योहान 14

येसुन चेला काजे हिंमत आपनो

1तुमरो मोन कासावीस नि होये; परमेश्वर पोर भुरसू कोरु एने मार पोर बी भुरसू कोरु. 2मारा बासोन घोरमा घोनु सोवटू रोयनेन जागू छे, ओगर नि रोयतु ती मे तुमु काजे कोय देतु; काहाकि मे तुमरेन कोरता जागू तीयार कोरनेन कोरता जाम. 3एने ओगर मी जायीन तुमरेन कोरता जागू तीयार कोरो, ती पोछु आवीन तुमु काजे मारेंचा लीन जायीस कि जा मी रोयीस चा तुमु बी रोये.

वाट, खराई एने जीवन

4जा मे जाम चा वावी वाट तुमुक मालूम छे. 5थोमा तीना काजे कोयू, “हे प्रभू, आमुक नि मालूम कि तू का जाणे बाज रोयू; ती वाट कोसा जानजे?” 6येसु तीनु काजे कोयू, “वाट एने खोरलु एने जीवन मेत छे; बिना मारे विगुर कुदू बासोनचा नि पुग सोकतलु. 7ओगर तुमु मेसेक उवखी लेता, ती मारा बासो काजे बी उवखी लेता; एने हिमी तीनाक उवखी रोया, एने तीनाक देखला बी छे.” 8फिलीप तीना काजे कोयू, “हे प्रभू, बासो काजे आमुक देखाळ दे, योत आमरेन कोरता रेट छे.” 9येसु तिना काजे कोयू, “हे फिलीप, मे ओतरा दाहळासी तुमरे साते छे, एने काय तू मेसेक नि उवेखतू? जू मेसेक देखलू छे चू बासो काजे देखलू छे. तू काहा कोये कि बासो काजे मेसेक देखाळ? 10काय तू भुरसू नि कोरतेलु कि मी बासोमा छे एने बास मारेमा छे? जे वाते यो मे तुमु काजे कोय रोयू, मारेंनचा गोथू नि कोयतू, बाकीन बासोमा रोयीण आपनो काम कोरतेलू छे. 11मार पोर भुरसू कोरु कि मे बासोमा छे एने बास मारेमा छे; नीती कामो पोरसी मारू भुरसू कोरु.”

येसुन नावमा दुवा

12“मी तुमु काजे छाचलीन-छाचलीन कोयो कि जू मारे पोर भुरसू कोरे, जो काम मे कोरतेलू छे चू बी कोरसे, बाकीन इनू गोथा बी मोटा काम कोरसे, काहाकि मे बासोनचा जाम. 13जो काय तुमु मारे नावोसी मांगे, चोत मे कोरिस कि पुऱ्यान लारे बासोन महिमा होये. 14ओगर तुमु मारे जुवू मारा नावोसी काहीन मांगसु, ती मे तीनाक आपीस.”

चुखली आत्मान कोसोम

15ओगर तुमु मारे पोर मोंग कोरे ती, मारा आग्या काजे मानजू. 16मे बासो काजे विनता कोरीस एने चू तुमुक एक ओवी मदतगार आपसे कि चू कायम तुमरे साते रोये. 17बाकीन खोरलु आत्मा, जिना काजे संसार स्वीकार नि कोर सकतला काहाकि चे तीनाक नि जानतेला; तुमु तीनाक जानतला, काहाकि तुमरे साते रोयलू, एने चू तुमरेमा रोयसे. 18“मे तुमुक विखावावा कोबी नि छुळो; मे तुमरेनचा आवो.” 19एने थुलिक टेम रोय गोयली छे कि ओवी संसार मेसेक नि देखे, बाकीन तुमु मेसेक देखसु, इनान कोरता कि मे जीवतलु छे, तुमु बी जीवतला रोयसू. 20तिने दाहळे तुमु सोमजी जासू कि मी मारा बासोमा छे, एने तुमु मारेमा, एने मे तुमरेमा. 21जेरे जुव मारी आग्या छे एने चू तीनुक मानतलु छे, चू मारे पोर मोंग कोरतेलु छे; एने जू मारे पोर मोंग कोरतेलू छे तीनाक मारू बास मोंग कोरसे, एने मे तिना पोर मोंग कोरिस एने मे आपना खुदो काजे तेरे सामने लाविस. 22चू यहुदा जू इस्कारीयोतन नि होतु, तीना काजे कोयू, “हे प्रभू, काय होयो कि तू आपना खुदो काजे आमरेपोर प्रगट कोरणे कोय रोयू एने जोगो पोर नि?” 23येसु तीनाक जोवाब आप्यू, “ओगर कुदु मार पोर मोंग कोरसे ती चू मारा वचन काजे माणसे, एने मारू बास तीना पोर मोंग कोरसे, एने आमु तेरेनचा रोयसू.” 24जू मार पोर मोंग नि कोरे, चू मारो वचन नि मानतलु; एने जो वचन तुमु सोमोवतला चो मारो नि होय बाकीन बासोन छे, जू मेसेक मूकल्यु. 25“जे वाते मे तुमरे साते रोयनेन टेमे गोथू कोयलु छे. 26बाकीन मदतगार मतलब पवित्र आत्मा जीनाक बास मारे नावसी मुकलसे, चू तुमु काजे आखा वाते सिकाळसे, एने जो काहीन मी तुमु काजे कोयलु छे, चो आखो तुमु काजे फोम देवाळसे.”

येसुन शांतीन भेट

27मे तुमुक शांती आप दोम, मारी शांती तुमुक आप दोम; जोसो जोग आपतला छे, तोसो मे तुमुक नि आपो, तुमरो मोन कासावीस नि होये एने मा बिहू. 28तुमु सोमव्या कि मे तुमु काजे कोयू, “मे जाम, एने तुमरेनचा पोछु आवीस” ओगर तुमु मार पोर मोंग कोरता, ती इना वातोसी खुश होयता कि मे बासोनचा जाम, काहाकि बास मार गोथू मोटू छे. 29एने मे यो कोयनेन पेहेले तुमु काजे कोय देदलु छे, कि जेतार चो होय जाय, ती तुमु भुरसू कोरु. 30मे हिमी तुमरे साते ओवी वाते नि कोरो, काहाकि इना जोगोन सरदार आव रोयू मारे पोर तेरु काय होक नी होय;. 31बाकीन यो इनान कोरता होय रोयो कि जोग जाणे कि मे बासोपोर मोंग कोरतेलू छे, एने जोसो बास मेसेक आग्या आपलु मे तोसोच कोरतेलू छे. उठू, न्या गोथा जाता.

Currently Selected:

योहान 14: BFBNT

Highlight

Copy