मरकुस 13

येसुन लारे मंदीरोन नाशोन भविष्यवाणी

(मत्ती 24:1-2; लुका 21:5-6)

1जेतार चु मंदीरमा गोथू नीकवतु होतु, ती तेरा चेला मायलु एक जोणु तीनाक कोयू “हे गुरु देख, कोसा मोटला दोगळा एने कोसा मोट-मोटा घोरे छे.” 2येसु तीना काजे कोयू, काय तुमु ये मोट-मोटा घोरे देख रोया,? न्या दोगळा पोर दोगळू बि वाचीन नी रोये यु पाळाय नी सोके.

दुख एने पीळा

(मत्ती 24:3-14; लुका 21:7-19)

3जेतार चू जयतुनोन बोयळा पोर मंदीरोन सामने बोस रोयू होतु, ती पतरस एने याकुब एने योहान एने अन्द्रियास ओलोग जायीन तीना काजे पुछ्या, 4“आमुक कोय कि ये वाते केतार होयसे?” एने जेतार ये आखा वाते पुरा होयने पोर होयसे तिना टेमोन काय चिन्ह होसे? 5येसु तीनु काजे कोये बाज गोयू, “हुशारीमा रोयु कि कुदू तुमु काजे नि फोसाळे.” 6घोना सोवटा मारे नावसी आवीन कोयसे, “कि मे होयु छे” एने घोणा सोवटा काजे फोसाळने. 7जेतार तुमु लोळाय, एने लोळायीन खोबर सोमवसु, ती नि बिहीजू; काहाकि इंदरो होयनो जोरुरी छे, बाकीन तिनी टेमे आखरी नि होये. 8काहाकि जाती पोर जाती, एने राज पोर राज चोढाइ कोरसे. जागो जाग धोरती फाटसे, एने काव पोळसे यो ते पीळान सुरवातुत होयसे.

9“बाकीन तुमु आपना बारामा हुशारीमा रोयू; काहाकि माणसे तुमु काजे मोटला सभान होवाले कोरसे एने तुमु प्रार्थना घोरमा मार खासु, एने मारे वजेसी सुभेदारोन एने राजान ओगोव उबा कोराय जासे, काहाकि तिंदरेन कोरीन गोवा होये.” 10बाकीन जोरुरी छे कि पेहेले वारली खोबरन आखा जातीमा प्रचार कोराय जासे. 11जेतार चे तुमु काजे लीजायीन होवाले कोरसे, ती पेहेलेसी चिंता नि कोरजू कि आमु काय कोयसू; बाकीन जो काय तुमु काजे तिनी टेमे देखाळसे चो काहनो; काहाकि बुलणे वावा तुमु नि होय, बाकीन पवित्र आत्मा छे. 12भाश काजे भाश, एने बास काजे पुऱ्यु मारनेन कोरीन होवाले कोरसे, एने पुऱ्या आसी-बासान खिलापमा उठीन तीनु काजे माराय देसे. 13एने मारा नावोन वोजेसी आखा माणसे तुमरे पोर खिलाप कोरसे; बाकीन जु आखरी तोक धीर धोर रोयसे, तिंदरू छुटकारू होयसे.

मोटला दुखन टेम

(मत्ती 24:15-28; लुका 21:20-24)

14आखरी जेतार तुमु तिना उजाळने वावी विटाव चीज काजे जा वारू नि होय चा उबरोयली देखू, (भोनने वावा सोमजी लेजू) तेत्यार जे यहुदिमा होय, चे बोयळा पोर दोवळी पोळे. 15जे छोत पोर होय, चे आपने घोर गोथा काहीन लेणे कोरीन नेचा नि उतरे एने नि माहाय जाय; 16एने जे खेतोमा होय, चे आपना कापळा लेणे कोरीन पोछा नी आवे. 17तीनु दाहळामा जे भारीस एने दुध पावती होसे, तीनुन कोरीन हाय, हाय, 18एने प्रार्थना कोरता रोयू कि यो सिवोमा नि होये. 19काहाकि चे दाहळा ओसा दुखोवावा रोयसे कि जोगोन सुरुवातशी, यो परमेश्वरोन बोनावलो छे, हिमी तोक नि ते होयो एने नि एने कोबी होयसे. 20ओगर प्रभू तीनु दाहळा काजे नि घोटाळतू, ती कुदू प्राणी बी धोरती पोर नि वाचता; बाकीन इनू प्रेषितोन वजेसी जीनु काजे येसु नेवाळलु छे, इनू दाहळा काजे घोटाळयू. 21इनी टेमे हीमी कुदू तुमु काजे कोये, “देखू, मसिह न्या छे,” नीती “देखू, वा छे,” ती भुरसू झुन कोरता. 22काहाकि झुटा मसिह एने झुटा भविष्य कोरता उठीन उबरोय से, एने चिन्हा एने चमत्कारी काम देखाळसे कि ओगर होय सोके ती नेवाळला काजे बी फोसाळ देसे. 23बाकीन तुमु हुशारीमा रोयू; देखू, मे तुमु काजे आखा वाते पेहेलेसी कोय देदलु छे.

येसुन पोछो आवनो

(मत्ती 24:29-31; लुका 21:25-28)

24तीनु दाहळामा, तीनु तोकलीतोन ओवतेन दाहळू आंदारू होय जासे, एने चांद विजावो नि आपे;. 25एने सोरगोमा गोथा तारा पोळने बाज जासे; एने सोरगोन ताकत हालवाय जासे. 26तेत्यार माणसे माणसोन पुऱ्या काजे मोटी ताकत एने महीमा साते वादवामा आवतेलु देखसे. 27तिनी टेमे चु आपना सोरग दूतो काजे मुकलीन, धोरतीन इनी धोळे गोथो सोरगोन पोल धोळे तोक, चारू धोळे गोथा आपना नेवाळला माणसो काजे एखठा कोरसे.

गुलोर झाडोन दाखलू

(मत्ती 24:32-35; लुका 21:29-33)

28गुलोरोन झाडोसी यु दाखलू सिकू जेतार तेरी डाव कोवोव्वी होय जातली, एने पाला निकोवने लाग जातला; ती तुमु जान जातला कि उनावू साते छे. 29इनी रितीसी जेतार तुमु इनी वातो काजे होयतेली देखसु, ती जान लेवू कि चु साते छे पुन झोपलेत छे. 30मे तुमु काजे छाचलीन कोयो कि जेतार तोक ये आखा वाते नि होये, तेत्यार तोक ये माणसे जाती नि रोये. 31सोरग एने धोरती टोव जासे, बाकीन मारी वाते कोबी नि टोवे.

जागता रोयू

(मत्ती 24:36-44)

32“तिने दाहळे नीती तिनी टेमोन बारामा कुदु नी जानतलु, नि सोरगोन दूत, एने नी पुऱ्यु; बाकीन निस्तू बास.” 33देखू, जागता एने प्रार्थना कोरता रोयू; काहाकि तुमु नि जानतेला कि ची टेम कोत्यार आवसे. 34यो तिना माणसो तोसी हालत छे, जु पोरदेश जाणेन टेमे आपनो घोर छुळीन जाय, एने आपना पावोर काजे होक आप देय; एने होर एक जोना काजे तेरो काम देखाळ देये, एने राखवाव काजे जागतू रोयनेन आग्या आपे. 35इनान कोरता जागता रोयू, काहाकि तुमु नि जानतला कि घोरोन मालिक कोत्यार आवसे, सांतू नीती आदी राती, नीती कुकळा वासनेन टेमे नीती सोंदारे वेगूत. 36ओसो नि होयनो जुवे कि चू उचकालुन आवीन तुमु काजे सुवतेला देखे. 37एने यो मे तुमु काजे कोय कि, चोत आखा काजे कोय, “जागता रोयू.”

Currently Selected:

मरकुस 13: BFBNT

Highlight

Copy