मरकुस 9

ईशु चो रूप बदलतोर

1हुन हुनमन ले बल्लो, “मय तुमचो ले सते बलें सें कि जोन ऐथा उबा आसोत, हुनमन थानले कोनी-कोनी असन आत, कि जिदलदाय ले माहापुरू चो राज के सामरत संगे ऐतोर नी दकोत, हुलदाय ले मरना चो सुआद केबीई नी चाकोत।”

2छय दिन चो पाचे ईशु पतरस आउर याकूब आउर यूहन्ना के संगे धरलो, आउर चिमचाम ने कोनी डेंग डोंगरी थाने नीलो। हुता हुनमन चो पुरे हुनचो रूप बदलली, 3आउर हुनचो फटीई असन बरूक मुरयाली आउर ऐथा तक उजर होली, कि धरतनी थाने कोनी धोबी बले हुसन उजर करूक नी सके। 4आउर हुनमन के मूसा चो संगे एलिया दका दिलो; हुनमन ईशु चो संगे गोठयाते रवत। 5ऐ थाने पतरस ईशु ले बल्लो, “हे रब्बी, आमचो ऐथा रतोर ठीक आय: ऐईकाजे आमी तीन तम्बू बनाऊ; गोटक तुचो काजे, गोटक मूसा काजे, आउर गोटक एलिया काजे।” 6कसनबल्लोने हुन नी जानते रलो कि काय जबाप देयें दें, ऐईकाजे कि हुनमन खुबे डरू रवत। 7तेबे गोटक बादरी हुनमन के ढ़ापली, आउर हुन बादरी थानले ऐ शब्द निकरली, “ऐ मोचो लाड़रा बेटा आय, ऐचो सुना।” 8तेबे हुनमन उधापड़े भोंवरक नंजराला, आउर ईशु के छांडुन आपलो संगे आउर कोकीई नी दकला। 9डोंगरी ले उतर तो दाय हुन हुनमन के हुकुम दिलो कि जिदलदाय ले माने चो बेटा मरलो थानले जीव नी उठे, हुदलदाय ले जोन काई बले तुमी दकलासास हुनके कोचीई ले नी बोला। 10हुनमन ऐ गोठ के सुरता संगाला; आउर आपस ने बहस करूक मुरयाला, “मरलो बितामन थानले जीव उठतोर काय अरत आय?” 11आउर हुनमन हुनचो ले पचारला, “शास्तरीमन केंव बोलु आत कि एलिया चो पयले ऐतोर जरूरी आय?” 12ईशु हुनमन के जबाप दिलो, “एलिया सते पयले ऐऊन भाती सपाय काई सुदराये दे, मान्तर माने चो बेटा चो बारे ने ऐ केंव लिकलोर आसे कि हुन खुबे दुक उठाये दे, आउर नीच गेना जाये दे? 13मान्तर मय तुमचो ले बलें सें, कि एलिया तो ईलो, आउर जसन हुनचो बारे ने लिकलोर आसे, हुनमन जोन काई चाहला हुनचो संगे करला।”

दुष्टआत्मा ले उजरातोर

14जिदलदाय हुन चेलामन चो लगे ईलो, तेबे दकलो कि हुनमन चो भोंवरक बड़े भीड़ रूंड़ा होला से आउर शास्तरीमन हुनमन चो संगे बहस कर सोत। 15हुनके दकते ची सपाय खुबे भक्याक मुरयाला, आउर हुनचो बाटे पराऊन भाती हुनके जुहार करला। 16हुन हुनमन ले पचारलो, “तुमी ऐ मन संगे काय बहस करसास?” 17भीड़ थानले गोटक माने हुनके जबाप दिलो, “हे गुरू, मय आपलो बेटा के, जेचो थाने कोंदी दुष्टआत्मा भिड़ली से, तुचो लगे आनु रये। 18जाहांय बले हुन हुनके धरू आय, हुताय आपटून देऊ आय; आउर हुन टोंड ने फेफला भरून आनु आय, आउर दात कड़रू आय, आउर सुकते जाऊ आय। मय तुचो चेलामन ले बल्ले कि हुनमन हुनके निकराऊन दे ओत, मान्तर हुनमन निकराऊक नी सकला।” 19ऐ सुनुन भाती हुन हुनमन ले जबाप देऊन बल्लो, “हे अबिश्वासी लोगमन, मय केबे तक तुमचो संगे रयें दें? आउर केबे तक तुमचो सहें दें? हुनके मोचो लगे आना।” 20तेबे हुनमन हुनके हुनचो लगे धरून आनला। आउर जिदलदाय हुन हुनके दकलो, तेबे हुन दुष्टआत्मा तुरते हुनके अलटलो; आउर हुन भूईं थाने घसरलो, आउर टोंड ले फेफला निकरा ते घोंडरुक मुरयालो। 21हुन हुनचो बुआ ले पचारलो, “ऐचो असन दसा केबे ले आय?” हुन बल्लो, “पिलादाय ले। 22हुन ऐके नाश करतो काजे केबे तो आईग आउर केबे पानी ने घसरालो; मान्तर अगर तुय काई करूक सकीस, तो आमचो उपरे जीव दुकान भाती आमचो उपकार कर।” 23ईशु हुनचो ले बल्लो, “अगर तुय करूक सकीस? ऐ काय गोठ आय! बिश्वास करतो बितामन चो काजे सपाय काई होऊक सके।” 24लेका चो बुआ तुरते जुहार बीआर होऊन बल्लो, “हे परबु, मय बिश्वास करें से, मोचो अबिश्वास चो उपाय कर।” 25जिदलदाय ईशु दकलो कि लोग पराऊन भाती भीड़ होय सोत, तेबे हुन अशुद्ध आत्मा के ऐ बोलुन भाती खिजलो, “हे कोंदी आउर भयरी आत्मा, मय तुके हुकुम देयें सें, हुनचो थानले निकरून आव, आउर हुनचो थाने फेर केबीई नी ओल।” 26तेबे हुन चिचयाऊन भाती आउर हुनके खुबे अलटून भाती, निकरून ईली; आउर लेका मरलो असन होलो, ऐथा ले कि खुबे लोग बोलुक मुरयाला कि हुन मरलो। 27मान्तर ईशु हुनचो हाथ धरून भाती हुनके उठालो, आउर हुन उबा होलो। 28जिदलदाय हुन घर ने ईलो, तेबे हुनचो चेलामन ऐकला ने हुनचो ले पचारला, “आमी हुनके केंव नी निकराऊक सकलु?” 29हुन हुनमन ले बल्लो, “ऐ जात बिन पारथना चो काई आउर उपाय ले नी निकरूक सके।”

ईशु आपलो मरना चो बारे दुसरहार सांगतोर

30फेर हुनमन हुता ले गेला, आउर गलील ले होऊन भाती जाते रवत। हुन नी चाहते रलो कि कोनी जानोत, 31कसनबल्लोने हुन आपलो चेलामन के उपदेश देते आउर हुनमन ले बोलते रलो, “माने चो बेटा, मानेमन चो हाथे धराय जायेदे, आउर हुनमन हुनके मारून पकादे; आउर हुन मरलोर तीन दिन पाचे जीव उठेदे।” 32मान्तर ऐ गोठ हुनमन चो समज ने नी ईली, आउर हुनमन हुनचो ले पचारतो काजे डरते रवत।

चेलामन ने सपाय ले बड़े कोन आय

33फेर हुनमन कफरनहूम ने ईला; आउर घर ने ऐऊन भाती हुन हुनमन ले पचारलो, “बाटे तुमी काय गोठ ने बहस करते राआस?” 34हुनमन ओगाय रला, कसनबल्लोने बाटे हुनमन आपस ने ऐ गोठ बात करला कि आमचो थानले बड़े कोन आय। 35तेबे हुन बसुन भाती बारा झान के हाग दिलो आउर हुनमन ले बल्लो, “अगर कोनी बड़े होऊक चाहा ये से, तो सपाय ले नानी आउर सपाय चो सेवक बनो।” 36आउर हुन गोटक लेका के धरून भाती हुनमन चो मंजी ने उबा करलो, आउर हुनके कोरा ने धरून भाती हुनमन ले बल्लो, 37“जोन कोनी मोचो नाव ले असन लेकामन ले कोनी गोटक के बले गरहन करू आय, हुन मोके गरहन करू आय; आउर जोन कोनी मोके गरहन करू आय, हुन मोके नाई, मान्तर मोचो पठालोबिता के गरहन करू आय।”

38तेबे यूहन्ना हुनचो ले बल्लो, “हे गुरू, आमी गोटक माने के तुचो नाव ले दुष्टआत्मामन के निकरातोर दकलु आउर आमी हुनके मना करलु, कसनबल्लोने हुन आमचो पाट-पाट नी होलो।” 39ईशु बल्लो, “हुनके मना नी करा; कसनबल्लोने असन कोनी निआत जोन मोचो नाव ले सामरत चो काम करूक सके, आउर झटके मोके खराप बोलुक सको, 40कसनबल्लोने जोन आमचो बिरूद ने निआय, हुन आमचो बाटले आय। 41जोन कोनी गोटक बटका पानी तुमके ऐईकाजे पिआ ओ कि तुमी मसीह चो आहास तेबे मय तुमचो ले सते बलेंसें कि हुन आपलो ईनाम कसने रीति ले बले नी हजाये।

ईशु चो परीक्षा चो बारे ने जनातोर

42“जोन कोनी ऐ नानीमन थानले जोन मोचो उपरे बिश्वास कर सोत, कोकीई ठोकर खुआ ये दे तेबे हुनचो काजे अच्छा ऐ आय कि गोटक बड़े जता चो पाट हुनचो टोडरा ने लटकाया जाओ आउर हुन समुन्द ने डालुन दिआय जाओ। 43अगर तुचो हाथ तुके ठोकरना खुआ ये दे तेबे हुनके गोंदुन पकाव। ठुठा होऊन भाती जीवना ने ओलतोर तुचो काजे ऐचो ले अच्छा आय कि दुय हाथ रते-रते नरक चो आईग ने पकाया जासे जोन केबीई लिबु नुआय। 44जोन थाने हुनमन चो कीड़ा नी मरोत आउर आईग नी लिबे। 45अगर तुचो पाँय तुके ठोकरना खुआ ये दे तेबे हुनके गोंदुन पकाव। खोड़ीया होऊन भाती जीवना ने ओलतोर तुचो काजे ऐचो ले अच्छा आय कि दुय पाँय रते-रते नरक ने पकाया जासे। 46जोन थाने हुनमन चो कीड़ा नी मरोत आउर आईग नी लिबे। 47अगर तुचो आँईक तुके ठोकरना खुआ ये दे तेबे हुनके निकराऊन पकाव। काना होऊन भाती माहापुरू चो राज ने ओलतोर तुचो काजे ऐचो ले अच्छा आय कि दुय आँईक रते-रते तुय नरक ने पकाया जासे। 48जोन थाने हुनमन चो कीड़ा नी मरोत आउर आईग नी लिबे। 49कसनबल्लोने सपाय कोनी लोग आईग ले खर करा जादे। 50लोन ठीक आय, मान्तर अगर लोन चो सुआद जाते रये दे, तेबे हुनके काय ले खर करा से? आपलो थाने लोन संगावा, आउर आपस ने मिला-मिसा होऊन राआ।”

Currently Selected:

मरकुस 9: HLBNT

Highlight

Copy