikuru, ni chinji paningalekomkonkani lomba pano? Nze niike moyo wangu pa mlandu wanu. 38Yesu eyasuka, Kansi uŵike moyo wako pa mlandu wangu? Lezee lezee nukuuzya, Kombwe pakali wosalila unikane katatu.

Currently Selected:

M. Yohana 13: MA23

Highlight

Copy