पठालोबितामन 18
18
कुरिन्थुस ने पौलुस
1ऐचो पाचे पौलुस एथेन्स के छांडुन भाती कुरिन्थुस ने ईलो।
2हुता हुनके अकविला नाव चो गोटक यहूदी मिरलो, जेचो जनम पुनथुस ने होऊ रली। हुन आपलो बायले प्रिसकिला चो संगे इटली ले हाल ने ची ऐऊ रलो, कसनबल्लोने क्लौदियुस सपाय यहूदीमन के रोम ले निकरून जातोर हुकुम देऊ रलो। ऐईकाजे हुन हुनमन चो थाने गेलो।
3हुनचो आउर हुनमन चो गोटक ची धंधा रली; ऐईकाजे हुन हुनमन चो संगे रलो आउर हुनमन काम करूक मुरयाला; आउर हुनमन चो धंधा तम्बू बनातोर रली।
4हुन हरकोनी सब्त चो दिने आराधना घर ने गोठ बात करून यहूदीमन आउर यूनानीमन के बले समजाते रलो।
5जिदलदाय सीलास आउर तीमुथियुस मकिदुनिया ले ईला, तेबे पौलुस बचन सुनातोर धुन ने यहूदीमन के गोहई देऊक मुरयालो कि ईशु ची मसीह आय।
6मान्तर जिदलदाय हुनमन बिरूद आउर निन्दा करूक मुरयाला, तेबे हुन आपलो फटीई फाफडून भाती हुनमन ले बल्लो, “तुमचो लऊ तुमचेई टोडरा थाने रओ! मय निर्दोष आंय। अदायं ले मय दुसर जातिमन चो लगे जायें दें।”
7हुता ले जाऊन भाती हुन तीतुस युस्तुस नाव चो माहापुरू चो गोटक भगती चो घर ने ईलो; जेचो घर आराधना घर ले लगु रली।
8तेबे आराधना घर चो सरदार क्रिसपुस आपलो सपाय घरलोगमन संगे परबु उपरे बिश्वास करलो; आउर खुबे असन कुरिन्थबासी सुनुन भाती बिश्वास आनला आउर डूबन धरला।
9परबु गोटक राती दरशन चो बाटले पौलुस ले बल्लो, नी डर, मान्तर बोलते जा आउर ओगाय नी रा;
10कसनबल्लोने मय तुचो संगे आंसे, आउर कोनी तुचो उपरे ऐऊन भाती तुचो हानि नी करे दे; कसनबल्लोने ऐ नंगर ने मोचो खुबे असन लोग आसोत।
11ऐईकाजे हुन हुनमन थाने माहापुरू चो बचन सिकाते-सिकाते डेढ़ बरक ले रलो।
12जिदलदाय गल्लियो अखाया देश चो हाकिम रलो, तेबे यहूदीमन गोटक होऊन पौलुस चो उपरे ईला, आउर हुनके नियाय आसन चो पुरे आनुन भाती बोलुक मुरयाला,
13“ऐ लोगमन के समजाऊँ आय कि माहापुरू चो उपास असन रीति ले करोत, जोन नियम चो उलटा आय।”
14जिदलदाय पौलुस बोलतो ची थाने रलो, तेबे गल्लियो यहूदीमन ले बल्ला, हे यहूदीमन, अगर ऐ काई ओनियाय नाहले खराप चो गोठ होती, तेबे नगत रली कि मय तुमचो सुनते।
15मान्तर अगर ऐ गोठ बात शब्दमन, आउर नावमन, आउर तुमचो थानो नियम चो बारे आय, तेबे तुमी ची जाना; कसनबल्लोने मय ऐ गोठमन चो नियायी नी बनुक मन करें से।
16आउर हुन हुनमन के नियाय आसन चो पुरे ले निकराऊन दिलो।
17तेबे सपाय लोगमन आराधना घर चो सरदार सोस्थिनेस के धरून नियाय आसन चो पुरे मारला। मान्तर गल्लियो ऐ गोठमन चो काई बले चिन्ता नी करला।
अन्ताकिया बाटे जातोर
18पौलुस खुबे दिन ले हुता रलो। फेर भाईमन ले बिदा होऊन भाती किंख्रीया ने ऐईकाजे मुण्ड खुरालो, कसनबल्लोने हुन बर मांगु रलो, आउर जाहाज उपरे सीरिया ने जाते गेलो आउर हुनचो संगे प्रिसकिला आउर अकविला रवत।
19हुन इफिसुस पोंचुन भाती हुनमन के हुता छांडलो, आउर खुद आराधना घर ने जाऊन भाती यहूदीमन चो संगे गोठ बात करूक मुरयालो।
20जिदलदाय हुनमन हुनचो ले गुहार करला, “आमचो संगे आउर खिन्डिक दिन रा।” तेबे हुन नी मानलो;
21मान्तर ऐ बोलुन भाती हुनमन ले बिदा होलो, “अगर माहापुरू मन करे दे तेबे मय तुमचो लगे फेर ऐयें दें।” तेबे हुन इफिसुस ले जाहाज ढीलुन भाती जाते गेलो;।
22आउर कैसरिया ने उतरून भाती (यरूशलेम ने) गेलो आउर कलीसिया के जुहार करून अन्ताकिया ने ईलो।
पौलुस चो तीसरा परचार यातरा चो मुर
23फेर खिन्डिक दिन रऊन भाती हुन हुता ले निकरलो, आउर गोटक बाटले गलातिया आउर फ्रुगिया परदेशमन ने सपाय चेलामन के थीर करते फिरलो।
अपुल्लोस नाव विद्वान मनुक
24अपुल्लोस नाव चो गोटक यहूदी, जेचो जनम सिकन्दरिया ने होऊ रली, जोन पण्डित माने रलो आउर पवितर शास्त्र के अच्छा ढंग ले जानते रलो, इफिसुस ने ईलो।
25हुन परबु चो बाट चो सिक्या पाऊ रलो, आउर मन लगाऊन भाती ईशु चो बारे ठीक-ठीक सुनाते आउर सिकाते रलो, मान्तर हुन मात्र यूहन्ना चो डूबन चो गोठ जानते रलो।
26हुन आराधना घर ने नी डर होऊन भाती बोलुक मुरयालो, मान्तर प्रिसकिला आउर अकविला हुनचो गोठमन सुनुन भाती हुनके आपलो थाने नीला आउर माहापुरू चो बाट हुनके आउर बले ठीक-ठीक सांगला।
27जिदलदाय हुन तय करलो कि हुनपाट उतरून भाती अखाया चो बाटे जाओ तेबे भाईमन हुनके हिम्मत देऊन भाती चेलामन के लिकला कि हुनमन हुनके अच्छा ढंग ले मिलोत; आउर हुन हुता पोंचुन भाती हुन लोगमन चो बड़े सायता करलो जोनमन अनुग्रह चो लागुन बिश्वास करू रला।
28कसनबल्लोने हुन पवितर शास्त्र ले सबुत देऊन-देऊन भाती कि ईशु ची मसीह आय, बड़े हिम्मत ले यहूदीमन के सपाय चो पुरे बेजबाप करते रलो।
Currently Selected:
पठालोबितामन 18: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
