मरकुस 8
8
ईशु चो चार हजार लोगमन के खुआतोर
1हुन दिनमन ने जिदलदाय फेर बड़े भीड़ रूंड़ा होली, आउर हुनमन चो लगे काई खातो काजे नी रली, तेबे हुन आपलो चेलामन के लगे हाग देऊन भाती हुनमन ले बल्लो, 2“मोके ऐ भीड़ थाने जीव दुके से, कसनबल्लोने ऐ तीन दिन ले समान मोचो संगे आसोत, आउर हुनमन चो लगे काई बले खातो काजे निआय। 3अगर मय हुनमन के भूके घरे पटायें दें, तो बाट ने थाकुन भाती रऊन जादे; कसनबल्लोने ऐ मन थानले कोनी-कोनी लापी ले ईला सोत।” 4हुनचो चेलामन हुनके जबाप दिला, “ऐथा रान ने इतलो रोटी कोनी काहां ले आनदे कि ऐ मन संतुष्ट होओत?” 5हुन हुनमन ले पचारलो, “तुमचो लगे कितलो रोटी आसे?” हुनमन बल्ला, “सात।”
6तेबे हुन लोगमन के भूईं थाने बोसतोर हुकुम दिलो, आउर हुन सात रोटी के धरलो आउर धन्यबाद करून टुटालो, आउर आपलो चेलामन के देते गेलो कि हुनमन चो पुरे संगा ओत, आउर हुनमन लोगमन चो पुरे बाटुन दिला।
7आउर हुनमन चो लगे खिन्डिक असन नानी मछरी बले रली; हुन धन्यबाद करून हुनके बले लोगमन चो पुरे संगातो काजे हुकुम दिलो। 8आउर हुनमन खाऊन भाती संतुष्ट होला आउर चेलामन बाचलो गोंदा चो सात टुकना भरून भाती उठाला। 9आउर लोग चार हजार चो लगे-लगे रवत; तेबे हुन हुनमन के बिदा करलो, 10आउर हुन तुरते आपलो चेलामन चो संगे ड़ोंगा थाने चेगुन भाती दलमनूता देश ने गेलो।
फरीसीमन चो चिना मांगतोर
11फेर फरीसी ऐऊन भाती हुनचो ले बहस करूक मुरयाला, आउर हुनके जाचतो काजे हुनचो ले कोनी सरग चो चिना मांगला। 12हुन आपलो आत्मा ने आह भरून भाती बल्लो, “ऐ समया चो लोगमन केंव चिना डगराय सोत? मय तुमचो ले सते बलें सें कि ऐ समया चो लोगमन के कोनी चिना नी दिया जाये।” 13आउर हुन हुनमन के छांडुन भाती फेर ड़ोंगा थाने चेगलो आउर हुनपाट गेलो।
फरीसीमन चो खमीर
14चेलामन रोटी धरतोर भुलकुन रवत, आउर ड़ोंगा थाने हुनमन चो लगे गोटक ची रोटी रली। 15हुन हुनमन के जनालो, “दका, फरीसीमन चो खमीर आउर हेरोदेस चो खमीर ले खबड़दार राहा।” 16हुनमन आपस ने बिचारून भाती बोलुक मुरयाला, “आमचो लगे रोटी निआय।” 17ऐ जानुन भाती ईशु हुनमन ले बल्लो, “तुमी केंव आपनी-आपनी ऐ बिचार करेसास कि आमचो लगे रोटी निआय? काय ऐबे तक नी जानास आउर नी समजास? काय तुमचो मन कठर होली से? 18काय आँईकमन रते-रते बले नी दकास, आउर कान रते-रते बले नी सुनास? आउर काय तुमके सुरता निआय? 19कि जिदलदाय मय पांच हजार झान चो काजे पांच रोटी के टुटाऊन रले तेबे तुमी गोंदामन चो कितलो टुकना भरून भाती उठालास?” हुनमन हुनचो ले बल्ला, “बारा टुकना।” 20“आउर जिदलदाय चार हजार झान चो काजे सात रोटी रली तेबे तुमी गोंदामन चो कितलो टुकना भरून भाती उठाऊन रलास?” हुनमन हुनचो ले बल्ला, “सात टुकना।” 21हुन हुनमन ले बल्लो, “काय तुमी ऐबे तक ले नी समजास?”
काना के चेंगा करतोर
22हुनमन बैतसैदा ने ईला; आउर लोग गोटक काना के हुनचो लगे धरून आनला आउर हुनचो ले गुहारला कि हुनके छिंवो। 23हुन-हुन काना चो हाथ धरून भाती हुनके गाँव चो बाहरे धरून गेलो, आउर हुनचो आँईकमन ने थुकुन भाती हुनचो उपरे हाथ संगालो, आउर हुनचो ले पचारलो, “काय तुय काई दक सीस?” 24हुन आँईक उठाऊन भाती बल्लो, “मय मानेमन के दकें सें; हुनमन मोके हिन्ड़ते-हिन्ड़ते रूकमन असन दका देये सोत।” 25तेबे हुन दुसरहार हुनचो आँईकमन थाने हाथ संगालो, आउर काना धिआन ले दकलो। हुन चेंगा होऊन गेलो, आउर सपाय काई छुकछुका दकुक मुरयालो। 26हुन हुनके ऐ बोलुन भाती घरे पठालो, “ऐ गाँव चो भीतरे पाँय बले नी संगाव।”
पतरस चो ईशु के मसीह मानतोर
27ईशु आउर हुनचो चेलामन कैसरिया फिलिप्पी चो गाँवमन ने गेला। बाट ने हुन आपलो चेलामन ले पचारलो, “लोग मोके काय बले सोत?” 28हुनमन जबाप दिला, “यूहन्ना डूबन देतो बिता; मान्तर कोनी-कोनी एलिया आउर कोनी-कोनी अगम गिआनीमन थानले गोटक बले बोलु आत।” 29हुन हुनमन ले पचारलो, “मान्तर तुमी मोके काय बोलु आहास?” पतरस हुनके जबाप दिलो, “तुय मसीह आस।” 30तेबे हुन हुनमन के चेताऊन भाती बल्लो कि मोचो बारे ने ऐ कोचीई ले नी बोल।
ईशु आपलो मरना चो बारे ने सांगतोर
31तेबे हुन हुनमन के सिकाऊक मुरयालो कि माने चो बेटा काजे जरूर आय कि हुन खुबे दुक उठाओ, आउर पुरनिमन आउर परधान याजक, आउर शास्तरीमन हुनके नीच समजुन भाती मारून पका ओत, आउर हुन तीन दिन चो पाचे जीव उठेदे। 32हुन ऐ गोठ हुनमन ले सरसरा सांगुन दिलो। ऐ थाने पतरस हुनके अलगे नेऊन भाती खिजुक मुरयालो, 33मान्तर हुन पलटून भाती आपलो चेलामन चो बाटे दकलो, आउर पतरस के खिजुन भाती बल्लो, “हे शयतान, मोचो पुरे ले लापी जा; कसनबल्लोने तुय माहापुरू चो गोठमन थाने नाई, मान्तर मानेमन चो गोठमन थाने मन लगाऊ आस।”
चेला बनतोर अरत
34हुन भीड़ के आपलो चेलामन चो संगे लगे हाग देऊन भाती हुनमन ले बल्लो, “जोन कोनी मोचो पाट-पाट ऐऊक चाहा ये से, हुन आपन खुद ले इन्कार करो आउर आपलो कुरूस के उठाऊन भाती, मोचो पाट-पाट ऐओ। 35कसनबल्लोने जोन कोनी आपलो जीव बचाऊक चाहा ये से हुन हुनके नी बचाए, मान्तर जोन कोनी मोचो आउर नगतखबर चो काजे आपलो जीव देऊ आय, हुन हुनके बचाए दे। 36अगर माने सपाय जगत के पाये दे आउर आपलो जीव चो हानि उठाये दे, तेबे हुनके काय लाब होये दे? 37माने आपलो जीव चो पलटा ने काय देये दे? 38जोन कोनी ऐ बेबीचारी आउर पापी जाति चो मंजी मोचो ले आउर मोचो गोठमन ले लाज होये दे, माने चो बेटा बले जिदलदाय हुन पवितर सरग दूतमन चो संगे आपलो बुआ चो महिमा संगे ऐये दे, तेबे हुनचो ले बले लाज होये दे।”
Currently Selected:
मरकुस 8: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
