मरकुस 10
10
बिआ आउर तलाक चो बारे ने सिक्या
1फेर हुन हुता ले उठून भाती यहूदिया चो संदी ने आउर यरदन चो हुनपाट ईलो। भीड़ हुनचो लगे फेर रूंड़ा होली, आउर हुन आपलो रीति चो अनुसार हुनमन के फेर उपदेश देऊक मुरयालो। 2तेबे फरीसीमन हुनचो लगे ऐऊन भाती हुनचो परीक्षा करतो काजे हुनचो ले पचारला, “काय ऐ ठीक आय कि मनुक आपलो बायले के छांडो?” 3हुन हुनमन के जबाप दिलो, “मूसा तुमके काय हुकुम दिलो से?” 4हुनमन बल्ला, “मूसा छाड़पतर लिकतोर आउर छांडतोर हुकुम दिलो से।” 5ईशु हुनमन ले बल्लो, “तुमचो मन चो कठरता चो लागुन हुन तुमचो काजे ऐ हुकुम लिकलो। 6मान्तर बरमाण्ड चो मुर ले माहापुरू नर आउर नारी करून हुनमन के बनालो से। 7ऐई लागुन माने आपलो आया-बुआ ले अलग होऊन भाती आपलो बायले संगे रये दे, 8आउर हुनमन दुनो देंह गागर हो दे; ऐईकाजे हुनमन अदायं दुय नाई मान्तर गोटक देंह आत। 9ऐईकाजे जोन के माहापुरू जोड़ लो से हुनके माने अलग नी करोत।” 10घर ने चेलामन ऐचो बारे ने हुनचो ले फेर पचारला। 11हुन हुनमन ले बल्लो, “जोन कोनी आपलो बायले के छांडुन भाती दुसर संगे बिहा होये दे तेबे हुन हुनचो पयले चो बायले चो बिरूद ने बेबीचार करू आय; 12आउर अगर बायले आपलो मनुक के छांडुन दुसर संगे बिहा होये दे तेबे हुन बेबीचार करू आय।”
लेकापिला आउर सरग चो राज
13फेर लोग लेकामन के हुनचो लगे आनुक मुरयाला कि हुन हुनमन चो उपरे हाथ संगा ओ, मान्तर चेलामन हुनमन के खिजला। 14ईशु ऐ दकुन रीस होऊन भाती हुनमन ले बल्लो, “लेकामन के मोचो लगे ऐऊक दिआस आउर हुनमन के माना नी करा, कसनबल्लोने माहापुरू चो राज असने मन चो आय। 15मय तुमचो ले सते बलें सें कि जोन कोनी माहापुरू चो राज के पिला चो असन गरहन नी करे, हुन हुन थाने केबे ओलुक नी सके।” 16आउर हुन हुनमन के कोरा ने धरलो, आउर हुनमन चो उपरे हाथ संगाऊन भाती हुनमन के आशीष दिलो।
जुआन सवकार आउर माहापुरू चो राज
17जिदलदाय हुन हुता ले निकरून भाती बाट ने जाते रलो, तेबे गोटक माने हुनचो लगे पराते-पराते ईलो, आउर हुनचो पुरे मांडी टेकुन भाती हुनचो ले पचारलो, “हे बड़ीया गुरू, अमर जीवना चो हकदार होतो काजे मय काय करेंदे?” 18ईशु हुनचो ले बल्लो, “तुय मोके उत्तम केंव बोल सीस? कोनी बड़ीया नुआत, मात्र गोटक बल्लोने माहापुरू। 19तुय हुकुममन के तो जानीस: ‘हत्या नी कर, बेबीचार नी कर, चोरी नी कर, झूठा गोहई नी देस, छंदवार नी हो, आपलो बुआ आउर आपलो आया चो ईजीत कर।’” 20हुन हुनचो ले बल्लो, “हे गुरू, ऐ सपाय के मय पिला बेरा ले मानते ऐयें से।” 21ईशु हुनचो उपरे नंजराऊन भाती हुनचो ले मया करलो, आउर हुनचो ले बल्लो, “तुचो ने गोटक गोठ चो कमी आसे। जा, जोन काई तुचो आय हुनके बिकुन भाती कंगालमन के देऊन देस, आउर तुके सरग ने धन मिरेदे, आउर ऐऊन भाती मोचो पाट-पाट हो।” 22ऐ गोठ ले हुनचो थोमना मुरूस नाय होली, आउर हुन दुक होऊन भाती गेलो, कसनबल्लोने हुन खुबे सवकार रये।
23ईशु भोंवरक दकुन भाती आपलो चेलामन ले बल्लो, “सवकारमन चो माहापुरू चो राज ने ओलतोर कसन मशकिल आय!” 24चेलामन हुनचो गोठमन ले भक्याला। ऐ थाने ईशु फेर हुनमन ले बल्लो, “हे लेकामन, जोन धन थाने भरसा संगाऊ आत, हुनमन काजे माहापुरू चो राज ने ओलतोर कसन मशकिल आय! 25माहापुरू चो राज ने सवकार चो ओलतोर ले ऊंट चो सुजी चो छेदा थानले निकरून जातोर सरसरा आय!” 26हुनमन खुबे भक्याऊन भाती आपस ने बोलुक मुरयाला, “तो फेर काचो मुक्ति होऊक सके?” 27ईशु हुनमन चो बाटे दकुन भाती बल्लो, “मानेमन ले तो ऐ नी होऊक सके, मान्तर माहापुरू ले होऊक सके; कसनबल्लोने माहापुरू ले सपाय काई होऊक सके।” 28पतरस हुनचो ले बोलुक मुरयालो, “दक, आमी तो सपाय काई छांडुन भाती तुचो पाट-पाट होलु से।” 29ईशु बल्लो, “मय तुमचो ले सते बलेंसें कि असन कोनी निआत, जोन मोचो आउर नगतखबर चो काजे घर नाहले भाईमन नाहले भईनमन नाहले आया नाहले बुआ नाहले पिला-झिलामन नाहले बेड़ामन के छांडुन दिलो से, 30आउर अदायं ऐ समया सव गुना नी पाआ, घरमन आउर भाईमन आउर भईनमन आउर आयामन आउर पिला-झिलामन आउर बेड़ामन के, मान्तर कन्दरानी चो संगे आउर उपरपुर ने अमर जीवना। 31मान्तर खुबे असन जोन पुरे आसोत, पाटकुती होदे; आउर जोन पाटकुती आसोत, हुनमन पुरे होदे।”
ईशु आपलो मरना चो बारे तीसरबार सांगतोर
32हुनमन यरूशलेम ने जाते-जाते बाट ने रवत, आउर ईशु हुनमन चो पुरे-पुरे जाते रलो: चेलामन अकचकित रवत आउर जोन हुनचो पाट-पाट हिन्ड़ते रवत हुनमन डरू रवत। तेबे हुन फेर हुन बारा झान के धरून भाती हुनमन ले हुन गोठमन बोलुक मुरयालो, जोन हुनचो उपरे ऐतो बिती रली, 33“दका, आमी यरूशलेम बाटे जाऊँ से, आउर माने चो बेटा परधान याजक आउर शास्तरीमन चो हाथे धराय जायेदे, आउर हुनमन हुनके घात चो लायक ठेबा दे, आउर दुसर जातिमन चो हाथ ने सोपदे। 34हुनमन हुनके मजाक उड़ादे, हुनचो उपरे थुक दे, हुनके कोड़ा मारदे आउर हुनके मरते मारदे, आउर तीन दिन चो पाचे हुन जीव उठेदे।”
सेवा चो बड़पन
35तेबे जबदी चो बेटा याकूब आउर यूहन्ना हुनचो लगे ऐऊन भाती बल्ला, “हे गुरू, आमी मन करूं से कि जोन काई आमी तुचो ले मांगु दें, हुनके तुय आमचो काजे कर से।” 36हुन हुनमन ले बल्लो, “तुमी काय मन करेसास कि मय तुमचो काजे करेंदे?” 37हुनमन हुनचो ले बल्ला, “आमके ऐ देस कि तुचो महिमा ने आमीमन थानले गोटक तुचो उजा पाट आउर दुसर तुचो डेबरी पाट बोसवां।” 38ईशु हुनमन ले बल्लो, “तुमी नी जानास कि काय मांगेसास? जोन बटका थानले मय पिव तो थाने आंसे, काय तुमी पिऊक सकास? आउर जोन डूबन मय धरतो बिता आंय, काय तुमी धरूक सकास?” 39हुनमन हुनचो ले बल्ला, “आमचो ले होऊक सके।” ईशु हुनमन ले बल्लो, “जोन बटका थानले मय पिव तो थाने आंसे, तुमी पिआ से; आउर जोन डूबन मय धरतो बिता आंय, हुनके धरा से। 40मान्तर जेचो काजे तिआर कराय गेली से, हुनमन के छांडुन आउर कोनी के आपलो उजा आउर आपलो डेबरी पाट बसातोर मोचो काम नुआय।” 41ऐ सुनुन भाती दसों याकूब आउर यूहन्ना के रीस होऊक मुरयाला। 42तेबे ईशु हुनमन के लगे हाग देऊन भाती हुनमन ले बल्लो, “तुमी जानास कि जोन दुसर जातिमन चो हाकिम समजा जाऊ आत, हुनमन-हुनमन उपरे भलाई करू आत; आउर हुनमन ने जोन बड़े आत, हुनमन उपरे हक जताऊ आय। 43मान्तर तुमीमन ने असन निआय, मान्तर जोन कोनी तुमीमन ने बड़े होऊक चाहाय से हुन तुमचो सेवक बनो; 44आउर जोन कोनी तुमचो ने परधान होऊक चाहाय से, हुन सपाय चो दास बनो। 45कसनबल्लोने माने चो बेटा ऐईकाजे नी ईलो कि हुनचो सेवा शासन करा जाओ, मान्तर ऐईकाजे ईलो कि खुद सेवा शासन करो, आउर खुबे लोगमन चो छंड़ातो काजे आपलो जीव देओ।”
काना बरतिमाई चो चेंगा
46हुनमन यरीहो ने ईला, आउर जिदलदाय हुन आउर हुनचो चेलामन, आउर गोटक बड़े भीड़ यरीहो ले निकरू रये, तेबे तिमाई चो बेटा बरतिमाई, गोटक काना भिकारी, सड़क चो रेटे बसुन रलो। 47हुन ऐ सुनुन भाती कि ईशु नासरी आय, चिचयाऊन-चिचयाऊन भाती बोलुक मुरयालो, “हे दाऊद चो पिला, ईशु, मोचो उपरे दया कर!” 48खुबे लोगमन हुनके खिजला कि ओगाय रा, मान्तर हुन आउर बले चिचयाऊक मुरयालो, “हे दाऊद चो पिला, मोचो उपरे दया कर!” 49तेबे ईशु ठेबुन भाती बल्लो, “हुनके हाग दिआस।” आउर लोगमन हुन काना के हाग देऊन भाती हुनचो ले बल्ला, “धीरज धर! उठ! हुन तुके हाग देये से।” 50हुन आपलो फटीई पोकाऊन भाती झटके उठलो, आउर ईशु चो लगे ईलो। 51ऐ थाने ईशु हुनचो ले बल्लो, “तुय काय चाहाय सीस कि मय तुचो काजे करें?” काना हुनचो ले बल्लो, “हे रब्बी, ऐ कि मय दकुक मुरयायें।” 52ईशु हुनचो ले बल्लो, “जाते जा, तुचो बिश्वास तुके चेंगा करलो से।” हुन तुरते दकुक मुरयालो, आउर बाट ने हुनचो पाट-पाट गेलो।
Currently Selected:
मरकुस 10: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
