पठालोबितामन 23
23
1पौलुस महासभा चो बाटे नजर गड़ाऊन भाती दकलो आउर बल्लो, “हे भाईमन, मय आजी तक माहापुरू चो काजे बिलकुल सत बिबक ले जीवना बिताले से।”
2ऐ थाने हनन्या माहायाजक हुनमन के जोन हुनचो लगे उबा रओत, हुनचो थमना थाने थापड़ मारतोर हुकुम दिलो।
3तेबे पौलुस हुनचो ले बल्लो, “हे चुना सरालो बिती भिती, माहापुरू तुके मारे दे। तुय नियम चो अनुसार मोचो नियाय करतो काजे बसली सीस, आउर फेर काय नियम चो बिरूद मोके मारतोर हुकुम देये सीस?”
4जोनमन लगे उबा रओत हुनमन बल्ला, “काय तुय माहापुरू चो माहायाजक के अनाप-सनाप बोल सीस?”
5पौलुस बल्लो, “हे भाईमन, मय नी जानते रयें कि ये माहायाजक आय; कसनबल्लोने लिकलोर आसे, ‘आपलो लोगमन चो परधान के खराप नी बोल’।”
6तेबे पौलुस ऐ जानुन भाती कि गोटक दल सदूकीमन आउर दुसर फरीसीमन चो आय, सभा ने हाग देऊन भाती बल्लो, “हे भाईमन, मय फरीसी आउर फरीसीमन चो बंश चो आंय, मरलो लोगमन चो आशा आउर जीव उठतोर बारे ने मोचो पेशी होये से।”
7जिदलदाय हुन ये गोठ बल्लो तेबे फरीसीमन आउर सदूकीमन ने झगड़ा होऊक मुरयाली; आउर सभा ने फुट पडुन गेली।
8कसनबल्लोने सदूकी तो ऐ बोलु आत, कि ना जीव उठतोर आसे, ना सरगदूत आउर ना आत्मा आसे; मान्तर फरीसी ऐ सपाय के मानु आत।
9तेबे बड़े कोलार होली आउर खिन्डिक शास्तरीमन जोन फरीसीमन चो दल चो रवत, उठून उबा होला आउर ऐ बोलुन भाती झगड़ा होऊक मुरयाला, “आमी ऐ माने ने काई खराबी नी पाऊं, आउर अगर कोनी आत्मा नाहले सरगदूत हुनचो ले बोलु आय तो फेर काय?”
10जिदलदाय खुबे झगड़ा होली, तेबे पलटन चो सरदार ऐ डर ले कि हुनमन पौलुस चो गोंदा-गोंदा नी करून दे ओत, पलटन के हुकुम दिलो कि उतरून भाती हुनके हुनमन चो मंजी ले जबरन निकराओत आउर गड़ ने धरून नेओत।
11हुनी राती परबु हुनचो लगे उबा होऊन भाती बल्लो, “हे पौलुस, हिम्मत बांद; कसनबल्लोने जसन तुय यरूशलेम ने मोचो गोहई दिलीस, असने ची तुके रोम ने बले गोहई देतोर होये दे।”
पौलुस चो हत्या करतोर खराप उआट
12जिदलदाय दिन होली तेबे यहूदीमन खराप उआट बनाला आउर किरिया खादला कि जिदलदाय ले आमी पौलुस के मारून नी पकाऊं, तेबे तक खाऊं नाहले पिऊं तेबे आमचो उपरे छी।
13जोनमन खुद ने ऐ किरिया खाऊ रला, हुनमन चालीस झान ले खुबे रवत।
14हुनमन परधान याजकमन आउर पुरनिमन चो लगे जाऊन भाती बल्ला, “आमी ऐ कट करलु से कि जिदलदाय ले आमी पौलुस के मारून नी पाकाऊ, तेबे तक अगर काई चाकुन्दे बले तो आमचो उपरे छी आय।”
15“ऐईकाजे अदायं महासभा संगे पलटन चो सरदार के समजाहा कि हुनके तुमचो लगे धरून ऐओ, माना कि तुमी हुनचो बारे ने आउर बले ठीक ले जाच करूक मन करेसास; आउर आमी हुनचो अमरतोर पयले ची हुनके मारतो काजे तिआर रउन्दे।”
16पौलुस चो भाचा सुनलो कि हुनमन हुनचो घत ने आसोत, तेबे गढ़ ने जाऊन भाती पौलुस के खबर दिलो।
17पौलुस सुबेदारमन ले गोटक के आपलो लगे हाग देऊन भाती बल्लो, “ऐ जुआन के पलटन चो सरदार चो लगे निया, ऐ हुनचो ले काई बोलतोर मन करे से।”
18ऐईकाजे हुन हुनके पलटन चो सरदार चो लगे नेऊन भाती बल्लो, “बन्दी पौलुस मोके हाग देऊन भाती गुहार करलो कि ऐ जुआन पलटन चो सरदार ले काई बोलतोर मन करे से; ऐके हुनचो लगे धरून जा।”
19पलटन चो सरदार हुनचो हाथ धरून भाती आउर अलगे नेऊन भाती पचारलो, “तुय मोचो ले काय बोलतोर मन कर सीस?”
20हुन बल्लो, यहूदीमन उआट बनाला से कि तुचो ले गुहार करोत कि काली के पौलुस के बड़े सभा ने आनोत, माना हुनमन आउर ठीक ले हुनचो जाच करूक मन करे सोत।
21मान्तर हुनमन चो नी मान, कसनबल्लोने हुनमन थानले चालीस चो उपरे माने हुनचो घात ने आसोत, जोनमन ऐ हट करला सोत कि जिदलदाय ले हुनमन पौलुस के मारून नी दे ओत, तेबे तक ना खादे आउर ना पिवदे। आउर अदायं हुनमन तिआर आसोत आउर तुचो बचन चो बाट दक सोत।
22तेबे पलटन चो सरदार जुआन के ऐ हुकुम देऊन भाती बिदा करलो, “कोचीई ले नी बोल कि तुय मोके ऐ गोठमन सांगली सीस।”
पौलुस के कैसरिया ने पटातोर
23तेबे हुन दुय झान सुबेदारमन के हाग देऊन भाती बल्लो, दुय सव पलटन, सतर चेगतो बिती, आउर दुय सव भाला बितामन, पाहरक राती बितलोर पाचे कैसरिया बाटे जातो काजे तिआर करून संगाआ।
24आउर पौलुस चो चेगतो काजे घोड़ा तिआर संगाआ, कि हुनके फेलिक्स हाकिम चो लगे बचाऊन पोंचाऊन देवां।
25हुन असन परकार चो चिठ्ठी बले लिकलो:
26“माहापरतापी फेलिक्स मुखिया के क्लौदियुस लुसियास चो जुहार।”
27ऐ माने के यहूदीमन धरून भाती मारून देतोर मन करला, मान्तर जिदलदाय मय जानले कि रोमि आय, तेबे पलटन धरून भाती छंडाऊन आनले।
28मय जानतोर मन करते रले कि हुनमन हुनचो उपरे काय कारन दोष लगाय सोत, ऐईकाजे हुनके हुनमन चो माहासभा ने धरून नीले।
29तेबे मय जानले कि हुनमन आपलो नियम चो झगड़ा चो बारे ने हुनचो उपरे दोष लगाऊ आत, मान्तर मारून दिया जातोर नाहले बान्दा जातोर लायक हुनचो उपरे काई दोष निआय।
30“जिदलदाय मोके सांगा गेली कि हुनमन ऐ माने चो घत ने भीड़ला सोत तेबे मय तुरते हुनके तुचो लगे पटाऊन दिले; आउर बयरीमन के बले हुकुम दिले कि तुचो पुरे हुनचो उपरे नालिस करोत।”
31आउर जसन पलटनमन के हुकुम दिया जाऊ रली, असने ची हुनमन पौलुस के धरून भाती राती-रात अन्तिपत्रिस ने ईला।
32दुसर दिन हुनमन चेगतो बितीमन के हुनचो संगे जातो काजे छांडुन भाती खुद गढ़ बाटे लेवटला।
33हुनमन कैसरिया अमरून भाती मुखिया के चिठ्ठी दिला; आउर पौलुस के बले हुनचो पुरे उबा करला।
34हुन चिठ्ठी पढुन भाती पचारलो, “ऐ कोन परगन चो आय?”
35आउर जिदलदाय जानलो कि किलिकिया चो आय तेबे हुनचो ले बल्लो, “जिदलदाय तुचो बयरी बले ऐ दे, तेबे मय तुचो मुकदमा करें दें।” आउर हुन हुनके हेरोदेस चो किला ने पाहारा ने संगातोर हुकुम दिलो।
Currently Selected:
पठालोबितामन 23: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
