लूका 10

सत्तर चेलाह मोकेलणो

1आवो वातून बाद यीशु सत्तर एने माणुह निवाडीन आपील, एने ज्या ज्या नगरांत एने जागापूर तो स्वता: जाहू एतो, ताहारी ताह दुय-दुय केरीन आपणो उगी मोकलील. 2तो ताह कियील, “पाकील खेत जुलुम हि, पुण काम केरणार थोडोक हि; ज्यान केरीता पिकान मालक्यान आपणा खेतामाय पिक काटनिण केरता काम केरणार मोकली केरीन प्रार्थना केरू.” 3जा; देखू, मी तुमूह होस कोल्योमाय मोकलथू मी तुमूह मोकलथू. 4केरीन नाहं ते थेयली, नाहं ते झोली नाहं, चाट्या लिवू; एने मी वाटी कोणीह नमस्कार केरू. 5जां काल्ला भी घेरामाय जाहू, ते पेल केवू, ज्या घेरामाय शान्ति रेंय 6जर ताहारी कूण शान्तिन लायकीन रेंय, ते आमरी शान्ति तापुर रेय, नाहं तुमरी शान्ति उगे आवी. 7ताच घेराम रीवू, एने जो काही ताफायरीन जुडी, तोज खाऊ पिवू, काहाकाय काम केरणाराह आपणी मोंजरी जुडणे जुवी; घेरा-घेर मा फिरहू. 8कायताहा पुण नगरांत जाईल, एने तावाला माणहे तुमूह स्वीकारीन तर जे काही तुमरो सुमोर मिलील जाहू तोज खा. 9ताहरी वाला दुखा-याह हाजा केरू एने ताह केवू, बोगवानान राज्य तुमरे आहने आव पोचील हि. 10पुण जा नगरामाय जाहू, एने ताहरी वाला माणहान तुमरो स्वीकार नाय केरी, ते तान बाजारामाय जाइन किवू, 11तुमरा नगरामाय वालो मातड्यो भी, जो आमरा पायाह लागिल हि, आमु तुमरे ओगांण झेटकी देतेह; तेभी ज्यो होमजी लिवू का बोगवानान राज्य तुमरे आहने आव पोचील हि. 12मी तुमूह किथु का, न्यायान दिह ता नगरान दशा से सदोमान दशा जादा सहने योग्य रेंय.

मोन नाह फिरावणारा पोर हाय

(मत्ती 11:20-24)

13“हाय खुराजीना! हाय बेथसदा, सामर्थ्यान काम तुम्रेमाय किरील हि, जर तो सोर एने सिदोनमाय किरील जातेह तर तरट एईन एने राखेत बोहीन एने पश्चाताप केरतीन. 14पुण न्यायान दिह तुमरी दशा सोर से सिदोन एने गमोरान दशा जादा सहने योग्य रेंय.” 15एने हे कफर्णहुमा, काय तू स्वर्ग वोर उचो केरनेमाय आवही? तू ते अधोलोक वोर बुंदे जाही. 16“जो तुमुच होमेलनू, तो मान्हा होमलथू; एने जो तुमूह तुच्छ माणने, तो मान्हा तुच्छ माणने; एने जो मान्हा तुच्छ माणने, तो मारो मोकालनारह तुच्छ माणने.”

सत्तर चेलान वापस आवणो

17ते सत्तर आनंद केरीन आवा एने केणेंन लागिल, “हे प्रभुजी, तारो नावान अशुद्ध आत्मा पुण वंश माय हि.” 18तो ताह कियील, “मी शैतानाहा विजेनहोस स्वर्गामाय रीन पोडतेन दिखील एतो. 19देखू, मी तीह गेयळेक एने विचू न्या तुडविण्याचा, एने शत्रुची आखा सामर्थ्यापोर अधिकार आपील हि; एने कायताहा वस्तु हे-यो तुमूह काही त्रास एय नाहं. 20तेभी पुण ज्यापूर आनंदित मा एहू कि दुष्ट आत्मा तुमरो वंश माय हि, पुण ज्यापरीन आनंदित रीवू कि तुमरो नाव स्वर्गामाय लिखील हि.”

सोरा द्वारा आबाकाह प्रगट करणो

(मत्ती 11:25-27; 13:16-17)

21ताच टैमापोर तो पवित्र आत्मा माय बोराय गीयो एने आनंदित एनो, एने केदो, “हे पिता, स्वर्ग एने पृथ्वीन प्रभु, मी तारो उपकार मानथू का तू ज्यू वातूह ज्ञानवान एने सोमेजदाराह रीन लीकाड मिलील, एने सोरा पोर प्रकट केरील होव हे पिता, काहाकाय तुवाह ज्यो हाजो लागनो. 22मार पिता माहु आखो होप दियील हि; एने कुणीहुच मालूम नाह सोतो का सोरो कूण हि फक्त पिताह, एने पिता कूण हि कुणीहुच मालूम नाहं, फक्त सोरा फायरीन एने तो ज्यापूर ताह प्रगट केरणेन ईच्छा हि.” 23तेवी चेला उगे वोलीन कियील, “धन्य हि ज्याह डोला, जो ओवतो वातू जो तुमूह देखणु देखीह हि. 24कारण मी तुमूह किथु कि जादा भविष्यवक्ता एने राजान बाळगले कि ज्या वातू तुमूह देखणु देखतीच, एने ज्या वातू तुमूह होमेलनू होमलने पोर होमेल्नी.”

एक हाजाला सामरीन वार्ता

25ओवतो देखू, एक व्यवस्थापकाने उठिल एने केयीन तान परिक्षा लेणे लागिल, “हे गुरु, अनंत जीवनाम वारिस एणेन केरता मी काय केरूह?” 26तो ताह कियील, “व्यवस्था काय लिखील हि? तू किहीत वाचथू?” 27तास उत्तर आपील, “तू बोगवानान आपणो बोगवानान आपणा आखा मोना केरीन एने आपणा आखा जीवाने एने आपणा आखा ताकेत केरीन एने आपणो पुरो बुद्धीसी प्रेम केर; एने आपणो शेजाऱ्यापुर आपणो सारकोस प्रीती केर” 28तो ताह कियील, “तू बरोबर उत्तर आपील, ज्याच केर तर तू जीवनंत रेहि.” 29पुण ताह आपणो जीवेच: ला धार्मिक ठेरावनेन ईच्छेनि यीशुह फुसील, “तर मारो शेजारी कूण हि” 30यीशुन उत्तर आपील, “एक माणुह यरूशलेमान यरीहोमाय जात एतो कि चोरटा देरीन तान फाडकाकाढीन लीईल, एने मारीन ताह आरदोमरेल टाकीन निकलीन गीया. 31एने इही एय गीयो कि तान वाटीन एक याजक जात एतो, पुण ताह देखीन दिहीरा वाटीन निकलीन गीयो. 32याच प्रकारे एक लेवी ता जागीपोर आवा, तो पुण ताह देखीन दिहीरा वाटीन निकलीन गीयो. 33पुण एक शमरोनी प्रिनासी ताहारी आवा, एने ताह देखीन दया आवी.” 34तो तान आहने आवीन तान जखमा तेल एने अंगूररस लागाडीन पोट्ट्या बाधील, एने आपणो जेनावरापोर बोहाडीन उतार शाळेत लीन गीयो, एने तान सेवा केरील. 35दिहरा एक दिह ताह दुय दिनार काडीन उतार शाळेन मालक्या आपील, एने कियील, ज्यान होमाल केर, एने जे काही तुवाह उंजू लागणार, ते मी पोशा आविलपोर बोरीन आपण्यू. 36एव्ही तारो लक्षाम जो लुटारूमाय पोडील एतो, आवो तीनु मायरीन तान शेजारी कूण एतो? 37तो कियील, “तोच तान केरता तापोर दया केरील.” यीशु ताह कियील, “जा, तू पुण ओहलोच केर.”

मार्था एने मरियम

38जेव्ही ते जात एता तर तो एक गावाम गीयो, एने मार्था नावान एक बायाकू ताह आपणो गिर हादाडील. 39मरियम नावान तीन एक बोणिक एती ती प्रभुन पायाहे-या बोहीन तान वचन होंबलेह एती. 40पुण मार्था सेवा केरता बियीन गीयी, एने तान आहने आवीन केणे लागिल, “हे प्रभुजी काय तुमूह कायीच चिंता नाहं केरील कि मारो बोणिक माहु सेवा केरणेन केरता एखालीच मिलील? तान केरता तीह केवो कि मारी मदत केरावी.” 41यीशुन तीह उत्तर आपील, “मार्था, हे मार्था; तू जुलुम वातू केरता चिंता केरूह एने घाबरीह. 42पुण एक वात गर्जेन हि, एने तो हाजो वाटो मरियम ने निवाडीन लियेल हि तो तीन तारीन लियेल जाहू नाहं.”

Currently Selected:

लूका 10: NLXNT

Highlight

Copy