मरकुस 14

येसुक मारनेन योजना

(मत्ती 26:1-5; लुका 22:1-2; योहान 11:45-53)

1दुय दाहळान ओवतेन वोलांडोनोन तीहीवार एने बेखमीर रुटान तीहीवार होयने वावू होतु एने प्रधान पुजारू एने शास्त्री इनी वातोन हेरमा होता कि येसु काजे कोसा धोकू दीन धोरीन मार देजे;. 2बाकीन चे कोयता होता, कि तीहीवारोन दाहळे कोदि ओसो नि होये कि माणसोमा दोंगू होय जाय.

बैतनिय्याह गावमा येसुन अभिषेक

(मत्ती 26:6-13; लुका 12:1-8)

3जेतार चु बैतनिय्याह गावमा शिमोन कुळावा बिमारी वावान घोर खाणो खाणे बोस रोयू होतु, तेत्यार एक बायोर संगमरमरोन केटलीमा जटामासीन घोनो मोहोंगलो चुखलो इत्तर लीन आवी; एने केटली फुळीन इत्तर काजे तेरे मुनका पोर रेचवी देदी. 4बाकीन काहना माणसे तिंदरा मोनमा रीसवायीन कोयने बाज गोया, “इना इत्तरोन काहा आखो नाश कोराय गोयो?” 5काहाकि यो इत्तर ते तीन सोव दिनार गोथो जादा मोहोंगो वेचीन गरीब काजे वाट सोकता होता, एने चे तिनीक जुर कोरणे बाज गोया. 6येसु कोयू, हीनीक छुळ देवू; हीनीक काहा दोमतेला, होयी ते मारे साते भोलाई कोरली छे? 7गरीब तुमरे साते हमेशा रोयतेला छे, एने तुमुक जेतार जुवे तेत्यार तिंदरी भोलाई कोर सोकतेला बाकीन मे तुमरे साते हमेशा नि रोयो. 8जो काहीन ची कोर सोकी, होयी कोरी; होयी मारो गाळाय जाणेन तीयारी पेहेलेसी मारा डीलोपोर इत्तर लागाळली छे. 9मे तुमु काजे छाचलीन कोयो कि आखा जोगोमा जा का बी वारली खोबरोन प्रचार कोरायसे, चा तेरा इना कामोन वात बी तेरी फोममा कोरायसे.

यहुदान भुरसू घात

(मत्ती 26:14-16; लुका 22:3-6)

10तेत्यार यहुदा इस्कारीयोत यु बारा जोना मायलु एक होतु, प्रधान पुजारानचा गोयू कि येसु-काजे इंदरे हाते धोराय देये. 11चे यो सोमवीन खुश होया, एने तीनाक काजे पोयशा आपनेन वायदु कोऱ्या एने चू टेम हेरने बाज गोयू कि तीनाक काहना रितीसी धोराव दोम.

चेला साते आखरी खाणो

(मत्ती 26:17-25; लुका 22:7-14,21-23; योहान 13:21-30)

12बेखमीर रुटान तीहीवारोन पेहेले दाहळे, जीनामा चे योग्य बलिदान कोरता होता, तेरा चेला तीना काजे पुछ्या, तारी का मोर्जी छे कि आमु जायीन तारेन कोरता तीहीवारोन खाणो खाणे तीयारी कोरजे? 13येसु आपना चेलामा गोथू दुय जोना काजे यो कोयीन मूकल्यु, “सोहोरमा जावू, एने एक माणूस पाणीन डूचरो हाकली रोयलू तुमु काजे भेटायसे, तेरे पोछोव जाजू.” 14एने चू जीना घोरमा जाय, तिना घोरन मालिक काजे कोयजू, “गुरु कोये कि मारी पाहांतरायीन जागा जीनामा मे मारा चेला साते तीहीवारोन खाणो खाम का छे?” 15ची तुमु काजे घाटावी कोरली, एने तीयार कोरली मोटीत खुली देखाळ देसे, चा आपनेन कोरता तीयारी कोरु. 16चेला निकवीन सोहोरोमा आव्या, एने जोसू चू तीनु काजे कोयलु होतु, तोसोच देख्या; एने तीहीवारोन तीयारी कोऱ्या.

17जेतार सांतो होयो, ती येसु बारा जोना साते आव्यु. 18जेतार चे बोसीन खाणो खाता होता, ती येसु कोयू, “मे तुमु काजे छाचलीन कोयो कि तुमरे मायीन एक, जू मारे पुठी खाणो खाणे बाज रोयू, मेसेक धोरावसे”. 19तिंदरेमा नाराजगी आव गोयी एने चे एक-एक जोण तिना काजे कोयने बाज गोया, काय चु मे छे? 20येसु तीनु काजे कोयू, चू बारा जोना मायन एक छे, जु मारे साते थाविमा हात घालने बाज रोयू. 21काहाकि माणसोन पुऱ्यु ते, जोसो तेरे बारामा लिखलो छे, जातलू छे; बाकीन तिना माणसो पोर हाय जिनान लारे माणसोन पुऱ्यु धोराय जातलू छे बाकीन तिना माणसोन जन्मो नि होयतो, ती तेरेन कोरता वारु होतो.

प्रभू भोज

(मत्ती 26:26-30; लुका 22:15-20; 1 कुरीन्थियो 11:23-25)

22जेतार चे खाणेत बाज रोया होता, चू रुटू लेदू, एने आशिष मांगीन भांग्यू, एने तीनुक आप्यू, एने कोयू, “लेवू यो मारो डील छे.” 23ओवतेन चु प्यालू लीन धन्यवाद कोऱ्यु, एने तीनुक आप्यू; एने चे आखा तीनामा गोथा पीदा. 24एने येसु तीनु काजे कोयू, यो नोवला वायदू मारो चो लुय छे, जो घोना सोवटान कोरता वोयाळाय जातलो छे. 25मे तुमु काजे छाचलीन कोयो कि आंगुरोन रोस तिने दाहळे तोक ओवी कोबी नी पीयो, जेतार तोक परमेश्वरोन राजमा नोवलो नी पीयो. 26ओवतेन चे भजन गावीन बारथे जयतुनोन बोयळा पोर गोया.

पतरसोन येसु काजे मना कोरणेन भविष्यवाणी

(मत्ती 26:31-35; लुका 22:31-34; योहान 13:36-38)

27तेत्यार येसु तीनु काजे कोयू, “तुमु आखा ठूकर खासु, काहाकि लिखलो छे, ‘मे राखवाव काजे दिस, एने गाडरा वेरा-वेर होय जासे,’” 28बाकीन मे खुद जीव उठनेन ओवतेन तुमरे पेहेले गलीलमा जायीस. 29पतरस तीना काजे कोयू, “अगर आखा ठूकर खाय ती खाय, पुन मे ठूकर नी खाम.” 30येसु तीनाक कोयू, “मे तुसे काजे छाचलीन कोयो कि आजुत इनी राती कुकळू दुय कावा वासनेन पेहेले, तु तीन कावा मेसे काजे नाकारीस.” 31बाकीन चू ओवी जुर दीन कोयू, “बाकीन मेसेक तारे साते मोरनो बी पोळसे, ते बी मे तारू नाकार कोदि नी कोरो”, इना रितीसी ओवी आखा बी कोया.

गतसमनीमा येसुन प्रार्थना

(मत्ती 26:36-46; लुका 22:39-46)

32ओवतेन चे गेथसेमोन नावोन एक जागे आव्या, एने येसु आपना चेला काजे कोयू, न्या बोस रोयू, जेतार तोक मे प्रार्थना कोरो, 33एने चू पतरस एने याकुब एने योहान काजे तेरे साते लिगोयू; एने घोन जुदु थाक्यू एने कासावीस होयने बाज गोयू, 34एने तीनु काजे कोयू, “मारो मोन घोनो नोराज छे, न्या तोक कि मे मोरने पोर छे; तुमु न्या रोयू, एने जागता रोयू.” 35ओवतेन येसु थुलूक ओगू गोयू एने धोरती पोर पोळीन प्रार्थना कोरणे बाज गोयू कि ओगर होय सोके ती जी टेम मारे पोर गोथी टोव जाय. 36एने कोयू, “हे अब्बा, हे बास, तारेसी सोब काय होय सोकतलो छे, इना प्याला काजे मारेंचा गोथु छेटू कोरले ते बी जोसो मारा मोनोन तोसो नी, बाकीन तारा मोनोन तोसो होये”. 37ओवतेन चु आव्यु एने तीनु काजे सुवतेला देखीन पतरस काजे कोयू, “हे शिमोन, तू सुव रोयू? काय तू एक घोळीभोर बी नी जाग सोक्यू?” 38जागता एने प्रार्थना कोरता रोयू कि तुमु परीक्षामा नी पोळे आत्मा ते तीयार छे, बाकीन डील कोमजुर छे. 39एने चु ओवी जात रोयू एने तीनु बुलोमा प्रार्थना कोऱ्यु. 40ओवी आवीन तीनुक सुवतेला देख्यू, काहाकि तिंदरा डूवा निंदसी भोरला होता; एने नी जानता होता कि तीनाक काय जोवाब आपजे. 41एने तिसरे कावा आवीन तीनु काजे कोयू, “हीमी सुवता रोयू एने आराम कोरु, बस, टेम आव लागी; देखू माणसोन पुऱ्यु पापीन हाते धोरवाय जातलू छे. 42उठू, चालू देखू, मेसेक धोरावने वावु साते आव लागलु छे.”

गतसमनीमा येसुक धोरावनो

(मत्ती 26:47-56; लुका 22:47-53; योहान 18:3-12)

43येसु यो कोयनेत बाज रोयू होतु कि यहुदा जू बारा जोना मायलु एक होतु, आपने साते प्रधान पुजारू एने शास्त्री एने पुढारीनचा गोथी एक मोटीत गोरदी लीन तेत्यारुत आव लाग्यू, जे तलवाऱ्या एने लाकळ्या ली रोया होता. 44तीना काजे धोरावने वावू तीनु काजे यु पोतू आपलु होतु कि जीना काजे मे गुवू दोम होयु छे, तिनाक धोरीन सोमावीन ली जाजू. 45चू आव्यु, एने तेत्यारुत तेरेनचा साते जायीन कोयू, “हे रब्बी!” एने तीना काजे घोन सोवटा गुवालेदू. 46तेत्यार चे तीना पोर हात नाखीन तीनाक धोर लेदा. 47तिंदरे मायला जे साते उबरोय रोया होता, एक जोनू तलवार हापकीन महायाजकोन पावोर पोर चालाळ्यु, एने तेरो कानटो काट देदू. 48येसु तीनु काजे कोयू, “काय तुमु डाखू सोमजीन मेसेक धोरणे कोरीन तलवाऱ्या एने लाकळ्या लीन निकवी रोया?” 49मे ते दाहळीन मंदीरमा तुमरे साते रोयीन सिकाळतू होतु, एने तेत्यार तुमु मेसेक नी धोऱ्या बाकीन यो इनान कोरता होयलो छे कि पवित्र शास्त्रन वाते पुरी होये. 50इनापोरसी आखा चेला येसुक छुळीन ढास गोया. 51एक जुवान आपना उगाळला डीलोपोर चादरो पांगेरतू जायीन तेरे पोछोव चाल पोळ्यु; एने माणसे तीनाक धोऱ्या, 52बाकीन चु चादरो छुळीन उगाळलुत ढास गोयू.

मोटली सभामा येसु

(मत्ती 26:57-68; लुका 22:54-55,63-71; योहान 18:13-14,19-24)

53ओवतेन चे येसु काजे महायाजकनचा लीगोया; एने आखा प्रधान पुजारू एने पुढारी एने शास्त्री तेरेनचा एखठा होय गोया. 54पतरस नांबेत नांबे तेरे पोछोव-पोछोव महायाजकोन आंगनान माहाय तोक गोयू, एने तिंदरा साते वावा साते बोसीन आगठे तापणे बाज गोयू. 55प्रधान पुजारू एने आखी मोटली सभा येसु काजे मारनेन कोरता तेरे खिलापमा गोवा हेरता होता बाकीन नि जोळी. 56काहाकि लोकेत जोना तेरे खिलापमा झुटी गोवायी आपता होता, बाकीन तिंदरी गोवायी एकसारखी नि होती. 57तेत्यार कहानला माणसे उठीन तेरे खिलापमा जो झुटी गोवायी आप्या, 58“कि आमु इना काजे यो कोयतेलु सोमवला छे, कि मे इना हातोन बोनावला मंदीर काजे पाळ दिस, एने तीन दाहळामा दिसरो बोनावीस, जो हातसी नि बोनलो होय.” 59इनापोर बी तिंदरी गोवायी एकसारखी नि निकवी. 60तेत्यार महायाजक इचमा उबरोयीन येसु काजे पुछु, “तु काय जोवाब नि आपतू? ये माणसे तारा खिलापमा काय गोवायी आपने बाज रोया?” 61बाकीन येसु हुगुत रोयू, एने काहीन जोवाब नि आप्यू महायाजक तीना काजे ओवी पुछु, “काय तू तिना परम सोयावान पुऱ्यु मसिह छे?” 62येसु कोयू, “मे छे” एने तुमु माणसोन पुऱ्या काजे सर्वशक्तिमानोन जेवळे धोळे बोसीन, एने सोरगोन वादवा पुठी आवतेलु देखसु. 63तेत्यार महायाजक तिंदरा छिंदरा फाळीन कोया, हिमी आमु काजे गोवायीन ओवी काय गोरोज छे? 64तुमु जी बुराई सोमव्या, तुमरू काय इरादू छे? चे आखा कोया कि यु मोरनोन दोंडोन लायक छे. 65तेत्यार कहानास ते तिना पोर थूपणे, एने काहनास तेरो मूय ढाकणे एने तीनाक धुमा देणे, एने तिना काजे कोयने बाज गोया, “भविष्यवाणी कोर” एने सिपायळा तीना काजे धोरीन थापळ्या देदा.

पतरसोन येसुक मना कोरनो एने रोडनो

(मत्ती 26:69-75; लुका 22:56-62; योहान 18:15-18,25-27)

66जेतार पतरस नेचू आंगनामा होतु, ती महायाजकोन पावरनी मायली एक चा आवी, 67एने पतरस काजे आगठे तापतलु देखीन तीनाक टोक लागाळीन देखी एने कोयने बाज गोयी, “तू बी ते इना नासरी येसुन साते होतु.” 68चु घाबराय गोयू, एने कोयू, “मे नि जानतलु एने नि सोमोजतो कि तू काय कोयने बाज रोयी, बारथे देवळी पोर गोयू; एने कुकळू वासने बाज गोयू,” 69ची पावेरनी तीनाक देखीन तिंदरे साते जे उबरोयला होता, एने कोयने बाज गोयी, “यु इंदरे मायलु एक छे.” 70बाकीन चू ओवी नाकार कोऱ्यु थुलिक वारमा चे जे साते उबरोय रोया होता ओवी पतरस काजे कोया, “छाचलीन तू तिंदरे मायलु एक छे; काहाकि तू गलीली बी छे.” 71तेत्यार चू धिक्कारीन एने कोसोम खाणे बाज गोयू, “मे तिना माणसो काजे, जेरी तुमु वात कोर रोया, नि जानतलु,” 72तेत्यार तेत्यारुत दिसरे कावा कुकळू वासने बाज गोयू पतरस काजे जी वात जु येसु तीना काजे कोयलु होतु फोम आवी “कुकळान दुय कावा वासनेन पेहेले तू तीन कावार मारू नाकार कोरीस” एने चू इनी वातोन फोम कोरीन रोडणे बाज गोयू.

Currently Selected:

मरकुस 14: BFBNT

Highlight

Copy