योहान 13

प्रभू भोज

1वोलांडोनोन तीहीवारोन पेहेले, जेतार येसु जान लेदू कि ची टेम आव लागली छे कि जोग छुळीन बासोनचा जायीस, ती आपना माणसे जे जोगोमा होता जोसू मोंग चू कोरतू होतु आखरी तोक तोसुच मोंग कोरतू रोयू. 2जेतार भुतडू शिमोनोन पुऱ्यु यहुदा इस्कारीयोतन मोनोमा यो नाख देदलु होतु कि चू धोरावे, ती खाणो खाणेन टेमे. 3येसु, यो जानीन कि बास आखो काहीन मारा हातोमा कोर देदलु छे एने मे परमेश्वरोनचा गोथू आव रोयू एने परमेश्वरोनचा जाम, 4खाणा पोर गोथू उठीन आपना उपोरला कापळा निकाव देदू, एने फेटू लीन आपनो कोळ्यो बांध्यू.

येसुन चेलान पाय धुवनो

5तेत्यार टाहरामा पाणी भोरीन चेलान पाय धुवने एने जिने फेटे कोरीन कोळ्यो बांधलो होतो तिने फेटे कोरीन नुसने बाज गोयू. 6तेत्यार चू शिमोन पतरस तीना काजे कोयू, “हे प्रभू काहा तू मारा पाय धुवतलु?” 7येसु तीना काजे “जो मे कोरणे बाज रोयू, तू तीनाक कोबी नि सोमजे, बाकीन एरेन ओवतेन सोमजसे.” 8तेत्यार पतरस कोयू, “तू मारा पाय कोबी नि धुव सोके” यो सोमवीन येसु तीना काजे कोयू, “ओगर मे तुसेक नि धुवो, ती मारे पुठी तारू काहीन बी वाटू नि होय.” 9शिमोन पतरस तीना काजे कोयू, “हे प्रभू ती मारा पाय नि, बाकीन हात एने मुंडको बी धुव दे.” 10येसु तीना काजे कोयू, जू उंगवी लेदलु छे तीनाक पाय सिवाय ओवी काहीन धुवनेन जोरुरोत नि होय, बाकीन चू निस्तु चुखलु छे; एने तुमु चुखला छे, बाकीन आखान-आखा चुखा नि होय. 11चू ते आपना धोरावने वावा काजे जानतू होतु इनान कोरता चू कोयू, “तुमु आखान-आखा चुखा नि होय.”

पाय धुवनेन मतलब

12तेत्यार येसु तिंदरा पाय धुव देदलु होतु, एने आपना छिंदरा पेहेरीन पोछु बोस गोयू, ती चू कोयने बाज गोयू, “काय तुमु सोमज्या कि मे तुमरे साते काय कोऱ्यु?” 13तुमु मेसेक गुरु एने प्रभू कोयतेला, एने ठीक कोयतेला काहाकि मे चू छे. 14ओगर मी प्रभू होयीन तुमरा पाय धुव्यू ती तुमु बी एक दिसरान पाय धुवनो जुवे. 15काहाकि मे तुमुक नम्रता देखाळ देदलु कि जोसू मे तुमरे साते कोरलु छे, तुमु बी तोसोच कोऱ्या कोरु. 16मे तुमु काजे छाचलीन-छाचलीन कोयो कि सेवक आपना मालिक गोथू मोटू नि होय, एने मुकलायलु मुकलेनेवावा गोथू. 17तुमु जे वाते जानतेला, एने ओगर तीनु पोर चाले ती सोयावा छे.

(मत्ती 26:20-25; मरकुस 14:17-21; लुका 22:21-23)

18मे तुमुक आखान बारामा नि कोयतू; जीनुक मी नेवाळ देदलु छे, तीनुक मे उवखतलु; बाकीन चू इनान कोरता छे कि पवित्र शास्त्रान यो वचन पुरो होये; यु मारू रुटू खादला, चे मार पोर लात देखाळे. 19हिमी मे चो होयनेन पेहेलेत तुमुक जोताळो कि तेत्यार यो होय जाय ती तुमु भुरसू कोरु कि मे चू छे. 20“मे तुमु काजे छाचलीन-छाचलीन कोयो कि जू मेसेक मुकेलने वावाक काजे स्वीकार कोरसे, चू मेसेक स्वीकार कोरसे; एने जू मेसेक स्वीकार कोरतेलु, चू मेसेक मुकलने वावाक स्वीकार कोरतेलू.”

भुरसू घाती वोखे इशारू

21ये वाते कोयीन येसु आपना आत्मामा चिंताम पोड गोयू एने जी गोवायी आप्यू, “मे तुमु काजे छाचलीन-छाचलीन कोयो कि तुमरेमा गोथू एक जोणु मेसेक धोराय देसे.” 22चेला शंका कोरता जायीन कि यु कुनीन बारामा कोये बाज रोयू, एक दुसरा भूनी भावने बाज रोया. 23तेरा चेला माहीन एक जिना पोर येसु मोंग कोरतु होतु, येसुन छाती भूनी वाकू वोवीन बोस रोयू होतु. 24शिमोन पतरस तिना भूनी इशारू कोरीन तीनाक पुछु, “काय ते चू कुनीन बारामा कोय रोयू?” 25तेत्यार चू तोसुच येसुन छाती भूनी वाकू वोवीन येसु काजे पुछु, “हे प्रभू चू कून छे?” 26येसु जोवाब आप्यू, “जीनाक मी यु रुटान भुकरू डूबाळीन आपीस चू छे” एने चू भूकरु डूबाळीन शिमोन इस्कारीयोतन पुऱ्यु यहुदा काजे आप्यू. 27भूकरु लेतेच भुतडू तीनामा भोराय गोयू तेत्यार येसु तीना काजे कोयू, “जो तू कोयने बाज रोयू, मामार कोर.” 28बाकीन बोसने वावा मायला कुदु नी सोमज्या कि चू जी वात तीना काजे कालगान कोरता कोयू. 29यहुदा जुव थोयली रोयती होती, इनान कोरता काहना-काहना सोमज्या कि येसु तीनाक कोय रोयू कि जो काहीन आमुक तीहीवारोन कोरता जुवे चो मुले लेणे, नि ती यो कि गोरीबो काजे काहीन आपे. 30आखरी चू भूकरू लीन मामार बारथे जात रोयू; एने जो रातीन टेम होती.

नवली आग्या

(मत्ती 26:31-35; मरकुस 14:27-31; लुका 22:31-34)

31तेत्यार चू बारथे जात रोयू ती येसु कोयू, “हिमी माणसोन पुऱ्यान महिमा होय गोयली छे, एने परमेश्वरोन महिमा तीनामा होयली छे” 32ओगर तीनामा परमेश्वरोन महिमा होयली छे ती परमेश्वर आपनेमा महिमा कोरसे एने मामार कोरसे. 33“हे पुऱ्या, मी एने थुलिक वार तुमरे साते छे ओवते तुमु मेसेक हेरसू, एने जोसू मे यहुदिन काजे कोयलु, जा मे जाणे बाज रोयू चा तुमु नि आव सोकतला, तोसुच मे हिमी तुमु काजे कोयो.” 34मे तुमु काजे एक नोवली आग्या आपो कि एक दिसरा पोर मोंग कोरु; जोसू मे तुमरे पोर कोरतेलू, तोसोच तुमु बी एक दिसरा पोर मोंग कोरु. 35ओगर आपोसमा मोंग कोरसू, ती इनासी आखा सोमजी जासू कि तुमु मारा चेला छे.

पतरसोन येसुक मना करनेन भविष्यवाणी

36शिमोन पतरस तीना काजे कोयू, “हे प्रभू, तू कां जाणे बाज रोयू?” येसु जोवाब आप्यू, “जा मे जाणे बाज रोयू चा तुमु बी मारे पोछोव आव नि सोकतला; बाकीन इनान ओवतेन मार पोछोव आवसे.” 37पतरस तीना काजे कोयू, “हे प्रभू, मे हिमी तारे पोछोव कानली आव सोकतेलु? मे ते तारेन कोरता आपनु जीव बी आपदिस.” 38येसु जोवाब आप्यू, काय तू मारेन कोरता तारू जीव आपीस? मे तुसेक छाचलीन छाचलीन कोयो कि कुकळू वासे नि तेतार तोक तू तीन कावार मारु इनकार कोर दिस.

Currently Selected:

योहान 13: BFBNT

Highlight

Copy