पठालोबितामन 24
24
फेलिक्स चो पुरे पौलुस
1पांच दिन चो पाचे हनन्या माहायाजक कितलो सियानमन आउर तिरतुल्लुस नाव चो कोनी उकील के संगे धरून ईलो। हुनमन मुखिया चो पुरे पौलुस उपरे नालिस करला।
2जिदलदाय हुन हाग दिया गेलो तेबे तिरतुल्लुस हुनचो उपरे दोष लगाऊन भाती बोलुक मुरयालो, हे माहापरतापी फेलिक्स, तुचो बाटले आमीमन ने बड़े कुशल होऊ आय; आउर तुचो जुगाड़ ले ऐ जाति चो काजे कईं खराबीमन सुधरते जाऊ आय।
3ऐके आमी हर जगा आउर हर परकार ले धन्यबाद चो संगे मानु आंव।
4मान्तर ऐईकाजे कि तुके आउर दुक नी देऊक चाहायें, मय तुचो ले बिनती करें से कि किरपा करून आमचो गोटक दुय गोठमन सुन।
5कसनबल्लोने आमी ऐ माने के उपद्रवी आउर जगत चो पुईतराय यहूदीमन ने राजद्रोह करातो बिता, आउर नासरीमन चो कुपन्थ चो मुखिया पावलु से।
6हुन मंदिर के अशुद्ध करतोर चाहा लो, मान्तर आमी हुनके धरलु। आमी हुनके आपलो नियम चो अनुसार डण्ड देऊ रतु;
7मान्तर पलटन चो सरदार लुसियास हुनके जबरन आमचो हाथ ले झिकुन निलो,
8आउर दोष लगाऊ मन के तुचो पुरे ऐतोर हुकुम दिलो। ऐ सपाय गोठमन के जेचो बारे ने आमी हुनचो उपरे दोष लगाऊ सें, तुय खुद ची हुनके जाच करून जान से।
9यहूदीमन बले हुनचो सात देऊन भाती बल्ला, ऐ गोठमन असने ची परकार चो आय।
फेलिक्स चो पुरे पौलुस चो बचाव
10जिदलदाय मुखिया पौलुस के बोलतोर सोयका दिलो, तेबे हुन जबाप दिलो: मय ऐ जानुन भाती कि तुय खुबे बरक ले ऐ जाति चो नियाय कर सीस, हरिक ले खुद चो जबाप देयें से।
11तुय खुद जानुक सकीस कि जिदलदाय ले मय यरूशलेम ने आराधना करूक लाय ईले, मोके बारा दिन ले आगर नी होली से।
12हुनमन मोके ना मंदिर ने ना आराधना घरमन ने, ना नंगर ने काचीई ले झगड़ा करते नाहले भीड़ लगातोर पावला;
13आउर ना तो हुनमन हुन गोठमन के, जेचो हुनमन अदायं मोचो उपरे दोष लगाय सोत, तुचो पुरे सत साबित करूक सकोत।
14मान्तर मय तुचो पुरे ऐ माने से कि जोन बाट के हुनमन कुपन्थ बोले सोत, हुनचेई रीति थाने मय आपलो बुआ दादीमन चो माहापुरू चो सेवा करूं आंय; आउर जोन गोठमन नियम आउर अगम गिआनीमन चो किताब ने लिकलोर आसे, हुन सपाय थाने बिश्वास करूं आंय।
15आउर माहापुरू ले आशा संगाऊ आंय जोन हुनमन खुद बले संगाऊ आत, कि धरमी आउर अधरमी दुनो चो जीव उठतोर होये दे।
16ऐचो ले मय खुद बले कोशिश करूं आंय कि माहापुरू चो, आउर मानेमन चो बाटे मोचो बिबक सदा बेकसूर रओ।
17खुबे बरक चो पाचे मय आपलो लोगमन के दान पोंचाऊक, आउर भेट चेगाऊक ऐऊ रले।
18हुनमन मोके मंदिर ने, शुद्ध दशा ने, बिना भीड़ चो संगे, आउर बिना कोलार करते-करते भेट चेगाते पावला हव, आसिया चो कईं यहूदी रवत हुनमन के नगत रली
19कि अगर मोचो बिरूद ने हुनमन चो लगे काई गोठ होती तेबे ऐथा तुचो पुरे ऐऊन भाती मोचो उपरे दोष लगाता।
20नाहले ऐ खुद ची सांगोत कि जिदलदाय मय बड़े सभा चो पुरे उबा रले, तेबे हुनमन मोचो ने कोन असन गलती पावला?
21ऐ गोटक गोठ के छांडुन जोन मय हुनमन चो मंजी ने उबा होऊन भाती हाग देऊन भाती बोलु रले, मरलो बितामन चो जीव उठतोर बारे ने आजी मोचो तुमचो पुरे पेशी होये से।
22फेलिक्स, जोन ऐ बाट चो गोठमन ठीक-ठीक जानते रलो, हुनमन के ऐ बोलुन भाती टरकान दिलो, “जिदलदाय पलटन चो सरदार लुसियास ऐये दे, तेबे तुमचो गोठमन चो फयसला करे दे।”
23आउर सुबेदार के हुकुम दिलो कि पौलुस के खिन्डिक छुट ने संगाऊन भाती राका जागा करा, आउर हुनचो मितमन ने कोकीई बले हुनचो सेवा करतोर ने नी माना करा।
पौलुस चो फेलिक्स आउर हुनचो बायले ले गोठ-बात
24खिन्डिक दिनमन चो पाचे फेलिक्स आपलो बायले द्रुसिल्ला के, जोन यहूदीनी रली, संगे धरून ईलो आउर पौलुस के हाग देऊन भाती हुन बिश्वास चो बारे ने जोन मसीह ईशु उपरे आसे, हुनचो ले सुनला।
25जिदलदाय हुन धरम, आउर सहन, आउर ऐतो बिता नियाय चो चरचा करते रलो, तेबे फेलिक्स घबराऊन भाती जबाप दिलो, “ऐबे तो जा; मवका दकुन मय तुके फेर हाग देयें दें।”
26हुनके पौलुस ले खिन्डिक रूपया मिरतोर बले आशा रली, ऐईकाजे आउर बले हाग देऊन हाग देऊन भाती हुनचो ले गोठमन करते रलो।
27मान्तर जिदलदाय दुय बरक बितुन गेली तेबे पुरकियुस फेस्तुस, फेलिक्स चो जगा थाने ईलो; आउर फेलिक्स यहूदीमन के खुश करतोर इच्छा ले पौलुस के बन्दी ची छांडुन गेलो।
Currently Selected:
पठालोबितामन 24: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
