पठालोबितामन 16
16
पौलुस आउर तीमुथियुस
1फेर हुन दिरबे आउर लुस्त्रा ने बले गेलो। हुता तीमुथियुस नाव चो गोटक चेला रलो, जोन कोनी बिश्वासी यहूदीनी चो बेटा रलो, मान्तर हुनचो बुआ यूनानी रलो।
2हुन लुस्त्रा आउर इकुनियुम चो भाईमन ने सुनाम रलो।
3पौलुस चो इच्छा रली कि हुन हुनचो संगे चलो; आउर जोन यहूदी लोग हुन जगामन ने रवत हुनमन चो लागुन हुन हुनचो खतना करलो, कसनबल्लोने हुनमन सपाय जानते रवत, कि हुनचो बुआ यूनानी रलो।
4आउर नंगर-नंगर जाते-जाते हुनमन हुन बिदीमन के जोन यरूशलेम चो पठालोबिता आउर सियानमन ठेबाऊ रला, मानतो काजे हुनमन के पोंचाते जाते रवत।
5ऐई परकार कलीसियामन बिश्वास ने थीर होते गेला आउर गेनती ने रोजे दिना बाड़ते गेला।
पौलुस चो दरशन
6हुनमन फ्रुगिया आउर गलातिया परदेशमन ले होऊन भाती गेला, कसनबल्लोने पवितर आत्मा हुनमन के आसिया ने बचन सुनातो ले मना करलो।
7हुनमन मूसिया चो लगे अमरून भाती, बितूनिया ने जाऊक मन करला; मान्तर ईशु चो आत्मा हुनमन के जाऊक नी दिलो।
8आउर हुनमन मूसिया ले होऊन भाती त्रोआस ने ईला।
9हुता पौलुस राती बेरा गोटक दरशन दकलो कि गोटक मकिदूनी माने उबा होऊन हुनचो ले बिनती करून बले से, “हुनपाट उतरून भाती मकिदुनिया ने आव, आउर आमचो सायता कर।”
10हुनचो ऐ दरशन दकते ची आमी तुरते मकिदुनिया जाऊक मन करलु, ऐ समजुन भाती कि माहापुरू आमके हुनमन के नगतखबर सुनातो काजे हाग दिलो से।
11ऐईकाजे त्रोआस ले जाहाज ढ़िलुन भाती आमी शुमत्रा चो आउर दुसर दिने नियापुलिस ने ईलु।
12हुता ले आमी फिलिप्पी अमरलु, जोन मकिदुनिया गड़ चो खास नंगर आउर रोमिमन चो बस्ती आय; आउर आमी हुन नंगर ने खिन्डिक दिन ले रलु।
13सब्त चो दिने आमी नंगर चो बाट चो बाहरे लंदी चो रेटे ऐ समजुन भाती गेलु कि हुता पारथना करतोर जगा होये दे, आउर बसुन भाती हुन बायले लेकीमन ले जोन रूंड़ा होऊ रवत, गोठयाऊक मुरयालु।
यूरोप चो पहिल बिश्वासी
14लुदिया नाव चो थुआथीरा नंगर चो बैंजनी फटीईमन बिकतो बिती गोटक भगत बायले लेकी सुनते रली। परबु हुनचो मन खोललो कि हुन पौलुस चो गोठमन थाने मन लगा ओ।
15जिदलदाय हुन आपलो घरलोगमन संगे डूबन धरला, तेबे हुन आमचो ले बिनती करली, “अगर तुमी मोके परबु चो बिश्वासीनी समजेसास, तो जाऊन भाती मोचो घर ने राहा,” आउर हुन आमके राजी करून निली।
दुष्टआत्मा ले छंडाय होतोर
16जिदलदाय आमी पारथना करतोर जगा जाते रलु, तेबे आमके गोटक दासी भेट होली जेचो ने अगम गोठ बलतो बिती आत्मा रली; आउर अगम गोठ बल्लो ले आपलो मालिकमन चो काजे खुबे काई कमाऊन आनते रली।
17हुन पौलुस चो आउर आमचो पाटकुती ऐऊन भाती चिचयाऊक मुरयाली, “ये माने परमपरधान माहापुरू चो दास आत, जोन आमके मुक्ति चो बाट चो कथा सुनाऊ आत।”
18हुन खुबे दिन ले असने ची करते रली; मान्तर पौलुस नराज होलो, आउर पलटून भाती हुन आत्मा के बल्लो, “मय तुके ईशु मसीह चो नाव ले हुकुम देयें से कि हुन थानले निकरून जा।” आउर हुन हुदली ची दाय निकरून गेली।
19जिदलदाय हुनचो मालिकमन दकला कि आमचो कमाई चो आशा जाते रली, तेबे पौलुस आउर सीलास के धरून जोड़ान ने परधानमन चो लगे झिकुन नीला;
20आउर हुनमन के फवजीमन चो हाकिममन चो लगे नीला आउर बल्ला, ऐ लोग जोन यहूदी आत, आमचो नंगर ने बड़े हुड़दुम करे सोत;
21आउर असन रीतिमन सांगे सोत, जोनमन के अपनातोर नाहले मानतोर आमी रोमिमन चो काजे ठीक नुआय।
पौलुस आउर सीलास जयलघर ने
22तेबे भीड़ चो लोग हुनमन चो बिरूद ने रूंड़ा होऊन भाती उपरे ईला, आउर हाकिममन हुनमन चो फटीई चिरून भाती हिटाला, आउर हुनमन के बेत मारतोर हुकुम दिला।
23खुबे बेत मराऊन भाती हुनमन-हुनमन के जयलघर ने ढाकुन दिला आउर पलटन के हुकुम दिला कि हुनमन के चलाक ने संगाओत।
24हुन असन हुकुम पाऊन भाती हुनमन के भीतर चो खोली ने संगालो आउर हुनमन चो पाँय फारा ने ठेचुन दिला।
पौलुस आउर सीलास के जयलघर ले छंडातोर
25अधघर राती चो लगे-लगे पौलुस आउर सीलास पारथना करते-करते माहापुरू चो भजन गाते रवत, आउर कयदीमन हुनमन चो सुनते रवत।
26ईतलो ने उटपटांग बड़े भुईं डोल ईली, ऐथा ले कि जयलघर चो पाया हलुन गेली, आउर तुरते सपाय बाट उगाढ़ी होली; आउर सपाय चो बान्दन हिटुन गेली।
27दरोगा चेतलो, आउर जयलघर चो बाट उगाढ़ा दकुन भाती समजलो कि कयदी पराला से, आउर हुन तलवार झिकुन भाती आपन खुद के मारतोर मन करलो।
28मान्तर पौलुस जोर ले हाग देऊन भाती बल्लो, “आपन खुद के काई हानि नी पोंचाव, कसनबल्लोने आमी सपाय ऐथाय आंसु।”
29तेबे हुन चिमनी आनाऊन भाती भीतरे ओंजार लो, आउर थरथरते-थरथरते पौलुस आउर सीलास चो पुरे घसरलो;
दरोगा चो मन बदलतोर
30आउर हुनमन के बाहरे आनुन भाती बल्लो, “हे सियानमन, मुक्ति पावतो काजे मय काय करें दें?”
31हुनमन बल्ला, “परबु ईशु मसीह चो उपरे बिश्वास कर, तेबे तुय आउर तुचो घरलोगमन मुक्ति पावदे।”
32आउर हुनमन हुनके आउर हुनचो पुईतराय घर चो लोगमन के परबु चो बचन सुनाला।
33राती बेरा हुदली ची दाय हुन हुनमन के नेऊन भाती हुनमन चो घाव धोहलो, आउर हुन आपलो सपाय लोगमन चो संगे तुरते डूबन धरलो।
34तेबे हुन हुनमन के आपलो घरे नेऊन भाती हुनमन चो पुरे भात संगालो, आउर पुईतराय घरलोगमन संगे माहापुरू उपरे बिश्वास करून हरिक बनालो।
35जिदलदाय दिन होली तेबे हाकिममन पलटनमन चो हाथे खबर पठाला कि हुन मानेमन के छांडुन दिआस।
36पलटन ऐ गोठमन पौलुस ले बल्लो, “हाकिममन तुमके छांडुन देतोर हुकुम पटाऊन दिला से। ऐईकाजे अदायं निकरून भाती हरिक ले जाते जाहा।”
37मान्तर पौलुस हुनमन चो ले बल्लो, “हुनमन आमके जोन रोमि माने आंव, दोषी ठेबालो नाहलोर लोगमन चो पुरे मारला आउर जयलघर ने ढ़ाकला। अदायं काय आमके खुसराय निकराय सोत? असन नाई; मान्तर हुनमन खुद ऐऊन भाती आमके बाहरे निकराओत।”
38पलटनमन ऐ गोठमन हाकिममन ले बल्ला, आउर हुनमन ऐ सुनुन भाती कि रोमि आत, डरून गेला,
39आउर ऐऊन भाती हुनमन के फुसियाला, आउर बाहरे नेऊन भाती गुहार करला कि नंगर ले जाते जाओत।
40हुनमन जयलघर ले निकरून भाती लुदिया चो थाने गेला, आउर भाईमन ले भेट करून हुनमन के शान्ति दिला, आउर जाते गेला।
Currently Selected:
पठालोबितामन 16: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
