लूका 12

शास्त्री एने फरीसीन गेटमा बोणो

1ओलाक माय ता हेर्यी हजारोन भीड एय गीयी, न्याओर का ता एक दिहरापुर पोडते जाताला, ते तो आखाह रीन पोयले आपणा चेलाह केणें लागिल, “फरीसीन कपट रूपी खमीर से होम्बालीन रिज्यू. 2काही डाकील नाहं, एने काय लिकाईल नाह सोतो जो काय जाणाय नाय.” 3ज्यानकेरता जो काही तुमूह आंधाराम कियील हि, तो उजांलाम होमलील जाय; एने जो तुमूह कोठडाम कानाम केईल हि, तो धान्यापुर गाजाडील जाहू.

उसी से डरो

(मत्ती 10:28-31)

4“मी तुमूह जा मारा हेरी एहू शकणे कि जो शरीराह घात केरणू पुण तान पासाण उंजू काही नाहं केरूह शकत, ताह मा बिऊ.” 5मी तुमूह सुचवितो कि तुमूह कुणबी बिईल जाती, घात केरील तां बाद ज्याह नरकाम टाकणेन अधिकार हि, ताहुच बिणु. 6काय दुय रुप्यामाई पाच चिडाह नाह वेचाते? तेभी पुण बोगवान तामायरीन एक पुण विहिरीन नाहं. 7तुमरो मुडी लेडया भी मुजील हेते, ज्यानकेरता बिऊ मा, तुमूह जादा चिडाह पेक्षा मोलवान हि.

यीशुह नाकारणेन अर्थ

(मत्ती 10:32-33; 12:32; 10:19-20)

8“मी तुमूह किथु जो माणहान ओगांण माहु स्वीकार केरी ताह मी भी माणहान सोरो भी बोगवानान स्वर्गदूतांन ओगांण स्वीकार केर लेय. 9पुण जो माणहान ओगांण मारो नाकार केरी ते मी भी तान बोगवानान स्वर्गदूतांन ओगांण नाकार केरनेमाय आवी.” 10“जो कूण माणहान सोरान विरूधमाय काल्ली भी वात केय, ते तान अपराध क्षमा एय जाय, पुण जो पवित्र आत्मान निंदा केरी, तान अपराधान क्षमा नाय एय.” 11“जेवी माणहे तुमूह आराधनालयने अधिपती एने अधिकारी ज्ञान ओगांण ली जाती, तर कालजी नाहं केरणेन कि आमु कायताहा प्रकारे एने काय उत्तर आपण्यू, एने काय केनार. 12कारण पवित्र आत्मा तान टाइम तुमूह हिकाडीन आपण्यू कि काय केणेंन जुवी.”

एक मालदार माणहान वार्ता

13ओवतो गेर्दीमरीन एकजाण ताह कियील, “हे गुरुजी, मारो बाहाक किजी कि आबाकने संपती मारो हेरी वाटीन आप.” 14तो ताह कियील, “हे माणुह कूण माहु तुमरो न्यायाधीश वाटणी केरुहू निवाडीन हि?” 15तो ताह कियील, “होमंबालीन रीवू, एने प्रत्येक प्रकारान लोभामायरीन आपणो जीवेच: ला वोचाडीन मेलील; काहाकाय कुणीन जीवन तान संपत्ती तारीन रेथे नाहं.”

16तास ताह एक वार्तामा केयेल: कूण एक श्रीमंत माणहान जोमनिह जुलुम पिक आवा. 17तेवी तो आपणो मोनाम विचार केरूह लागिल, “मी काय केरूह? काहाकाय मारो न्या जागो नाहं जाहारी मारो पिक हे मेलूह.” 18एने तो कियील, “मी हे केरुहू: मी आपणी कोठारे मुडीन तान फायरीन मटली बोणावनार; एने ताह आपणो आखा दान एने माल मेलूह; 19एने आपणो जीवाह केनार कि जीवा, तारो आहने मोक्तास संपत्ती मिलील हि; मौज्या केरू, खा, पिवू, सुखानी रीवू. 20पुण बोगवानान ताह कियील, हे मूर्ख! आवो राती तारो जीव तारो तारीन लियेल जाहो; तेवी जे काही तू एखठाच किरील हि कुणान एय? 21ओहलोच तो माणुह पुण हि जो आपणो केरता धन एखठाच करने, पुण बोगवानान दृष्टीसमोर धनी नाहं.”

काल्लीच भी वातून चिन्तामा केरो

(मत्ती 6:25-34; 6:19-21)

22तेवी तो आपणा चेलाह कियील, “तान केरता मी तुमूह किथु, आपणा जीवान चिन्ता मां केरूह का आमु काय खाह; नाहं आपणा डीलान का काय पेरहू. 23कारण का जीव, एने फाडका पेक्षा शरीर विशेष हि. 24कागलापुर लक्ष मेलू, ता पेरणु नाहं एने काटणु भी नाहं; नाहं तान कोठारा नाह तान काणगी हि; तेभी बोगवान ताह खाणेन आपणे तुमरी किंमत चिडापेक्षा जुलुम जादा हि” 25तुमरे माय ओहलो कूण हि जो चिंता केरीन आपणा आयुष्यामाय एक टाइम भी वोळाव शकणे? 26तान केरता जर तुमूह आखाम आत्या काम देखी नाहं केरूह शकत, तेवी उजू दिहीरा वातू केरता काहा चिंता केरतीन रेणू? 27सोसनान फुलाह देखू तो केहिक वोदणु: मेहनत केरते नाहं, नाहं काटणी केरणू; तेभी पुण मी तुमूह किथु कि सुलेमान राजू भी आपणा आखा वैभवाम, एक होस फाडका पेरील नाह एतो. 28तान केरता जर बोगवान मोयदानान खेडाह, जो आज हि हेकाले भट्टीम टाकील जाय, ओहलो पिरिह; तर ज्या अल्पविश्वासी जाणाह, तो तुमूह काहा नाहं पेरावणार? 29एने तुमूह ज्यू वातू होदणेमाय मा रेहू का काय खाहू एने काय पिहु, एने नाहं चिंता केरू. 30काहाकाय जगामाय वाली जाती जी वोस्तून होदमाय रेणू, एने तुमरो आबाकाहा मालूम हि का तुमूह, जी वस्तून जरुरत हि. 31केरीन तुमूह तान राज्य एने तान धार्मिकता होदमा रीवू, तेवी ज्यू वस्तु भी तुमूह जुडी जाती.

धेनाह काहरी एकट्ठा केरणू?

32“हे आत्यो कळपा, मां बिऊ; काहाकाय तुमरो पित्याह हाजो लागीह, कि तुमूह राज्य आपज्यू. 33आपणी संपत्ती पाकील दान केरू; तोहोलोच स्वर्गामायील अक्षय धनान जीर्ण एने आवो थैली आपणे केरता केरीन मेलू ताहरी चोर आविह नाहं एने उदय लागणे नाहं. 34काहाकाय जाहारी तुमरो धेन हि, ताहारी तुमरो मोन देखी लागिल रेंय.”

तियार रीवू

(मत्ती 24:42-44)

35“तुमरी कंबरे बांधील एने जुवी एने तुमरो दिवे पेटाईल एने जुवी, 36एने तुमूह ता माणहान होस बना, जे आपणो मालकान वाट दिखिह रेणू कि तो एने-हाडामायरीन केवी पोशा आवी, एने ताहेरया तो आवीन बायणो ठोकहु तेवी चालूच तान केरता उगाळनेदे. 37धन्य हि ते दास ताहेर्यो मालक आवीन जागृत देखू; मी तुमूह खेरी खेरीच किथे कि तो कंबर बाधील ताह भोजन केरणे केरता बोहावूह एने आहने आवीन तान सेवा केरूह. 38जर तो रातीन दिहीरा प्रहरी केवी तिसऱ्या प्रहरी आवीन जागृत देखू, तेवी तो दास धन्य. 39पुण तुमूह हे होमजाडीन ली कि जर घेरान मालक्या मालूम हि कि चोर कायताहा टाइम आवी, तेवी जागृत रीवू एने आपणो घेराह फोडू आपील नसतू. 40तुमूह भी तीयारीम रेवू; कारण कि ज्या टाइम तुमूह विचार देखी केरीन नाहं, ता टाइम माणहान सोरो आवी.”

विश्वास योग्य दास कूण?

(मत्ती 24:45-51)

41तेवी पतरससान कियील, “हे प्रभु, काय हा वार्ता तू आमूह कि आखाच किथी आह.” 42प्रभु कियील, “तो विश्वास योग्य एने बुद्धिमान कूण हि, ज्यान मालक ताह दास चाकारापुर सरदार नेमिल कि ताह वेलेपूर भोजन सामग्री आपण्यू. 43धन्य हि ते दास, ज्याह आपणो स्वामींनी ओहलोस केरतालून देखी. 44मी तुमूह खेरी खेरीच किथे, तो ताह आपणी आखा संपत्ती उपेर अधिकार ठेरिनणार. 45पुण तो जर दास विचार केरुहू कि मारो मालक आवणेन वार केरतीन हि, एने दासे एने दासी न्या मोरू देहू लागिल, एने खाइन पिईन एने मस्त एय. 46ते ता दासान मालक ओला एक दिह, जेवी तो तान वाट नाय जोवी एने ओहली टायमे कि तो नाह जाणीत, आवूह एने ताह काटीन टाकणे ताह अविश्वासू हेरी नेमणार.” 47तो दास जो आपणो मालक्यान ईच्छा होमजाडणे एतो, एने तियार नाहं रेणू एने तान ईच्छा चालहु, जादा मार खाण्यू. 48पुण जो नाहं होमजाडीन मार खाणेन केरता काम केरूह तो थोडो मार खाण्यू; एने ज्याह होवटो होपीन आपील हि, तान फायरीन होवटो विसीन जाहू.

शान्ति नाह फुट

(मत्ती 10:34-36)

49“मी पृथ्वीपूर आगठो लावण्या केरता आवूह हि; एने काय ईच्छा हि फक्त हे कि ऐवी पेटील एती! 50तेवी तर एक बाप्तिस्मा लेणेनेन हि, एने जेवीवोर तो एय नाहं ताहउर मी कायताहा व्यवस्था माय रेहू! 51काय तुमूह होमजीह कि मी पृथ्वीपोर शांतता करण्या केरता आवूह हि? मी तुमूह किथु; नाहं तर आलेग केरणे केरता आवूह हि. 52पाच काहा का ऐवी तारीन एक घेरामाय पाच जन आपनेमाय विरोध केरुहू, तीन विरुद्ध माय दुयू एने दुयूविरुद्ध तीनु. 53आबुक सोराह, एने सोरो पीताहेर्यो विरोध केरुहू; आहाक सोरान एने सोरी आईक केरीन, हाहवूक वोवडी, एने वोवडी आहवूक हेरी विरोध मेलूह.”

टायमान ओलेख

(मत्ती 16:2-3)

54तान माणहा पुण कियील, “ताहेरया तुमूह वादडा पश्चिम उगेरीन आव तालून देखताला तेवी चालूच केणु कि पाणी पोडीह, एने तोहोलोच एता; 55एने ताहेरया दक्षिणेन वारो सुटी तेवी कि तेवी तुमूह केणु कि उष्ण एय एने तोहोलोच एता हि.” 56“हे कोपटी, तुमूह जोमनि एने आकाशान हुगुण पारखता आवणु, पुण ज्या युगान विषयामाय काहा पारख नाह केर्ते?”

आपणी समस्याह सोडवो

(मत्ती 5:25-26)

57“तुमूह स्वताह निर्णय का नाहं केरीन लेतेन कि हाजो काय हि? 58जर तू आपणा दुश्मोन हेऱ्यो वाद विवाद केरणारा हेरी अधिकारी फाय जात हि तर लागतालोच तान तारीन सूटण्याचा ताहवोर मेल केर, याज मां एणेन जोईल कि तो तुवाह न्यायधीशाह उगे लीन जाहू, एने न्यायाधीश तुवाह शिपायांच्या आथे होपू एने शिपाई तुवाह जेलीमाय टाकी. 59मी तुमूह हाचलीन केथु का, जेवीवोर तू एक एक दमड्या नाह आपण्यू ताहवोर तू सुटणार नाहं.”

Currently Selected:

लूका 12: NLXNT

Highlight

Copy