लूका 2
2
बैतलहम ने ईशु चो जनम
1हुन दिनमन ने राजा अगस्तुस चो बाटले हुकुम निकरली कि सपाय जगत चो लोगमन चो नाव लिका जाओ। 2ऐ पयला नाव लिकाई हुन समया ने होली जिदलदाय क्विरिनियुस सीरिया चो राजपाल रलो। 3सपाय लोग नाव लिकातो काजे आपलो-आपलो नंगर ने गेला। 4आउरी यूसुफ बले ऐईकाजे कि हुन दाऊद चो घर आउर बंश चो रलो, गलील चो नासरत नंगर ले यहूदिया ने दाऊद चो नंगर बैतलहम ने गेलो, 5कि आपलो मांगनी करलो बिती मरियम चो संगे जोन देंहबारी रली नाव लिका ओत। 6हुनमन चो हुता रऊ-रऊ हुनचो जचकी चो दिन पुरा होली, 7आउर हुन आपलो पयलवात बेटा जन्माली आउर हुनके फटीई थाने लेपटाऊन भाती कोंड़ा डोंगा ने संगाला; कसनबल्लोने हुनमन चो काजे धरमशाला ने ठान नी रली।
चरेयामन के सरग दूतमन बाटले खबर
8आउर हुन देश ने कितलो धोरीई रला, जोन राती बेरा भाटा ने रऊन भाती आपलो छेरी-मेंडी गोहड़ी चो पाहारा देते रवत। 9आउर परबु चो गोटक दूत हुनमन चो लगे ऐऊन उबा होलो, आउर परबु चो तेज हुनमन चो चारो बाटे चमकली आउर हुनमन खुबे डरला। 10तेबे सरगदूत हुनमन ले बल्लो, “नी डरा; कसनबल्लोने दका, मय तुमके बड़े हरिक चो नगतखबर सुनाय से जोन सपाय लोगमन चो काजे होये दे, 11कि आजी दाऊद चो नंगर ने तुमचो काजे गोटक मुक्तिकरू जनम लो से, आउर ऐई ची मसीह परबु आय। 12आउर येचो तुमचो काजे ऐ चिना आय कि तुमी गोटक लेका के फटीई ने गुन्ड़ीयालोर आउर कोंड़ा डोंगा ने पड़लोर पाहा से।” 13तेबे हटातरे हुन सरगदूत संगे सरग दूतमन चो दल माहापुरू चो स्तुति करते-करते आउर ऐ बोलते दका दीला,
14“बादरी ने माहापुरू चो महिमा आउर
धरतनी थाने हुन मानेमन ने जेचो ले हुन हरिक आसे, शान्ति होओ।”
चरेयामन चो बैतलहम ने जातोर
15जिदलदाय सरगदूत हुनमन चो लगले सरग ने जाते गेला, तेबे धोरीईमन आपस ने बल्ला, “ईआ, आमी बैतलहम जाऊन भाती ऐ गोठ जोन होली से, आउर जोन के परबु आमके सांगलो से, दकवां।” 16आउर हुनमन तुरते जाऊन भाती मरियम आउर यूसुफ के, आउर कोटा चो डोंगा ने हुन लेकापिला के पड़लोर दकला। 17ऐ मन के दकुन भाती हुनमन हुन गोठ जोन ऐ लेकापिला चो बारे ने हुनमन ले बलाय जाऊ रली, उजागर करलो, 18आउर सपाय सुनतो बितामन हुन गोठमन ले जोन धोरीईमन हुनमन ले बल्ला भक्याला। 19मान्तर मरियम ऐ सपाय गोठमन के आपलो मन ने संगाऊन भाती बिचार ते रली। 20आउर धोरीईमन जसन हुनमन ले बलाय जाऊ रली, असने ची सपाय सुनुन भाती आउर दकुन भारी माहापुरू चो महिमा आउर स्तुति करते-करते आपस जाते गेला।
ईशु चो खतना आउर नाव संगातोर
21जिदलदाय आंट दिन पुरा होली आउर हुनचो खतना चो समया ईली, तेबे हुनचो नाव ईशु संगाया गेली जोन सरगदूत हुनचो पेट ने ऐतोर पयले बोलु रलो। 22जिदलदाय मूसा चो नियम चो अनुसार हुनमन चो शुद्ध होतोर दिन पुरली, तेबे हुनमन हुनके यरूशलेम ने धरून गेला कि परबु चो पुरे आनोत, 23जसन कि परबु चो नियम ने लिकलोर आसे: “हरकोनी पयलवात परबु चो काजे पवितर ठेबे दे।” 24आउर परबु चो नियम चो बचन चो अनुसार, “पंडकीमन चो गोटक जोड़ी, नाहले परेयां चो दुय चड़ीई पिला” आनुन भाती बलिदान करोत।
शिमोन चो अगम गोठ
25यरूशलेम ने शिमोन नाव चो गोटक माने रलो, आउर हुन माने धरमी आउर भगत रलो; आउर इस्राएल चो शान्ति चो बाट दकते रलो, आउर पवितर आत्मा हुनचो उपरे रली। 26आउर पवितर आत्मा बाटले हुनचो उपरे उजागर होऊ रली कि जिदलदाय ले हुन परबु चो मसीह के नी दके, हुदलदाय ले मरना के नी दके दे। 27हुन आत्मा चो सिका लो ने मंदिर ने ईलो; आउर जिदलदाय आया-बुआ हुन लेकापिला ईशु के भीतरे आनला, कि हुनचो काजे नियम चो रीति चो अनुसार करोत, 28तेबे हुन हुनके आपलो कोरा ने धरलो आउर माहापुरू चो धन्यबाद करून बल्लो:
29“हे मालिक, अदायं तुय आपलो दास के आपलो
बचन चो अनुसार शान्ति ले बिदा करून देस,
30कसनबल्लोने मोचो आँईकमन तुचो मुक्ति के
दकला से,
31जोन के तुय सपाय देशमन चो लोगमन चो पुरे
तिआर करली सीस,
32कि हुन दुसर जातिमन के उजर देतो
काजे उजर,
आउर तुचो निज लोग इस्राएल चो महिमा होओ।”
33हुनचो बुआ आउर हुनचो आया ऐ गोठमन ले जोन हुनचो बारे ने बल्ला जाते रली, भक्याते रवत। 34तेबे शिमोन हुनमन के आशीष देऊन भाती, हुनचो आया मरियम ले बल्लो, “दक, हुन तो इस्राएल ने खुबेमन चो घसरतोर, आउर उठतोर काजे, आउर गोटक असन चिना होतो काजे ठेबाय गेलो से, जेचो बिरूद ने गोठमन कर दे 35मान्तर तुचो जीव बले खंडा ले ऐ पाट हुनपाट छेदा जाय दे ऐचो ले खुबेमन चो मन चो बिचार उजागर होये दे।”
हन्ना चो गोहई
36अशेर चो पुरखा थानले हन्ना नाव चो फन्नुएल चो बेटी गोटक अगम गिआनीन रली। हुन खुबे डोकरी रली, आउर बिहा होलोर पाचे सात बरक आपलो मनुक संगे रऊक सकु रली। 37हुन चवरासी बरक ले रान्डी रली: आउर मंदिर के नी छाड़ते रली, मान्तर उपास आउर पारथना करून-करून रात दिन उपास करते रली। 38आउर हुन-हुन समया हुता ऐऊन भाती माहापुरू चो धन्यबाद करूक मुरयाली, आउर हुन सपाय ले, जोन यरूशलेम चो छुटकारा चो बाट टाकु रवत, हुन लेकापिला चो बारे ने गोठयाऊक मुरयाली।
यूसुफ आउर मरियम चो नासरत ने आपस ऐतोर
39जिदलदाय हुनमन परबु चो नियम चो अनुसार सपाय काई पुरा करला तेबे गलील ने आपलो नंगर नासरत ने फेर जाते गेला। 40आउर लेकापिला बाड़ते, आउर बलवान होते, आउर अकल ले भरपूर होते गेलो; आउर माहापुरू चो अनुग्रह हुनचो उपरे रली।
बालक ईशु मंदिर ने
41हुनचो आया-बुआ हर बरक फसह चो तिआर ने यरूशलेम जाते रवत। 42जिदलदाय ईशु बारा बरक चो होलो, तेबे हुनमन तिआर चो रीति चो अनुसार यरूशलेम ने गेला। 43जिदलदाय हुनमन हुन दिनमन के पुरा करून आपस ऐऊक मुरयाला, तेबे लेकापिला ईशु यरूशलेम ने रऊन गेलो; आउर ऐ हुनचो आया-बुआ नी जानते रवत। 44हुनमन ऐ समजुन भाती कि हुन दुसर यातरीमन चो संगे होये दे, गोठ दिन चो बाट निकरून गेला: आउर हुनके आपलो कुटुममन आउर जान पयचान बितामन थाने डगराऊक मुरयाला। 45मान्तर जिदलदाय नी मिरलो, तेबे डगराते-डगराते यरूशलेम ने फेर आपस गेला, 46आउर तीन दिन चो पाचे हुनमन हुनके मंदिर ने अच्छा गोठ सिकाऊ मन चो मंजी ने बसलोर, हुनमन चो सुनतोर आउर हुनमन के सवाल करतोर पावला। 47जितरो हुनचो सुनते रवत, हुनमन सपाय हुनचो समज आउर हुनचो जबापमन ले भक्याऊन रवत। 48तेबे हुनमन हुनके दकुन भाती भक्याला आउर हुनचो आया हुनचो ले बल्ली, “हे बेटा, तुय आमचो संगे केंव असन बेवहार करलीस? दक, तुचो बुआ आउर मय कुड़-कुड़ ते डगराते रलु?” 49हुन हुनमन ले बल्लो, “तुमी मोके केंव डगराते राआस? काय नी जानते राआस कि मोके आपलो बुआ चो भवन ने होतोर जरूरी आय?” 50मान्तर जोन गोठ हुन हुनमन ले बल्लो, हुनमन हुनके नी समजला। 51तेबे हुन हुनमन चो संगे गेलो, आउर नासरत ने ईलो आउर हुनमन चो वश ने रलो; आउर हुनचो आया ऐ सपाय गोठमन आपलो मन ने संगाली। 52आउर ईशु अकल आउर डीलडोल ने, आउर माहापुरू आउर मानेमन चो अनुग्रह ने बाड़ते गेलो।
Currently Selected:
लूका 2: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
