मरकुस 8

चार हजार माणसोक खावाळनो

(मत्ती 15:32-39)

1तीनु दाहळामा जेतार ओवी मोटीत गोरदी एखठी होयी एने तिंदरे जुव खाणे नि होतो, ती येसु तेरा चेला काजे साते बुलावीन तीनु काजे कोयू, 2“मेसेक इनी गोरदी पोर गिन आवे, काहाकि जे तीन दाहळासी मारे पुठी छे, एने तिंदरे जुव कायबी खाणे नि होय. 3हिमी मे हिनु काजे भूकला घोर मुकली दिस, ती वाटे थाकीन रोय जासे; काहाकि इनामा गोथा कां-कां नांबे गोथा आवला छे.” 4तेरा चेला तीना काजे जवाब आप्या, “न्या उजाळीमा ओतरा रुटा कुदु कां गोथा लावसे कि जे आफरी जासे?” 5येसु तीनु काजे पुछु, “तुमरे जुव कोतरा रुटा छे?” चे कोया, “सात.”

6तेत्यार चू माणसो काजे धोरती पोर बोसनेन आग्या आप्यू, एने चे सात रुटा लीन एने धन्यवाद कोरीन भांग्यू, एने तेरा चेला काजे आपतू गोयू कि तिंदरे सामने मेके, एने चे माणसो काजे वाट देदा. 7तिंदरे जुव थुलाक नानला माछा बी होता; चू धन्यवाद कोरीन तीनुक बी माणसो सामने मेकनेन आग्या आप्यू. 8चे खायीन आफरी गोया एने चेला तीनु रोयला भूकरान सात खिल्ला भोरीन चुट्या. 9एने माणसे चार होजारोन आस पास होता; एने तेत्यार चू तीनु काजे मुकली देदू, 10एने चू तेत्यारुत आपना चेला पुठी ढोंड्यामा चोळीन दलमनुथा देसोमा जात रोयू.

फरुशीन लारे चिन्ह मांगनो

(मत्ती 16:1-4; लुका 11:16,29)

11एने फरुशी आवीन तीना साते जोखळायने बाज गोया, एने तीना काजे पारेखणेन कोरीन तीना जुव कहीन सोरगोन निशाणी मांग्या. 12चू तेरा आत्मामा ठुसका भोरीन कोयू, “इनी टेमोन माणसे काहा निशाणी हेरता होसे? मे तुमु काजे छाचलीन कोयो कि इनी टेमोन माणसो काजे कानली निशाणी नी आपाये.” 13एने ओवतेन चू तीनु काजे छुळीन ओवी ढोंड्यामा चोळ गोयू एने पोरले धोळे जात रोयू.

फरुशीन खमीर

(मत्ती 16:5-12)

14एने चेला रूटा लेणे विसरी गोया, एने ढोंड्यामा तिंदरे जुव एकुत रूटू होतु. 15एने चू तीनु काजे जोताळ्यु, “देखू, फरुशीन खमीर एने हेरोदोन खमीरसी हुशारीमा रोवू.” 16चे आपोसमा विचार कोरीन कोयने बाज गोया, “आमरे जुव रूटा नि होय.” 17यो जानीन येसु तीनु काजे कोयू, “तुमु काहा आपोसमा ओसू विचार कोर रोया कि आमरे जुव रूटा नि होय? काय हांजू तोक नि जानतेला एने नि सोमोजतेला? 18काय तुमरा मोने काठला होय गोया? काय डूवे देखीन बी नि देखतेला, एने कानटा होयीन बी नि सोमवतला? एने काय तुमु काजे फोम नि होय. 19कि जेतार मे पाच होजारोन कोरता पाच रुटा भांगलू होतु ती तुमु भुकरान कोतरा टूपला भोरीन चूटला?” चे तीना काजे कोया “बारा टूपला” 20“एने जेतार चार होजारोन कोरता सात रुटा होता ती तुमु भूकरान कोतरा टूपला भोरीन चूटला होता?” चू तीनु काजे कोयू, “सात टूपला” 21चू तीनु काजे कोयू, “काय तुमु हांजू तोक नि सोमोज्या?”

आन्दवा काजे वारू कोरनो

22एने चे बेथसदामा आव्या; एने माणसे एक आंदवा काजे तेरेनचा लाव्या एने तीना काजे विनता कोऱ्या कि इना काजे छिमे. 23चू तिना आंदवान हात धोरीन तीना काजे गावोन बारथे लीगोयू, एने तेरा डूवामा थूपीन तेर पोर हात मेक्यू, एने तीना काजे पुछु, “काय तुसेक काहीन देखाये?” 24चू डूवा उचा कोरीन कोयू, “मे माणसो काजे देखतेलु; चे मेसे काजे चालतला झाड सारखा देखायतेला.” 25तेत्यार चू दुय कावार तेरा डूवा पोर हात मेक्यू, एने आंदवू ध्यानसी देख्यू एने चू वारू होय गोयू, एने आखो काय चुखो-चुखो देखने बाज गोयू. 26एने चू तीना काजे ओसो कोयीन घोर मूकल्यु, “इना गावोमा पाय बी झुन मेके.”

पतरसोन येसुक मान लेनो

(मत्ती 16:13-20; लुका 9:18-21)

27येसु एने तेरा चेला केसरिया फिलीप्पीन गावोमा जात रोयला. वाटे चू तेरा चेला काजे पुछु, “माणसे मेसे काजे काय कोयतेला?” 28चे जोवाब आप्या, “योहान बाप्तिस्मा आपनेवावू बाकीन कुदू-कुदू एलिया एने कुदू-कुदू भविष्य कोरता माईन एक बी कोयतेला.” 29चू तीनु काजे पुछु, “बाकीन तुमु मेसे काजे काय कोयतेला?” पतरस तीना काजे जोवाब आप्यू, “तू मसिह छे.” 30तेत्यार चू तीनु काजे जोताळीन कोयू कि मारा बारामा यो कुदा काजे झुन कोयता.

येसुन मोरनेन भविष्यवाणी

(मत्ती 16:21-28; लुका 9:22-27)

31एने तेत्यार चू तीनु काजे भोनावने बाज गोयू कि माणसोन पुऱ्यान कोरता जोरुरी छे कि चू घोनो दुख उठावसे, एने डाह-डाहा एने प्रधान पुजारू, एने शास्त्री चे तीनाक विटाव सोमजीन मार देसे, एने चू तीन दाहळान ओवतेन जीवतु होयसे. 32चू जी वात तीनु काजे खोरी-खोरी कोय देदू इनापोर पतरस तीना काजे ओलोग लीजायीन कोयने बाज गोयू, 33बाकीन चू वोवीन तेरा चेला भूनी देख्यू, एने पतरस काजे जुर कोयू, “हे भुतडा, मारे सामने गोथू नांबे होय; काहाकि तू परमेश्वरोन वातो पोर नि, बाकीन माणसोन वातो पोर मोन लागाळतलु.”

चेला बोननेन मतलब

34चू गोरदी काजे तेरा चेला पुठी साते बुलावीन तीनु काजे कोयू, “जिना कुदा काजे मार पोछोव आवने लागे, चू आपना खुदोन नाकार कोरे, एने आपनु ख्रुस हाकलीन, मार पोछोव आवे. 35काहाकि जू कुदू आपनु जीव वाचाडनेन देखसे चू तीना काजे खुवाळ देसे, बाकीन जू कुदू मारा एने वारली खोबरोन कोरता आपनु जीव खुवाळसे, चू तीनाक वाचाडसे. 36अगर माणूस आखो जोगो काजे जीक लेसे एने आपना जीवन नाश कोर लेसे, ती तिना काजे काय फायदु होयसे? 37एने माणूस आपना जीवनोन बोदले काय आपसे? 38जू कुदू जे भुंडला विचारे एने पापी जातीन इचमा मेसेक एने मारी वातो काजे लाजवायसे, माणसोन पुऱ्यु बी तेत्यार चू चुखला सोरग दूत पुठी आपना बासोन महिमा साते आवसे, तेतार तीनाक बी लाजवाळसे.”

Currently Selected:

मरकुस 8: BFBNT

Highlight

Copy