मरकुस 7
7
रीति रिवाज आउर नियम
1तेबे फरीसी आउर खिन्डिक शास्तरीमन जोन यरूशलेम ले ऐऊ रवत, ईशु लगे रूंड़ा होला, 2आउर हुनमन हुनचो कितलो चेलामन के अशुद्ध बल्ले बिना हाथ धोहलोर रोटी खातोर दकला 3कसनबल्लोने फरीसी आउर सपाय यहूदी, सियानमन चो रीति बिदी थाने चलु आत आउर जिदलदाय ले छुकछुका हाथ नी धोओत हुदलदाय ले नी खाओत; 4आउर हाट ले ऐऊन भाती, जिदलदाय ले नाहाऊ नुआत, हुदलदाय ले नी खाओत; आउर खुबे असन दुसर गोठमन आसे, जोन हुनमन चो लगे मानतो काजे अमरली से, जसन बटकामन, आउर कसलामन, आउर तामा चो भण्डवामन के धोवतोर-मान्जतोर। 5ऐईकाजे हुन फरीसीमन आउर शास्तरीमन हुनचो ले पचारला, “तुचो चेलामन केंव पुरखामन चो रीति बिदीमन थाने नी चलोत, आउर बिना हाथ धोहलोर रोटी खाऊ आत?” 6ईशु हुनमन ले बल्लो, “यशाया तुमी कपटीमन चो बारे ने खुबे अच्छा अगम गोठ करलो; जसन लिकलोर आसे:
‘ऐ लोग होटमन ले तो मोचो ईजीत करू आत,
मान्तर हुनमन चो मन मोचो ले लापी आसे।
7ऐ मन फोकाहा मोचो उपास करू आत,
कसनबल्लोने मानेमन चो हुकुममन के धरम उपदेश करून सिकाऊ आत।’
8“कसनबल्लोने तुमी माहापुरू चो हुकुम के टालुन भाती मानेमन चो रीतिमन के मानेसास।” 9ईशु हुनमन ले बल्लो, “तुमी आपलो रीति बिदीमन के मानतो काजे माहापुरू चो हुकुम कसन अच्छा ढंग ले टालुन देयेसास! 10कसनबल्लोने मूसा बल्लो से, ‘आपलो बुआ आउर आपलो आया चो मान कर,’ आउर ‘जोन कोनी बुआ नाहले आया के खराप बले दे, हुन जरूर मारा जाओ।’ 11मान्तर तुमी बलेसास कि अगर कोनी आपलो बुआ नाहले आया ले बले दे, ‘जोन काई तुके मोचो ले फायदा पोंहचुक सकते रये, हुन कुरबान बल्लोने तय होली।’ 12तेबे तुमी हुनके हुनचो बुआ नाहले हुनचो आया चो काई सेवा करूक नी दिआस। 13असने परकार तुमी आपलो रीति बिदी ले, जोन के तुमी ठेबालास, माहापुरू चो बचन टालुन देसास; आउर असन-असन खुबे असन काम करसास।”
माने के अशुद्ध करतो बिती गोठमन
14तेबे हुन लोगमन के आपलो लगे हाग देऊन भाती हुनमन ले बल्लो, “तुमी सपाय मोचो सुना, आउर समजा। 15असन कोनी तीज निआय जोन माने ने बाहार ले भिडुन भाती हुनके अशुद्ध करो; मान्तर जोन तीजमन माने चो भीतर ले निकरू आय, हुन हुनके अशुद्ध करू आय। 16अगर काचीई सुनतोर कान आसे तो हुन सुना।” 17जिदलदाय हुन भीड़ चो लगे ले घर ने गेलो, तेबे हुनचो चेलामन ऐ कहनी चो बारे ने हुनचो ले पचारला। 18हुन हुनमन ले बल्लो, “काय तुमी बले असन अबुज आहास? काय तुमी नी समजास कि जोन तीजमन बाहार ले माने चो भीतरे जाऊ आय, हुन हुनके अशुद्ध नी करूक सके? 19कसनबल्लोने हुन हुनचो मन ने नाई, मान्तर पेट ने जाऊ आय आउर झाड़ा बाटले निकरून जाऊ आय?” ऐ बोलुन भाती हुन सपाय खातो बिती तीजमन के शुद्ध ठेबालो। 20फेर हुन बल्लो, “जोन माने ले निकरू आय, हुनी माने के अशुद्ध करू आय। 21कसनबल्लोने भीतर ले, बल्ले माने चो मन ले, खराप-खराप बिचार, बेबीचार, चोरतोर, हत्या, दुसर चो बायले के नेतोर, 22लोभ, दुष्टता, छंद, लुचपन, खराप नजर, निन्दा, घमण्डाहा, आउर मुरूक गोठ निकरू आय। 23ऐ सपाय खराप गोठमन भीतर ले निकरू आय आउर माने के अशुद्ध करू आय।”
सुरूफिनिकी जाति चो बायले लेकी चो बिश्वास
24फेर ईशु हुता ले उठून भाती सूर आउर सयदा चो देशमन ने ईलो; आउर गोटक घर ने गेलो आउर चाहते रलो कि कोनी नी जानोत; मान्तर हुन लुकुक नी सकलो। 25आउर तुरते गोटक बायले लेकी जेचो नानी बेटी ने अशुद्ध आत्मा रली, हुनचो चरचा सुनुन भाती ईली, आउर हुनचो पाँयमन थाने घसरली। 26ऐ यूनानी आउर सुरूफिनीकी जात चो रली; आउर हुन ईशु ले गुहार करली कि मोचो बेटी थानले दुष्टआत्मा निकराऊन देस। 27ईशु हुनचो ले बल्लो, “पयले लेकामन के संतुष्ट होऊक देस, कसनबल्लोने लेकामन चो रोटी धरून कुकूरमन चो पुरे पकातोर अच्छा नुआय।” 28हुन ईशु के जबाप दिली, “सते आय परबु; तेबले बले कुकूरमन बले तो टेबुल चो खाले लेकामन चो रोटी थानो बिरलो-बिरलो खाऊ आत।” 29ईशु हुनचो ले बल्लो, “ऐई गोठ चो लागुन निकरून जा; दुष्टआत्मा तुचो बेटी थानले निकरून गेली से।” 30हुन आपलो घरे ऐऊन भाती दकली कि लेकी खटिया ने पढ़ली से, आउर दुष्टआत्मा निकरून गेली से।
ईशु चो भयरा आउर तोतरा माने के चेंगा करतोर
31फेर ईशु सूर आउर सयदा चो देशमन ले निकरून भाती दिकापुलिस देश ले होते गलील चो झील थाने अमरलो। 32तेबे लोगमन गोटक भयरा के जोन तोतरा बले रलो, हुनचो लगे आनुन भाती हुनचो ले गुहारला कि आपलो हाथ हुनचो उपरे संगा ओ। 33तेबे ईशु हुनके भीड़ ले अलगे धरून गेलो, आउर आपलो अंडकीमन के हुनचो कानमन ने कोचक लो, आउर थुकुन भाती हुनचो जीब के छिंवलो; 34आउर सरग बाटे दकुन भाती गाग गगानी होलो, आउर हुनचो ले बल्लो, “इप्फत्तह!” बल्ले “खुलुन जा”! 35आउर हुनचो कान खुलुन गेली, आउर हुनचो जीब चो गट बले खुलुन गेली, आउर हुन छुकछुका बोलुक मुरयालो। 36तेबे हुन हुनमन के जनालो कि कोचीई ले नी बोला; मान्तर जितरो हुन हुनमन के जनालो उतली ची हुनमन आउर परचार करूक मुरयाला। 37हुनमन खुबे ची भक्यान भाती बोलुक मुरयाला, “हुन जोन काई करलो सपाय अच्छा करलो से; हुन भयरामन के सुनातोर, आउर कोंदामन के बोलतोर शक्ति देऊ आय।”
Currently Selected:
मरकुस 7: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
