मत्ती 26

यीशुह मारणेन चाल

(मरकुस 14:1-2; लूका 22:1-2; यूहन्ना 11:45-53)

1जेवी यीशु जी आखी वातू केय देणु ते आपणा चेलाह केणे लागू, 2“तुमूह मालूम हि कि दुय दिहापासाडी फसहन तिवार आविह, हि एने माणहान सोरो क्रुस पोर चढाव ने केरता धेरा जाय.” 3तेवी मुख्य याजक एने डाय डाया महायाजकान गिर जमाना, महायाजकान नाव कायफा एता, 4एने तास आपसामाय यीशुह गुपचुप देरावीन मारीन टाकणेन होम्च्यू रेचील. 5पुण ते केताला, “पर्व बुखेत नाहां; कां इही एणेन मां कि माणहामाय गडबड एय जाहो.”

यीशु पोर मोगाला इत्रना टाकणु

(मरकुस 14:3-9; यूहन्ना 12:1-8)

6ताहेरया यीशु बैथानी शिमोन कुष्ठरोगीन च्या घेराम एतो, 7तेवी एक बायकू संगम खेराह बासनाम बहुमुल्य तेल लीन यीशु हेऱ्यो आवी, एने ताहेरया ते रोटू केरीन केरता बोहनी तेवी तान मुंडीपोर तिने रोचवी देनी. 8पुण चेलाह हे देखीन जुलील गीया केहू लागिल, “ज्यो सुगंध तेलान का नाश केरील गीया? 9आवो तेलुहू जादा किमती पाकील गारीबांह रुपये आपुह शकताला.” 10हे समजून यीशु ताह कियील, “तुमूह आवो बायकू काहा त्रास आपणु? काय आवो केरता कि तिने मारकेरीन हाजो किरील हि? 11गरीब तर तुवाहेर्यो कायम रेतेह, पुण मी तुवाहेर्यो कायम रेहू नाहं. 12ताहेरया तिने मारो शरीरपोर हे सुगंधि तेल टाकील हे, जानकेरता टाकील कि मारो जुना टाईमपोर तियारी तिने केरील. 13मी तुमूह खेरीच किथे, आखा जगाम जाहारी कां हा पोरचार आपणे माय आवी, ताहारी आवो बोहीही कामान वर्णन पुण इआवीह केरणेम आवी.”

यहूदा इस्करियोतीन धोको देणु

(मरकुस 14:10-11; लूका 22:3-6)

14तेवी बारा मायरीन एक ज्यान नाव यहूदा इस्कर्योत, एता मुख्य याजका आहाने गीयो. 15एने तान कियील “जर मी यीशुह तुमरो आथे देराव आपण्यू तर माहु काय आपण्यू?” एने तास ताह चांदीन तीस सिक्के तोलीत आपील. 16तेवी पासून तो ताह देरावीन आपणे केरता योग्यवेळ होदणे लागिल.

चेला हेरी फसहने आखरी भोज

(मरकुस 14:12-21; लूका 22:7-14,21-23; यूहन्ना 13:21-30)

17ओवतो चेला बेखमीर रोटान तीवारान पेल्ला एक दिह केरावी, यीशु आहने आवीन फुसनेनकेरता लागिल, “तुवाह कां बेखमीर रूटू खाणे तिवार फसह केरता तियारी केरावी इही लागीह?” 18तान कियील, “नगरांत ता माणहान आहनी जाइन ताह केवो, गुरु किथी हि मारी टाइम आहनी हि. माहु मारो चेला हेऱ्यो फसह तिवार मोगावणे हि.” 19तेवी यीशुन आज्ञेनुसार, चेला नी फसह तियारी केरील.

20ताहेरया हांजपोर एनी, तेवी ते बारा चेला यीशु हे-यो खाणेन बोहू. 21ताहेरया ते जेवण केरतीन एता, तेवी तान कियील, “मी खेरीच किथे कि, तुमरे मायरीन एक माहु देरावीन आपण्यू हि.” 22ज्यापोर ते जादा दुखां एयीन, एक एक जन ताह फुचने लागिल, “हे प्रभु, मी तर नाहं ना?” 23तान कियील, “तो ज्यान मारहे-या वाटकामाय आथ टाकील हि, तोच माहु देरावीन आपण्यू हि. 24माणहान सोराह तर जोहलो तान बारामाय लेखील हि, तोहोलो एयुच हि; पुण तान हाय ओहलो ज्यान उगेरीन माणहान सोरो देरावीन आपणे माय आवी: ता माणहा केरता हाजो एता जर तान जोनुमोज लीईल नसतू.” 25तेवी ताह देरावीन आपणार म्हणजे यहूदाने कियील, हे गुरु, “काय मी हि तो?” तान कियील, “तू स्वताच केय देनो.”

प्रभु भोज

(मरकुस 14:22-26; लूका 22:15-20; 1 कुरिन्थियो 11:23-25)

26ताहेरया ते जेवण केरतीन एता यीशु रूटू लीईल एने आशीर्वाद मागिल रूटू मुडीन चेला आपतेन कियील, ली एने खा हे मारा शरीर हि. 27ओवतो तान प्याला लियेल आभार मानना एने ताह आपतेन कियील तुमूह आखा या मायरीन पिवू. 28कारण हे मारो वाचान रक्त हि जे माणहा केरता पाप्यान क्षमा केरीन टाकील जाहू हि. 29पुण मी तुमूह किथे कि अंगूरांन रूह एविरीन ता दिहावोर पिनार नाहं ताहउर मी आपणो आबाकने राज्यातम नोवालो अंगूरांन रूह पिनार नाहं. 30ओवतो ते गीत गावित जैतुनान डोंगरापोर चेडिन गीया.

पतरसान यीशुह नकारणेन भविष्यवाणी

(मरकुस 14:27-31; लूका 22:31-34; यूहन्ना 13:36-38)

31तेवी यीशु ताह कियील, “आज राती आखा तुमूह मारबाराम ठोकर खाहू, ओहलो शास्त्रलेख हि कि मी मेंढवालो मारणार एने मेंढरे वेराय माय एय जाती. 32पुण मी जीवतालू एह तेवी मी तुमरे पेल गलील माय जाह. 33पतरस कियील जर आखा जेरी तार बारामाय ठोकर खाय ते खाय पुण मी केधीच ठोकर नाय खाव.” 34यीशु ताह कियील मी खेरीच किथु का आजुच राती कुकडाह वाहणेन पोयले तू माहु तीन वारीन नाकारही. 35पतरस ताह कियील जर माहु तार हे-यो मोरने पोडी तेभी मी तुवाह नाकार नाय बोगवानान एने, आखा चेला भी जिच वात कियील.

गतसमनी भोगीच्यान प्रार्थना

(मरकुस 14:32-42; लूका 22:39-46)

36तेवी यीशु ताहेऱ्यो गतसमनी नावान जागीपोर आवा एने आपणो चेला कियील, जेवीवोर मी जीहीजाणेन प्रार्थना करने तुमूह न्याहीरीच बोहो. 37तान आपणेहेर्यो पतरस एने जब्दीन दुयू सोरा लीईल एने दुखाम एने कष्टी एहू लागिल. 38ओवतो तान ताहाच केदा मारा मोन दुखी हि मी मोरण्यू, ओलख दुखी एनो हि न्याहीरीज उबरीवू एने मारहे-या जागे रीवू. 39ओवतो तो थोडो ओगाण गीयो पाया पोडीन प्रार्थना केरूह लागिल “हे मारो आबुक, जर शेक्यो रेंय तर हा प्याला माफायरीन निकलीन जाहू आप तेभी पुण मारी नाहं तारी ईच्छा पुरो एहू आप.” 40तेवी तो चेलान आहने आवा एने ताह हूवताला देखीन पतरसाह कियील काय तुमूह मारहे-या थोडूटायम पुण जीवहु शकले नाहं? 41जागे रीवू एने प्रार्थना केरतीन रीवू कि तुमूह परिक्षाम पोडहुं नाहा आत्मा तर तियार हि पुण शरीर दुर्बल हि. 42ओवतो तान दिहीरीवेले जाइन ओहलो प्रार्थना केरील, “हे मारो आबुक, जर हा प्याला पिलाशिवाय टोलोंत जात निह एय तर तारी ईच्छा एहू आप.” 43तान उन्जू ओवतो आवीन हूवताला देखील कारण तान डोला हुवितो बारो एय गीयो एता. 44तो ताह उंजू सोडीन निकलीन गीयो एने तीच वात केयीन तिसरिवार प्रार्थना केरणे लागिल. 45उंजू ओवतो तो चेलान आहने आवीन ताह कियील का तुमूह एवीज आराकेरिन हुवीन रेणा हि? देखू टाइम आवीन गीयी हि माणहान सोरो पापी माणहान आथे देराय. 46उठू, चालू एने देखू माहु देरीन आपणार आहनी आवील हि.

यीशुह बोन्दि बोणावणो

(मरकुस 14:43-50; लूका 22:47-53; यूहन्ना 18:3-12)

47ताहेरया तो हे किथी एतो, तर देखू यहूदा बारातून एक एतो आवीन गीयो एने ताहेऱ्यो तलवार एने डेंगा लेद्लो एक मोठू टोळां एतो ज्याह मुख्य याजक एने डाय डाया मोकलील एता. 48देरावीन आप्नारावाही ताह हि निशानी आपील एती, ज्यान मी चुंबन केरुहू तोच रे ताह देर लेज्यो. 49तो चालूच यीशु हेऱ्यो आवीन बोल्णु हे गुरुजी नमस्कार एने तान चुंबन केर्यो. 50यीशु ताह कियील दोस्ती ज्या कामान केरता तू आवा हि ताह केर, तेवी तान यीशु आहनी आवीन ताह देराव दियेल. 51तेवी यीशुन हेरीमाय वालो एकजाण आथ ओगांण केरीन तलवार खेचीन महायाजकान दासापुर चालाडीन तान कान काट दियेल. 52तेवी यीशु ताह कियील आपणी तलवार म्यानमाय मेल कारण जो तलवार चालाडने तो आखा तलवारी केरिनच नाश एती. 53केव्ही काय तुमूह विचार केरणू काय कि मी आपणो आबाक विनंती केरूह शकत नाहं एने तो स्वर्गदूत चालूच बारा सैन्याचा दलोमरीन सैन्यदल मारो अधिकाराम केरीन आपण्यू. 54पुण तेवी पवित्र शास्त्र कोहलो पुरो एय कि ओहलो ला जरुरी हि? 55तेवी यीशु गर्दीह कियील काय तुमूह तलवार एने डेंगा लीन माहु देरणे आवाह जीहीकाय मी डाकू हि? मी दाडीन मंदिरामाय बोहीन हिकाडतालु, एने तेवी तुमूह माहु नाह देरील? 56पुण ज्यो आखो जानकेरता एय गीयो का भविष्यवक्ता वचन पुरो एने जुवी तेवी आखा चेला ताह सोडीन नाह गीया.

केफान सामने यीशु

(मरकुस 14:53-65; लूका 22:54-55,63-71; यूहन्ना 18:13-14,19-24)

57एने यीशुह देरीन एतो ताह कायफा महायाजकान ओगांण लीन गीया, ताहरी शास्त्री एने डाय डाया एखठाच जोमना. 58पतरस भी थोडो सेटेरिन तान पासाण पासाण महायाजकान खोलीम पोचनो, एने ताहरी माय काय एती ते देखणेन पहारेकऱ्या हेर्यो बोह गीयो. 59मुख्य याजक एने आखा न्यायसभा यीशुन विरूद्धाम खोटी गवाही प्रयत्न केरते रेणा ज्यान मुळे तो ताह मारीन टाकणे. 60एने मोकताज ठेगणे गवाही दारान होदामाय एता तेभी तो ताह जुडना नाहं तेभी सेवट दुयू आवीन केयेल का, 61एने केयील हि, मी बोगवानान मंदिराह पाडीन ताह तीन दिहामाय पोशा बोणावूह शकुह.

62तेवी महायाजकउबरीन ताह कियील, “का तू उत्तर नाह आपीत काय नाहा” ज्या माणहे तार विरुद्धामाय काय गवाही आपतेह. 63पुण यीशु ठावको रेणू जापोर महायाजक ताह कियील, मी जीवतालू बोगवानान शपथ आपथु, “जर तू बोगवानान सोरू मसीह हि तर आमूह केयीन आप.” 64यीशु ताह कियील, “तू स्वताह इही कियील तेभी पुण मी तुवाह किथे कि ज्यान ओगाण तुमूह माणहान सोराह आखा शक्तीमानाच्या जेवडी उगे बोहील एने आकाशान वादलामाय आवातल्या देखूह.” 65तेवी महायाजक आपणा फाडका फाडीन केयील का, ज्यो बोगवानान निंदा केरीह, ऐवी उंजू आमूह गवाही दारान काय गिरीज हि? देखू तुमूह भी होमेल्नी हेते. 66ऐवी तुमरो काय विचार हि? तास उत्तर आपील तो मृत्यू दण्डास योग्य हि. 67तेवी ता तान मुयापूर थूपील, एने कूण ते ताह दुमा केरीन देताला, एने दिहरा ते ताह थापाकेरीन दिन केताला, 68“हे, मसीहा, भविष्यवाणी केरीन आमूह के का तुवाह कूण देईल?”

पतरसा द्वारा यीशुह नकारणो

(मरकुस 14:66-72; लूका 22:56-62; यूहन्ना 18:15-18,25-27)

69पतरस खोलीमाय बाहेर बोहील एतो ओलाखमाय एक दासीने आवीन ताह कियील, “तू पुण गलीली यीशु हे-यो एतो.” 70पुण तीह बायकू ता आखा सुमोर तान कियील, “माहु समाजैल नाहं कि तू काय किथी हि.” 71तेव्ही तो बाहेर जाइन आखठा केरीन गीयो तेवी एक बायकू दासीह ताह देखीन ताहारी एता ताह कियील, “ज्यो माणुह भी नासरी यीशु हे-यो एतो.” 72तेवी तान शपथ खाइन नकार आपतेन पोशो कियील, “मी ता माणहाह ओळखतेह नाहं.” 73ओवतो वेलाम जे ताहरी उबरीयेल एता ता पतरसाहेर्यो आवीन ताह कियेल, खेरी खेरीच तू भी तामायरीन एक हि कारण “तारी कोली तुवाह प्रकट केरूह.” 74तेवी तो कोसने एने शपथ खाइन केरणे लागिल, “मी ता माणहाह ओलखी नाहं” एने तोलाचमा कुकडो वाहनो, 75तेवी पतरसा जीवात यीशु कियील एती ती वात इर आविह का, कुकडो वाहणेन पेल तू माहु तीन वारीन नाकर केरही, एने तो बाहेर जाइन मोठ मोठस रेडने लागिल.

Currently Selected:

मत्ती 26: NLXNT

Highlight

Copy