लूका 1
1
लूका चो लिकतोर कारन
1खुबे लोगमन हुन गोठमन चो जोन आमचो मंजी ने घटली से, हुनके लिकतो काजे हाथ लगाला सोत, 2जसन कि हुनमन जोन पईल ले ची ऐ गोठमन चो दकतो बितामन आउर बचन चो सेवकमन रवत, आमचो लगे पोंचाला। 3ऐईकाजे, हे मुखिया थिऊफिलुस, मोके बले ऐ नगत जान पढ़ली कि हुन सपाय गोठमन चो पुईतनाय हाल मुर ले ठीक-ठीक जाच करून, हुनमन के तुचो काजे लाईन बार लिकेन्दे 4बल्ले तुय ऐ जान से कि हुन गोठमन जेचो तुय सिक्या पावली सीस, कसन अटल आय।
जकर्याह आउर इलीशिबा
5यहूदिया चो राजा हेरोदेस चो समया अबिय्याह चो दल ने जकर्याह नाव चो गोटक याजक रलो, आउर हुनचो बायले हारून चो बंश चो रली जेचो नाव इलीशिबा रली। 6हुनमन दुनो झान माहापुरू चो पुरे धरमी रवत, आउर परबु चो सपाय हुकुममन आउर बिदीमन थाने दोष नाहलो चलतो बिता रवत। 7हुनमन चो कोनी बले पिलाझिला नी रवत, कसनबल्लोने इलीशिबा बांजीन रली, आउर हुनमन दुनो डोकरा-डोकरी रवत।
सरगदूत बाटले यूहन्ना चो जनम चो अगम गोठ
8जिदलदाय हुन आपलो दल चो पारी थाने माहापुरू चो पुरे याजक चो काम करते रलो, 9तेबे याजकमन चो रीति चो अनुसार हुनचो नाव थाने चिठ्ठी निकरली कि परबु चो मंदिर ने जाऊन भाती धुप जराओ। 10धुप जरातो समया लोगमन चो सपाय भीड़ बाहरे पारथना करते रली। 11हुदलीदाय परबु चो गोटक सरगदूत धुप चो बेदी चो उजा घाई उबा होलोर हुनके दका दिलो। 12जकर्याह दकुन भाती घबरालो आउर हुन खुबे डरून गेलो। 13मान्तर सरगदूत हुनचो ले बल्लो, “हे जकर्याह, बाय बिकाल नी हो, कसनबल्लोने तुचो पारथना सुना गेली से; आउर तुचो बायले इलीशिबा ले तुचो काजे गोटक बेटा जनम होयेदे, आउर तुय हुनचो नाव यूहन्ना संगाव। 14तुके हरिक उपरे आउर हरिक होयेदे आउर खुबे लोग हुनचो जनम चो कारन हरिक होदे, 15कसनबल्लोने हुन परबु चो पुरे माहान होये दे; आउर दाखरस आउर मंद केबीई नी पिये; आउर आपलो आया चो गरब ले ची पवितर आत्मा ले समपूरन होऊन जायेदे; 16आउर इस्राएलीमन थानले खुबे असन के हुन परबु माहापुरू चो बाटे फिरायदे। 17हुन एलिया चो आत्मा आउर सामरत ने होऊन भाती हुनचो पुरे-पुरे हिन्डे दे कि बुआमन चो मन पिला-झिलामन चो बाटे फिरान देयेंदे; आउर हुकुम नी मानतो बितामन के धरमीमन चो समज थाने आनो; आउर परबु चो काजे गोटक लायक परजा तिआर करो।” 18जकर्याह सरगदूत ले पचारलो, “ऐ मय कसन जाने दें? कसनबल्लोने मय तो डोकरा आंय; आउर मोचो बायले बले डोकरी होली से।” 19सरगदूत हुनके जबाप दिलो, “मय गब्रिएल आंय, जोन माहापुरू चो पुरे उबा रऊ आंय; आउर मय तुचो ले गोठयाऊक आउर तुके ऐ नगतखबर सुनातो काजे पटाया गेले से। 20दक, जोन दिन ले ऐ गोठमन पुरा नी होऊन जाये, हुन दिन ले तुय ओगाय रसे आउर बोलुक नी सकसे, ऐईकाजे कि तुय मोचो गोठमन चो जोन आपलो समया थाने पुरा होये दे, बिश्वास नी करलीस।” 21लोग जकर्याह चो बाट दकते रवत आउर चकित करूक मुरयाला कि हुनके मंदिर ने इतलो बेर कसन लागली। 22जिदलदाय हुन बाहरे ईलो, तेबे हुनमन ले बोलुक नी सकलो आउर हुनमन जानुन गेला कि हुन मंदिर ने काई दरशन पावलो से; आउर हुन हुनमन ले ईसारा करते रलो, आउर कोंदा रऊन गेलो। 23जिदलदाय हुनचो सेवा चो दिन पुरा होली, तेबे हुन आपलो घरे जाते गेलो। 24ऐ दिनमन चो पाचे हुनचो बायले इलीशिबा देंहबारी होली; आउर पांच मयना ले आपन खुद के ऐ बोलुन लुकाऊन संगाली, 25“मानेमन ने मोचो बेईजित दूर करतो काजे, परबु ऐ दिनमन ने दयाधरम करून मोचो काजे असन करलो से।”
सरगदूत चो मरियम के दका देतोर
26छठवां मयना ने माहापुरू चो बाटले गब्रिएल सरगदूत, गलील चो नासरत नंगर ने, 27गोटक कुंआरी चो लगे पटाया गेलो जेचो मांगनी यूसुफ नाव चो दाऊद चो घरमन चो गोटक माने ले होऊ रली: हुन कुंआरी चो नाव मरियम रली। 28सरगदूत हुनचो लगे भीतरे ऐऊन भाती बोललो, “हरिक आउर जय तुचो होओ, जेचो थाने ईश्पर चो अनुग्रह होली से! परबु तुचो संगे आसे!” 29हुन-हुन बचन ले खुबे डरून गेली, आउर बिचार करूक मुरयाली कि ऐ कसन परकार चो जुहार आय? 30सरगदूत हुनचो ले बल्लो, “हे मरियम, नी डर, कसनबल्लोने माहापुरू चो अनुग्रह तुचो उपरे होली से। 31दक, तुय देंहबारी हो से, आउर तुचो गोटक बेटा जनम होयेदे; तुय हुनचो नाव ईशु संगाव। 32हुन माहान होयेदे आउर परमपरधान चो बेटा बलाय जायेदे; आउर परबु माहापुरू हुनचो बुआ दाऊद चो सिंघासन हुनके देयेंदे, 33आउर हुन याकूब चो घरमन थाने हरमेशा राज करेंदे; आउर हुनचो राज चो आखरी नी होयेदे।” 34मरियम सरगदूत ले बल्ली, “ऐ कसन होयेदे। मय तो माने के जाने ची नाई।” 35सरगदूत हुनके जबाप दिलो, “पवितर आत्मा तुचो उपरे उतरे दे, आउर परमपरधान चो सामरत तुचो उपरे छांय करेंदे; ऐईकाजे हुन पवितर जोन पयदा होतो बिता आय, माहापुरू चो बेटा बलाय जायेदे। 36आउर दक, तुचो कुटुम चो इलीशिबा के बले डोकरी बेरा बेटा होतो बिती आय, ऐ हुनचो, जोन बांजीन बलाया जाते रली छठवां मयना आय। 37कसनबल्लोने जोन बचन माहापुरू चो बाटले होऊ आय हुन बेअसर नी होये।” 38मरियम बल्ली, “दक, मय परबु चो दासी आंय, मोके तुचो बचन चो अनुसार होओ।” तेबे सरगदूत हुनचो लगे ले जाते गेलो।
इलीशिबा लगे मरियम भेट होऊक जातोर
39हुन दिनमन ने मरियम उठून भाती झटके ची डोंगरी देश ने यहूदा चो गोटक नंगर ने गेली, 40आउर जकर्याह चो घर ने जाऊन भाती इलीशिबा के जुहार करली। 41जसने ची इलीशिबा मरियम चो जुहार सुनली, असने ची पिला हुनचो पेट ने उदललो, आउर इलीशिबा पवितर आत्मा ले परिपुरन होली। 42आउर हुन बड़े जोर ले चिचयाऊन भाती बल्ली, “तुय बायले लेकीमन ने धन्य आस, आउर तुचो पेट चो फल धन्य आय! 43ऐ अनुग्रह मोके काहां ले होली कि मोचो परबु चो आया मोचो लगे ईली? 44दक, जसने ची तुचो जुहार चो शब्द मोचो कानमन ने पढ़ली, असने ची पिला मोचो पेट ने खुशी ले उदलुन गेलो। 45धन्य आय हुन जोन बिश्वास करलो कि जोन गोठमन परबु चो बाटले हुनचो ले बोला गेली, हुनमन पुरा होयेदे!”
मरियम बाटले माहापुरू चो स्तुति
46तेबे मरियम बल्ली,
“मोचो जीव परबु चो बड़ाई करू आय
47आउर मोचो आत्मा मोचो मुक्ति करतो बिता
माहापुरू ले हरिक होली,
48कसनबल्लोने हुन आपलो दासी चो दिनता उपरे
नंजरालो से;
ऐईकाजे दका, अदायं ले सपाय जुग-जुग
चो लोग मोके धन्य बलदे,
49कसनबल्लोने हुन शक्तिमान मोचो काजे बड़े
बड़े काम करलो से। हुनचो नाव पवितर आय,
50आउर हुनचो दया हुनमन उपरे,
जोन हुनचो ले डरू आत, पीढ़ी-पीढ़ी ले बनु रऊ आय।
51हुन आपलो बांहबल दकालो,
आउर जोन आपलो मन ने घमण्ड करते रवत,
हुनमन के जत-खत करलो।
52हुन शासन करतो बितामन के हुनमन चो सिंघासनमन ले
घसराऊन दिलो;
आउर गरीब-दुरीमन के बड़े बनालो।
53हुन भुकाहामन के अच्छा तीजमन ले संतुष्ट करलो,
आउर धन बितामन के मेलाय हाथ निकराऊन दिलो।
54हुन आपलो सेवक इस्राएल के समाललो
कि आपलो हुन दया के सुरता करोत,
55जोन अब्राहाम आउर हुनचो बंश उपरे हरमेशा रयदे,
जसन हुन आमचो बुआ-दादीमन के बोलु रलो।”
56मरियम लग-भग तीन मयना हुनचो संगे रऊन भाती आपलो घरे आपस जाते गेली।
यूहन्ना डूबन देतो बिता चो जनम
57तेबे इलीशिबा चो जचकी चो समया पुरा होली, आउर हुन पिला के जनम दिली। 58हुनचो पड़ोसीमन आउर कुटुममन ऐ सुनुन भाती कि परबु हुनचो उपरे बड़े दया करलो से, हुनचो संगे हरिक होला, 59आउर असन होली कि आंटवा दिन ने हुनमन लेका चो खतना करूक ईला आउर हुनचो नाव हुनचो बुआ चो नाव थाने जकर्याह संगाऊक मुरयाला। 60ऐ थाने हुनचो आया जबाप दिली, “नाई; मान्तर हुनचो नाव यूहन्ना संगाया जाओ।” 61हुनमन हुनचो ले बल्ला, “तुचो कुटुम ने काचीई ऐ नाव निआय!” 62तेबे हुनमन हुनचो बुआ ले सोयका करून पचारला कि तुय हुनचो नाव काय संगाऊक मन करसीस? 63हुन लिकतोर पटटी मांगुन भाती लिकुन दिलो, “हुनचो नाव यूहन्ना आय,” आउर सपाय के चकित होली। 64तेबे हुनचो मुंह आउर जीब तुरते खुलुन गेली; आउर हुन बोलुक आउर माहापुरू चो धन्यबाद करूक मुरयालो। 65हुनचो लगे-लगे चो सपाय रतो बितामन थाने डर समाली; आउर हुन सपाय गोठमन चो चरचा यहूदिया चो सपाय डोंगरी देश ने फयलुन गेली, 66आउर सपाय सुनतो बितामन आपलो-आपलो मन ने बिचार करून बल्ला, “ऐ लेका कसन होयेदे?” कसनबल्लोने परबु चो हाथ हुनचो संगे रली।
जकर्याह चो अगम गोठ
67हुनचो बुआ जकर्याह पवितर आत्मा ले भरपूर होऊन गेलो आउर अगम गोठ करूक मुरयालो।
68“परबु इस्राएल चो माहापुरू धन्य हो,
कसनबल्लोने हुन आपलो लोगमन उपरे नंजरा लो
आउर हुनमन चो छुटकारा करलो से,
69आउर आपलो सेवक दाऊद चो घर ने
आमचो काजे गोटक मुक्ति चो सींग
निकरालो,
70(जसन हुन आपलो पवितर अगम गिआनीमन
चो बाटले जोन जगत चो मुर ले होते
ईली से, बोलु रलो,)
71बल्लोने आमचो शतरूमन, ले आउर आमचो सपाय
बयरीमन चो हाथ ले आमचो मुक्ति करलो से,
72कि आमचो बुआ-दादीमन उपरे दया करून आपलो
पवितर बायदा चो सुरता करोत,
73आउर हुन किरिया जोन हुन आमचो बुआ
अब्राहाम ले खाऊ रलो,
74कि हुन आमके ऐ देयें दें कि आमी आपलो
शतरूमन चो हाथ ले छंडाय होऊन,
75हुनचो पुरे पवितरता आउर धारमिकता
ले जीवभर निडर रऊन भाती हुनचो सेवा करते रवां।
76आउर तुय हे लेका, परमपरधान चो
अगम गिआनी बलाय जासे,
कसनबल्लोने तुय परबु चो बाट तिआर करतो
काजे हुनचो पुरे-पुरे जासे,
77कि हुनचो लोगमन के मुक्ति चो गिआन देओ,
जोन हुनमन चो पापमन चो छमा ले मिरेसे।
78ऐ आमचो माहापुरू चो हुनी बड़े करूना ले होयेदे;
जेचो लागुन बादरी ले आमचो उपरे बिहान चो उजर उदय होयेदे,
79कि अंधार आउर मरना चो छांय ने बसतो बितामन के उजर देओ,
आउर आमचो पाँयमन के अच्छा बाट ने सीदा चला ओ।”
80आउर हुन लेका बाड़ते आउर आत्मा ने बलवान होते गेलो, आउर इस्राएल थाने परकट होतोर दिन ले रानमन ने रलो।
Currently Selected:
लूका 1: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
