मत्ती 27

पिलातुसान सामने यीशु

(मरकुस 15:1; लूका 23:1-2; यूहन्ना 18:28-32; प्रेरितान कामे 1:18-19)

1जेवी वेगीस एनी ता आखा मुख्य याजक एने माणहान डाय डाया ज्या यीशुह मारणेन विचार किरील. 2एने ता ताह बांधीन पिलातुसान सुभेदार ज्यान आथाम होप दियील.

यहूदा इस्करियोतीन आत्महत्या

3ताहेर्या ताह देरीन आपणारा यहूदाने देखील कि तो दोषी नाहं एतो तो पस्तावील एने ते तीस चांदीन शिक्का मुख्य याजक एने डाय डाया यान उगे पोशा लावील. 4एने कियील, “मी निर्दोषांह मोत ने केरता देरीन आपील पाप किरील हि” ते कियेल, “तान आमूह काय? तो देखील ले.” 5उवतू तो मंदिर माय आवीन शिक्का जगार दिन जात रीनू, एने जाइन स्वता फासी लागाड लियील.

6मुख्य याजकावजेसे ते शिक्का लीन कियेल, “दानकोशात मेलणे हाजो नाहं, कारण हे रक्ताचे मोल हि.” 7सेवट ते विचार केरीन ता हिकणे उपऱ्याना पुराविकेरता कुंभाराहा खेत वेचातो लीईल. 8ज्यानकेरता ते खेत आज ताहवोर रक्ताचे खेत कियील जातेह. 9तेवी जे वचन यिर्मया भविष्यवक्तान द्वारे कियील एता ते पुरो एय गीयो: “तास ते तीस शिक्का म्हणजे ते ठेरायेल मोल ज्याह इस्राएलान कुलामरीन केताहा ठेराव्यू एता लेय लीईल, 10एने जीही बोगवानान माहु आज्ञा आपील एती तोहोलोच ता कुंभारान खेताहा मोल माय आपील एती.”

पिलातुसान यीशुह से प्रश्न

(मरकुस 15:2-5; लूका 23:3-5; यूहन्ना 18:33-38)

11जेवी यीशु सुभेदारान ओगांण उबरील एतो तेवी सुभेदार ताह फुसील, “काय तू यहूदीयान राजा हि? यीशु ताह कियील तू जीवेच किथी हि.” 12जेवी मुख्य याजक एने डाय डाया तापोर दोष लागाड ताला तेवी तो काय उत्तर आपील नाहं. 13ज्यापूर पिलातुस ताह कियील, “काय तू नाहं होंबलीत का ज्या तारे विरुद्ध कोलाक खोटी गवाही आपतेन हि? 14पुण तो ताह एक भी वातीन उत्तर नाहं आपील, न्यावोर ताहवोर कि सुभेदाराह जुलुम आश्यर्य लागनो.”

मृत्यू-दण्ड कि आज्ञा

(मरकुस 15:6-15; लूका 23:13-25; यूहन्ना 18:39-19:16)

15एने सुभेदारान जी रीत एती का तान वल्हानडन तीवाराम माणहा केरता काल्लोबी एक बंदीवानाह ताह जा ओळखतेह एता, सोडीन आपतेन एता. 16ता टाइम बरब्बा नावान एक तामाय वालो एक नावलायेल गुंडो बोन्दिमाय एतो. 17सेवट ताहेरया ते एक्ठाच एय गीयो, तर पिलातुसान ताह कियील, “तुमूह कोणीही जाणे कि मी तुमरो केरता सोडीन आपुह? बरब्बाह, किव्हा यीशुह जो मसीह कियील हि?” 18कारण तो जाणतालो का मुख्य याजक ताह कुयराये से देराव देयेल एता. 19ताहेरया तो न्यायासणापूर बोह्ना एता तर तान बायकून ताह खोबीर मोकलना, “तू ता धर्मी बारामाय आपु पोडहुं नाय, कारण मी आज होपनाम तान सोरा जुलुम यातना सोसल्या.”

20मुख्य याजक एने डाय डाया एने माणहाह चेढाविल का ता बरब्बाह मांग लिवू, एने यीशुन नाश केरू. 21सुभेदारा ताह फुसील, “न्यादुयू मायरीन कूण जुवी का ताह मी तुमरीकेरता सोड बोगवानान?” ते ता कियेल, “बरब्बाह.” 22पिलातुसान ताह फुसील, “पोशा यीशुह जो मसीह केयेल जाथू, काय केरूह?” आखा ताह कियील, “ताह क्रुसांपोर खिळून टाकु” 23सुभेदाराने कियील, का, ताह काय वाईट किरील हि? पुण ते उंजू आयडीन आयडीन केणेंन लागिल “ताह क्रुसांपोर खिळून टाकु.” 24ताहेरया पिलातुसान देखील कि काही फरक नाहं दोवडतीन हि पुण तान उलटो तंटा वोदनेन चालेहे हि, तेवी तान पाणी लीन गेर्दी सुमोर आपणा आथ धुवील एने कियील, “मी आवो नीतिमानान रक्ताने निर्दोष हि; तुमरो तुमुच देखू.” 25आखा माणहान उत्तर आपील, “तान रक्त आमऱ्येपुररीन एने आमरा सोराह ओहलो.” 26ज्याह उपेरीन तान बरब्बाह तान केरता सोडीन आपील, एने यीशुह फरके मारीन तान स्वाधीन किरील कि क्रुसांपोर खिलाकेरीन ठोक बोगवानानू.

सिपायडा द्वारा यीशुन अपमान

(मरकुस 15:16-20; यूहन्ना 19:2-3)

27तेवी सुभेदाराने शिपाई यीशुह माय लावा आखीच तुकडी तान चारू उगे जोमाड्यो. 28एने तान फाडका काडीन ताह रातला रेगांन किरमिजी झगो, 29एने काटान मुकूट गुथीन तान मुंडीमाय रीगाड दियील, एने तान जेड्या आथाम वेत आपील एने तान ओगांण मांडा टेकिन तान थट्टा केरील एने कियील, “ज्यो यहूदीयान राजा हि, नमस्कार. 30एने तापोर थूपील; एने तोच जेड्या लीन तान मुंड पोर देणे लागिल.”

यीशुह क्रुस पोर चढ़ावाणो

(मरकुस 15:21-32; लूका 23:26-39; यूहन्ना 19:17-19)

31जेवी ता तान थट्टा केरीन ता ताह झगा तान शरीरामायरीन काडीन पोशा ताणुच फाडका ताह पेरावील, एने क्रुसांपोर खिलने केरीन लीन गीया. 32बाहेर जात एतालून ताह शिमोन नावान एक कुरनेकर माणुह मिलील ताह तास तान क्रुस ली जाणे केरताली गीया. 33एने ती जागे जो गुलगुथा म्हणजे कवटीई जागो आव पोचना 34ताच ताह पित्तमिश्रीत अंगूररस पिणे केरीन आपील, “पुण तो चाखीन देखीलपूर तो पिईल नाहा. 35ताह क्रुसांपोर खिल्योतांहा तास चिठ्या टाकीन तान फाडका वाट लीईल.” 36एने ताहारी बोहीन तान देखरेख केरणे लागा. 37एने तान दोषारोपान लेख तान मुंडीपोर लागाडया, काय ज्यू यहूदीयान राजा यीशु हि. 38तेवी ताहेऱ्यो दुय लुटारू एक जेवडी उगे एने एक डाखरीउगी, क्रुसांपोर चेढाविल एता. 39एने आवणारे जाणारे मुंडे आलाडी आलाडीन तान निंदा केरताला. 40एने ज्यो केताला का, “अरे, मंदिर पाडीन पोशो तीन दिहामाय बांधणार, स्वताह ते वोचाड! जर तू बोगवानान सोरो एय, ते क्रुसपूर रीन उतरीन आव” 41आवो रीतीवजेसे मुख्य याजक पुण शास्त्री एने डाय डाया ह्यांच्या बरोबरी ने थट्टा केरीन केतेह एता, 42ज्यो दिहराह वोचाडील, एने आपणो स्वताह नाह वाचाड नाह शेक्नु “इस्राएलान राजो” हि ऐवी क्रुस पुर रीन उतरीन आवा ते आमु तापुर विश्वास मेलूह. 43तो बोगवानानापूर विश्वास मेली; तर तो ताह होवा रेंय, तर ऐवी ताह सोडवीत ले, कारण तान कियील एता, “मी बोगवानान सोरो हि.” 44न्या केरीन लुटारू भी ताहे-यो क्रुसांपोर खिलना गीया एता, तान निंदा केरतीन एता.

यीशुन जीव निकलणो

(मरकुस 15:33-41; लूका 23:44-49; यूहन्ना 19:28-30)

45दिह तारीन तिसऱ्या पहरीरीन ता आखा देशाम आंधारो पोडील. 46सुमारे नवव्या टाईमान यीशु मोठली आवाजामाय आयडीन कियील, “एली-एली सबखुथनी?” म्हणजे हे मारो बोगवानाना, हे मारो बोगवानाना, तू माहु का सुळील? 47जे ताहारी उबरीयेल एता, तामायरीन केतेहेजोये हे होयलू कियेल, “हा तर एलीयाह आयेड थी.” 48तामायरीन एक जन जेल्दी धुवडील, एने स्पंज लेईन आंबेत बुडावल्यो, एने जेड्या टोकोहपूर मेलीन ताह चाखाछाकेरता आपील. 49काही जाणाह कियील, “रेहू आप, एलिया ताह वोचाडीहू आवथू कि नाहं.” 50तेव्ही यीशु पोशा मोठली आवाजामाय आयडीन जीव सोडील. 51फासी देखू मंदिरान पोडदु उपेर तारीन ते बुंदे ताहवोर फाटीन टुकडा एय गीयो: एने जोमनि काटील एने दिगुड फोडीन, 52एने कबरे उघाडील, एने हूवताला पवित्र माणहान मोक्तास शरीर जीवताला उठी, 53एने तान पुनरुस्थान ओवतो ते कबरे मायरीन निकलीन पवित्र नगरात गीया एने दिहरीबी देखा. 54तेव्ही शताधीपती एने ताहेर्यो यीशुन पाहरा केरताला, भूकंप एने जो काही एय जायेल एतो देखीन जादा बिय जायेल एता एने कियेल, “खेरीच ज्यो बोगवानान सोरो इतू” 55ताह मोक्तास बायकून ता गलीलामरीन यीशुन सेवा केरीन तान हेरी आवीन एता. 56त्या माय मरियम मग्दालिया, एने याकूब एने योसेफ ज्यान आहाक मरियम, एने जब्दीच्या सोरान आहाक एती.

यीशुह बुजणो

(मरकुस 15:42-47; लूका 23:50-56; यूहन्ना 19:38-42)

57जेवी हांजेपो इयेलपूर योसेफ नावान अरीमथाईया एक धनवान माणुह जो आपणे आप हि यीशुन चेलो एतो, आवा. 58त्याने पिलातुसाही जाइन यीशुन शरीर मांगील ज्यापरीन पिलातुसान आपील आज्ञा केरील. 59योसेफाहा शरीर लीईल, ताह साप फाडकाम गुडाळेहे, 60एने ताह आपणो नोवालो कबरेचए बनापुर मोठू दिगड लटकीत निकलीन गीया. 61मरियम मग्दालिया एने दिहिरी मरियम ताहारी कबरे आहनी बोहनी एती.

यीशुन माहाणा पोर पहरो

62दिहीरा एक दिह जो तियारी ओवतो चा दिह एतो, मुख्य याजक एने फरीसी पिलातुसाही टोलु कियेल, 63“ता कियेल हे महाराज, आमूह इर हि का तो लाबाड जीवतालू इतू” कियेल इतू का “मी तीन दिहान बादमाय पोशो उठूह.” 64सेवटे: आज्ञा आपील कि तिसऱ्या दिहावोर कबरेची पाहानारू केरील गीयी, ओहलो होवो कि तान चेला आवीन ताह चोरीते लीन जाहू तेवी फासाई धोका पिलरीन वाईट एय. 65पिलातुसाए ताह कियील, “तुमरीफाय जागतालो तर हि जा, तुमरे वजेसे एय तोहोलो होमाल केर. 66आखिर: ते जागतालो बरोबर गीया, एने देगडापूर शिक्का लागाडीन बरेचा होमाल किरील.”

Currently Selected:

मत्ती 27: NLXNT

Highlight

Copy