प्रेरितान कामे 5

हनन्याह एने सफिरा

1हनन्याह नावान एक माणुह एने तान लाडी सफिरा, ज्यान मिलिन आपणो ईस्सामाय रीन हिस्सो वेचील. 2एने आपणो लाडीन जाणकारीकेरिन तामायवाला काही स्वता: आहने लीन लीईल, एने काही धन प्रेरितांन पाया हेर्यो मिलना. 3ह्यापूर पतरसाने कियील, “हे हनन्याह! शैतानाला तू आपणो मोना माय ज्याह वातू केरता का जागो आपील कि तू पवित्र आत्माह ठेग-यु बोल्णु, जोमनि पाकील जूळना-या धेनामायरीन काही धन स्वता: आहने मेलीन लीईल? 4ते वेचनेनपिल काय तारीच नाहां एती? एने ताहेरया तू ती वेचना तेवी ते धन काय तारीच अधिकाराम नाह एता? तू ज्याविषायापूर का विचार किरील? तू माणहाह नाहं बोगवानान ठेग-यु बोल्णु हि.” 5हनन्याह ने ताहेरया हे शब्द होमलील, तेवी तो बुंदे पोडील एने जीव सोडील ज्या कूण ज्याविषायापूर होमलील, आखान बिय वाटू लागिल. 6ओवतो जुवान माणहान आवीन ताह उखीलील एने गुंडाला एने बाहेर जाइन ताह बुजील. 7सुमारे तीन तासान जे काही गेडनो एता ते मालूम येतो तान लाडी आहने आवी. 8पतरसाने तीह कियील, “काय तुमूह तुमरो खेत ओलाखमाय वेचने?” तिने कियील “होव, ओलाखमाय.” 9तेवी पतरसाने तीह कियील, “तुमूह दुयू प्रभुन आत्मान परिक्षा का समेज हि? देखू, तारो एदम्याह बुजणेन पाय दरिनाजेउर आवा हि, एने ते तुवाह पुण लीन जातीमाय.” 10तेवी ती तान पायान आहने आवीन बुंदे पुडील, एने मोरीन गीयी; ओवतो जुवान आहने आवीन तीह मुरील देखीन; विसीन लेईन गीया एने तीन एदम्याने आहने तीह बुजील. 11योग्य कलीसिया एने ज्या कूण हे होमलील ताह कठीण बिय लागनी.

चिन्ह एने अद्भुत काम

12प्रेरितांनद्वारे माणहामाय जादा चिन्ह प्रकट एहू लागिल एने आश्चर्य कामे केरतीन एता, ता आखा सुलेमानाच्या बोगवानानडीन आहने टोलु वोलील एता. 13तामाय भेलाईल एणेन कुणान धेर्य एता नाह एता; तेभी माणहे तान प्रशंसा केरीन एता. 14ता जागापूर प्रभु पुर विश्वास केरणारा बायकू एने माणहे वोळतेच एता. 15परिणामास्वरूप माणहे आपणा रोगी-दुखारया लीन खाटलापोर एने आथरुनापूर गेल्लीमाय हुवाडूहु लागिल, जानकेरता कि पतरस ता रेस्तामाय जाहो तेवी तामायरीन थोडोकउपेर तान सावुलू जर पुडील तेभी हजो एय. 16यरूशलेम जागे रीन नगरामरीन आपणा एने अशुद्ध आत्मा पासून पिडीत माणहाह लीन गटा गेटाम आवहू लागिल एने ता आखा हजो एता.

प्रेरिताह जेल

17ओवतो महायाजक एने तान हेरीवाला आखा हेरी म्हणजे आखा सदुकी तान विरुद्धामाय उबरीयेल रेणा ते किसवायल भूरील एता. 18तास प्रेरिताहा अटक केरीन लीईल एने सार्वजनिक बोन्दिखाणामाय टाकील. 19पुण रातीन समयी प्रभुन स्वर्गदूताने बोन्दिखाणान बायणो उघाडीन आपील, तास ताह बाहेर लीन जायीलओवतो कियील, 20“जा, मंदिरामाय उबरीयेल रीवू, एने ज्याह नोवालो जीवनानबारामाय माणहाह आखा केवो.” 21ताहे-या तासहे होमलील तेवी तास दिह उजाडील मंदिरामाय प्रवेश किरील एने संदेश आपणे लागिल, ओवतो ताहे-या महायाजक एने तान हेरी ताजागेन पोचेल तेवी तास यहूदी संघ तोहोलोच इस्राएलान डावालु ज्यान सभा लीईल ओवतो तास बोन्दिखाणामाय प्रेरितांन हादाडील. 22पुण ताहे-या अधिकारी बोन्दिखाणामाय गीया तेवी प्रेरित ताह ताहारी मिलना नाहं तास पोशा आवीन हे वर्तमान आपील एने. 23कियील, “आमूह बोन्दिखाणान सुरक्षान तालो लागाळील, एने बायणान आहने सुरक्षा-शिपाई उबरीयेल एता, पुण ताहेरया आमु बायणो उगाडनो, तेवी माय आमूह कूण देखाईल नाहं.” 24मंदिरान शिपायांन मुख्य याजक ज्यान ताहे-या हे होमलील, तेवी ते तान बारामाय चिंता माय पोडील एने विचार केरूह लागिल, ऐवी काय एय! 25ओवतो कूण आहने आवीन कियेल, “ज्या माणहान तुमूह बोन्दिखाणामाय टाकील एता, ते मंदिरामाय उबरीयेल रेयीन माणहाह संदेश आपतेन हि.” 26मंदिरान सुरक्षा शिपायांन, मुख्य आपणो अधिका-या हे-यो ताजागेन गीया, एने प्रेरितांन जुलुम केरता पोशा लीन आवा, कारण ताह बिणेन एती कि माणहे ताह (मंदिरान शिपायांना) दिगुड मोरू नाहा. 27ते ताह आहने लीन आवा एने आखामारीन मोठो यहूदी सभान ओगाण उबरीयेल किरील; एने ओवतो महायाजकांन ताह फुसतेन कियेल, 28“आमु तुमूह ज्याह नावान संदेश आपणेन केठीन आज्ञा आपील एतो? एने तुमूह पोशो आखा यरूशलेमेन आपणो संदेशाने बोरीन आपील हि एने तुमूह ज्याह माणहान रक्त अपराध आमुपूर लावतालो हि.” 29पतरस एने दिहीरा प्रेरितान उत्तर आपील, “आमूह माणहा पेक्षा बोगवानान वात होमेल्नी जुवी. 30ता यीशुह पूर्वजान बोगवान ज्यासे पोशो जीवतालू केरीन, उबरीयेल किरील हि ज्याह एक क्रुसापोर लेटकाईन तुमूह मारील एता. 31ताहुच बोगवान ने प्रभु एने उद्धारकर्ता ठेरावीन, तान जेवड्या आथा केरीन आखाह रीन उपेर केरील, का तो इस्राएल माणहान केरीन मोन फिरावणेन शक्ती एने पापान क्षमा प्रदान केरी. 32ज्याह आखा वातूनकेरता आमु गवाही हेते एने तो पवित्र आत्मा पुण हि जो बोगवानाने ताह आपील हि जे तान आज्ञा पोहणे केरणू. 33ताहे-या तासहे होमलील, तेवी ते जादा जुलील एने ताह मारणेन प्रयत्न किरील. 34पुण महासभामाय गमलीएल नावान एक फरीसी जो धर्म शास्त्रान शिक्षक एतो, ज्यान आखा माणहे मानपान आपतेन एता, उबरील रेणू एने आज्ञा आपील कि ताह थोडच वेला केरता बाहेर केरीन दया.” 35ओवतो तो ताह कियील, “इस्राएलान माणहा, तुमूह ज्याह माणहाहे-यो जे काही केरणू ते तावामाय केरतीन हि; विचार केरीन केरू. 36काही त्याकाळपेल स्वता: ला मोठा जाही केरणू केरतीन थियुदास प्रकट एय गीयो एता, एने सुमारे चारहोव माणहे तान पासाण पुण एय गीयो एता, पुण तो मारील गीयो, एने तान आखा चेलान वेरायगियान एनी एती, परिणामी कायीच एय गीयो नाहं. 37ज्याबाद माय नाव लिखाणेन टाइम गलील माय रेणार यहूदा प्रकट एनो एतो, तान पुण काही माणहाह तान पासाण आवणे खेचाना किरील एता; तो पुण मारीन गीयो एने तान चेलान वेरायगियान एनी. 38जानकेरता ज्याह वर्तमानानबाराम मी तुमूह किथी हि कि ज्याह माणहा फायरीन आलेग रीवू; यान ओहलाच एखाला रेहू दया काहाकाय तान हि योजना एने हि काम माणहा केरीन रेंय तर स्वयं समाप्त एय; 39पुण जर हे बोगवानारीन हि, तर तुमूह थोबविण शकत नाहं. तेवी एहू शकते कि तुमूह स्वता: ला बोगवानान विरोधामाय लेढ्तेहे देखूह तान हिक तास मानेल.” 40एने प्रेरितांन आहने हादाडळीन ताह फरके मारील एने ताह; हि आज्ञा आपील कि यीशुन नावानविषयाम काय भी चर्चा केरूह नाहा; एने तान जाहू आपील. 41ते प्रेरित ज्याह वातूनकेरता आनंद केरतीन येतो, कि ताह तान नावाकेरता अपमान सहन केरणेन योग्य मानना गीया एने यहूदी महासभामायरीन निकलीन गीया. 42ओवतो मंदिर एने घेरा घेरामाय, प्रत्येक एक दिह हि सुवार्ता कि यीशु जोस मसीह हि शिक्षण आपणेन एने पोरचार आपणेन तास केधीच सुळील नाहं.

Currently Selected:

प्रेरितान कामे 5: NLXNT

Highlight

Copy