पठालोबितामन 25
25
फेस्तुस चो पुरे
1फेस्तुस हुन परगन ने पोंचलोर तीन दिन पाचे कैसरिया ले यरूशलेम बाटे गेलो।
2तेबे परधान याजकमन आउर यहूदीमन चो मुखिया लोगमन हुनचो पुरे पौलुस चो उपरे दोष लगाला;
3आउर हुनचो ले बिनती करून हुनचो बिरूद ने ऐ बर चाहला कि हुन हुनके यरूशलेम ने हाग देओ, कसनबल्लोने हुनमन हुनके बाट ने ची मारून देतोर घत ने लगु रवत।
4फेस्तुस जबाप दिलो, “पौलुस कैसरिया ने पाहारा ने आसे, आउर मय खुद झटके हुता जायें दें।”
5फेर बल्लो, “तुमचो ने जोन हक संगाऊ आत हुनमन संगे जाओत, आउर अगर ऐ माने काई खराप काम करलो से तो हुनचो उपरे दोष लगा ओत।”
6हुनमन चो मंजी कोनी आंट दस दिन रऊन भाती हुन कैसरिया जाते गेलो; आउर दुसर दिने नियाय आसन ने बसुन भाती पौलुस के आनतोर हुकुम दिलो।
7जिदलदाय हुन ईलो तेबे जोन यहूदी यरूशलेम ले ऐऊन रवत, हुनमन लगे-लगे उबा होऊन भाती हुनचो उपरे खुबे असन घोर दोष लगाला, जेचो सबुत हुनमन नी देऊक सकते रवत।
8मान्तर पौलुस जबाप दिलो, “मय ना तो यहूदीमन चो नियम चो आउर ना मंदिर चो, आउर ना राजा चो बिरूद कोनी गलती करले से।”
9तेबे फेस्तुस यहूदीमन के खुश करतोर इच्छा ले पौलुस ले बल्लो, “काय तुय मन कर सीस कि यरूशलेम बाटे जांवा; आउर हुता मोचो पुरे तुचो ऐ पेशी तय करा जाओ?”
पौलुस चो राजा के गुहारतोर
10पौलुस बल्लो, मय राजा चो नियाय आसन चो पुरे उबा आंसे; मोचो पेशी चो ऐथाय फयसला होतोर आसे। जसन तुय अच्छा ले जानीस, यहूदीमन चो मय काई अपराध नी करले।
11अगर मय अपराधी आंय आउर मारून पकातोर लायक कोनी काम करले से, तेबे मरतो काजे नी मुकरें; मान्तर जोन गोठमन चो ऐ मोचो उपरे दोष लगाऊ आत, अगर हुनमन थानले कोनी बले गोठ सत नी ठेबे, तेबे कोनी मोके हुनमन चो हाथे नी सोपुक सके। मय राजा चो दुहाई देयें से।
12तेबे फेस्तुस मंत्रीमन चो सभा चो संगे गोठमन करून जबाप दिलो, “तुय राजा चो दुहाई दिली सीस, तुय राजा ची हि लगे जासे।”
अग्रिप्पा चो पुरे पौलुस
13खिन्डिक दिन गेलो पाचे अग्रिप्पा राजा आउर बिरनीके कैसरिया ने ऐऊन भाती फेस्तुस ले भेट करला।
14हुनमन चो खुबे दिन हुता रलोर पाचे फेस्तुस पौलुस चो बारे ने राजा के सांगलो, गोटक माने आसे, जोन के फेलिक्स बन्दी छांडुन गेलो से।
15जिदलदाय मय यरूशलेम ने रयें, तेबे परधान याजक आउर यहूदीमन चो पुरनिमन हुनचो नालिस करला आउर चाहला कि हुनचो उपरे डण्ड चो हुकुम दिया जाओ।
16मान्तर मय हुनमन के जबाप दिले कि रोमिमन चो ऐ रीति नुआय कि कोनी माने के डण्ड चो काजे सोपुन दे ओत, जिदलदाय ले मुद्दाघर के आपलो दोष लगाऊ बितामन चो पुरे उबा होऊन भाती दोष चो जबाप देतोर मवका नी मिरे।
17आउर जिदलदाय हुनमन ऐथा रूंडा होला, तेबे मय खिन्डिक बेर नी करले, मान्तर दुसर ची दिने नियाय आसन थाने बसुन भाती हुन माने के आनतोर हुकुम दिले।
18जिदलदाय हुनचो दोष लगाऊ बितामन उबा होला, तेबे हुनमन असन खराप गोठमन चो दोष नी लगाला, जसन मय समजते रले।
19मान्तर हुनमन आपलो मत चो आउर ईशु नाव कोनी माने चो बारे ने, जोन मरून जाऊ रये आउर पौलुस हुनके जीवता सांगु रये, गोठ बात करते रवत।
20मय धोक ने रले कि ऐ गोठमन चो पता कसन लगायें दे? ऐईकाजे मय हुनचो ले पचार ले, काय तुय यरूशलेम जाऊ आस कि हुता ऐ गोठमन चो फयसला होओ?
21“मान्तर जिदलदाय पौलुस दुहाई दिलो कि हुनचो पेशी चो फयसला माहाराजाधीराज चो थाने होओ, तेबे मय हुकुम दिले कि जिदलदाय ले हुनके राजा चो लगे नी पटायें, हुनके हिरासत ने संगाया जाओ।”
22तेबे अग्रिप्पा फेस्तुस ले बल्लो, “मय बले हुन माने चो सुनुक चाहायें से।” हुन बल्लो, “तुय काली के सुन से।”
23आउर दुसर दिने जिदलदाय अग्रिप्पा आउर बिरनीके बड़े धुमधाम ले ईला आउर पलटन चो सरदारमन आउर नंगर चो मुखिया लोगमन चो संगे दरबार ने पोंचला। तेबे फेस्तुस हुकुम दिलो कि हुनमन पौलुस के धरून आनोत।
24फेस्तुस बल्लो, “हे राजा अग्रिप्पा, आउर हे सपाय मानेमन जोन ऐथा आमचो संगे आसास, तुमी ऐ माने के दकेसास, जेचो बारे ने सपाय यहूदीमन यरूशलेम ने आउर ऐथा बले चिचयाऊन-चिचयाऊन भाती मोचो ले बिनती करला कि ऐचो जीव रतोर ठीक नुआय।”
25मान्तर मय जानले कि हुन असन काई नी करलो कि मारून दिया जाओ; आउर जसन कि हुन खुदे ची माहाराजाधीराज चो दुहाई दिलो, तेबे मय हुनके पटातोर तय करले।
26मय हुनचो बारे ने काई तय गोठ नी पावले कि आपलो मालिक चो लगे लिकेन्दे। ऐईकाजे मय हुनके तुमचो पुरे आउर खास करून हे राजा अग्रिप्पा, तुचो पुरे आनले से कि जाचलोर पाचे मोके काई लिकतो काजे मिरो।
27कसनबल्लोने बन्दी के पटातोर आउर जोन दोष हुनचो उपरे लगाया गेली, हुनमन के नी सांगतोर, मोके फोकाहा जान पड़े से।
Currently Selected:
पठालोबितामन 25: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
