मरकुस 7

रिती रीवाज एने नियम

1तेत्यार फरुशी एने काहना शास्त्री जे यरुशलेम गोथा आवला होता, तेरेनचा एखठा होया, 2एने चे तेरा काहना चेला काजे विटव मतलब बिना धुवला हातोसी रूटा खातला देख्या. 3काहाकि फरुशी एने आखा यहुदि, डाय-डायान रिती रीवाजसी चालतला एने जेतार एक वारू रितीसी हात नी धुवे चा तोक नी खातला;. 4एने हाटोमा गोथा आवीन, जेतार तोक उग्वे नि, तेत्यार तोक नि खातला; एने लोकेत दिसरा वाते छे जे तिंदरे जुव माननेन कोरीन पुगाळला छे, जोसा वाटका, एने कोवशा, एने तांबान ठाहरा काजे धुवनो-उजावोनो.

5इनान कोरीन चे फरुशी एने शास्त्री तीनाक पुछ्या, “कि तारा चेला काहा डाय-डायान रिती रीवाज पोर नी चालतला, एने भुंडला हातोसी रूटा खातला?” 6चु तीनु काजे कोयू, “यशयाह तुमरा दोगावावान बारामा घोनो वारू भविष्यवाणी कोरलु” ओसो लिखलो छे

“जे माणसे हुटे कोरीन ते मारू सन्मान कोरतेला,

बाकीन तिंदरा मोने मारेसी नांबे रोयतेला

7एने चे वायबार मारी आराधना कोरतेला छे,

काहाकि माणसोन आग्या काजे धर्म प्रचारोन कोरीन भोनावतला.” 8काहाकि तुमु परमेश्वरोन आग्या काजे टाविन माणसोन रिती काजे मानतेला.

9एने चू तीनु काजे कोयू, “तुमु आपनी रिती रीवाजोकाजे माननेन कोरीन परमेश्वरोन आग्या कोसा वारली रितीसी टाव देतेला.” 10काहाकि मुसा कोयलु छे, “आपनु बास एने आपनी आयान मान कोर,” एने “जु कुदू आपनु बास एने आश काजे भुंडला कोये, चू जरूर माराय जासे.” 11बाकीन तुमु कोयतेला कि कुदू आपना बास एने आश काजे कोये, “जो काय तुसेक मारेसी लाभ पुग सोकतेलो, चो कुरबान मतलब अरपण होय यो.” परमेश्वरोन वरदान छे.

12ती तुमु तीना काजे तेरा बास एने तेरी आयान काय सेवा कोरणे नि देतला. 13इनी रितीसी तुमु आपनी रिती रीवाजसी, जीनु काजे तुमु ठेरावला छे, परमेश्वरोन वचन टाव देतला; एने ओसला-ओसला लोकेत काम कोरतेला.

माणसो काजे भुंडली कोरणे वावी वाते

14तेत्यार चू माणसो काजे तेरे साते बुलावीन तीनु काजे कोयू, “तुमु आखा मारो सोमवू, एने सोमजू. 15ओसी कानली चीज नि होय जी माणसोन बारथे गोथी भोराईन तीना काजे विटावे; बाकीन जे चीजे माणसोन माहाय गोथी निकवतेली छे, चीत तीना काजे विटावतेली छे. 16(हिमी कुदान सोमोवणेन कानटा होय ती सोमवे).” 17तेत्यार चू गोरदीमा गोथू घोरमा गोयू, ती तेरा चेला तिना दाखलांन बारामा तीना काजे पुछ्या. 18चू तीनु काजे कोयू, “काय तुमु बी ओसा नासोमोज छे? काय तुमु नि सोमोजतेला कि जी चीज बारथे गोथी माणसोन माहाय जातेली, ची तीनु काजे विटाव नि सोकतेली? 19काहाकि ची तेरा मोनोमा नि, बाकीन पेटोमा जातेली एने हागनेमा निकवी जातली”? यो कोयीन येसु आखा खाणान चीजो काजे चुखलो ठराव्यू. 20एने चू कोयू, “जो माणसोमा गोथो निकोवतलो, चोत माणसो काजे विटावतेल. 21काहाकि माहाय गोथो, मतलब माणसोन मोनोमा गोथो, भुंडा-भुंडा विचार, भुंडला कामे, 22चुरी, खुन, दिसरी बायरी पुठी संसार, लोभ, दोगु, कपट, लालच, भुंडली नोजोर, चाहाळी, मोटायकी एने बिन ओकली निकवतेली छे. 23जे आखा भुंडला वाते माहाय गोथा निकवतेला एने माणसो काजे विटावतेला.”

एक बायरोन भुरसू

(मत्ती 15:21-28)

24एने चू चा गोथू उठीन सोर एने सिदोन देसोमा आव्यु; एने एक घोरमा गोयू, एने लाकतो होतो कि कुदु नि उवखे; बाकीन चू डूकाय नि सोक्यू. 25एने तेत्यारुत एक बायर तेरी नानली पुरायमा भुंडली आत्मा होती, तेरी वात सोमवीन आवी, एने तेरा पायो पोर पोळी. 26ची युनानी एने सूरफुनिकी जातीन होती एने ची तीना काजे विनता कोरी कि मारी पुरायमा गोथी भुंडली आत्मा निकाव दे. 27चू तिनी काजे कोयू, “पेहेले पुऱ्या काजे आफेरणे दे, काहाकि पुऱ्यान रूटा लीन कुत्रा ओगोव नाखने वारू नि होय.” 28ची तीना काजे जोवाब देदी, “छाचलीन छे प्रभू; ते बी कुत्रा बी ते टेबल तोवे पुऱ्यान रुटान चुरू चारू खातला.” 29चू तिनी काजे कोयू, “इनी वातोन वोजेसी जातरो; भुंडली आत्मा तारी पुरायमा गोथी निकवी गोयली छे.” 30एने ची तेरे घोर आवीन देखी कि पुराय खाटला पोर पोळ रोयी, एने भुंडली आत्मा निकवी गोयली.

बेहरा एने मुक्का काजे वारू कोरनो

31एने चू सोर एने सिदोन देसोमा गोथू निकवीन दिकापुलीस देसोमा गोथू गलीलोन दरिया धोळे पुग गोयू. 32एने माणसे एक बेहेराकाजे जू गुंगू बी होतु, तेरेनचा लावीन तीना काजे विनता कोऱ्या कि तारू हात इनापोर मेके. 33तेत्यार चू तिना काजे गोरदीमा गोथू एक धोळे लीगोयू, एने तेरा आंगव्या तेरा कानटामा घाल्यू, एने थुपीन तेरी जीबो काजे छिम्यू;. 34एने सोरगो भूनी देखीन ठुसका लेदू, एने तीना काजे कोयू, “इप्फाता” मतलब “उगळी जा.” 35तेरा कानटा उगळी गोया, एने तेरी जीबोन गाठ बी उगळी गोय, एने चू चुखो-चुखो बुलने बाज गोयू. 36तेत्यार चू तीनु काजे जोताळ्यु कि कुदा काजे झुन कोयतू; बाकीन जोतरो चू तीनु काजे जोताळ्यु तोतरोत चू एने फेलावने बाज गोयू. 37एने चे घोणा नोवलाय कोरीन कोयने बाज गोया, “चू यो काहीन कोऱ्यु आखो वारलो कोरलु छे; चू बेहेराकाजे सोमोवणेन एने गुंगा काजे बुलनेन ताकत आपतलु”.

Currently Selected:

मरकुस 7: BFBNT

Highlight

Copy