M. Yohana 12

1LOMBA pezisalako nsiku zisano na imo ku pasaka Yesu echiza ku Betaniya, kwamene kwenze Lazaro wechizyusya Yesu kwa akufwa. 2Naŵo emteŵetera mulalilo kwamene kula: Malita etumikila, sembe Lazaro enze mwa aŵo enzenkezi pakulya pamo naye. 3Nipo Mariya eula mlingo wa litro wa mafuta ŵonunkila a nardo akufwa zinyinji, nomzoleka Yesu mmendo nompukuta mmendo na sisi lake: na ng'anda izula kununkila kwa mafuta. 4Lomba Yuda Iskariote, umo wa asambili ŵake, wamene ati amvumbule, echiti, 5Nga ni chinji mafuta aŵa paliyositiwa makobiri myanda itatu nopewa ku akavu? 6Elaŵira teti nte poŵakungulila akavu sembe pakuŵa njivi na pana chipaŵo eulamo zuŵikiwamo. 7Teti Yesu echiti, Mlekeni kwasunga kuza na siku loŵikiwa kwangu mu msitu. 8Pakuti akavu muli naŵo nsiku zyonse, sembe neo simuli nane nsiku zyonse.

9Pamene apo winji wa Ayuda wichimvwa kuti alipo: nawo wichiza si chikomo cha Yesu cheka, sembe soti kuti ukamuŵone Lazaro wechizyusya kwa akufwa. 10Lomba akuru a ansembe epangana kuti ampaye Lazaro soti, 11pakuti chikomo cha yeve ni pechiimapo Ayuda anyinji nommvwila Yesu.

12Mmawa mwake maumbamaumba amene echiza ku masiku akuru akamvwe kuti Yesu akuza ku Yerusalemi 13eviula vikwambala vya tukoma echiyomchinguzya ekuwa kuti, Hosanna: Woŵirikila uyo akuza pa zina la Asikuru, ni Mfumu ya Israeli. 14Naye Yesu poŵona kabulu enkalapo; 15umo mkwilembewera kuti, Usayopa, we mwana mwanakazi wa ku Zioni: ŵona, Mfumu yako ikuza yunkala pa mwana wa bulu. 16Asambili ŵake ntemvwisya ivi poyamba: sembe pechichinzikiwa Yesu pamene apo eluusya kuti ivi vilembewa vyake na kuti emchitira vyamene ivi. 17Tetyo maumba enze naye pamo pechiita Lazaro afume mu msitu nomzyusya kwa akufwa echita untoni. 18Chikomo choteti maumba soti ni pechiyomchinguzya, pakuti echimvwa kuti echita chiziŵikwilo ichi. 19Tetyo Afarisayo enena ŵeka na ŵeka, Ŵonani, simkufwa kantu: kaŵoneni, charo chamsuma chafuma nomkonka.

20Lomba enzepo Ahellene achite pa ŵala echiyolambila pa masiku akuru: 21naŵo emzila Filipo, wamene enze wa ku Betsaida wa mGalilaya, nomsenga kwake kuti, Asikuru, tupangwoŵona Yesu. 22Filipo echizomuuzya Andreya: Andreya echiza na Filipo, naŵo emuuzya Yesu. 23Yesu eŵayasuka echiti, Nsita yaza yakuti Mwana wa muntu achinzikiwe. 24Lezee lezee numuuzyani, Mbuto ya mapira ikakanopona mu msili na kufwa yunkala yeve yeka: sembe kati ikafwa yutwala vitwalo vinyinji. 25Uyo otemwa moyo wake outaya; na uyo otinka moyo wake mcharo cha pansi azausungire ku moyo wosasila. 26Kati ali wonse onitumikira naŵonikonka; kunti nkaŵe na mtumiki wangu soti akaŵe kwamene: kati ali wonse onitumikira Ŵata azamzizye wamene. 27Lomba mzimu wangu wakwima, nane ninenenji? Ŵata, munipokesye ku nsita ino. Sembe chikomo choteti ni chinizila ku nsita ino. 28Ŵata, zizyani zina lanu. Pamene apo lizu lifuma kumulu lichiti, Nalizizya, nane nze nilizizye soti. 29Tetyo maumba enzepeneme pafupi elimvwa echiti, Leza wauluma: ŵambi echiti, Malaika walaŵira naye. 30Yesu eyasuka echiti, Lizu ili silazila pa mutu pangu sembe pa mutu panu. 31Lomba pali kupinguliwa kwa charo chino: lomba mkuru wa mcharo chino apozewe kunja. 32Nane nikazoimyiwa kufuma pamsili nze nikoke ŵonse kwangu. 33Lomba elaŵira teti kululula imfwa yotyani yati akafwe nayo. 34Maumba naŵo emyasuka, Tichimvwa mdango kuti Kristo ula onkalilila maŵeromaŵero: nga muneneranji kuti Mwana wa muntu aŵoimyiwa? uyu Mwana wa muntu ni ŵani? 35Teti Yesu eŵauzya, Kasalapo kansita katonto kachikali chiŵalilo muli mweo. Yendani pamuli nacho chiŵalilo, isamfwanani mfinzi: uyo oyenda mu mfinzi soziŵa kwakuya. 36Pamuli nacho chiŵalilo chizomereni chiŵalilo, mwakuŵa ŵana a mchiŵalilo.

Yesu elaŵira ivi, naye efumapo noŵafisama. 37Sembe chukanga echita viziŵikwilo vinyinji vyoteti pa menso paŵo, ŵeve aliyomzomera, 38kuti malizu ŵechinena Isaya muŵirizi asilizike akuti,

Asikuru, ni ŵani ozomera kuŵirizya kwasu?

Na kwanja kwa Asikuru kuŵoneshewera kwa ŵani?

39Chikomo choteti ni pekwiŵakanga kuzomera, pakuti Isaya echiti soti,

40Eŵasinka mmenso mwaŵo noŵayumisya mitima yaŵo;

Angaŵone na menso ŵaŵo, noziŵa na mitima yaŵo,

Noyaruka,

Nane ningaŵapozye.

41Isaya enena ivi pakuti eŵona mchinzi wake; naye elaŵira zyake. 42Chukanga teti anyinji a mwa akuru soti emzomera; sembe chikomo cha Afarisayo ntesokolola, angafumyiwe msunagoge: 43pakuti etemwa ulemo wa ŵantu kupula ulemo wa Mlungu.

44Lomba Yesu ekuwa kuti, Uyo onimvwila neo ntonimvwila neo sembe uyo enituma. 45Naye uyo onilola neo omulola uyo enituma. 46Nichiza msaniko mcharo cha pansi, kuti ali wonse onimvwila asankala mu mfinzi. 47Kati muntu akumvwa kunena kwangu nosakuchita neo sinumpingula: peniliyozila kupingula charo sembe kupuzumusya charo. 48Uyo onikana neo nosapokera kunena kwangu ali naŵo ompingula: malizu eninena, amene aŵa ni ati azampingule msiku losililila. 49Pakuti sinenzolaŵira neka; sembe Ŵata enituma ni enipa tetulo lakuti chinti ninene na chinti nilaŵire. 50Nane nuziŵa kuti tetulo lake ni moyo wosasila: teti ivi vinulaŵira, nga ni Ŵata mwechiniuzizya ni mnulaŵilila.

Currently Selected:

M. Yohana 12: MA23

Highlight

Copy