मरकुस 9

1एने तेत्यार चू तीनु काजे कोयू, “मे तुमु काजे छाचलीन कोयो कि ये न्या उबरोय रोया, इनामा काहना ओसा छे, कि जेतार तोक परमेश्वरोन राज काजे ताकत साते आवलु नि देख लेये, तेत्यार तोक मोरनेन सोवाद कोदि नि चाखे.”

येसुन रुपांतर

(मत्ती 17:1-13; लुका 9:28-36)

2छोव दाहळान ओवतेन येसु पतरस एने याकुब एने योहान काजे साते लेदू, एने सुनले जागे एक मोटला बोयळा पोर लीगोयू एने चा तिंदरे सामने तेरो रूप बोदली गोयो, 3एने तेरा छिंदरा ओसा धोव्वा सोप होय गोया एने न्या तोक धोव्वा होया, कि धोरती पोर काहनुत धोबी बी ओसो धोव नि कोर सोकतेलू, 4एने तीना काजे मुसा साते एलिया देखाय पोळ्यु; एने चे येसु साते वात कोरता होता. 5इनापोरसी पतरस येसु काजे कोयू, “हे रब्बी, आमरो न्या रोयनो वारोलो छे इनान कोरता आमु तीन मंडप बोनावजे; एक तारे जुगू, एक मुसा जुगू, एने एक एलिया जुगू.” 6काहाकि चू नि जानतू होतु कि काय जोवाब आपो, एरेन कोरता कि चे घोणा बिही गोयला होता. 7तेत्यार एक वादवो तिंदरे पोर छावाय गोयो, एने तिना वादवामा गोथो ओसो ओवाज निकव्यू, “यु मारू मोंगावू पुऱ्यु छे, तेरो सोमवू.” 8तेत्यार चे एक सारका च्यारु धोळे नोजोर नाख्या, एने येसु काजे छुळीन तिंदरे साते ओवी कुदा काजे नि देख्यू.

9बोयळा पोर गोथा उतरनेन टेमे चू तीनु काजे आग्या आप्यू कि जेतार तोक माणसोन पुऱ्यु मोरलामा गोथू पोछु जीव नि उठे, चा तोक यो काय तुमु देखला छे चो कुदा काजे झुन कोयता. 10चे इनी वातो काजे फोम राख्या; एने एक दिसरा साते जोखळायने बाज गोया, “कि मोरलामा गोथू पोछु जीव उठनेन काय मतलब छे?” 11एने चे तीना काजे पुछा, “शास्त्री काहा कोयतेला कि एलियान पेहेले आवोनो जरूरी छे?” 12येसु तीनु काजे जोवाब आप्यू, “एलिया छाचलीन पेहेले आवीन आखो काय सुदारसे, बाकीन माणसोन पुऱ्यान बारामा यो काहा लिखलो छे कि चू घोनो दुख उठावसे, एने विटाव गीनायसे?” 13बाकीन मे तुमु काजे छाचलीन कोयो, “कि एलिया ते आव लागलु, एने जोसो तेरा बारामा लिखलो छे, तीनु काजे जो काय जुवे तेरे साते कोऱ्या.”

भुंडली आत्मासी छुटकारू

(मत्ती 17:14-20; लुका 9:37-43)

14एने तेत्यार चू चेलानचा आव्यु, ती देख्यू कि तिंदरे च्यारु धोळे सोवटी गोरदी होय रोयी एने शास्त्री तिंदरे साते जोखळायने बाज रोया. 15एने तिना काजे देखताच आखा घोणात वाहराय गोया, एने तेरे भूनी दोवळीन तीना काजे नमस्कार कोऱ्या. 16चू तीनु काजे पुछु, “तुमु इनदरे पुठी काय जोखळी पोळ रोया?” 17गोरदीमा गोथू एक जोणु तीना काजे जोवाब आप्यू, “हे गुरु, मे आपना पुऱ्या काजे, जीनामा गुंगी आत्मा भोरायली छे, तारेनचा लावलू होतु.” 18जा काबी ची तीना काजे धोरतेली, चात आसटी देतली एने चू मुयोमा फेस भोर लेतेलू, एने दात पिस्तेलू, एने सुकतू जातलु एने मे तारा चेला काजे कोयू कि चे इना काजे निकाव देयू, बाकीन चे निकाव नि सोक्या. 19यो सोमवीन चू तीनु काजे जोवाब आपीन कोयू, “हे कोम भुरस्या माणसो, मे का तोक तुमरे साते रोयीस? एने का तोक तुमरो सोहीस? हिना काजे मारेंचा लावू.” 20तेत्यार चे तीना काजे तेरेनचा लाव्या एने जेतार चू तीना काजे देख्यू, ती ची भुंडली आत्मा तेत्यारुत तीना काजे पिव्वी देदी; एने चू धोरती पोर पोळ्यु एने मुयमा गोथू फेस वोयाळतू जायीन जाणे बाज गोयू. 21चू तेरा बास काजे पुछु, “एरी जी हालोत कोत्यार गोथी छे?” 22चू कोयू, “नानलू होतु तेत्यारून चू इना काजे सारने कोरीन कोत्यार आगठामा एने कोत्यार पाणीमा पाळलू; बाकीन अगर तू कोर सोके, ती आमरेपोर गीन कोरीन आमरेपोर उपकार कोर.” 23येसु तीना काजे कोयू, “अगर तू कोर सोकतेलु, जी काय वात छे? भुरसू कोरने वावान कोरता सोब काहीन होय सोकतेलो छे.” 24पुऱ्यान बास मामार नंम्र होयीन कोयू, “हे प्रभू, मे भुरसू कोरो, मारा अविस्वासोन इलाज कोर.” 25तेत्यार येसु देख्यू कि माणसे दोवळीन गोरदी कोरणे बाज रोया, ती चू भुंडली आत्मा काजे यो कोयीन धोमकाव्यू, “हे गुंगी एने बेहेरी आत्मा, मे तुसे काजे आग्या आपो, इनामा गोथी निकवी आव, एने इनामा कोबी भोरायती झुनी.” 26तेत्यार चू आयळीन एने तीना काजे घोनो पीव्वीन, निकवी आवी; एने पुऱ्यो मोरे ओसो होय गोयो, न्या तोक कि घोणा माणसे कोयने बाज गोया कि होयू मोर गोयू. 27बाकीन येसु तेरु हात धोरीन तीना काजे उठाळ्यू, एने चू उबरोय गोयू. 28जेतार चू घोरोमा आव्यु, ती तेरा चेला सुनलामा तीना काजे पुछ्या, “आमु तीना काजे काहा नि निकाव सोक्या?” 29चू तीनु काजे कोयू, “जो जात बिना प्रार्थना काहना इलाज सी नि निकोव सोकतेली.”

येसुन मोरनेन दुसरी कावा भविष्यवाणी

(मत्ती 17:22-23; लुका 9:43-45)

30ओवतेन चे चा गोथा गोया एने गलीलमा गोथा जाता होता तीना काजे नि लाकतो होतो कि कुदू नि उवखे, 31काहाकि चू तेरा चेला काजे सिकाळतू होतु एने तीनु काजे कोयतू होतु, “माणसोन पुऱ्यु माणसोन हाते धोराय जासे, एने चे तीना काजे मार नाखसे; एने चू मोरोनेन तीन दाहळान ओवतेन जीवतु होयीन उठ जासे, 32बाकीन जो वात तिंदरे सोमोजमा नि आवी, एने चे तीना काजे पुछने बिह्ता होता.”

चेला मायीन मोटलो कुन?

(मत्ती 18:1-5; लुका 9:46-48)

33एने चे कफर्णहुममा आव्या; एने घोरोमा आवीन चू तीनु काजे पुछु, “वाटे तुमु कानली वातो पोर जोखळायता होता?” 34चे हुगा रोया, काहाकि वाटे चे एक दिसरा साते ओसा जोखळी पोळला कि आमरे गोथू मोटू कून छे. 35तेत्यार चु बोसीन बारा जोना काजे बुलाव्यू एने तीनु काजे कोयू, “हिमी कुदा काजे मोटू होयने लागे, ती चू आखा गोथू नानू एने आखान सेवक बोने.” 36एने चू एक पुऱ्या काजे लीन तिंदरे इचमा उबराख देदू एने तीना काजे खुवामा लीन तीनु काजे कोयू, 37“जू कुदू मारे नावोसी ओसा पुऱ्यामा गोथू कुदा एका काजे बी स्वीकार कोरतेलू, चू मेसेक स्वीकार कोरतेलू छे; एने कुदू मेसेक स्वीकार कोरतेलू, चू मेसेक नी, बाकीन मेसेक मुकलने वावा काजे स्वीकार कोरतेलु.”

जो खिलापमा नि होय, चू पक्षमा

(लुका 9:49-50)

38तेत्यार योहान तीना काजे कोयू, “हे गुरु, आमु एक माणसो काजे तारा नावसी भुंडली आत्मा काजे निकावतलु देख्या एने आमु तीना काजे मोना कोरला, काहाकि चू आपने पोछोव नि आवतेलु.” 39येसु कोयू, “तीना काजे मा मोना कोरु; काहाकि ओसो कुदू नि होय जू मारा नावोसी मोटला कामे कोरे, एने ओगा मेसेक भुंडलु कोय सोके, 40काहाकि चे आमरा खिलापमा नि होय, चू आमरे भूनी छे. 41जू कुदू एक कोवशु पाणी तुमु काजे एरेन कोरता पिवाळे कि तुमु मसिहन छे ती मे तुमु काजे छाचलीन कोयो कि चू तेरु प्रतीफोव काहनाबी रितीसी नी खुवाळे.

ठूकरोन वजोह बोननो

(मत्ती 18:6-9; लुका 17:1-2)

42“जू कुदू इना नानलामा गोथू जे मार पोर भुरसू कोरतेला छे, कुदा काजे ठूकर खावाळे ती तेरेन कोरता वारू यो छे कि एक मोटीत घट्टीन पूळ तेरा गोवामा टांग देनो जुवे एने तीना काजे दोरीयामा नाख देनो जुवे. 43जेतार तारू हात तुसेक ठूकर खावाळे ती तीना काजे काट दे दुंन्डू होयीन जीवन जीवनेन कोरता तारेन कोरीन एरे गोथो वारू छे कि दुय हात होयीन बी नोरोगन आगठामा नाखाय जाने जी कोबी उलवाये नि. 44जा तिंदरा कीळा नि मोरतेला एने आगठो नि उलवायतेलो. 45जेतार तारू पाय तुसेक ठूकर खावाळे ती तीना काजे काट दे, लेंगळू होयीन जीवनमा जाणे तारेन कोरता वारू से कि तू दुय पाये लीन नोरोगमा जाय. 46जा तिंदरा कीळा नि मोरतेला एने आगठो नि उलवायतेलो. 47जेतार तारू डूवू तुसेक ठूकर खावाळे ती तीना काजे निकाव दे आन्द्वू होयीन बी परमेश्वरोन राजमा जाणेन कोरता तारे जुगू वारू छे कि दुय डूवा होयीन बी तू नोरोगमा नाखाय जाणे. 48जा तिंदरा किळा नि मोरतेला एने आगठो नि उलवायतेलो. 49काहाकि होर एक जोणु आगठासी खारलो कोरायसे. 50मीठो वारोलो छे, बाकीन मीठान सोवाद जात रोये, ती तीना काजे कालगा सी खोरलो कोरसू? आपनेमा मीठो राखू, एने एक दिसरा साते हिव मेवीन रोयू.”

Currently Selected:

मरकुस 9: BFBNT

Highlight

Copy