मरकुस 15

पिलातुसोन येसुक सवाल

(मत्ती 27:1-2,11-14; लुका 23:1-5; योहान 18:28-38)

1एने सोंदारो होयताच मामार प्रधान पुजारा, डाह-डाहा, एने शास्त्री एने आखी मोटली सभा पोतू लागाळीन येसु काजे बांदाळ्या, एने तीना काजे लीजायीन पिलातोन हातोमा आप देदा. 2पिलात तीना काजे पुछु, “काय तू यहुदिन राजा छे?” येसु तीना काजे जोवाब आप्यू, “तू खुद कोयने बाज रोयू.” 3प्रधान पुजारा तीना पोर लोकेत वातोन गुणा लागाळता होता. 4पिलात तीना काजे एने पुछु, “काय तू काहीन जोवाब नि आपतू, देख ये तारे पोर कोतरी वातोन गुणू लागाळ रोया?” 5येसु ओवी काहीन जोवाब नि आप्यू; न्या तोक कि पिलात काजे मोटी नोवलाय लागी.

येसुक मार देनेन आग्या

(मत्ती 27:15-31; लुका 23:13-25; योहान 18:39)

6पिलात तेरे पेहेले काहना एक बोंदीवान काजे जू तीनुक जुवतू होतु, तिंदरे कोरीन छुळ देतू होतु. 7बरब्बा नावोन एक माणूस तीनु बोंदीवानो साते बोंदी होतु, जे बंडामायलू खुनी होती. 8एने गोरदी उपोर जायीन तीना काजे विनता कोरणे बाज गोया, कि जोसू तू आमरेन कोरता कोरतू आवलु छे तोसुच कोर. 9पिलात तीनु काजे जोवाब आप्यू, “काय तुमरी मोर्जी छे कि मे तुमरेन कोरता यहुदिन राजा येसु काजे छुळ दोम?” 10काहाकि चू जानतू होतु कि प्रधान पुजारा तीना काजे डाव धोरीन धोरावला होता. 11बाकीन प्रधान पुजारा माणसो काजे उबराख्या कि चू बरब्बा काजेत तिंदरेन कोरता छुळ देये. 12यो सोमवीन पिलात तीनु काजे ओवी पुछु, “ती जीना काजे तुमु यहुदिन राजा कोयतेला, तीना काजे मे काय कोरो?” 13चे ओवी आयळ्या, “तीना काजे ख्रुस पोर चोळाव दे.” 14पिलात तीनु काजे कोयू, “काहा, यु काय बुराई कोरलु छे?” बाकीन चे ओवी आयळ्या, “हिना काजे ख्रुस पोर चोळाव दे” 15तेत्यार पिलात गोरदी काजे खुश कोरनेन कोरता, बरब्बा काजे तिंदरेन कोरता, छुळ देदू, एने येसु काजे चापका देवाळीन हवाले कोर देदू कि ख्रुस पोर चोळाय जाय.

येसुन अपमान

16सिपायळा येसु काजे किल्लान माहाय वावा आंगनामा लीगोया जो प्रीटोरीयुम कोवायतेला छे, एने आखी पलटन काजे बुलाव लाव्या. 17तेत्यार चे तीना काजे जामन्या छिंदरा पेहराव्या एने काटान मुकुट गुथीन तेरा मुंनकापोर मेक देदा, 18एने यो कोयीन तीना काजे नमस्कार कोरणे बाज गोया, “हे यहुदियान राजा, नमस्कार”. 19चे तेरा मुंनकापोर लाकळा देता, एने तीना पोर थूपता, एने मांडा टेकाळीन तीना काजे नमस्कार कोरता रोया. 20जेतार चे तेरी मोजाक कोर लेदा, ती तीना पोर गोथा जामन्यो छिंदरो निकावीन तेरात छिंदरा पेहेराव देदा; एने तेत्यार तीना काजे ख्रुस पोर चोळावनेन कोरता बारथे लीगोया.

येसु काजे ख्रुस पोर चोळावनो

(मत्ती 27:32-44; लुका 23:26-39; योहान 19:17-19)

21सिकनदर एने रुफूस इंदरु बाबू शिमोन, एक कुरेनेकर माणूस, यु गाव गोथू आवने बाजरोयलू चा गोथू निकव्यू; चे तीना काजे जोब्रानसी धोऱ्या कि तेरू ख्रुस हाकलीन चाले. 22चे येसु काजे गुलगुता नावोन जागा पोर, जिनान मतलब कोवटीन जागा छे, लाव्या. 23चा तीना काजे नोशा भेसेकलो अगुंरोन रोस आपने बाज गोया, बाकीन चू नि लेदू. 24तेत्यार चे तीना काजे ख्रुस पोर चोळाव्या एने तेरा डोगलापोर चिठ्या नाखीन, कि कुनी काजे काय जोळे, तीनाक वाट लेदा. 25एने एक पोहोरु दाहळू चोळ रोयू होतु, तेत्यार चे तीना काजे ख्रुस पोर चोळाव्या. 26एने तेरे पोर गुणान चिट्ठी लिखीन तीना पोर उपोर लागाळ देदा कि “यहुदियान राजा.” 27चे तेरे साते दुय डाखू, एक तेरे जेवळे एने एक तेरे डाखऱ्ये धोळे ख्रुस पोर चोळाव्या. 28तेत्यार पवित्र शास्त्रान यो वचन कि चू गुणावा साते गीनाय गोयू, पुरो होय गोयो. 29एने वाटे जान्या मुनको हालवी-हालवीन एने यो कोयीन तेरी बुराई कोरता होता, “वाह, मंदीर काजे तूळने वावू, एने तीन दाहळामा बोनावने वावू!. 30ख्रुस पोर गोथू उतरीन खुदो काजे वाचाडले.” 31इनी रितीसी प्रधान पुजारू बी, शास्त्री पुठी, आपोसमा मोसकरी कोरता होता, यु दिसरा काजे वाचाड्यू, बाकीन खुदो काजे नि वाचाड सोकतू. 32इस्राईलोन राजा, मसिह, हिमी ख्रुस पोर गोथू उतरीन आव कि आमु देखीन भुरसू कोरजे एने जे तेरे साते ख्रुस पोर चोळाव लाव होता, चे बी तेरी बुराई कोरता होता.

येसुन मोरनो

(मत्ती 27:45-56; लुका 23:44-49; योहान 19:28-30)

33दिसू होयनेन टेमे आखा देसोमा आंदारो होय गोयो, एने तिसरे पोहर तोक रोयो. 34तिसरे पोहर येसु मोटात बुलोमा आयळीन कोयू, “इलोई, इलोई, लमा सबखथनी?” एरू मतलब यो छे, “हे मारा परमेश्वर, हे मारा परमेश्वर, तू मेसे काजे काहा छुळ देदू?” 35ये साते उबरोयला होता, तिंदरे मायला कहानास यो सोमवीन कोया, “देखू, यु एलिया काजे आयळने बाज रोयू.” 36एने एक जोनू दोवळीन स्पंच काजे आंबोमा डूबाळयू, एने बोरून लाकळीन तीखलापोर मेकीन तीना काजे चूसाड्यू एने कोयू, “उबरोय जावू, देखू, एलिया इना काजे उतारनेन कोरता आवतेलु कि नी.” 37तेत्यार येसु मोटात बुलोसी आयळीन जीव छुळ देदू. 38एने मंदीरोन पोडदु उपोर गोथू नेचू तोक फाटीन दुय तुकडा होय गोयू. 39जु सुभेदार तेरे सामने उबरोय रोयू होतु, जेतार तीनाक ओसू आयळीन जीव छुळतेलू देख्यू, ती चू कोयू, छाचलीन यु माणूस, परमेश्वरोन पुऱ्यु होतु.

40लोकेत बायराबी नांबे रोयीन देख रोया होता तिंदरेमा मरीयम मगदलीनी, नानलु याकुब एने योसेन आया मरीया, एने सोलोमी होता. 41जेतार चू गलीलमा होतु ती ये तेरे पोछोव जाता होता एने तेरी सेवा हमेशा कोऱ्या कोरता होता; एने दिसरा लोकेत बायराबी होता, जे तेरे साते यरुशलेममा आवला होता.

येसुक मोळवाट्यामा मेकनो

(मत्ती 27:57-61; लुका 23:50-56; योहान 19:38-42)

42जेतार सांतो होय गोयो ती इनान कोरता कि तीयारीन दाहळू होतु, यु शब्बाथोन एक दाहळू पेहेले रोयतेलू, 43अरिमतियाह मा रोयने वावू युसूफ आव्यु, जू महासोभान मेंबर होतु एने खुद बी परमेश्वरोन राजोन वाट जुवतू होतु चू हिंमत कोरीन पिलातोन चा गोयू एने येसुन धोळ मांग्यू. 44पिलात काजे नोवलाय लागी कि चू ओतरू छाटू मोर गोयू; एने चू सुभेदार काजे बुलावीन पुछु, “काय इनाक मोरीन टेम होय गोयी?” 45जेतार चू सुभेदार जुव गोथू हालोत जान लेदू, ती धोळ युसूफ काजे आपाळ देदू. 46तेत्यार चू मखमोलोन एक चादरो मुले लेदू, एने धोळ उतारीन तिना चादरामा गुंडाव्यू, एने एक मोळवाट्यामा जो चाफऱ्यामा खोंदाय गोयलो होतो मेक्या, एने मोळवाट्यान झोपला पोर एक दोगळू ढोबवाव देदा. 47मरीयम मगदलीनी एने युसूफोन आया मरीया देखती होती कि चू का मेकायलू छे.

Currently Selected:

मरकुस 15: BFBNT

Highlight

Copy