मरकुस 12

दुष्ट खेती कोरणे वावान दाखलू

(मत्ती 21:33-46; लुका 20:9-19)

1ओवतेन चू दाखलासी तिंदरे पुठी वाते कोरणे बाज गोयू कि “काहनुस माणूस आंगुरोन वाळ लागाळयू, एने तेरे चारू धोळे वाळ बांदयू, एने रस जुगू कुंडो खोंदयू, एने वाळ बोनाव्यू; एने खेत कोरणे वावा काजे तेरू ठेकु आपीन परदेश जात रोय.” 2ओवतेन फोवोन मुसोम मा चु खेत कोरणे वावान घोर एक पावोर काजे मूकल्यु कि खेत कोरणे वावा जुव आंगुरोन फोवोन वाटू लेये. 3बाकीन चे तीना काजे धोरीन ठूक्या एने ठारले हाते मुकली देदा. 4ओवतेन चू एक एने पावोर काजे तिंदरेनचा मूकल्यु; चे तेरो मुंडको फुळ देदा एने तीना काजे बेइजत कोऱ्या. 5ओवतेन चू एक एने दिसरा काजे मूकल्यु; एने चे तीना काजे मार देदा तेत्यार चू एने लोकेत जोना काजे मूकल्यु; तीनामा गोथा चे काहनास काजे ठुक्या, एने काहनास काजे मार देदा. 6हिमी एकुत रोय गोयू होतु, जू तेरू मोंगावू पुऱ्यु होतु; आखिर चू तीना काजे बी तिंदरेनचा ओसो विचार कोरीन मूकल्यु कि चे मारा पुऱ्यान आदर कोरसे. 7बाकीन चे खेत कोरणे वावा आपसमा कोया, “यु ते वारीस छे; आवू, आपु इना काजे मार देता, तेत्यार मेर आपनी होय जासे.” 8एने चे तीना काजे धोरीन मार देदा, एने आंगुरोन वाळीन बारथे नाख देदा.

9इनान कोरता आंगुरोन वाळीन मालिक काय कोरसे? चू आवीन तीनु खेत कोरणे वावान नाश कोरसे, एने आंगुरोन वाळी दिसरा काजे आप देसे. 10काय तुमु पवित्र शास्त्रामा यो वचन नी भोन्या

जिना दोगळा काजे मिस्तऱ्या रीकामू ठेरावला होता,

चू कुपरान खुणू होय गोयू

11यो प्रभून तोरोफसी होयो,

एने आमरी नोजोरमा अदभूत छे.

12तेत्यार चे तीना काजे धोरणेन कोऱ्या; काहाकि सोमजी गोयला होता कि चू आमरे खिलाप यु दाखलू कोयलु छे बाकीन चे माणसो काजे बिह्या, एने तीना काजे छुळीन जात रोया.

केसर काजे फावू आपनेन सवाल

(मत्ती 22:15-22; लुका 20:20-26)

13तेत्यार चे येसु काजे वातोमा फोसाळनेन कोरता काहणास फरुशी एने हेरोदिया काजे तेरेनचा मूकल्या. 14चे आवीन येसु काजे कोया, “हे गुरु, आमु जानतेला छे, कि तू खोरलू छे, एने कुदान पोरवाय नि कोरतेलू; काहाकि तू माणसोन मूय देखीन वाते नि कोरतेलू, बाकीन परमेश्वरोन वाट देखाळतेलू छे ती काय केसरोन कोरजू आपने सही छे कि नि, 15आमु आपजे, कि नी आपजे?” येसु तिंदरू दोगू जानीन तीनु काजे कोयू, “मेसे काजे काहा पारेखतेला? एक दिनार मारेनचा लावू, कि मे तीनाक देखो”. 16चे लाव्या, एने येसु तीनु काजे कोयू, “यु छापू एने नाव कुनीन छे?” चे कोया, “केसरोन”. 17येसु तीनु काजे कोयू, “जो केसरोन छे चो केसर काजे, एने जो परमेश्वरोन छे चो परमेश्वर काजे आपु तेत्यार चे तीना पोर घोणा नोवलाय कोरणे बाज गोया”.

पोछो जीव उठनेन वारामा सवाल

(मत्ती 22:23-33; लुका 20:27-40)

18ओवतेन सदुकी बी, जे कोयतेला कि मोरलामा गोथा जीव उठनो होय नी, येसुनचा आवीन चे तीना काजे पुछ्या, 19कि हे गुरु, मुसा आमरेन कोरीन लिखलू छे कि ओगर कुदान भाश बिना पुऱ्यान मोर जाय एने तेरी लाडी रोय जाय, ती तेरू भाश तेरी लाडी पुठी वियाव कोर लेये एने आपना भाशोन कोरता पिढी पोयदा कोरे. 20सात भाश होता पेहलू भाश वियाव कोरीन बीना पुऱ्या मोर गोयू. 21तेत्यार दिसरू भाश तिनी बायर पुठी वियाव कोर लेदू एने बिना पुऱ्यान मोर गोयू; एने ओसुत तिसरू बी कोऱ्यु. 22एने सात जोनाक पुऱ्यान नि होयी आखान पोछोव ची बायर बी मोर गोयी. 23आखरी जीव उठने पोर ची इंदरे मायीन कुनीन लाडी होयसे? काहाकि ची सात जोनान लाडी बोन गोयली होती.

24येसु तीनु काजे कोयू, “काय तुमु इनान वोजेसी भूल मा ते नि पोळ रोया कि तुमु नि ते पवित्र शास्त्र काजे जानतेला, एने नी परमेश्वरोन ताकत काजे? 25काहाकि तेत्यार चे मोरलामा गोथा जीव उठसे, ती चे नि वियाव कोरसे एने नी वियावमा आपायसे, बाकीन सोरगोन दूतो सारखा होयसे. 26मोरलामा गोथा पोछा जीव उठनेन बारामा काय तुमु मुसान किताबमा झाडक्यान काहानीमा नि भोन्या कि परमेश्वर तीना काजे कोयू, ‘मे अब्राहामन परमेश्वर, एने इसाहाकोन परमेश्वर, एने याकुबोन परमेश्वर छे?’ 27परमेश्वर मोरला नी बाकीन जीवतलान परमेश्वर छे; आखा तुमु मोटी भूल मा पोळ रोया.”

मोटली आग्या

(मत्ती 22:34-40; लुका 10:25-28)

28शास्त्रीमा गोथू एक आवीन तीनु काजे जोखळाय तेला सोमव्यू, एने यो जानीन कि चू तीनु काजे वारला रितीसी जोवाब आप्यू, तीना काजे पुछु, “आखान मोटली आग्या काहनली छे?” 29येसु तीनु काजे जोवाब आप्यू, “आखा आग्यामा गोथी जी मोटी छे, ‘हे इस्राईल सोमोव, प्रभू आमरू परमेश्वर एकुत प्रभू छे, 30एने तू प्रभू आपना परमेश्वर सी आपना आखा मोनोसी, एने आपना आखा जीवोसी, एने आपना आखा ग्यानसी एने आपना आखा ताकतसी मोंग राखू.’ 31एने दिसरी जो छे, ‘तू आपना साते वावा साते खुदो सारखो मोंग राखजी’ इना गोथी मोटी एने कानली आग्या नि होय.” 32शास्त्री येसु काजे कोया, “हे गुरु, घोनो वारू. तु छाचलीन कोयू कि जो एकुत छे, एने तिनीक छुळीन एने कानली नि होय. 33एने तिनी काजे आखो मोन, एने आखो ग्यान, एने आखू जीव, एने आखी ताकतसी मोंग कोरजी; एने साते वावासी आपने सारखो मोंग करजी, आखा होमबली एने बलिदानोसी बोढीन छे.” 34जेतार येसु देख्यू कि चु सोमजीन जोवाब आप्यू, ती तीना काजे कोयू, “तू परमेश्वरोन राजसी नांबे नि होय,” एने कुदा काजे ओवी तीना काजे काहीन पुछनेन हिंमत नी आवी.

येसुन सवाल

(मत्ती 22:41-46; लुका 20:41-44)

35ओवतेन येसु मंदीरमा प्रचार कोरतू जाईन यो कोयू, शास्त्री कोसा कोयतेला कि मसिह दाऊदन पुऱ्यु छे? 36दाऊद खुद पवित्र आत्मामा रोयीन कोयलु छे,

प्रभू मारा प्रभू काजे कोयू, “मारे जेवळे बोस,

जेतार तोक कि मे तारा दुष्मोन काजे तारा पायोन पीढी नी कर दोम.”

37दाऊद ते खुद तीनाक प्रभू कोयतेलू, एने चू तेरु पुऱ्यु कां गोथू ठेऱ्यू? एने गोरदी मायला माणसे तेरी खुशीसी सोमवता होता.

येसुन लारे चेतावनी

(मत्ती 23:1-36; लुका 20:45-47)

38येसु आपना प्रचारमा तीनु काजे कोयू, “शास्त्रीसी हुशारीमा रोयू, जे नांबा-नांबा डोगला पेहरीन फीरनो एने हाटोमा नमस्कार, 39एने प्रार्थना घोरोमा मोटी-मोटी बोसणेन जागा एने खाणान नेवतामा मोटी-मोटी जागा जुवतली. 40चे रोंडायलान घोरो काजे खाय जातला छे, एने देखाळणेन कोरता घोनी वार तोक प्रार्थना कोरता रोयतेला छे ये जादा गुणान वोजा होयसे.”

रोंडायलीन दान

41येसु मंदीरोन दान पेटी सामने बोसीन देखतू होतु कि माणसे मंदीरोन दान पेटी काहना रितीसी पोयशा नाखतेला छे; एने लोकेत मालदार घोनो काहीन नाख्या. 42तोतरामा एक गोरीब रोंडायली आवीन दुय दोमड्या, चे एक ओदलाम बोराबोर होयतेला छे, नाखी. 43तेत्यार येसु आपना चेलानुकाजे साते बुलावीन तीनु काजे कोयू, “मे तुमु काजे छाचलीन कोय कि मंदिरोन दान पेटी नाखने वावामा गोथा जो गोरीब रोंडायली आखा गोथी बोढीन नाखली छे.” 44काहाकि आखा आपना धोनोन बोढतीमा गोथा नाखला छे, बाकीन जो आपना कोम मा गोथो जो काहीन तेरो होतो, मतलब आपनी आखी जीवनेन कोमाय नाख देदली छे.

Currently Selected:

मरकुस 12: BFBNT

Highlight

Copy