प्रेरितान कामे 4

माहासाभान सामने पतरस एने यूहन्ना

1ऐवी पतरस एने यूहन्ना माणहाहे-या बोलतेच एता, का याजक मंदिरान शिपायान मुख्य एने काही सदुकी ताहे-या आवा. 2ते तापोर ज्याह वातू उपेर जुलील एता कि पतरस एने यूहन्ना माणहाह संदेश आपतेन येतो यीशुन मरनेन ओवतो जीवतालू एणेन पुनरुस्थान विषयी पोरचार केरतीन एता. 3तास ताह अटक केरील तेवी ती टाइम हांजपोर एनी एती तान केरता ओंगाल्यो दिहावोर ताह चौकीत मिलील. 4पुण तान केरता तो संदेश होमलील तामायरीन जादा माणहान विश्वास किरील एतो तान संख्या सुमारे पाच हजार माणहे ताहवोर पोचील एती.

5ओंगाल्यो एक दिह तान सरदार, डाय डाया एने यहूदी धर्मशास्त्री यरूशलेम माय एकठा एय गीया. 6महायाजक हन्ना, कायफा, यूहन्ना, आलेक्स्द्र एने महायाजकान कुटुंबामाय, आखा माणहे पुण उपस्थित एता. 7ते ता प्रेरितांन तान ओगांण उबरीयेल केरीन फुसहु लागिल, तुमूह कायताहा शक्ती केरी जर कायतान नाव हे काम केरतीन हि, 8ओवतो पवित्र आत्मा माय पुरो एईन पतरस ताह कियील, 9हे माणहान अधिकारी एने डावालु माणहे, जर आज आमुफायरीन एक लेंगडू माणहा किरील हाजो विषयी हे चौकशी केरील जात हि कि, तो हाजो कोहलो एनो. 10तर तुमूहहु आखान एने इस्राएलचने माणहाह हे मालूम एने जुवी कि हे काम नासरी यीशु मसीहान नावान एय गीयो हि ज्याह तुमूह क्रुस पोर चेढाविन, आपील एने बोगवानान मरनेनओवतो पोशो जीवतालू किरील, ताउगेरीन हा पुरो हाजो एनो हि जो तुमरीओगाण उबरील हि. 11यीशु तोच, जो दिगुड ज्याह तुमूह बंधणा-यांनी तुच्छ मानेल तोच दिगुड अत्यंत महत्वपूर्ण (कोनशील) दिगुड बोणील. 12काहाकाय उद्धार दिहराफायरीन नाहं; कारण आकाशामाय बुंदे माणहाह इही दिहरा नाव आपील नाहं ज्यान उगेरीन आमरा उद्धार एने जुवी.

13ताहे-या तास पतरस एने यूहन्ना धेर्य देखील, एने हे वाचतेन लिखतेन केतेह एने हे साधारण माणुह हि, तेवी ताह जादा आश्चर्य लागनो ओवतो ताह मालूम कि हे यीशुहा-या रीईल हि. 14काहाकाय जो माणुह हाजो एनो एतो, ताह ताहेर्यो उबरील एतो जाइन दिखिह एता केरीन ताहेऱ्यो काही बोलणेन उगेरना नाहं. 15तास ताह यहूदी न्यायसभेमायरीन निकलीन जाणेन कियील, एने ओवतो आपसामाय विचार आपणो मेलणु केरू लागिल, 16“ज्याह माणहाहे-यो कोहलो व्यवहार केरुहू? कारण यरूशलेमा माय रेणार प्रत्येक माणहा मालूम एता, कि याउगेरीन एक उलेखनीय चिन्ह एय गीयो हि एने आमु ताह नकार आपुह शकत नाहं. 17पुण आमु ताह चेतावणी आपुह, कि ज्याह नावानविषयाम कुणाहे-यो हि चर्चा केरूह नाहा. जानकेरता माणहापूरिनूर ज्याह वातूनकेरता होवटो पोरचार केरणेन थोबविण शकले जाहो.” 18तास ताह आहने हादाडील एने आज्ञा आपील कि, “यीशुन नावाम कुणीहे-याभी चर्चा केरूह मा एने संदेश पुण आपुह मा.” 19पुण पतरस एने यूहन्ना ज्यान उत्तर आपील, “तुमुच केवो काय; बोगवाना ओगाण हे आमरे केरता योग्य हि कि बोगवानान होमलूह नाहा एने तुमरो होमलू? 20आमु जे काही देखील हि एने जे काही होमलील हि, ते केणेन केरीन आमु थोबहु शकत नाहं. 21ओवतो तास ताह होवटो दोमकाळील एने सोडीन आपील, ताह शिक्षा केरीन केरता ताह काही सिडिक सापडेल नाहं, काहाकाय जी घटना घेडील एती तान केरता आखा माणहे बोगवानान स्तुती केरतीन एता. 22ज्या माणहा, हाजो केरणेम मोठे कामा देखाडील एता, तान वय चाळीस वर्षारीन होवटो एता.”

विश्वास्यान प्रार्थना

23ताहे-या ताह सोडीन आपणे माय आवा, ते आपणो हेरी आहनी पोशा आवा एने ताह जे काही मुख्य याजकान एने डाय डाया अधिका-यान जे काही कियील ता, आखा ताह कियील. 24ज्यो होमलील ता आखा एकचीत एयीन मोठला आवाजामाय बोगवानाह कियेल, “हे प्रभु, तूच तोच हि जो स्वर्ग एने पृथ्वी एने समुन्द्र एने जो काही तामाय हि तान रचना केरील हि. 25तूच पवित्र आत्मा द्वारा आपणो दास, आमारो पूर्वज दाविद ज्यान मुया केरीन कियील इतू”

ज्याह जातीन माणहान का अहंकार देखाडील? आवो माणहान वाया योजना का केरील?

26जोमनिन राजान प्रभुन अभिषेक्तने विरुद्ध युद्ध केरणेन तियारी केरील, एने हाकीम मसीहान विरोधामाय एखालूच आवा.

27काहाकाय खेरीच, हेरोदेस एने पुन्तियुस पिलातुस भी आवो नगरामाय दिहरी जातीन एने इस्राएलाहे-यो मिलिन तारो पवित्र दास यीशुन विरोधामाय ज्याह तुमूह मसीहान रुपान अभिषेक किरील एता, वास्तव एकटाह एय गीयो एता. 28ते एखालूच एय गीयो जानकेरता कि तारी शक्ती ईच्छा नुसार जे काही देखील निश्चित एय गीयो ते पुरो एने जुवी. 29“एने ऐवी हे प्रभु, तान धमकीकडे लक्ष्य आप; एने आपणो दासाह निर्भयताने तारो वचन केणेन शेक्ती आप. 30ताहे-या हजो केरीन केरता तू आपणो आथ ओगाण केर एने चिन्ह तोहोलोच मोठो काम तारो पवित्र दासांद्वारे यीशुन नावाम किरील जाणे.” 31जेवी ता प्रार्थना केर लेयील, तेवी ज्या जागापूर ता एता तो जागो आल गीयो, एने ता आखा पवित्र आत्मा माय बोराय गीया, एने ता बोगवानान वचन इमुत केरीन केणे लागा.

विश्वास्यान सामुहिक जीवन

32विश्वासी माणाहान हा सहयोगी समुदाय एक मोन एने एक तन एतो, काडील इही किथी नाह एता कि हि मारी वस्तु हि, ताहेऱ्यो जे काही एता, ता आखा मिलिन वाटीन लेतेन एता. 33एने प्रेरित मोठला सामर्थ्या माय प्रभु यीशुन पोशो जीव उठणेन गवाही आपते रेंय एने बोगवानान मोठली कृपा एती. 34तामाय कुणीबी काय भी कोम दोवडतीन नाह एता; काहाकाय ज्या कुणी फाय खेत एने घेर एता, ते ताह पाकील आपतेन एता, एने तान जे धन जुडतो एता ते लीन; 35प्रेरितांन चरणी मेलणे एता एने ज्याह जोलाक गिरीज एता, ताह तोला धन आपील जात एता. 36वार्ताकेरता योसेफान नाव साइप्रस बेटान जन्मलेला एक लेवी एतो ज्याह प्रेरित बरनाबस अर्थात शान्तिन सोरो पुण केतेह एता. 37तान एक खेत पाकील आपील, तो तान मालिक एतो एने ते धन प्रेरितांन चरणी मिलना.

Currently Selected:

प्रेरितान कामे 4: NLXNT

Highlight

Copy