पठालोबितामन 22
22
भीड़ ने पौलुस चो खबर
1“हे भाईमन आउर बुआमन, मोचो जबाप सुना, जोन मय अदायं तुमचो पुरे पेश करें से।”
2हुनमन ऐ सुनुन भाती कि हुन आमचो ले इब्रानी भाषा ने बले से, आउर बले ओगाय होला। तेबे हुन बल्लो:
3“मय तो यहूदी माने आंय, जोन किलिकिया चो तरसुस ने जनम ले; मान्तर ऐ नंगर ने गमलीएल चो पाँयमन चो लगे बसुन भाती पड़ाया गेले, आउर बुआ दादीमन चो नियम चो ठीक रीति थाने सिकाया गेले; आउर माहापुरू चो काजे असन बाय लगाऊन रले, जसन तुमी सपाय आजी लगालासास।”
4मय माने आउर बायले लेकी दुनो के बान्दुन भाती आउर जयलघर ने ढाकुन भाती, ऐ बाट के ऐथा ले कन्दराले कि हुनमन के मराऊन बले दिले।
5ऐ गोठ काजे माहायाजक आउर सपाय पुरनिमन गोहई आसोत, कि हुनमन ले मय भाईमन चो नाव ने चिठ्ठी धरून भाती दमिश्क ने जाते रयें, कि जोन हुता रओ हुनमन के बले, डण्ड दियातो काजे बान्दुन भाती यरूशलेम आने दे।
मन बदलतोर गोठ
6जिदलदाय मय जाते-जाते दमिश्क लगे अमरले, तेबे असन होली कि दुसर पाहार चो लगे-लगे उधापड़े गोटक बड़े उजर बादरी ले मोचो भोंवरक बरली।
7आउर मय भुईं ने घसरले आउर ऐ शब्द सुनले, हे शाऊल, हे शाऊल, तुय मोके केंव कन्दराय सीस?
8मय जबाप दिले, हे परबु, तुय कोन आस? हुन मोचो ले बल्लो, मय ईशु नासरी आंय, जोन के तुय कन्दराय सीस।
9मोचो संगवारीमन उजर तो दकला, मान्तर जोन मोचो ले बोलते रलो हुनचो शब्द नी सुनला।
10तेबे मय बल्ले, हे परबु, मय काय करू आंय? परबु मोचो ले बल्लो, उठून भाती दमिश्क ने जा, आउर जोन काई तुचो करतो काजे ठेबाया गेली से हुता तुके सपाय सांगुन दिया जाये दे।
11जिदलदाय हुन उजर चो चमक चो लागुन मोके काई दका नी दिली, तेबे मय आपलो संगवारीमन चो हाथ धरून भाती दमिश्क ने ईले।
12तेबे हनन्या नाव चो नियम चो अनुसार गोटक भगत माने, जोन हुता रतो बिता सपाय यहूदीमन ने सुनाम रलो, मोचो लगे ईलो,
13आउर उबा होऊन भाती मोचो ले बल्लो, हे भाई शाऊल, फेर दकुक मुरयाव। हुदली ची दाय मोचो आँईक खुलली आउर मय हुनके दकले।
14तेबे हुन बल्लो, आमचो बुआ दादीमन चो माहापुरू तुके ऐईकाजे ठेबालो से कि तुय हुनचो इच्छा के जान, आउर हुन धरमी के दक आउर हुनचो मुंह ले गोठमन सुन।
15कसनबल्लोने तुय हुनचो बाटले सपाय मानेमन चो पुरे हुन गोठमन चो गोहई हो से जोन तुय दकलीस आउर सुनली सीस।
16अदायं केंव बेर कर सीस? उठ, डूबन धर, आउर हुनचो नाव धरून भाती आपलो पापमन के धोई हो।
17जिदलदाय मय फेर यरूशलेम ने ऐऊन भाती मंदिर ने पारथना करते रले, तेबे बेसुद होऊन गेले,
18आउर हुनके दकले कि हुन मोचो ले बले से, झटके करून यरूशलेम ले तड़ाक राय निकरून जा; कसनबल्लोने हुनमन मोचो बारे ने तुचो गोहई नी मान दे।
19मय बल्ले, हे परबु, हुनमन तो खुद जानोत कि मय तुचो उपरे बिश्वास करतो बितामन के जयलघर ने ढाकतोर आउर जगा-जगा आराधना घर ने पेटाते रयें।
20जिदलदाय तुचो गोहई स्तिफनुस चो लऊ बोहड़ाया जाते रली तेबे मय बले हुता उबा रयें आउर ऐ गोठ ने राजी रयें, आउर हुनचो हत्यारामन चो फटीई चो राका करते रयें।
21आउर हुन मोचो ले बल्लो, जाते जा: कसनबल्लोने मय तुके दुसर जातिमन चो लगे लापी-लापी पटायें दें।
22हुनमन ऐ गोठ लगले हुनचो सुनते रला, तेबे बड़े जोर ले चिचयाला, “असन माने चो खात्मा करा, हुनचो जीव रतोर नगत नुआय!”
23जिदलदाय हुनमन चिचयाते आउर फटीई पकाते आउर बादरी ने धुरला उड़ाते रवत;
24तेबे पलटन चो सरदार बल्लो, “ऐके गढ़ ने धरून जाआ, आउर कोड़ा मारून भाती जाच करा, कि मय जाने कि लोग काय कारन ने हुनचो बिरूद ने असन चिचयायसोत।”
25जिदलदाय हुनमन हुनके बेलुर ले बान्दला तेबे पौलुस हुन सुबेदार ले जोन लगे उबा रये, बल्लो, “काय ऐ ठीक आय कि तुमी गोटक रोमि माने के, आउर हुन बले बिना दोषी ठेबालोर, कोड़ा मारा?”
26सुबेदार ऐ सुनुन भाती पलटन चो सरदार चो लगे जाऊन भाती बल्लो, “तुय ऐ काय कर सीस? ऐ तो रोमि माने आय।”
27तेबे पलटन चो सरदार हुनचो लगे ऐऊन भाती बल्लो, “मोके सांग, काय तुय रोमि आस?” हुन बल्लो, “हव।”
28ऐ सुनुन भाती पलटन चो सरदार बल्लो, “मय रोमि होतोर पन खुबे रूपया देऊन भाती पावले से।” पौलुस बल्लो, “मय तो जनम ले रोमि आंय।”
29तेबे जोन लोग हुनके जाच करतो काजे रवत, हुनमन तुरते हुनचो लगले गुचुन गेला; आउर पलटन चो सरदार बले ऐ जानुन भाती कि ऐ रोमि आय आउर मय हुनके बान्दले से, डरून गेलो।
माहासभा चो पुरे पौलुस
30दुसर दिने हुन ठीक-ठीक जानतोर इच्छा ले कि यहूदी हुनचो उपरे केंव दोष लगाय सोत, हुनचो बान्दन ढ़िलुन दिला; आउर परधान याजकमन आउर पुईतराय माहासभा के रूंड़ा होतोर हुकुम दिलो, आउर पौलुस के खाले नेऊन भाती हुनमन चो पुरे उबा करलो।
Currently Selected:
पठालोबितामन 22: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
