मरकुस 6

नासरेतमा येसुन अपमान

(मत्ती 13:53-58; लुका 4:16-30)

1चा गोथू निकवीन चू आपना देसोमा आव्यु, एने तेरा चेला बी तेरे पोछोव गोया. 2शब्बाथोन दाहळे चू प्रार्थना घोरोमा सिकाळने बाज गोयू, एने घोन सोवटा माणसे सोमवीन वाहराय गोया एने कोयने बाज गोया, “इना काजे ये वाते का गोथा आवळी गोया? यो काहनो ग्यान छे जो इना काजे आपायलो छे? कोसो मोटला काम एरा हातोसी देखायतेलो?” 3काय जी ची सुतार नी होय, जू मरीयमन पुऱ्यु, एने याकुब, एने योसेस, एने यहुदा, एने शिमोनोन भाश छे? एने काय तेरा बहोनिशानचा आमरे साते नि रोयतेला? “इनान कोरता चे तेरा बारामा ठूकर खादा.” 4येसु तीनु काजे कोयू, “भविष्य कोरता काजे आपनु देस, एने आपनु परिवार, एने आपना घोर काजे छुळीन एने कोबी सन्मान नि जोळतेलु.” 5एने चू चा काहीन मोटला काम नि कोर सोक्यू, निसतू थुलाक बिमारी वावा पोर हात मेकीन तीनु काजे वारू कोऱ्यु. 6एने चू तिंदरू अविस्वास पोर नोवलाय कोऱ्यु, एने चू चारू धोळेन गाव-गावमा सिकाळतू फिऱ्यू.

येसुन बारा चेलाक मुकलनो

(मत्ती 10:1,5; लुका 9:1-6)

7एने चू बारा जोना काजे तेरे साते बुलाव्यू एने तीनु काजे दुय-दुय कोरीन मुकलने बाज गोयू; एने तीनु काजे भुंडली आत्मा पोर होक आप्यू. 8एने चू तीनु काजे आग्या आप्यू, “जाय तेतार लाकळी छुळीन ओवी काय झुन लेता; नि ते रूटा, नि झुवनो नि बोटवामा पोयशा, 9बाकीन खासळा पेहेरू एने दुय-दुय डोगला मा पेहरू.” 10एने ओवी चू तीनु काजे कोयू, “जा का बी तुमु कुदान घोर उतरसु, ती जेतार तोक चा गोथा आवे नि चा तोक तिना घोरोमा रोवू. 11जिने जागे माणसे तुमरो स्वीकार नी कोरे एने तुमरो नि सोमवे, चा जाताच आपना पायोन छोयळू झोटकी देयू कि तीनु पोर गोवा होये.” 12तेत्यार चे जायीन प्रचार कोऱ्या कि मोन फिरावू, 13एने घोना सोवटा भुंडली आत्मा काजे निकाव्या, एने लोकेत मांदला पोर तेल लागाळीन तीनु काजे वारू कोऱ्या.

बाप्तिस्मा आपने वावाक मार नाखनो

(मत्ती 14:1-12; लुका 9:7-9)

14एने हेरोद राजा बी तेरी वात सोमव्यू, काहाकि तेरो नाव पसरी गयो, एने चू कोयू, “योहान बाप्तिस्मा आपने वावु मोरलामा गोथू जीवतू होयु, इनान कोरता तेरेसी जे मोटला कामे देखायतेला.” 15एने दिसरा माणसे कोया, “यु एलिया छे” बाकीन काहना दिसरा कोया, “भविष्य कोरता नीती भविष्य कोरता मायलु एक जोना सारकू छे.” 16हेरोद यो सोमवीन कोयू, “जिना योहानोन मुनको मे काटाळलु होतु, चू जीवतू होय गोयू.” 17एने हेरोद आपनु भाश फिलीपन लाडी हेरोदीयान वोजेसी, तिनी पुठी चू वियाव कोर लेदलु होतु, माणसो काजे मुकलीन योहान काजे धोरावीन बंदी घोरमा नाख देदला होता; काहाकि योहान हेरोद काजे कोयलु होतु, “आपना भाशोन लाडी काजे राखनो तुसेक वारू नी होय.” 18काहाकि योहान हेरोद काजे कोयलु होतु, “आपना भाशोन लाडी काजे राखनो तुसेक वारू नी होय.” 19कोरीन हेरोदीया तेरे पोर डाव धोरती होती एने तिनीक लाकतो होतो कि तीना काजे माराय देयो; बाकीन ओसो नी होय सोक्यो, 20काहाकि हेरोद योहान काजे धोरमी एने चुखला माणसे मानीन तीना काजे बिहतु होतु, एने तीना काजे वाचाडीन राखतू होतु, एने तेरी वाते सोमवीन घोनु बिहतु होतु, बाकीन खुशीसी सोमवतू होतु.

21एने वारली टेम आवी तेत्यार हेरोद तेरा जन्मोन दाहळा पोर तेरा प्रधान, एने सेनापती, एने गलीलवावा मोटला माणसो जुगू खाणो बोनाव्यू. 22ती हेरोदीयान पुराय माहाय आवी एने नाचीन हेरोद काजे एने तेरा साते बोसने वावा काजे खुश कोरी तेत्यार राजा पुराय काजे कोयू, “तुसे जो जुवे चो मारजुव माग मे तुसेक आपीस.” 23एने तिनी काजे कोसोम खादु, “मे आपनो आदो राजतोक जो काय तू मारे जुव मांगीस मे तुसे आपीस.” 24ची बारथे जायीन तेरी आया काजे पुछि, “मे काय मांगो?” ची कोयी, “योहान बाप्तिस्मा आपनेवावान मुनको.” 25ची तेत्यारुच राजानचा माहाय आवी एने तीना काजे विनता कोरी कि, “मेसेक जुवे कि तू हिमी योहान बाप्तिस्मा आपनेवावान मुनको एक थाविमा मेसेक मांगाळ दे.”

26तेत्यार राजा घोन दुखी होयू, बाकीन तेरी कोसोमोन वोजेसी एने साते बोसने वावान वोजेसी तीना काजे टावायो नि. 27आखरी राजा तेत्यारुच एक सिपायळा काजे आग्या आपीन मूकल्यु कि तेरो मुनको काटीन लाव. 28चू जेल खाणामा जायीन तेरो मुनको काट्यु, एने एक थाविमा मेकीन लाव्यू एने पुराय काजे आप्यू, एने पुराय तेरी आया काजे आपी. 29यो सोमवीन योहानोन चेला आव्या एने तेरा धोळ काजे लीगोया एने मोळवाट्यामा मेक देदा.

पाच हजार माणसोक खावाळनो

(मत्ती 14:13-21; लुका 9:10-17; योहान 6:1-14)

30प्रेषितोन येसु साते एखठा होयीन, जे-जे चे कोरला एने सिकाळला होता, आखो तीना काजे कोया. 31चू तीनु काजे कोयू, “तुमु हिमी ओलोग कांखुर सुनले जागे जायीन थुलाक आराम कोरू” काहाकि लोकेत माणसे आवता-जाता होता, एने तिनु काजे खाणेन तोक टेम नी जोळती होती. 32इनान कोरता चे ढोंड्या पोर चोळीन सुनसान जागे ओलोग जात रोया.

33एने लोकेत जोना तीनु काजे जातलू देखिन उवखी लेदा, एने आखा गावोमा गोथा एखठा होयीन चा पाये दोवळ्या एने तेरे पेहेले जायीन पुग गोया. 34चू उतरीन सोवटी गोरदी देख्यू, एने तिंदरे पोर गिन कोऱ्यु, काहाकि चे तीनु गाडरा सार कोयता, जिंदरा कुदू राखवाव्या नि होय; एने चू तीनु काजे लोकेत वाते भोनावने बाज गोयू. 35तेत्यार दाहळू ढोव गोयू, ती तेरा चेला तेरेनचा आवीन कोयने बाज गोया, “न्या सुनसान जागा छे, एने दाहळू लोकेत ढोव गोयलु छे. 36इनू काजे मुकली दे कि चारू धोळेन गावमा एने वोसत्यामा जायीन, आपने जुगू काहीन खाणेन कोरता मुले लेये.” 37चू जवाब आप्यू, “तुमुत तीनु काजे खाणे आपु” चे तीना काजे कोया, “काय आमु सोव दिनारोन रूटा मुले लेजे, एने इनू काजे खावळावजे?” 38चू तीनु काजे कोयू, “जायीन देखू तुमरे जुव कोतरा रूटा छे”? चे मालूम कोरीन कोया, “पाच एने दुय माछा बी.”

39तेत्यार चू तीनु काजे आग्या देदू कि आखा काजे निव्वा खोळापोर पोंगात-पोंगात सी बोसाळ देवू. 40चे सोव-सोव एने पोचास-पोचास कोरीन पोंगात ने पोंगात बोस गोया. 41एने चू तीनु पाच रूटाकाजे एने दुय माछा काजे लेदू, एने सोरगो भूनी देखीन धन्यवाद कोऱ्यु, एने रूटाक भांग-भांगीन चेला काजे आपतू गोयू कि चे माणसो काजे वाटे, एने चे दुय माछा बी तीनु आखामा वाट देदा. 42एने आखा खायलीन आफरी गोया, 43एने चे भुकरा बारा टूपल्या भोरीन चुट्या, एने काहीन माछा बी. 44जे रूटा खादला, चे पाच होजार ओदमीत होता.

येसुन पाणी पोर चालनो

(मत्ती 14:22-33; योहान 6:16-21)

45तेत्यार चू मामार आपना चेला काजे ढोंड्या पोर चोळने कोरीन कोय देदू कि चे तीनाम गोथा पेहेले पोरले धोळे बेथसदामा जात रोये, जेतार तोक कि तीनु माणसो काजे मुकली देये. 46एने तीनु काजे मुकली दिन चू बोयळा पोर प्रार्थना कोरणे कोरीन गोयू. 47एने जेतार सांतो होयो, ती ढोंड्यो दोरीयान इचमा होतो, एने चू एखलु भूयमा होतु. 48तेत्यार चू देख्यू कि चे चालाळता-चालाळता घाबराय गोयला छे, काहाकि वाहावू तिंदरे खिलापमा होतु, ती रातीन चोवथा पोहरोन साते चू दरियापोर चालतू जायीन तिंदरे साते आव्यु; एने तिंदरे गोथू ओगोव जाने वावु होतु. 49बाकीन चे तीना काजे दरियापोर चालतलु देखीन सोमोज्या कि भुतडो छे, एने आयळीन पोळ्या काहाकि आखा तीना काजे देखीन बिही गोयला होता. 50बाकीन चू तेत्यारुत तिंदरे साते वात कोऱ्यु एने कोयू, “हिंमत बादू मे छे; बिहू मा.” 51जेतार चू तिंदरेनचा ढोंड्यामा आव्यु, एने वाहवो हुग रोय गोयो एने चे घोणा नोवलाय कोरणे बाज गोया. 52काहाकि चे रूटान बारामा नि सोमेजला होता, काहाकि तिंदरा मोने कोठोर होय रोया होतो.

गन्नेसरेतमा मांदला काजे वारू करनो

(मत्ती 14:34-36)

53एने चे पोल धोळे उतरीन गन्नेसरत जागामा पुग गोया, एने ढोंड्या काजे धोळे लागाळ देदा. 54एने जेतार चे ढोंड्यामा गोथा उतऱ्या, ती माणसे तेत्यारुत तीना काजे उवखीन, 55आस पासोन आखा देसोमा दोवळ्या, एने बिमारी वावा काजे खाटला पोर मेकीन, जा-जा खोबर लीन कि चू छे, चा-चा लीन फीऱ्या. 56एने जा कां बी चु गाव, सोहोर, एने वस्तीमा जातु होतु, माणसे मांदला काजे हाटोमा नेकीन तीना काजे विनता कोरता होता कि चू तीनु काजे आपना छिंदरा कुरोकाजे छिमने दे, एने जोतरा तीना काजे छिमता होता, आखा वारू होय जाता होता.

Currently Selected:

मरकुस 6: BFBNT

Highlight

Copy