योहान 12

बेथनीमा येसुन आदर

(मत्ती 26:6-13; मरकुस 14:3-9)

1येसु वोलांडोनोन तीहीवार गोथा छोव दाहळान पेहले बैतनिय्याह गावमा आव्यु जा लाजर होतु, जीनाक येसु मोरलामा गोथू जीवाळलु होतु. 2चा चे तेरेन कोरता खाणो तीयार कोऱ्या; एने मार्था सेवा कोरती होती, एने लाजर तीना मायलु एक होतु जू तेर पुठी खाणो खाणेन कोरता बोसलु होतु. 3जेतार मरीयमन जटामासीन आदु शेर मोहोंगलो इत्तर लीन येसुन पायो पोर लागाळी, एने तेरे झोटे कोरीन तेरा पाय नुसी; एने इत्तरोन गोंधसी घोर सुगंधीत होय गोयो. 4बाकीन तेरा चेला मायलु यहुदा इस्कारीयोत नावोन एक चेलु जू तीनाक धोरणे वावू होतु, कोयने बाज गोयू, 5“यो इत्तर तीन सौ दिनारोमा वेचीन गोरीब काजे काहा नि आप्या?” 6चू यो वात इनान कोरता नी कोयू कि तीनाक गोरीबोन चिंता होती, बाकीन इनान कोरता कि चू चुटू होतु, तिंदरेजू चुरी कोरणेन थोयली रोयती होती एने तीनिमा जो काहना नाखायतो होतो चो चू निकाव लेतलु होतु. 7येसु कोयू, “तिनीक रोयने देवू. तिनीक यो मारा गाळाय जाणेन दाहळान कोरता मेकने देवू. 8काहाकि गोरीब ते तुमरे पुठी हमेशा रोयतलु, बाकीन मी तुमरे पुठी हमेशा नि रोयो.”

लाजर काजे मारनेन फेसलु

9जेतार यहुदिन मोटी भिळ जान गोया कि चू वा छे, ती चे नि बाकीन येसुन वोजेसी आव्या बाकीन इनान कोरता बी कि लाजर काजे देखणे जीनाक चू मोरलामा गोथू जीवतलु कोरलु होतु. 10तेत्यार प्रधान पुजारू लाजर काजे मारनेन डाव धोऱ्या. 11काहाकि तेरो वोजेसी लेकेत यहुदि जात रोया एने येसु पोर भुरसू कोऱ्या दिसरे दाहळे लोकेत माणसे जे तीहीवारोमा आवला होता यो सोमवीन कि येसु यरुशलेममा आवने बाज रोयू.

यरुशलेममा जाणो

(मत्ती 21:1-11; मरकुस 11:1-11; लुका 19:28-40)

12दिसरे दाहळे घोणा सोवटा माणसे जे वोलांडोनोन तीहीवारमा आवला होता यो सोमवीन कि येसु यरुशलेममा आवने बाज रोयू. 13इनान कोरता खोजुरोन डाव्या लीन एने तीनाक भेटनेन कोरीन निकव्या, एने आयळने बाज गोया होसान्ना, सोयावा इस्राईलोन राजा, जू प्रभून नावोसी आवलु, 14जेतार येसु काजे गोदळीन एक पिलो जोळ्यो; ती चू तीना पोर बोस गोयू, जोसो लिखलो छे,

15“हे सियोनोन बेटीस

मा बिहे

देख, तारू राजा गोदळीन पिलापोर

चोळीन आवसे.”

16तेरा चेला ये वाते पेहेले नी सोमज्या, बाकीन जेतार येसुन महिमा देखायी ती तीनुक फोम आवी कि जे वाते तेरा बारामा लिखायली होती एने माणसे तेरे पोर इना रितीसी वेहवहार कोरला होता. 17तेत्यार भीळमा चे माणसे गोवायी आप्या जे तिने टेमे तेरे पुठी होता जेतार चू लाजर काजे मोळवाट्यामा गोथू बुलावीन मोरलामा गोथू जीवतलु कोरलु होतु. 18इनान वोजेसी माणसे तीनाक भेटने कोरता आवला होता काहाकि चे सोमवला होता कि यो निशाणी देखाळतलु. 19तेत्यार फरुशी आपसमा कोया, “विचार कोरु ते खोरा कि तुमरे माहीन कुदान नि चालतलो देखू जोग तेरे पोछोव जाणे बाज रोया.”

येसु एने युनानी

20जे माणसे तीहीवारोमा आराधना कोरणे आवला होता तिंदरे मायला काहनास युनानी होतु. 21चे गलीलोन बेथसदामा रोयने वावान फिलीपोनचा आवीन तीनाक विनता कोऱ्या, कि “माहाराज आमु येसु काजे भेटने छे.” 22फिलीप आवीन अन्द्रियास काजे कोयू, तेतार अन्द्रियास एने फिलीप जायीन येसु काजे कोया. 23इनापोरसी येसु तीनु काजे कोयू, ची टेम आव लागली छे कि माणसोन पुऱ्यान महिमा होये. 24मी तुमु काजे छाचलीन-छाचलीन कोयो, कि जेतार तोक गोहून दाना धोरतीमा पोळीन मोरे नि, चू एखलु रोयतलु; बाकीन जेतार मोर जातलू ती लोके फोव लावतलू. 25यु आपना जीवो पोर मोंग कोरे, चू तीनाक खुवतेलु; एने जू इना जोगोमा आपना जीवो पोर मोंग नि कोरतेलू चू ओमोर जीवनोन कोरता तीनाक सोमावतलु. 26ओगर कुदु मारी सेवा कोरसे ती, मारे पोछोव चालू; एने चा मे छे, चा वारू सेवक बी रोयसे ओगर कुदु मारी सेवा बी कोरसे ती, बास तेरु मान कोरसे.

येसुन मोरनेन भविष्यवाणी

27“हिमी मारू जीव कासावीस होय रोयू इनान कोरता मी काय होयो? ‘हे बासो, मेसेक इनी टेमे सी वाचाड?’ ती, काहाकि इनान वोजेसी इनी टेमे पुग गोयलु छे.” 28हे बासो तार नावोन महिमा कोर तेत्यार जो सोरग वाणी होई, “मे तारी महिमा कोरलु छे, एने ओवी बी कोरिस.” 29तेत्यार जे माणसे उभरोहीण सोमवता होता चे कोया वादवो गाजे, दिसरा कोया, “कुदू एक सोरग दूत येसु पुठी बुल्यू.”

30इनापोरसी येसु कोयू, “यु आवाज मारेन कोरता नि होय, बाकीन तुमरे कोरता आवलु छे. 31हिमी इना जोगोन नियाव होयसे, हिमी इना जोगोन सरदार; निकवाय जासे. 32एने मी ओगर धोरती पोर गोथू उचला पोर चोळाय जाश ती, आखा काजे आपने जुव हापकीस.” 33ओसो कोयीन चू देखाळ देदू कि कोसा मोत सी मोरसे. 34इनापोरसी माणसे तीनाक कोया, “आमु नियम शास्त्रान जी वात सोमवला चे कि मसिह हमेशा रोयसे, ती तू काहा कोयतलु कि माणसोन पुऱ्यु काजे उचला पोर चोळनो जोरुरी छे? यु माणसोन पुऱ्यु कून छे?” 35येसु तीनु काजे कोयू, “विजावो हिमी थुलिक वार तोक तुमरेमा छे जेतार तोक विजावो तुमरे पुठी छे तेत्यार तोक चालता रोयू, ओसो नि होये कि आंदारो तुमुक आवीन घेर लेये; यु आंदाराम चालतलु चू नि जानतलु कि कांखुर जाणे बाज रोयू. 36जेतार तोक विजावो तुमरे पुठी छे, विजावा पोर भुरसू कोरु काहाकि तुमु विजावान पुऱ्या बोने” जे वाते कोयीन येसु जात रोयू एने तिंदरेनचा गोथू डूकाय रोयू.

भविष्यवाणी पुरो होयनो

37चू तिंदरे सामने चमत्कार देखाळ्यू, ते बी चे तिना पोर भुरसू नि कोऱ्या;. 38काहाकि यशयाह भविष्य कोरतान वचन पुरो होय गोयो जे चे कोयला

“हे प्रभू, आमरा वारली खोबर पोर कून भुरसू कोरलु छे?

एने प्रभून भूज बल कुनीपोर एखलु छे?” 39इनान वोजेसी चे भुरसू नि कोर सोक्या, काहाकि यशयाह जोबी कोयलु छे;

40“चू तिंदरा डूवा आंदवा

एने तिंदरा मोने काठला कोर देदलु छे;

कोबी ओसो नि होये कि डूवे कोरीन देखसे,

एने मोनोसी समजे,

एने फिरे एने मे तीनुक वारु कोरिस.” 41यशयाह ये वाते इनान कोरता कोयलु कि चू तेरी महिमा देखलू, एने चू तेरा बारामा वाते कोऱ्यु. 42ते बी अधिकारी मायला लोके तेरे पोर भुरसू कोऱ्या, बाकीन फरुशी वोजेसी देखाळता नि होता, कोबी ओसो नि होये कि चे प्रार्थना घोरोमा गोथा निकावाय जाय. 43काहाकि माणसो भूनी गोथी गोवायी तीनु काजे परमेश्वर भूनी गोथी बोढाईन आस जादा मोंगावी लागती होती.

विजावामा चालनो

44येसु आयळीन कोयू, जू मारे पोर भुरसू कोरतेलू, चू मार पोर नि बाकीन मेसेक मुकलने वावा पोर भुरसू कोरतेलु, 45एने जो मेसेक देखतला चे मेसेक मुकलने वावाक देखतलु. 46मी जोगोमा विजावो बोनीन आव रोयू, काहाकि जू कुदु मार पोर भुरसू कोरे चू आंदारामा नि रोये. 47ओगर कुदु मारी वात सोमवीन नि माने, ती मे तीनाक गुणावू नि ठेरावतू; काहाकि मे जोगो काजे गुणावा ठेरावने नि, बाकीन जोगोन छुटकारू कोरनेन कोरता आव रोयू. 48जू मेसेक वीटवलु माणसे एने मारा वातोन भुरसू नि कोरतेलू तीनाक गुणावू ठेरावने वावू ते एक छे मतलब जो वचन मे कोयलु छे, चोत ओगला दाहळामा तीनाक गुणावू ठेरावसे. 49काहाकि मे मारेनचा गोथू वाते नि कोऱ्यु; बाकीन बास जू मेसेक मुकेललु छे चू मेसेक आग्या आपलु छे कि काय-काय कोयो एने काय-काय बुलो? 50एने मेसेक मालूम छे कि तेरी आग्या ओमोर जीवन छे इनान कोरता मे जो काहीन बुलतलु, चो जोसू बास मेसेक कोयलु छे तोसोच बुलतलु.

Currently Selected:

योहान 12: BFBNT

Highlight

Copy