लूका 11

प्रार्थना हिकाडणो

(मत्ती 6:9-15)

1एक दिह तो काल्ली तेभी जागीपोर प्रार्थना केरतीन एतो. ताहेर्यो तो प्रार्थना केरीन निव्रावणे, तर तान चेला मायरीन एकजाण कियील, “हे प्रभु, जोहलो यूहन्नान आपणो चेलाह प्रार्थना केरणेन केरता हिकाडील, तोहोलो आमूह हिकाडीन आप.”

2तो ताह कियील, “जेवी तुमूह प्रार्थना केरुहू तर इही किवू: हे आमरा आबाक, तारो नाव पवित्र मानाय जाय, तारो राज्य आवी. 3आमरा दिह बोरान रूटू दाडीन दिह आमूह आप्या केर. 4आमरा पापान क्षमा केर, काहाकाय आमु भी आमरा अपराधीह क्षमा करणु, एने आमूह परिक्षाम लावही मां.”

मांगती रीवो

(मत्ती 7:7-11)

5ओवतो तो ताह कियील, “तुमरो मायरीन कूण हि तो तान एक हेरी हि, एने तो अर्ध्या राती जाइन तान आहने केनार हे दोस्ती; माहु तीन रूटू आप. 6काहाकाय एक प्रिनासी हेरी माहफाय आवा हि, एने तान ओगांण मेलणेन माहफाय कायीच नाहं; 7एने तो मायरीन उत्तर आपण्यू, माहु त्रास आपुह मां; ऐवी बायणो बंद हि एने मारी सोरा माहफाय हि तामुळे मी उठीन तुवाह आपुह शकत नाहं. 8मी तुमूह किथे जर तान हेरी असून पुण ताह आपतेन नाहं तेभी पुण लाज सोडीन मागणेन ताह आवश्यक एता तोला उठीन आपण्यू. 9एने मी तुमूह किथु का मांगु म्हणजे तुमूह आपुह; होदू म्हणजे तुमूह जुडी; ठोकु म्हणजे तुमरीकेरता उगाडणे माय आवी. 10कारण जो कूण मांगणे ताह जुडणे; जो होदणे ताह सापडी; एने जो ठोकणे तान केरता उगाडणे माय आवी. 11तुमरे माय ओहलो कूण हि आबुक हि, ता का तान सोरो रूटू मागी ताह दिगुड आपी, एने मासो मांगी तर ताह मासान बोदलाम ताह गेयळेक आपी? 12केव्ही इनंडो मागणार तर ताह विचू आपी? 13जेवी जर तुमु खराब रेयने आपणा सोराह हाजाली वस्तु आपणेन सोमजीतेवी, ते तुमरो स्वर्गावालू आबुक तुमूह पवित्र आत्मा काहा नेय आपी.”

यीशु एने दुष्ट आत्मान अधिकारी

(मत्ती 12:22-30; मरकुस 3:20-27)

14ओवतो तान एक मुक्का दुष्ट आत्माह काडील. ताहेर्यो दुष्ट आत्मा निकलीन गीयो तर मुक्का बोलणे लागिल; एने माणहाह आश्चर्य लागनो. 15पुण तामायरीन काही जाणाह कियील, हा तर बालजबुल नावान शैतान दुष्ट आत्मान प्रधानान मदतकेरिन दुष्ट आत्मा काढी. 16दिहरो तान परिक्षा केरणेन केरता ताफायरीन आकाशा मायरीन एक चिन्ह मागिल. 17पुण तान मनामरीन वातू समजून ताह कियील ज्या ज्या राज्यातम फुट एता तो राज्य उजाड एईन जातेह; एने ज्या घेराम फुट पुळील तो नाश एईन जातेह. 18जर शैतान जीवाचने विरोधी एईन जाहू तर तान राज्य केवी बोणावीन रेंय? कारण तुमूह मारो विषयातमाय केणु कि ज्यो शैतानान मदतकेरिन दुष्ट आत्मा काढी. 19हाजो मी शैतानान मदतकेरिन दुष्ट आत्मा काढी तर तुमरी सोरा कुणीन मदतकेरिन काढवू? तावजेसे तोज तुमरो न्याय केरुहू. 20पुण जर मी बोगवानान सामर्थ्यान दुष्ट आत्मांना काडीन तर बोगवानान राज्य तुमरेहे-यो आवीन गीया हि. 21ताहेर्यो बलवंत माणुह हत्यारे बांधीन आपणो घेरान रक्षा करने तेवी तान संपती वाचीन रेणेन. 22पुण ताउगेरीन होवटो बलवंत तापोर चेढाय केरीन ताह जिंकीन लेणे तर तान ते हत्यार ज्यापूर तान विश्वास एतो साडाळीनि लेणे एने तान संपती साडाळीनि वाटीन आपथु. 23जो मारहे-या नाहं तो मारो विरोधामाय हि एने जो मारहे-या नाहं जो मारहे-या टुलू केरतीन नाहं तो उधळतो.

अशुद्ध आत्माह घेरान होद

(मत्ती 12:43-45)

24“ताहेर्यो अशुद्ध आत्मा माणहा मायरीन निकलीन जातेह तेवी हुखेल जागाम आराम होदतेन फिरणे एने ताहेरया जुडतो नाहं तर किथी मी आपणो तान घेराम जारीन निकालनु एतो फिरीन जाहू. 25एने पोशा आवीन तान झेडगेचा एने होबाडील देखील. 26तेवी तो जाइन आपणे केरता दुष्ट आत्मा उंजू सात आत्मांना आपणेहेर्यो लीन आवथू एने ती तामाय वस्ती केरथू एने ता माणहान पासणली परिस्थिती पिलरीन वाईट एईन जातेह. 27ताहेर्यो तो ज्याह वातू केताच एतो तेवी गेर्दीमाय एक बायाकू मोठला शब्दान कियील, धन्य हि ते पेट ज्यामाय तू रेणू एने धन्य हि ते स्तन ज्याह तू चुहील. 28तो ताह कियील हा; पुण धन्य हेते जा बोगवानान वचन होमेलनू एने मानणु.”

स्वर्गीय पुरावान मांग

(मत्ती 12:38-42; मरकुस 8:12)

29ताहेर्यो मोठली गेर्दी एक्ठाच एईन जमत एती तेवी तो केणेंन लागिल, ओवतो युगान माणुह वाईट हेते; तो चिन्ह होद्णु पुण योनान चिन्हा सोडीन दिहरा चिन्ह ताह आपील जाहू नाहं. 30तोहोलोज योना निनवेन माणहा केरता चिन्ह ठेरेल तोहोलोच माणहान सोरो पुण ओवता कालाम माणहा केरता चिन्ह ठेरणार. 31दक्षिणान राणी न्यायान एक दिह आवी समयान माणहा हेऱ्यो उठीन ताह दोषी ठेरावणार काहाकाय तो सुलेमानाह ज्ञान होमलने केरीन पृथ्वीन टूकेरीन आवी, एने देखू, न्या तो हि जो सुलेमानारीन मोठू हि. 32निनवेन माणुह न्यायान एक दिह आवो काळान माणहा हेऱ्यो उबरीयेल रेयीन ताह दोषी ठेरावणार; कारण तास योनान पोरचार होम्लीन मोन फिरावना एता एने देखू न्या तो हि जो योनाफायरीन मोठू हि.

शरीरान दिवो

(मत्ती 5:15; 6:22-23)

33“कूण माणुह दिवू लागाडीन ताह घेराम केव्ही मापान बुंदे मेलणे नाहं पुण दिवह उपेर मेलणे, जानकेरता जो आहने आवणे ताह उजालो जुड सेकीह. 34तारो शरीरान डोलो तारो दिवू हि, तामुळे ताहेर्यो तारो डोलो साफ हि, तर तारो आखा शरीर पुण उजाला माय हि; पुण ताहेर्यो तो वाईट रेय, तेवी शरीर भी आंधाराम हि. 35तामुळे होमंबालीन रेणेन कि जो प्रकाश तुमरीम हि तो आंधारो बोणणेन मां. 36तामुळे तारो आखा शरीर प्रकाशित जुवी, एने तान काल्लूच भागाम आंधारो रेणेन मां, तेवी आखा इही प्रकाशित एय, जोहलो ता समयामाय एता, जेवी दिवो आपुह आपण प्रकाशाने तुवाह प्रकाश आपीह.”

शास्त्री एने फरीसीह फोटकार

(मत्ती 23:1-36; मरकुस 12:38-40; लूका 20:45-47)

37जेव्ही तो बोलीह एतो तेवी एक फरीसीन ताह विनंती केरील कि माहुफाय जेवण केरणू तो माय जाइन रूटू खाणेन बोहील. 38फरीसी ज्यो देखीन बोंनग्लाय गीया का तो रूटू खाणेन पेल नाह उगेल्नु 39प्रभु ताह कियील, हे फरीसीन, तुमूह तेली एने वाटीह बाहेररीन साफ केरणू तुमरे माय आंधारो एने दुष्ट पणा बोरेल हि. 40हे मुर्खानो, ज्यान बाहेरने भाग बोनाईल हि कायतान मायवाल भाग बोनाईल नाहं काय. 41पुण हा माय वाला वस्तून तुमूह दान केरीन दया तर देखू आखा काही तुमरीकेरता शुद्ध एईन जाहू.

42पुण हे फरीसी तुमरे पोर हाय! तुमूह पुदिना एने बडीशेप एने जुदाजुदा साग पातान दहावा भाग आपणु पुण लेनेआवो एने बोगवानान प्रेमाह टालीन आपणु; जुवी एता कि ज्याह पुण केरतीन रेणेन जुवी एता ज्याह सोडणेन मां एता. 43हे फरीसी तुमरे पोर हाय तुमूह आराधनालय माय मुख्य जागो एने बाजारामारीन नमस्कार ताह जुवी. 44हाय तुमरे पोर काहाकाय तुमूह लिकाईल कबरेसारखे हि जीपोर माणुह चालणु पुण होमजाडणे नाहं. 45तेवी एक व्यवस्थापक ताह उत्तर आपील, हे गुरु, आवो वातून केयेलकिरीन तू आमरा निंदा करने. 46तान कियील शास्त्री तुमरे पोर हाय तुमूह ओहलो बारलो जो वीसने केठीन हि तो माणहापोर मेलतेन पुण तुमूह स्वताह ता बाराह आपणो एक आगलीकेरीन पुण स्पर्श केरतीन नाहं. 47हाय तुमरे पोर तुमूह ता भविष्यवक्ता माहणे बोणावतेहे ज्याह तुमराच आबुक दादांनी मारीन टाकील एता. 48केरीन तुमूह गवाही हि एने आपणो बापदादान कामाम सहभाग हि; काहाकाय तास ताह मारीन टाकील एने तुमूह तान माहणे बोणावतेहे. 49ज्यानकेरता बोगवानान बुद्धीसी पुण कियील हि मी तान आहने भविष्यवक्ता एने प्रेरितांन मोकलुह, एने तो तान मायरीन कोलाक जाणाह मारीन टाकणे एने काही जाणान तरास केरुहू. 50तामुळे जोलाक भविष्यवक्ता रक्त जगान उत्पती फिरीन वोईल हि आखान हिशोब आवो पिडीन माणहा फायरीन लीईल जाय. 51हाबेलान खुन मायरीन जख-यान खुणेपर्यंत जो वेदीन एने मंदिरान माय घात किरील एतो मी तुमूह खेरीच किथु ज्याह आखा वातून हिशोब ज्याह पिडीन माणहा फायरीन लियेल जाय. 52हाय तुमूह व्यवस्थापक तुमूह ज्ञानान किल्ली लीईल हि पुण तुमूह स्वताहन प्रवेश किरील नाहं एने प्रवेश केरणारा पुण थोबाडीन मिलील हि.

53ताहेरया तो तारीन निकलील तेवी शास्त्री एने फरीसी वाईट प्रकारे तान पासाण पोडीन गीया त्रास आपुह लागिल कि तो ताहेर्यो उंजू बोलणेन जुवी. 54एने आवो नादान रेणा एकी तान तोंडच्या कानलु तेभी वातूह देरू.

Currently Selected:

लूका 11: NLXNT

Highlight

Copy