पठालोबितामन 17
17
थिस्सलुनीके नंगर ने पौलुस आउर सीलास
1फेर हुनमन अम्फिपुलिस आउर अपुलोनिया होऊन भाती थिस्सलुनी ने ईला, जोन थाने यहूदीमन चो गोटक आराधना घर रली।
2पौलुस आपलो रीति चो अनुसार हुनमन चो लगे गेलो, आउर तीन सब्त चो दिने पवितर शास्त्रमन ले हुनमन चो संगे गोठ बात करलो;
3आउर हुनमन चो मतलब खोलुन-खोलुन समजाते रलो कि मसीह के दुख उठातोर, आउर मरलो बितामन थानले जीव उठतोर, जरूरी रये; आउर “ऐई ईशु जेचो मय तुमके कथा सुनाय से, मसीह आय।”
4हुनमन थानले कितलो झान, आउर भगत यूनानीमन थानले खुबेमन, आउर खुबे असन कलंकीन बायले लेकीमन मानला, आउर पौलुस आउर सीलास चो संगे मिसुन गेला।
5मान्तर यहूदीमन कुचर ले भरून भाती बजार चो लोगमन थानले कितलो दुष्ट मानेमन के आपलो संगने धरला, आउर भीड़ रूंड़ा करून नंगर ने कोलार करूक मुरयाला, आउर यासोन चो घर थाने जबरन जाऊन हुनमन के लोगमन चो पुरे आनुक मन करला।
6हुनमन के हुता नी भेटुन भाती हुनमन ऐ चिचयाते-चिचयाते यासोन आउर खिन्डिक भाईमन के नंगर चो हाकिममन चो पुरे झिकुन आनला, ऐ लोग जोनमन जगत के उलटा पुलटा करून दिला से, ऐथा बले ऐऊन गेला से।
7यासोन हुनमन के आपलो थाने उतरालो से। ऐ सपाय चो सपाय ऐ बोल सोत कि ईशु राजा आय, आउर राजा चो हुकुममन चो बिरूद करे सोत।
8हुनमन लोगमन के आउर नंगर चो हाकिममन के ऐ सुनाऊन भाती घबराऊन दिला।
9ऐईकाजे हुनमन यासोन आउर बाकी लोगमन ले जुरमाना धरून हुनमन के छांडुन दिला।
बिरीया नंगर ने पौलुस आउर सीलास
10भाईमन तुरते रात ची रात पौलुस आउर सीलास के बिरीया पटाऊन दिला; आउर हुनमन हुता पहुँचुन भाती यहूदीमन चो आराधना घर ने गेला।
11ऐ लोग तो थिसलुनी चो यहूदीमन ले अच्छा रवत, आउर हुनमन बड़े लालच ले बचन गरहन करला, आउर रोजे दिना पवितर शास्त्रमन ने डगराते रला कि ऐ गोठमन असने ची आय कि नुआय।
12ऐईकाजे हुनमन थानले खुबेमन, आउर यूनानी सियानिन बायले लेकीमन थानले आउर मानेमन थानले बले खुबेमन बिश्वास करला।
13मान्तर जिदलदाय थिस्सलुनी चो यहूदी जानुन गेला कि पौलुस बिरीया ने बले माहापुरू चो बचन सुनाऊ आय, तेबे हुता बले ऐऊन भाती लोगमन के हुच हुचाक आउर हुड़दुम करूक मुरयाला।
14तेबे भाईमन तुरते पौलुस के बिदा करला कि समुन्द चो रेटे जाते जाओ; मान्तर सीलास आउर तीमुथियुस हुताय रऊन गेला।
15पौलुस के अमरातो बितामन हुनके एथेन्स लगले धरून गेला; आउर सीलास आउर तीमुथियुस चो काजे ऐ हुकुम पाऊन भाती बिदा होला कि हुनमन हुनचो लगे झटके ले झटके ऐ ओत।
एथेन्स नंगर ने पौलुस
16जिदलदाय पौलुस एथेन्स ने हुनमन चो बाट टाकते रलो, तेबे नंगर के मुरतीमन ले भरी होलोर दकुन भाती हुनचो जीव जलुन गेली।
17आउर हुन आराधना घर ने यहूदीमन आउर भगतमन ले, आउर जोड़ान ने जोन लोग हुनके भेटते रवत हुनमन चो ले रोजे दिना गोठ बात करते रलो।
18तेबे इपिकुरी आउर स्तोईकी दरशन दकुमन थानले कितलो हुनके तर्क करूक मुरयाला, आउर कितलो बल्ला, “ऐ टाबरी काय बोलुक मन करे से?” मान्तर दुसरमन बल्ला, “हुन दुसर देवमन चो परचार करू जान पड़े से” कसनबल्लोने हुन ईशु चो आउर जीव उठतोर नगतखबर सुनाते रलो।
19तेबे हुनमन हुनके आपलो संगे अरियुपगुस थाने धरून गेला आउर पचारला, काय आमी जानुक सकु कि ऐ नवा मत जोन तुय सुनाय सीस, काय आय?
20कसनबल्लोने तुय भयंकर गोठमन आमके सुनाय सीस, ऐईकाजे आमी जानुक मनकरू से कि ऐ मन चो मतलब काय आय।
21(ऐईकाजे कि सपाय एथेन्स बितामन आउर परदेशीया जोन हुता रते रवत, नवा-नवा गोठमन बोलतोर आउर सुनतोर छांडुन आउर कोनी काम ने समया नी बिताते रवत।)
अरियुपगुस ने पौलुस चो उपदेश
22तेबे पौलुस अरियुपगुस चो मंजी ने उबा होऊन भाती बल्लो,
हे एथेन्स चो लोगमन, मय दकें सें कि तुमी हर गोठ ने देवमन चो बड़े मानतो बिता आस।
23कसनबल्लोने मय फिरते-फिरते जिदलदाय तुमचो पुजा करतो बिती तीजमन के दकते रले, तेबे गोटक असन बेदी बले पावले, जेचो उपरे लिका रली, नी जानतो ईश्पर चो काजे। ऐईकाजे जोन के तुमी बिन जानुन पुजेसास, मय तुमके हुनचो खबर सुनाये से।
24जोन माहापुरू धरतनी आउर हुनचो सपाय तीजमन के बनालो, हुन सरग आउर धरतनी चो मालिक होऊन भाती, हाथ चो बनालो बिती मंदिरमन ने नी रये;
25ना कोनी तीज चो जरूरत चो लागुन मानेमन चो हाथमन चो सेवा धरू आय, कसनबल्लोने हुन खुद ची सपाय के जीव आउर फुंडा आउर सपाय काई देऊ आय।
26हुन गोटक ची मुर ले मानेमन चो सपाय जातिमन पुईतराय धरतनी थाने रतो काजे बनालो से; आउर हुनमन चो थेबालो बिती समया आउर डेरा चो संदीमन के ऐईकाजे बान्दलो से,
27कि हुनमन माहापुरू के डगरा ओत, आउर कोन जाने हुनके टमडून भाती पाओत, तेबले बले हुन आमचो थानले कोचीई ले लापी निआय।
28कसनबल्लोने आमी हुनचेई ने जीव रऊन, आउर हिन्ड़ते बुलते, आउर थीर रऊ आंव; जसन तुमचो कितलो कवीमन बले बल्ला से,
“आमी तो हुनचेई बंशज आंव।”
29आउर माहापुरू चो कुल होऊन भाती आमके ऐ समजतोर नगत नुआय कि ईश्पररुप सोना नाहले रूपा नाहले पकना चो असन आय, जोन माने चो चाटुबड़ई आउर कलपना ले गड़लो बिती होओ।
30ऐईकाजे माहापुरू अगिआनता चो समयामन थाने धिआन नी दिलो, मान्तर अदायं हर जगा सपाय मानेमन के मन फिरातोर हुकुम देऊ आय।
31“कसनबल्लोने हुन गोटक दिन ठेबालो से, जोन थाने हुन-हुन माने चो बाटले धरम ले जगत चो नियाय करे दे, जोन के हुन ठेबालो से, आउर हुनके मरलो बितामन थानले जिआऊन भाती ऐ गोठ सपाय उपरे परकट करून दिलो से।”
32मरलो बितामन चो जीव उठतोर गोठ सुनुन भाती कितलो तो मजाक उड़ाऊक मुरयाला, आउर कितरो बल्ला, “ऐ गोठ आमी तुचो ले फेर केबीई सुनवां।”
33ऐ थाने पौलुस हुनमन चो मंजी ले निकरून गेलो।
34मान्तर कितलो माने हुनचो संगे मिसुन गेला, आउर बिश्वास करला; जोन थाने डीयुनुसीऊस जोन अरियुपगुस चो सदस्य रलो, आउर दमरिस नाव चो गोटक बायले लेकी रली, आउर हुनमन चो संगे आउर बले लोग रवत।
Currently Selected:
पठालोबितामन 17: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
